Colosenses 2 - Nuevo Testamento Uwotjüja

¹ Ja̧'wa̧ta̧nü̧ ku̧wo̧juä̧tu̧kua̧ pä'üsä, ukutu jäwänä̧ usurä chȩmä̧u̧'i̧nä̧, ja̧'wa̧ta̧nü̧ Laodicea-nä̧ kka̧kuä̧tü̧rü̧ usurä chȩmä̧u̧'i̧nä̧, ja̧'wa̧ta̧nü̧ kkorotü ttürü jerupätürü'i̧nä̧ o'katoi'ünä̧rü̧.

² Kua̧mi̧so'kitukunä̧ esewächi'ü, ji̧nä̧ yo̧mȩtȩnä̧ repe'äkuäu, jo̧mȩnü̧ 'kukuächi'ünä̧ ku̧wo̧juä̧chä̧tu̧kua̧ pä'üsä. Ja̧'wa̧nü̧ jo̧mȩnä̧ Dio yä̧wȩi̧nä̧ u̧ju̧nä̧ri̧nü̧ ku̧wo̧jui̧päkuo̧tü̧jä̧. Jua̧u̧mä̧ Crito ja̧'a̧.

³ O'kajuiyünä̧ jua̧u̧nä̧tä̧ kka̧'a̧ wo̧juä̧wä̧ wȩnȩ'i̧nä̧ ja̧'wa̧ta̧nü̧ ttu̧ȩpä̧rä̧kuä̧wä̧ wȩnȩ'i̧nä̧ jü̧nä̧.

⁴ Pi̧yȩmä̧ ukuturu pä'üsä, kuju'kächi'ätukunä̧ adiu ji'äu ottipächätukuäku pä'ü.

⁵ Isopäi'ünä̧ ukututäku wäjuönä̧mä̧ chü̧jo̧ka̧'a̧nä̧, cha̧'kua̧rü̧ i̧sa̧nä̧tä̧ kkü̧sä̧ ukutukumä̧, ja̧'wa̧nü̧ ja̧'a̧ttü̧ eseusä adiu kuaditätukua'a'i̧nä̧ ja̧'wa̧ta̧nü̧ Crito-rü yaboku kua̧'kua̧ ku̧wȩnä̧rä̧tu̧kua̧'a̧'i̧nä̧ topü.

⁶ Ja̧'wa̧nü̧ ja̧'a̧ttü̧, Jesucrito-rü ku̧ru̧wa̧tu̧ku̧ jü̧nä̧ kuesetinä̧tu̧kua̧'a̧mä̧, churutä pä̧wä̧rü̧jo̧mȩnä̧ kka̧kuä̧tu̧kui̧.

⁷ Chuttutä kkada'ka jü̧nä̧ 'chu̧ä̧rü̧nä̧ kka̧kuä̧tu̧kui̧. Yabonü̧ kua̧'kua̧ wȩnä̧rä̧tu̧kui̧rü̧ ku̧wo̧jui̧'i̧nä̧tu̧ku̧'a̧kuä̧, 'kuäopünä̧ Dio-rü eseu.

⁸ Ttu̧'ȩpä̧rü̧nü̧ to̧pä̧rä̧kuä̧wä̧tu̧kui̧ yapare wȩnȩ ttü̧ja̧ tamükuädünä̧ kuesetätuku juiyäkua'anü̧. Juätü ttü̧ja̧mä̧ Crito-rü ttukuota jueimä̧, pi̧jä̧nä̧ttü̧ we'ätü ttujuru kku̧nä̧rä̧tü̧rü̧tä̧ ukuotätü.

⁹ Ja̧'wa̧ta̧nü̧ o'kajuiyünä̧ Dio jäwämä̧ Crito-nä̧ kka̧kua̧'a̧ topätüjä̧,

¹⁰ Ja̧u̧nä̧tä̧ ujurumä̧ o'kajuiyünä̧ kka̧kuä̧mü̧ topü Dio-mä̧, ja̧'wa̧ta̧nü̧ Crito-tä ja̧'a̧, o'katoi'ünä̧ epíritu-tu̧ juruwätü'i̧nä̧, pi̧jä̧nä̧ttü̧ ruwo we'ätü'i̧nä̧ ttu̧wä̧mȩnä̧ wa̧mä̧.

¹¹ Circuncisió̧-mä̧ jua̧u̧tä̧ jäwänä̧ jȩpä̧kuä̧wo̧tü̧jä̧, jua̧u̧mä̧ ttü̧ja̧ jäwänä̧mä̧ jȩtto̧ko̧u̧ pinä̧tü̧jä̧, ja̧u̧ ja̧jü̧ jueimä̧ Dio-tä circuncisió̧-mä̧ jȩi̧nä̧u̧jä̧ Crito-ku ppäkuächi'ätukunä̧mä̧ ja̧'wa̧ta̧nü̧ yaboku kuidepätuku kkü'keku jȩ'kuä̧tu̧ku̧mä̧ 'kȩ'ȩpü̧ ikuinä̧u̧jä̧.

¹² Bautizo jȩ'kuä̧kuä̧wä̧tu̧kuo̧mȩnä̧, ukutumä̧ Crito-ku 'korujuo'ächinä̧tü̧jä̧, ja̧'wa̧ta̧nü̧ wa'arettü'i̧nä̧ jua̧u̧tä̧ku̧ tto'ächinä̧tü̧jä̧, isopäi'ünä̧ Dio ujuru kku̧nä̧rü̧rü̧ wa'arettü'i̧nä̧ tto'ächinü̧rü̧ kuesetinä̧tu̧kua̧'a̧ttü̧.

¹³ Ukutumä̧, kko̧ro̧nü̧ pä̧nä̧mä̧, surojü jȩ'kuä̧tu̧ku̧ jäwänä̧ 'korujuo'ächinä̧tü̧ pinä̧tü̧jä̧ jua'amä̧ suronä̧ jȩ'kuä̧tu̧ku̧ 'kȩkui̧pä̧chä̧tu̧kuo̧ko̧mȩnä̧; ja̧'wa̧nü̧ ji̧na̧'a̧nä̧ Dio jitämä̧ Crito-ku ji̧nä̧ yo̧mȩtȩnä̧ kua̧'kua̧ru̧tu̧ku̧ iyinä̧u̧jä̧, jua̧u̧tä̧ ji̧na̧'a̧ o'kajuiyünä̧ suronä̧ jȩtü̧ jȩpo̧ko̧tü̧rü̧ 'kua̧rü̧nä̧ esekuinü̧mä̧.

¹⁴ Dio-mä̧ ti̧mi̧ppotü timita pä'ü pätetü jȩpü̧ kku̧nä̧wä̧'i̧nä̧ mi̧ppotokotü jü̧nä̧tä̧ jȩpü̧ ikuinü̧; Crito-rü ü̧jo̧kä̧nü̧ jäinä̧ pȩ'o̧pü̧ ttu̧ju̧no̧mȩnä̧ mitäu ikuinü̧.

¹⁵ Dio-mä̧ ttujuru jȩpü̧ ikuinü̧ isotü uwäpokotü ttukuo kku̧nä̧rä̧tü̧rü̧mä̧, ja̧'wa̧ta̧nü̧ Jesucrito-nä̧tä̧ o'katoi'ünä̧ ttä'ka jo̧mȩttü̧ i̧jȩpü̧ ikuinü̧, ü̧jo̧kä̧nü̧ jäinä̧ 'korujuoächomȩnä̧ juätüttü'i̧nä̧ ttu̧wä̧mȩnä̧ pä'i'inü̧.

¹⁶ Ya̧tȩ'i̧nä̧ kkü'küjui'ü pä'cha'anä̧mä̧ kuiyäwätukuä, ku̧kuȩtu̧ku̧nä̧'i̧nä̧, kua̧wä̧tu̧ku̧nä̧'i̧nä̧. Isopäi'ünä̧ pä'käri jü̧ mo̧ro̧ kuesewätukuokümä̧ ja̧'wa̧nü̧ kkä̧wa̧ jareünä̧ räopomȩnä̧ kukuotätukumä̧.

¹⁷ Pi̧yȩmä̧ o'kajuiyünä̧tä̧ i̧chä̧kuȩ a̧'kua̧juä̧tä̧ ji̧na̧'a̧. Ja̧'wa̧nü̧ ja̧'a̧nä̧ isopäi'ünä̧ ji̧yȩtä̧ jueü wȩnȩmä̧ Crito-tä jä̧kua̧'a̧ttü̧ ji̧na̧'a̧.

¹⁸ Ja̧'wa̧nü̧ ja̧'a̧ttü̧ adiwä juei kuȩmä̧tu̧kuä̧kuȩ, kuȩmä̧tu̧ku̧ juiyünä̧ jȩtta̧'a̧nä̧ ja̧'a̧tä̧ to'kuätukuä, juätü á̧gȩrȩ-tü̧rü̧ esetü, adiu esetätü 'kua̧rü̧nä̧ jȩpä̧tü̧rü̧mä̧. Visión pättü topätüjä̧ pä'ü ukuo te'äutä suronä̧ jȩpä̧tü̧rü̧mä̧.

¹⁹ Juätümä̧ Crito-rü, igresia u päi'ünä̧ wa̧rü̧mä̧ todepokotü. Jua̧u̧nä̧ 'chu̧ä̧rü̧nä̧, todeunä̧ kkä̧nü̧ ttü̧jo̧mȩnä̧tä̧, Dio-rü pä̧wä̧rü̧jo̧mȩnä̧mä̧ büó juoäwa'a.

Crito-ku ji̧yȩtȩnä̧ kkä̧kuä̧wä̧ wȩnȩ

²⁰ Täkü Crito-ku, ü̧jo̧kä̧nü̧ jäinä̧ ji̧nä̧ ji̧yȩtȩnä̧ 'korujuo'ächinä̧tü̧jä̧ pi̧jä̧ jäwättümä̧. Ja̧'wa̧nü̧ ja̧'a̧nä̧, ¿tta̧'a̧nü̧ pä'ü, pi̧jä̧ jäwänä̧ kkä̧nü̧ jä̧'i̧nü̧'a̧nü̧ kka̧kuä̧tü̧jä̧ttü̧? Pa̧'a̧nü̧

²¹ pä'ä'chümä̧: Jua̧u̧mä̧ 'chukuädätukuä, mȩkuä̧tu̧kuä̧, jua̧u̧mä̧ kukuätukuä, jü̧nä̧.

²² Ja̧'wa̧nü̧ jȩtta̧ pä'ü weäwämä̧ o'kajuiyünä̧ pi̧jä̧ ttü̧ja̧ jäwätä ja̧'a̧. Jua̧u̧mä̧ yoyoja̧'a̧ beipächü jäwä ja̧'a̧.

²³ Isopäi'ünä̧ jua̧u̧mä̧ wo̧juä̧wä̧ ppädü 'kua̧rü̧ jä'i̧nü̧'a̧nü̧ ja̧'a̧, Dio-rü ukuoku'i̧nä̧, adiu ukuotü 'kua̧rü̧nä̧'i̧nä̧, ttidepä usurä ȩmä̧u̧nä̧ jȩtta̧'a̧ttü̧. Ja̧'wa̧nü̧ ja̧'a̧nä̧ ppädokü ja̧'a̧ ttidepä jäepümä̧.