Colosenses 4 - Nuevo Testamento Uwotjüja

¹ Ukutu, tturuwotümä̧, adiwomȩnä̧ amükuädü jȩpü̧ kka̧kuä̧tu̧kui̧. Ukutu'i̧nä̧ amükuädätukui, mo̧ro̧jä̧ra̧'a̧ kku̧nä̧rä̧tü̧jä̧, ya̧tȩ ku̧ru̧wa̧tu̧ku̧ru̧mä̧.

Jȩtta̧ pä'ü weäwi'inü̧

² Käkuädi'ätukuoka'a, yabonü̧ Dio-rü ukuokuätukui. 'Kuäopünä̧ tta̧'a̧rä̧kuä̧u̧ Dio-rü esewätukui.

³ Ja̧'wa̧nü̧ kukuokuätukuomȩnä̧mä̧ ujuturu'i̧nä̧ Dio-rü ukuokuätukui, Tu̧ru̧wa̧ bawepätü, Crito amükuädinü̧ ttieruwuö wȩnȩ jitäwa, ttü'i̧nä̧ jua̧u̧ jäwänä̧tä̧ kärenä̧ pü̧sä̧.

⁴ Dio-rümä̧ jä'epätukui chutä i̧wȩnȩ adiu ttu̧wo̧jui̧pü̧nä̧ jidäwäkua'anü̧.

⁵ Wo̧juȩku̧nä̧ ttu̧'ȩpä̧rü̧nü̧ kka̧kuä̧tu̧kui̧ kkorotü Dio-rü esetokotuku. Ja̧'wa̧nü̧ jȩ'kuä̧tu̧ku̧ jü̧'a̧nü̧ jo̧mȩnä̧mä̧, adiu jȩpä̧tu̧kui̧.

⁶ Juätuku kukuokuätukuomȩnä̧mä̧, tteseunä̧ jo̧mȩnä̧ ukuokuätukui. Ja̧'wa̧nü̧ ja̧'a̧ttü̧, kuädätätukua pä'ümä̧, adiu amükuädünü̧tä̧ adätätukui.

⁷ O'kajuiyütä ttü chütü'kü ukuturu ji̧ä̧wä̧kua̧mä̧, ta̧wa̧ru̧wa̧ ti̧jä̧wa̧ Tíquico ujuturu ppä'ädä̧rä̧'i̧jü̧, ji̧nä̧ ji̧yȩtȩnä̧ Tu̧ru̧wa̧ weäwänä̧ aditä'ijütä jä̧kua̧'a̧.

⁸ Ja̧'wa̧nü̧ ji̧yä̧ku̧ jua̧u̧ru̧ wȩdä̧u̧jä̧, ujutu tü̧ja̧ku̧ tü'kü'i̧nä̧ ji'äu kkä̧nü̧, kua̧'kua̧ tta̧kuȩkuä̧tu̧ku̧ juiyünä̧ jiäwätukuaku pä'ü.

⁹ Jua̧u̧ku̧mä̧ i̧chä̧kua̧ ta̧wa̧ru̧wa̧ ti̧jä̧wa̧ ujututäku aditä'ijü, kui̧rȩjä̧tu̧ku̧ i̧sa̧ Onésimo'i̧nä̧. Juätütä jä̧kua̧'a̧ o'kajuiyünä̧ pa̧nä̧ttü̧ 'kuätopü ukuturu jittäwäkuotümä̧.

¹⁰ Ttütäku kärenä̧ pü̧ Aritarco'i̧nä̧ teäwä̧u̧jä̧. Ja̧'wa̧ta̧nü̧ Bernawé, a̧wa̧ru̧wa̧ Maruku'i̧nä̧ teäwä̧u̧jä̧. Jua̧u̧ ütü'kümä̧ wedinä̧u̧jä̧, do'ächü ichüttümä̧ adiutä ppä'ädätukuirü.

¹¹ Ja̧'wa̧ta̧nü̧ Jesú, surojü jui̧'a̧ pättä'ijäku'i̧nä̧ teäwä̧u̧jä̧. Judío wotüttü, Dio i̧wȩnȩnä̧ chaditomȩnä̧ chesewuönä̧ ppä̧'ä̧dä̧rü̧ aditä'ijätümä̧ juätütä ja̧'a̧.

¹² Kui̧rȩjä̧tu̧ku̧ i̧sa̧, Crito-rü esetü, yaboku Dio-rü pä̧wä̧rü̧jo̧mȩnä̧ kui̧'chä̧tu̧kua̧ pä'ü Dio-rü ukuokuä'ijü, Epafra'i̧nä̧ ukuturu te'äu.

¹³ Ttümä̧ wo̧jua̧sä̧ jua̧u̧ ukuturu a̧'kua̧ roekua'amä̧, Laodicea-nä̧ kka̧kuä̧tü̧rü̧'i̧nä̧, ja̧'wa̧ta̧nü̧ Hierápori-nä kka̧kuä̧tü̧rü̧'i̧nä̧, jü̧nä̧.

¹⁴ Ja̧'wa̧ta̧nü̧ repetä'ijäku, jawapü adikuä i̧sa̧ Ruka'i̧nä̧, Dema'i̧nä̧ ukuturu te'äwätü.

¹⁵ Laodicea-nä̧ kka̧kuä̧tü̧ tawaruwä tü̧jä̧wa̧tü̧rü̧ te'äwätukui. Ja̧'wa̧ta̧nü̧ Ninfa-rü̧'i̧nä̧ te'äu kkä̧nü̧, kkojusodenä̧ Dio esetü ka̧ka̧kuä̧rä̧tü̧rü̧'i̧nä̧ te'äwätukui.

¹⁶ Pi̧yȩ ttü chi̧wȩyu̧tä̧ji̧ ukutu ukuokui'ü'kotümä̧, Laodicea igresia wotürü'i̧nä̧ ttukuokunä̧ we'ätukui; pärokua'aku Laodicea ttü̧ja̧'i̧nä̧ ukuturu ttukuokunä̧ jȩpä̧tu̧kui̧.

¹⁷ Arquipo-rü'i̧nä̧ ji'äwätukui: Tu̧ru̧wa̧ weinü̧ aditäwä adiwomȩnä̧ aditäkua'anü̧.

¹⁸ Ttütä, Pauru, chu̧mü̧nä̧ wȩyu̧tu̧ te'äusä: kärenä̧ chü̧'a̧'a̧ amükuädätukui. Cha̧mi̧ iso'ki o'kajuiyünä̧ pä̧wä̧rü̧jä̧ku̧sä̧, Dio repeü jo̧mȩnü̧ ku̧ju̧nä̧rä̧tu̧kua̧ pä'ü.