Efesios 3 - Nuevo Testamento Uwotjüja

Pauru, judío pokotürü ji'äwinü̧

¹ Ja̧'wa̧nü̧ jo̧mȩttü̧, Ttü Pauru-mä̧ Jesucrito kärenä̧ ütinä̧ku̧sä̧, ukutu judío pokotürü rekuä rü̧ji̧yä̧ku̧.

² Täkü wo̧juä̧tü̧jä̧ 'kua̧ra̧'a̧, Dio ukuturu rettü chaditiyarü pä'ü ttürü we'ü u̧ju̧ni̧nü̧mä̧.

³ Ttürümä̧ chu̧wo̧jui̧pü̧nä̧ i̧jȩkuä̧chi̧nä̧ku̧sä̧ yä̧wä̧i̧nä̧ jäwämä̧, jua̧u̧ tü'kümä̧ a̧'u̧ku̧nä̧ wȩyu̧tu̧ we'äjisä.

⁴ Jua̧u̧ chi̧wȩyu̧tä̧ji̧ kukuokuätukuttümä̧, ku̧wo̧jui̧päkuo̧tü̧jä̧, Crito jäwä yä̧wä̧i̧nä̧ jäwä chu̧wo̧jua̧'a̧mä̧,

⁵ jua̧u̧mä̧ tü̧tä̧mü̧ mi̧nä̧ ttü̧ja̧kui̧nü̧mä̧ ttu̧wo̧jui̧pa̧ pä'ümä̧ iyäwi'okü ji̧nü̧; ja̧'wa̧nü̧ ji̧na̧'a̧nä̧ jitämä̧, Epíritu-nä̧ apótore-rü'i̧nä̧, profeta-rü'i̧nä̧ Dio-mä̧ i̧jȩpi̧nü̧.

⁶ Jua̧u̧mä̧, pi̧yȩ ja̧'a̧: judío pokotü'i̧nä̧, irae ttü̧ja̧ku̧ yo̧mȩtȩnä̧ Dio jäwä ttȩmä̧kuo̧tü̧, ji̧nä̧ ya̧tȩnä̧tä̧ ji̧nä̧ yotüte ttäkuotü, Crito-nä̧ iya päinü̧mä̧ ttȩmä̧kuo̧tü̧, jareü wȩnȩnä̧.

⁷ Jua̧u̧ jäwättütä chadita pä'ü iyäwi'inä̧ku̧sä̧, Dio rettü mipponä̧ iya'attü, chutä ujurunä̧tä̧.

⁸ Ttümä̧ o'katoi'ünä̧ Dio pojopü weinä̧u̧ttü̧'i̧nä̧ tti̧dȩ'a̧nä̧ cha'anä̧, pi̧yȩ mippoünä̧ iyinä̧ku̧sä̧, judío pokotürü Crito ukuo jäwä jidäwiyarü pä'ü.

⁹ Ja̧'wa̧ta̧nü̧ weinä̧ku̧sä̧ o'katoi'ünä̧ ttu̧wo̧juä̧chi̧'ü̧nä̧ jidäwa pä'ü, Dio amükuädü u̧ju̧ni̧nü̧, mo̧ täbokütä päi'ünä̧ yä̧wä̧i̧nä̧ chunä̧tä̧ kka̧kui̧nü̧, pi̧jä̧ ruwäkuiyä adikuä i̧sa̧nä̧.

¹⁰ Jua'amä̧ jȩpi̧nü̧ Dio rü̧ȩnä̧ u̧wo̧juö̧ iäre igresia-nä̧tä̧ i̧jȩkuä̧cha̧ pä'ü, tturuwo kku̧nä̧rä̧tü̧rü̧'i̧nä̧, mo̧ro̧jä̧nä̧ tturuwo kku̧nä̧rä̧tü̧rü̧'i̧nä̧, jü̧nä̧.

¹¹ Pi̧yȩtä̧ ja̧'a̧, ä̧kuo̧mȩnä̧ttü̧tä̧ päi'ünä̧ Dio amükuädü u̧ju̧ni̧nü̧mä̧, ja̧'wa̧ta̧nü̧ jua̧u̧mä̧ Tu̧ru̧wa̧ Jesucrito-nä̧tä̧ iso juo'epinü̧.

¹² Ja̧'wa̧ta̧nü̧ jua̧u̧nä̧tä̧ ta̧'kua̧ wȩnä̧rü̧ Dio-rümä̧ wäjuönä̧ dodetünä̧ ja̧'a̧.

¹³ Ja̧'wa̧nü̧ ja̧'a̧ttü̧, ukutu jäwänä̧ usurä chȩmä̧wa̧'a̧mä̧ kua̧'kua̧ tta̧kuȩkuä̧tu̧kuä̧, pärokua'aku jua̧u̧mä̧ kuesewätukua pä'ütä ja̧'a̧.

Dio-rü ukuoku esewinü̧ wȩnȩ

¹⁴ Pa̧'a̧nü̧ jo̧mȩttü̧ chiwe'kiyunä̧ pä̧mä̧dü̧ Chä'o Dio-rü ukuokusä,

¹⁵ jua̧u̧ttü̧tä̧ ȩmä̧tü̧ tti̧mi̧pi̧yä̧mä̧, mo̧ro̧jä̧nä̧ kka̧kuä̧tü̧'i̧nä̧, pi̧jä̧nä̧ kka̧kuä̧tü̧'i̧nä̧ o'katoi'ünä̧.

¹⁶ Epíritu jäwänä̧, chutä uruwo kka̧'a̧ku̧, kujurutuku iyätukuaku pä'ü ukuokusä, kua̧'kua̧rü̧ jakuänä̧.

¹⁷ Kua̧'kua̧ ku̧wȩnä̧rä̧tu̧ku̧nä̧ ji̧yȩnä̧tä̧ Crito-rü kua̧mi̧ iso'kitukunä̧ ü̧ja̧ pä'üsä, kuesewätukumä̧ kkada'ka jü̧nä̧tä̧ 'chu̧ä̧rü̧nä̧.

¹⁸ Kkorotü Dio-rü esetätuku, Crito rȩrü̧jü̧ toinü̧, ü̧rü̧ä̧'i̧nä̧, üoto'i̧nä̧, ütäku'i̧nä̧, ükäwe'i̧nä̧ ku̧wo̧jui̧pä̧tu̧kuä̧kua̧'a̧nü̧;

¹⁹ Ja̧'wa̧ta̧nü̧ Crito rȩrü̧jü̧ toinü̧ ku̧wo̧juä̧tu̧kuä̧kua̧'a̧nü̧, wo̧juä̧wä̧ u̧wä̧mȩnä̧ ja̧'a̧, Dio ukuturu iya päinü̧mä̧ o'kajuiyü jo̧mȩnü̧tä̧ kuȩmä̧tu̧kua̧ pä'ü.

²⁰ Dio-mä̧ ujuru rü̧ȩnä̧ kku̧nä̧rü̧ jätepomȩttü̧'i̧nä̧ abonä̧nü̧ iya pä'ü, ¡tamükuädüttü'i̧nä̧ u̧wä̧mȩnä̧ wa̧, chutä üjü'komȩnä̧ adita'attü ujutunä̧!

²¹ Jua̧u̧ru̧tä̧ teseäkuäwätukua igresia-ttümä̧, Crito Jesú-nä̧tä̧ pi̧jä̧ ttü̧ja̧mä̧ o'katoi'ünä̧, mo̧ro̧ kki̧ä̧mü̧nä̧. Amȩ́.