Colosenses 3 - Nuevo Testamento Uwotjüja

¹ Isopäi'ünä̧ Crito-ku ttokuächinä̧tu̧ku̧ttü̧mä̧, mo̧ro̧jä̧ jäwätä usätukui, Crito jä'o Dio u̧wo̧jua̧'a̧ku̧nä̧ ü̧'a̧'a̧ jäwätä.

² Mo̧ro̧jä̧ jäwätä amükuädätukui, pi̧jä̧ jäwämä̧ kuamükuädätukuä.

³ Isopäi'ünä̧ ukutumä̧ 'korujuo'ächinä̧tü̧jä̧ ja̧'wa̧nü̧ ja̧'a̧nä̧ Crito-nä̧ dajäwinä̧tü̧jä̧ Dio jäwättümä̧.

⁴ Kua̧'kua̧rä̧tu̧kuä̧ku̧, Crito ichomȩnä̧mä̧. Jua̧u̧tä̧ku̧ ukutu'i̧nä̧ kui̧jȩkuä̧chä̧kuo̧tü̧jä̧, uruwo jäwänä̧.

Crito-ku jareünä̧ kkä̧kuä̧wä̧ wȩnȩ

⁵ Ja̧'wa̧nü̧ ja̧'a̧ttü̧, pi̧jä̧ jäwä surojü ukutunä̧ kka̧ku̧mä̧ o'kajuiyünä̧ wa'ü ikunä̧ jȩpä̧tu̧kui̧: irekua wokojuku jȩä̧'chä̧kuä̧wä̧'i̧nä̧, surojütä jȩä̧'chä̧kuä̧wä̧'i̧nä̧, kuidepä kkü'keku kkä̧kuä̧wä̧'i̧nä̧, surojütä kkü'käwä'i̧nä̧, o'kajuiyünä̧ obonä̧nü̧ ttu̧ju̧nä̧ra̧ pä'ü tta̧'kua̧ roekuäkuä'i̧nä̧ juiyünä̧ (ttü̧ä̧nä̧wa̧rü̧ ttukuota'a 'kua̧rü̧nä̧mä̧) jȩ'kuä̧.

⁶ Pi̧yȩmä̧ o'kajuiyütä Dio üjü'kokü jäwä ja̧'a̧, ukuotokotü jȩttü̧ ja̧'a̧ttü̧;

⁷ ukutu'i̧nä̧ ji̧yȩnü̧ mo̧ro̧mä̧ jua̧u̧ jäwänä̧ kka̧kui̧nä̧tü̧jä̧, jua̧u̧nä̧ ku̧jä̧tu̧kuä̧i̧mä̧.

⁸ Ja̧'wa̧nü̧ ja̧'a̧nä̧, jitämä̧ jua̧u̧mä̧ o'kajuiyünä̧tä̧ kä'ädäkuäwätukui: pä̧i̧'i̧nä̧, kkorotürü ra̧wä̧rä̧kuä̧wä̧'i̧nä̧, suronä̧ jȩä̧'chä̧kuä̧wä̧'i̧nä̧, suronä̧ pä'chäkuäwä'i̧nä̧, ja̧'wa̧ta̧nü̧ kuätukunä̧mä̧ surojümä̧ kukuokuätukuä.

⁹ Kkorotünü̧mä̧ yapareumä̧ kukuokuätukuä, täkü ä'koji surojü jȩ'kuinä̧tu̧ku̧mä̧ kä'ädäkuäwinä̧tü̧jä̧,

¹⁰ täkü pärokuä 'ka̧tä̧wä̧tu̧kui̧. Isopäi'ünä̧ pi̧yȩmä̧, Dio ukuturu uwäbe'inü̧ a̧'kua̧juä̧, yabonü̧ rü̧ä̧chä̧kua̧'a̧nü̧, Churutä jo̧mȩnü̧ ku̧wo̧juä̧chä̧tu̧ku̧nä̧.

¹¹ Ja̧'wa̧nü̧ ja̧'a̧ttü̧, judío i̧sa̧ ja̧ pä'ü'i̧nä̧, Grecia i̧sa̧ ja̧ pä'ü'i̧nä̧, circuncisión jȩpä̧kuä̧wa̧ ja̧ pä'ü'i̧nä̧, circuncisión jȩpä̧kuä̧wo̧kü̧ ja̧ pä'ü'i̧nä̧, esclavo pättäku ja̧ pä'ü'i̧nä̧, esclavo pättäku wokü ja̧ pä'ü'i̧nä̧ Crito-nä̧mä̧ o'kajuiyünä̧ jo̧mȩnü̧ wotüjä̧, o'kajuiyünä̧tä̧ ü̧ja̧'a̧ttü̧.

¹² Dio-mä̧ ukuturu repe'ü, ȩmi̧nä̧u̧jä̧ i̧tti̧mü̧ kuätukua pä'ü. Ja̧'wa̧nü̧ ja̧'a̧ttü̧ kkorotürü esewätukui, adiunä̧tä̧, ukuo tekuäwätukuoka'a, kua̧'kua̧pü̧nü̧ kkä̧nü̧ ja̧'wa̧ta̧nü̧ kua̧mi̧ 'ki'ächi'ü kka̧kuä̧tu̧kui̧.

¹³ Kkorotü jäwä surojü kua̧mi̧ 'ki'ächi'ätukui, suronä̧ jȩttü̧mä̧ mikuämä̧ kuamükuädä juätürümä̧.

¹⁴ Kkorottü'i̧nä̧ abonä̧nü̧ eseäkuäwätä kku̧nä̧rä̧tu̧kui̧, isopäi'ünä̧ jua̧u̧ eseäkuäwätä ja̧'a̧ jo̧mȩnü̧ 'chu̧ä̧rü̧mä̧.

¹⁵ Ja̧'wa̧ta̧nü̧ Crito jäwä wȩnȩ juiyünä̧ kua̧mi̧ iso'kitukunä̧ wea'anä̧ kka̧kuä̧tu̧kui̧. Isopäi'ünä̧ Dio-mä̧ ji̧nä̧ yotüte jü̧nä̧ tü̧ja̧kua̧ pä'ü woinä̧u̧jä̧. Ja̧'wa̧nü̧ Churutä eseutä.

¹⁶ Adiwäjuei Crito u̧wo̧juȩti̧nü̧mä̧ ku̧ni̧chi'ätukuä. Yotukunä̧ wo̧juȩtü̧'i̧nä̧, ro̧'ȩku̧'i̧nä̧ jȩ'kuä̧tu̧kuo̧mȩnä̧mä̧, wo̧juȩku̧nä̧ jȩpä̧tu̧kui̧. Dio-rü eseu ra̧'ä̧tu̧kui̧ kua̧mi̧'iso'kitukunä̧, salmos'i̧nä̧, ra̧wä̧wä̧ otoü'i̧nä̧, epíritu-nä̧ ra̧wä̧wä̧'i̧nä̧, jü̧nä̧.

¹⁷ Ja̧'wa̧ta̧nü̧ o'kajuiyünä̧ jȩ'kuä̧tu̧ku̧'i̧nä̧, kukuokuätuku'i̧nä̧ Tu̧ru̧wa̧ Jesú i̧mi̧nä̧ jȩpä̧tu̧kui̧, Crito jȩi̧nü̧ esewätukui jä'o Dio-rümä̧.

Crito-rü esetätü jȩttü̧ wȩnȩ

¹⁸ Tti̧rȩkua̧mü̧mä̧ kuirekuotukurumä̧ ukuotätukui, isopäi'ünä̧ pi̧yȩ ja̧'a̧, ukutu Tu̧ru̧wa̧rü̧ esetinä̧tü̧rü̧ weäwi'inü̧mä̧.

¹⁹ Ja̧'wa̧ta̧nü̧ ukutu u̧mä̧tü̧'i̧nä̧, kuirekuatukurumä̧ eseu repe'ätukui, juätürümä̧ pä̧i̧ku̧nä̧mä̧ wekuätukuä.

²⁰ Ukutu tti̧tti̧mü̧'i̧nä̧, kuä̧'o̧tü̧rü̧mä̧ ukuotätukui o'kajuiyünä̧, ja̧'wa̧nü̧ jȩ'kuä̧tu̧kuo̧mȩnä̧ Tu̧ru̧wa̧mä̧ eseu.

²¹ Ja̧'wa̧ta̧nü̧ ukutu ttä̧'o̧tü̧mä̧, kui̧tti̧mü̧tu̧ku̧ru̧mä̧ ku̧'ä̧i̧tä̧tu̧kuä̧. Jua'amä̧ ttijuiyuwächi'ü juiyäkua'anü̧.

²² Ukutu, ttu̧wo̧juȩtä̧u̧'i̧nä̧, pi̧jä̧nä̧ttü̧ kuruwotürümä̧ o'kajuiyünä̧tä̧ ukuotätukui, to̧ttä̧ro̧ka̧'a̧nä̧'i̧nä̧, pi̧jä̧ ttü̧ja̧rü̧ totta pä'ü 'kua̧rü̧nä̧mä̧ jȩ'kuä̧tu̧kuä̧, pärokua'aku kua̧mi̧ iso'kittü eseu Dio-rü ye'ekunü̧ jȩpä̧tu̧kui̧.

²³ Ja̧'wa̧ta̧nü̧ o'kajuiyünä̧ jȩ'kuä̧tu̧ku̧mä̧, eseunu̧ jȩpä̧tu̧kui̧. Crito weü ukuotü jȩtta̧'a̧ 'kua̧rü̧nä̧, pi̧jä̧ ttü̧ja̧rü̧ ukuotü jȩtta̧'a̧ 'kua̧rü̧nä̧mä̧ jȩ'kuä̧tu̧kuä̧.

²⁴ Ukutumä̧ wo̧juä̧tü̧jä̧ Tu̧ru̧wa̧ mikuä i̧yä̧kuȩmä̧, i̧tti̧mü̧rü̧ iya päinü̧mä̧. Jua'amä̧ Crito-rü, Tu̧ru̧wa̧rü̧ ukuotü jȩta̧'a̧ttü̧.

²⁵ Ja̧'wa̧nü̧ ja̧'a̧nä̧, surojü jȩpü̧rü̧mä̧ ro̧ȩkuä̧kua̧'a̧, jȩi̧nü̧'a̧kuä̧, isopäi'ünä̧ Dio-mä̧ yoräteunä̧tä̧ jȩa̧'a̧ttü̧.