Efesios 2 - Nuevo Testamento Uwotjüja

Dio-mä̧ tta̧'kua̧rü̧ iyü

¹ Ä'kojimä̧, ukutumä̧ wa'ü ikuinä̧tü̧tä̧ winä̧tü̧jä̧, surojü jȩpü̧ ku̧ja̧kuä̧tu̧kuo̧mȩnä̧;

² Mo̧ täbokümä̧ jua̧u̧nä̧tä̧ kue'ächinä̧tü̧jä̧, pi̧jä̧nä̧ isoppanä̧ we'ü wea'akutä. Epíritu jü̧nä̧ uwäpokü jua̧u̧mä̧ jitä'i̧nä̧ ukuotokotürü we'ü.

³ Ujutu'i̧nä̧ juätü jü̧ta̧'a̧nü̧ o'katoi'ünä̧ jua̧u̧ tidepä kkü'kekunä̧tä̧, tidepä wea'akutä, ujututä tamükuädünä̧ jȩpü̧ kka̧kui̧nä̧tü̧jä̧ ji̧yȩnü̧ mo̧ro̧mä̧. Kkada'kattü päi'ünä̧ pä̧i̧ i̧tti̧mü̧ winä̧tü̧jä̧ kkorotü jü̧ta̧'a̧nü̧.

⁴ Ja̧'wa̧nü̧ ja̧'a̧nä̧, Dio-mä̧ rȩrü̧jü̧ toäkuäwä i̧sa̧ ja̧'a̧ttü̧, ujuturu rü̧ȩnä̧ repeomȩttü̧,

⁵ surojünä̧ kkä̧nü̧ wa'ü ikuinä̧tü̧ ta'anä̧, Crito-ku yo̧mȩtȩnä̧ ta̧'kua̧rü̧ iyinä̧u̧jä̧ (mikuä juiyünä̧ surojüttümä̧ kka̧kui̧pi̧nä̧tü̧jä̧),

⁶ ja̧'wa̧ta̧nü̧ Crito-ku ttotächünä̧ jȩpü̧, Jua̧u̧tä̧ku̧tä̧ mo̧ro̧jä̧nä̧ tü̧'ä̧mä̧dü̧nä̧ jȩi̧nä̧u̧jä̧.

⁷ Pi̧yȩmä̧ jȩpi̧nü̧, Jesucrito-nä̧ rü̧ȩnä̧ rȩrü̧jü̧ toü yodoji mo̧ro̧ ujuturu i̧jȩpa̧ pä'ü.

⁸ Isopäi'ünä̧ mikuä juiyünä̧tä̧ surojüttümä̧ kka̧kui̧pi̧nä̧tü̧jä̧, kua̧'kua̧ ku̧wȩnä̧rä̧tu̧kuo̧mȩttü̧, jua'a'i̧nä̧ ukutu jäwä jo̧ka̧'a̧tä̧, Dio rettü ppädina̧'a̧tä̧.

⁹ Surojüttü kki̧'ä̧kuä̧wä̧mä̧ adiwä juei jȩ'kuä̧tu̧kua̧'a̧'i̧nä̧ po̧kui̧kuo̧kü̧, jua'amä̧ ya̧tȩ'i̧nä̧ a̧mü̧nä̧ pa̧ja̧tü̧ eseäkuäu juiya pä'ü;

¹⁰ Ja̧'wa̧nü̧ ja̧'a̧ttü̧ Dio-tä aditinä̧u̧jä̧: Crito-nä̧tä̧ aditinä̧u̧jä̧ adiwä juei jȩpü̧ tü̧ja̧kua̧ pä'ü, ä'kojitä päi'ünä̧ amükuädü kku̧ni̧nü̧ jua̧u̧ jȩpü̧ tü̧ja̧kuä̧kuȩmä̧.

Crito-mä̧ o'katoi'ünä̧rü̧ ji̧nä̧ yotüte päti'ünä̧ jȩpi̧nü̧

¹¹ Ja̧'wa̧nü̧ ja̧'a̧ttü̧, amükuädätukui ji̧yȩnü̧ mo̧ro̧ ukutu judío pokotürümä̧, judío-mä̧ circuncisión pättü jȩpä̧kuä̧wo̧ko̧tü̧ pättinä̧u̧jä̧, ja̧'wa̧nü̧ miku ttu̧mü̧nä̧, ttidepänä̧ jȩpä̧kuä̧wä̧tü̧ tta'attü̧.

¹² Amükuädätukui ji̧yȩnü̧ mo̧ro̧mä̧ Crito-ttümä̧ otó winä̧tü̧jä̧, Irae ttü̧ja̧ttü̧'i̧nä̧ ikuikuotü winä̧tü̧jä̧. Ja̧'wa̧ta̧nü̧ Dio iya pä'ü esekuinü̧ttü̧'i̧nä̧ otó winä̧tü̧jä̧, tta̧'ä̧rü̧ kuamükuä̧rä̧tu̧ku̧'i̧nä̧ jui'inä̧tü̧jä̧, Dio-rü'i̧nä̧ pi̧jä̧ttü̧mä̧ to'inä̧tü̧jä̧.

¹³ Ja̧'wa̧nü̧ Dio-ttümä̧ otó kuinä̧tu̧kua̧'a̧nä̧, jitämä̧ tü'kü juo'ächinä̧tü̧jä̧ Crito Jesú ukuojanä̧tä̧.

¹⁴ Isopäi'ünä̧ Jua̧u̧ Crito-tä ja̧'a̧ wȩnȩ juiyünä̧ kkä̧kuä̧wä̧ i̧sa̧mä̧: Tosare isotü winä̧tü̧ttü̧ (judío'i̧nä̧, judío pokotürü'i̧nä̧) ji̧nä̧ yotüte ttü̧ja̧ päti'ünä̧ jȩpi̧nü̧, tabo iyotü jü̧nä̧ tü̧ja̧kui̧nü̧mä̧.

¹⁵ Weäwä wȩnȩ ji̧nü̧mä̧ si'epü ikuinü̧, Chutä weü wȩnȩ jȩpü̧ kku̧nu̧. Pi̧yȩmä̧ jȩpi̧nü̧ Chutä a̧mü̧nä̧ pa̧ja̧tü̧, tosare isotü winä̧tü̧ttü̧mä̧ ji̧nä̧ ya̧tȩ ttü̧ja̧sa̧ ja̧rȩpa̧rü̧ uwäbe'ü kku̧nu̧, chunä̧tä̧, wȩnȩ juiyü jäwä uwäbe'ü kku̧ni̧nü̧.

¹⁶ Ja̧'wa̧nü̧ jȩpü̧ tosare isotürümä̧, idepänä̧ ü̧jo̧kä̧nü̧ to'e'ü Dio-rü eseku iyinü, ja̧'wa̧nü̧ ja̧'a̧ttü̧ ttürowäwä'ijümä̧ wa'ü ikunä̧ jȩpi̧nü̧.

¹⁷ Ja̧'wa̧nü̧ jȩpü̧, wȩnȩ juiyünä̧ kkä̧kuä̧wä̧ ukuturu i'kächü iyinü̧, Churutä otó kka̧kuä̧'i̧jä̧tü̧rü̧'i̧nä̧, chutäku tü'kü kka̧kuä̧'i̧jä̧tü̧rü̧'i̧nä̧, jü̧nä̧.

¹⁸ Ja̧'wa̧nü̧ ji̧na̧'a̧ttü̧, Jua̧u̧nä̧tä̧ yotukunä̧ Jä'o ü̧ja̧'a̧mä̧ dodepätüjä̧, Epíritumä̧ ji̧nä̧ ya̧tȩnä̧tä̧.

¹⁹ Ja̧'wa̧nü̧ ji̧no̧mȩttü̧, Dio ä'kattümä̧, kko̧ro̧jä̧ ttü̧ja̧mä̧kü̧jä̧. Jitämä̧, pärokua'akutä Dio umüwäyotü surojü jui'ätü jü̧nä̧, i̧tti̧mü̧ jü̧nä̧ wotüjä̧.

²⁰ Ukutumä̧, apótore winä̧tü̧'i̧nä̧, profetas pinä̧tü̧'i̧nä̧ isode rü̧o̧de, kkada'kiyu ttäräbe'a'a jä̧'i̧nü̧'a̧nü̧ ttaditinü̧nä̧ wotüjä̧, ji̧nä̧so yo'kitä jueü ino'kimä̧ Crito-tä jü̧nä̧.

²¹ Jua̧u̧nä̧tä̧, juode isode jättäjode 'kiyü 'chu̧ä̧rü̧nä̧ ttäräbe'omȩnä̧, Dio-rü ukuokuäkuäwode, surojü juiyode adikui'a'a Tu̧ru̧wa̧ ü̧jo̧de.

²² Jua̧u̧nä̧tä̧, ji̧nä̧ yo̧mȩtȩnä̧ aditäu̧jä̧, Epíritu Sa̧tu̧nä̧ Dio-mä̧ ü̧jä̧tu̧kua̧ku̧ pä'ü.