Efesios 1 - Nuevo Testamento Uwotjüja

Teäwinü̧ wȩnȩ

¹ Ttü Pauru, Dio üjü'komȩnä̧, Jesucrito-mä̧ apóto jü̧nä̧ weinä̧ku̧ cha'attü, Éfeso ütawiyä ttü̧ja̧rü̧ te'äusä, Jesucrito-rü esetätü, surojü jui'ätürü.

² Tä'o Dio'i̧nä̧, Tu̧ru̧wa̧ Jesucrito'i̧nä̧, eseu kkä̧kuä̧wä̧ iyätukuaku pä'üsä.

Pauru, Dio-rü esewinü̧ wȩnȩ

³ Tu̧ru̧wa̧ Jesucrito, Jä'o Dio-rü tesewätukua, Jua̧u̧ Crito-nä̧mä̧ epíritu jäwä mo̧ro̧jä̧ra̧'a̧ttü̧ i'chächü iyinä̧u̧ ta'attü̧.

⁴ Dio-mä̧ pi̧jä̧ uwäbe'äkua'a ä'kanä̧, Crito-nä̧mä̧ pojopü ȩmi̧nä̧u̧jä̧, chutä ä'ka jo̧mȩ surojü juiyünä̧, chutä üjü'komȩnä̧ tü̧ja̧kui̧ya̧rü̧ pä'ü. Rȩrü̧jü̧ toa'attü̧,

⁵ Rü̧ȩnä̧ repea'attü̧, ä̧kuo̧mȩnä̧tä̧ päi'ünä̧ pojopü u̧ju̧ni̧nä̧u̧jä̧, I̧tti̧ Jesucrito-nä̧ i̧tti̧mü̧ päi'ünä̧ ȩma̧tü̧ pä'ümä̧, churutä pä̧wä̧rü̧jo̧mȩnä̧.

⁶ Pa̧'a̧nü̧tä̧ jȩpi̧nü̧ Dio-mä̧ rü̧ȩnä̧ rȩrü̧jü̧ toü tesewarü pä'ümä̧, ja̧'wa̧nü̧ ja̧'a̧ttü̧ chutä I̧tti̧ repeäkunä̧ surojüttü kki̧'i̧kuä̧ iyinä̧u̧jä̧.

⁷ Jua̧u̧ ukuojänä̧tä̧ i̧mi̧tä̧wi̧nä̧u̧jä̧, suronä̧ jȩtä̧'i̧ja̧'a̧mä̧, rȩrü̧jü̧ toäkuäwä u̧ju̧nä̧ra̧'a̧ttü̧,

⁸ Dio-tä rü̧ȩnä̧ iyinä̧u̧jä̧ wo̧juȩku̧nä̧ o'kajuiyünä̧ u̧wo̧jua̧'a̧ttü̧.

⁹ Dio yä̧wä̧i̧nä̧ ä'kojitä päi'ünä̧ amükuädinü̧mä̧, Crito-nä̧tä̧ tu̧wo̧jui̧pü̧nä̧ jȩi̧näu̧jä Churutä pä̧wä̧rü̧jo̧mȩnä̧.

¹⁰ Mo̧ro̧ jo̧mȩnü̧ päi'omȩnä̧, Dio-mä̧ Jua̧u̧nä̧tä̧ o'kajuiyünä̧ ka̧ka̧tü̧ u̧ju̧nä̧kua̧. O'kajuiyünä̧ mo̧ro̧jä̧nä̧ kka̧ku̧'i̧nä̧, pi̧jä̧nä̧ kka̧ku̧'i̧nä̧, Crito-mä̧ u̧ru̧wa̧tä̧ päi'ünä̧.

¹¹ Ja̧'wa̧ta̧nü̧ Crito-nä̧mä̧, Chutä iäre tȩma̧ pä'ü ä'kojitä päi'ünä̧ ü'ojo'inä̧u̧jä̧, Chutä o'kajuiyünä̧ jȩpü̧ ja̧'a̧ttü̧, churutä pä̧wä̧rü̧jo̧mȩnä̧tä̧.

¹² Dio-mä̧ pä̧wä̧rü̧ji̧nä̧ku̧, ä̧kuo̧mȩnä̧mä̧ ujutu judío, Crito-rü ta̧'kua̧ tu̧wȩnä̧ri̧ya̧rü̧ pä'ü, chutä ujuru u̧ju̧nä̧ra̧'a̧ttü̧ tesewiyarü pä'ü.

¹³ Ja̧'wa̧ta̧nü̧ Jua̧u̧nä̧tä̧ ukutumä̧ jueü wȩnȩ'i̧nä̧, surojüttü kki̧'ä̧kuä̧wä̧'i̧nä̧, kuä̧ju̧kui̧nä̧tu̧kua̧'a̧ttü̧ ja̧'wa̧ta̧nü̧ jua̧u̧ru̧tä̧ kuesetinä̧tu̧kua̧'a̧ttü̧, Epíritu Sa̧tu̧nä̧ sello-nä̧ i̧nȩpü̧ ttüta'a jä̧'i̧nü̧'a̧nü̧ jȩi̧nä̧u̧jä̧, päinü̧'a̧kuä̧.

¹⁴ Ujuturu Dio iya päinü̧mä̧ Jua̧u̧ Epíritu-nä̧ todepätüjä̧, o'katoi'ünä̧ ukutu u̧mü̧wä̧yotürü rä'epü ikuomȩbü päi'ünä̧. Ja̧'wa̧nü̧ jo̧mȩttü̧ Dio ü̧rü̧ä̧ esewätüjä̧.

Jesucrito-rü esetätürü Dio-rü ukuokuinü̧

¹⁵ Ja̧'wa̧nü̧ jo̧mȩttü̧, ttümä̧, Tu̧ru̧wa̧ Jesú-ru kua̧'kua̧ ku̧wȩnä̧rä̧tu̧kua̧'a̧'i̧nä̧, ja̧'wa̧ta̧nü̧ Dio u̧mü̧wä̧yotürü eseu repe'ü jȩ'kuä̧tu̧kua̧'a̧'i̧nä̧ ä̧ju̧kui̧nü̧'ka̧,

¹⁶ kädädi'oka'a, Dio-rütä eseusä ukuturu amükuädü, Dio-rü chokuokuomȩnä̧mä̧.

¹⁷ Tu̧ru̧wa̧ Jesucrito jä'o Dio-rü, ja̧'wa̧ta̧nü̧ ukuou'i̧nä̧ jä'orü jä'epüsä, wo̧juä̧wä̧ iyü kkä̧nü̧ ja̧'wa̧ta̧nü̧ churutä ku̧wo̧juä̧chä̧tu̧ku̧nä̧ jiäwätukuaku pä'ü.

¹⁸ Ja̧'wa̧ta̧nü̧ jädepomȩnä̧mä̧, kua̧mi̧so'kituku'i̧nä̧ bawekuächünä̧ i̧tȩya̧u̧ kkä̧dȩpa̧ pä'ü jä'epüsä, tta̧tä̧rä̧'i̧jü̧mä̧ ji̧yȩja̧ ja̧'a̧ tä̧jí̧ pä'ü kkä̧nü̧ churutä esetätürü iäre i̧yä̧kuȩ ukuou'i̧nä̧ ku̧wo̧juä̧tu̧kua̧ pä'ü.

¹⁹ Ja̧'wa̧ta̧nü̧ uruwo, churutä esetätürü i̧yä̧kuȩmä̧ ya̧'a̧nü̧ rü̧a̧'a̧ tä̧jí̧ pä'ü ku̧wo̧juä̧tu̧kua̧ pä'ü. Jua'amä̧ chutä Dio ujuru adita'aku.

²⁰ Jua̧u̧ ujurutä ji̧na̧'a̧ Crito-rü wa'arettü tto'ädü kku̧nu̧, u̧wo̧jua̧'a̧ku̧nä̧ mo̧ro̧jä̧ra̧'a̧ttü̧ rütinümä̧;

²¹ O'katoi'ünä̧tä̧ ruwotürü'i̧nä̧, tturuwo kku̧nä̧rä̧tü̧rü̧'i̧nä̧, ttujuru kku̧nä̧rä̧tü̧rü̧'i̧nä̧, we'ü 'chu̧'ä̧rä̧tü̧rü̧'i̧nä̧, kkorotürü'i̧nä̧ tti̧mi̧nä̧ jä̧ttȩpä̧'i̧jä̧u̧ru̧mä̧ ttu̧wä̧mȩnä̧ jü̧nä̧ ütinä̧ku̧, suro jitä ttü̧ja̧ku̧ pä̧nä̧tä̧mä̧kü̧, ja̧'wa̧ta̧nü̧ yodoji ttü̧jä̧kuȩ pä̧nä̧'i̧nä̧.

²² Dio-mä̧, o'kajuiyünä̧tä̧ Crito weü jü̧nä̧tä̧ kku̧ni̧nü̧ ja̧'wa̧ta̧nü̧ igresia-rümä̧ kkorojuei o'kajuiyünä̧ u jü̧nä̧ kku̧ni̧nü̧.

²³ Ja̧'wa̧ta̧nü̧ igresia-mä̧ Crito jä̧ttä̧pä̧ya̧ jü̧nä̧ ja̧'a̧, jua̧u̧mä̧ jo̧mȩnü̧tä̧ wa̧ o'kajuiyünä̧tä̧.