Colosenses 1 - Nuevo Testamento Uwotjüja

Teäwinü̧ wȩnȩ

¹ Ttü Pauru, Dio-rü pä̧wä̧rü̧jo̧mȩnä̧, Jesucrito-mä̧ apóto päi'ünä̧ woinä̧ku̧ cha'attü, cha̧wa̧ru̧wa̧ chi̧jä̧wa̧ Timoteo-ku,

² Crito-nä̧ te'äusä surojü jui'ätü, Colosa ütawiyättü esetätürü: tä'o Dio'i̧nä̧, tu̧ru̧wa̧ Jesucrito'i̧nä̧ umüwäyotü kuätukua'attü wȩnȩ juiyünä̧, eseäkuäwä kkü̧nä̧ ku̧jä̧tu̧kua̧ pä'ü.

Dio-rü esewinü̧ wȩnȩ

³ Dio-rü tukuokuomȩnä̧mä̧, ukuturu amükuädü 'kuäopünä̧tä̧ Tu̧ru̧wa̧ Jesucrito Jä'o Dio-rü esewätüjä̧.

⁴ Tu̧ru̧wa̧ Jesucrito-rü kua̧'kua̧ ku̧wȩnä̧rä̧tu̧ku̧'i̧nä̧, ja̧'wa̧ta̧nü̧ Dio i̧tti̧mü̧ wotürü repekuätukua'a'i̧nä̧ tä̧ju̧kui̧na̧'a̧ttü̧,

⁵ mo̧ro̧jä̧ra̧'a̧ttü̧ ukuturu i̧yä̧wi̧'ä̧kuȩ tta̧kuä̧rä̧tu̧kua̧'a̧ttü̧. Jua̧u̧ ta̧kuä̧rä̧tu̧ku̧mä̧ ä̧ju̧kui̧nä̧tü̧jä̧ jueünä̧ jareü wȩnȩnä̧, Evangelio pä'ü mikunä̧,

⁶ jua̧u̧mä̧ ukuturu'i̧nä̧ rȩbȩwi̧na̧'a̧. Jua̧u̧mä̧ rü̧ȩnä̧ yo'äwi'ü rü̧ä̧cha̧'a̧ pi̧jä̧ o'kajuiyünä̧. Ukuturu Dio rȩrü̧jü̧ toü kuä̧ju̧kui̧nä̧tu̧kuo̧mȩttü̧ kkä̧mä̧dü̧.

⁷ Pi̧yȩmä̧ ta̧wa̧ru̧wa̧ Epafra u̧wo̧juȩti̧nä̧u̧jä̧, ujututäku aditä'ijü, Tu̧ru̧wa̧ weinü̧ ukuotü adikuä i̧sa̧.

⁸ Jua̧u̧tä̧ ja̧'a̧ ukutu 'kuäkuopätuku, Epíritu Sa̧tu̧ juȩpä̧ra̧'a̧nä̧ kuawaruwärü repe'ü jȩ'kuä̧tu̧ku̧ ujuturu ji'äwinü̧mä̧.

⁹ Ja̧'wa̧nü̧ ja̧'a̧ttü̧ ujutumä̧, tä̧ju̧kui̧nü̧tä̧ päi'ünä̧, Dio-rü ukuokuätüjä̧ kätädi'oka'a ukuturumä̧, 'kuäopünä̧ Dio-rü jä'epätüjä̧ churutä pä̧wä̧rü̧jü̧ u̧wo̧juȩtä̧tu̧kua̧ku̧ pä'ü ja̧'wa̧ta̧nü̧ wo̧juä̧wä̧'i̧nä̧ o'kajuiyünä̧ iyätukuaku pä'ü Epíritu Sa̧tu̧ üjü'komȩnä̧.

¹⁰ Ja̧'wa̧nü̧ jo̧mȩnä̧, Tu̧ru̧wa̧rü̧ pä̧wä̧rü̧jo̧mȩnä̧ ku̧ja̧kuä̧kuo̧tü̧jä̧, adiwäjuei o'kajuiyünä̧ jȩ'kuä̧tu̧ku̧mä̧ u̧wä̧ju̧ kkü̧nä̧'i̧nä̧, Dio ütü'kü'i̧nä̧ yaboku ku̧wo̧jui̧'ä̧kuo̧tü̧jä̧.

¹¹ Ja̧'wa̧nü̧ jo̧mȩnä̧, Chutä adiwä juei ujurunä̧tä̧ kujuruwätukuäkuotüjä̧, surojü 'kuäopomȩnä̧ ma̧kuä̧chä̧tu̧ku̧ juiya pä'ümä̧.

¹² Jä'o Dio-rü kuesewäkuotüjä̧, i̧tti̧mü̧rü̧ i̧yä̧kuȩ jäwä tȩya̧u̧ ruwo ȩmü̧.

¹³ Dio-mä̧ yo̧ü̧ ujuruttü rä'epü iku I̧tti̧ ru̧wa̧ eseäkuäwänä̧ weomȩku̧ u̧ju̧ni̧nä̧u̧jä̧,

¹⁴ jua̧u̧tä̧tä̧ ji̧na̧'a̧, ujuturu ukuojanä̧ mitäu ȩmi̧nü̧mä̧ surojüttü rä'epü iku.

¹⁵ Jua̧u̧ Crito-mä̧ Dio uwäpokü a̧'kua̧juä̧ ja̧'a̧, kkoro pi̧jä̧nä̧ttü̧ aditinü̧ttü̧'i̧nä̧ ä̧kuo̧mȩnä̧ i̧sa̧ ja̧'a̧.

¹⁶ Isopäi'ünä̧ Dio-mä̧ Jua̧u̧nä̧tä̧ uwäbe'inü̧ o'kajuiyünä̧, pi̧jä̧nä̧ kka̧ku̧'i̧nä̧, mo̧ro̧jä̧nä̧ kka̧ku̧'i̧nä̧, tottünä̧ jü̧'i̧nä̧, tottü juiyünä̧ jü̧'i̧nä̧ jü̧nä̧, epíritu-tu̧ pä̧ttä̧u̧ isoppa wotü ttujuru kku̧nä̧rä̧tü̧rü̧'i̧nä̧, ruwo we'ätürü'i̧nä̧, tturuwo kku̧nä̧rä̧tü̧'i̧nä̧. O'kajuiyünä̧tä̧ Jua̧u̧nä̧tä̧ uwäbe'inü̧, Chutä üäre jü̧nä̧tä̧.

¹⁷ Ja̧'wa̧nü̧ ja̧'a̧ttü̧, Crito-mä̧ kkorojuei o'kajuiyünä̧ aditäkua'a ä'koji kki̧nü̧. Ja̧'wa̧nü̧ ja̧'a̧ttü̧ o'kajuiyünä̧ kka̧ku̧mä̧ chunä̧tä̧tä̧ 'chu̧ä̧ra̧'a̧.

¹⁸ Ja̧'wa̧ta̧nü̧ Crito-mä̧ igresia u ja̧'a̧, igresia-mä̧ jä̧ttä̧pä̧ya̧ wa̧ jü̧nä̧ ja̧'a̧. Jua̧u̧mä̧ ä̧kuo̧mȩnä̧ i̧sa̧ winü̧, wa'inä̧tü̧ttü̧'i̧nä̧ ä̧kuo̧mȩnä̧ tto'ächinü̧, o'kajuiyünä̧tä̧ u̧wä̧mȩnä̧ wa̧ ja̧ pä'ümä̧.

¹⁹ Isopäi'ünä̧ Dio-mä̧ jua̧u̧ Crito-nä̧tä̧, Chutä ujuru o'kajuiyünä̧ kka̧ pä'inü̧,

²⁰ ja̧'wa̧ta̧nü̧ Crito-nä̧tä̧, o'kajuiyünä̧ esekua pä'inü̧, pi̧jä̧nä̧ kka̧ku̧'i̧nä̧, mo̧ro̧jä̧nä̧ kka̧ku̧'i̧nä̧ jü̧nä̧, wȩnȩ juiyünä̧ eseku ikunä̧, ü̧jo̧kä̧nü̧ jäinä̧ 'korujuoächinoya ukuojanä̧.

Crito-mä̧, Dio awaruwä juoepinä̧u̧jä̧

²¹ Ja̧'wa̧ta̧nü̧, ukutu'i̧nä̧, ji̧yȩnü̧ mo̧ro̧mä̧ kko̧ro̧jä̧ ttü̧ja̧ winä̧tü̧rü̧, kuamükuädätuku'i̧nä̧ aboiyotütä winä̧tü̧rü̧, surojütä jȩpü̧ kka̧kui̧nä̧tü̧rü̧ jitämä̧ eseku ikuinä̧u̧jä̧,

²² Ja̧'wa̧nü̧ jȩpü̧, Crito-mä̧ idepänä̧, wa'ü iku, surojü jui'ätü sa̧tu̧ jü̧nä̧, idiku juiyünä̧, ro̧ȩkuä̧ jui'ätü jü̧nä̧, juoepinä̧u̧jä̧ Dio ä'kattü.

²³ Jua'a'i̧nä̧, 'kiyünä̧ 'chu̧ä̧rü̧nä̧ ma̧kuä̧chä̧tu̧kuo̧ka̧'a̧, kua̧'kua̧ ku̧wȩnä̧rä̧tu̧ku̧ttü̧tä̧ jareü wȩnȩ kuäju̧kui̧nä̧tu̧ku̧nä̧. Jua̧u̧mä̧ wȩnȩmä̧ pi̧jä̧ o'kajuiyünä̧ jiäkuäwi'a'a, ja̧'wa̧ta̧nü̧, ttü Pauru'i̧nä̧ jua̧u̧tä̧ jiäkuäwä i̧sa̧ jü̧nä̧ juo'ächinü̧sä̧.

²⁴ Jitämä̧ eseusä ukutu jäwänä̧ usurä ȩmä̧u̧, ja̧'wa̧nü̧ jo̧mȩnä̧mä̧ ttü chidepänä̧, Crito usurä ȩmä̧wi̧nü̧ yabonü̧ usurä ȩmä̧u̧sä̧, igresia wotünä̧. Jua̧u̧ igresia-mä̧ chutä jä̧ttä̧pä̧ya̧ ja̧'a̧ttü̧.

²⁵ Jua̧u̧ igresia-nä̧ adikuä i̧sa̧ u̧ju̧ni̧nä̧ku̧sä̧ Dio-mä̧. Chutä i̧wȩnȩ chaditiyarü pä'ü.

²⁶ Jua̧u̧ jitäumä̧ rekuo mo̧ro̧ jo̧mȩnä̧ wo̧jui̧'ä̧kuä̧wo̧kü̧ ji̧nü̧, Dio-mä̧ yä̧u̧nä̧ u̧ju̧nä̧ra̧'a̧ttü̧. Ja̧'wa̧nü̧ ja̧'a̧nä̧ Dio-mä̧ i̧tti̧mü̧ ȩmi̧nä̧u̧ru̧ i̧jȩpi̧nü̧.

²⁷ Dio-mä̧ pi̧yȩ bäreu eseäkuäwä jäwämä̧ pi̧jä̧ o'kajuiyünä̧ ttü̧ja̧rü̧ iyinü̧, jua̧u̧mä̧ pi̧yȩ ja̧'a̧: Dio-mä̧ Crito-rü we'inü̧ ukutu ku̧'kä̧tȩtu̧ku̧nä̧ ü̧ja̧ pä'ü. Ja̧'wa̧nü̧ kkä̧nü̧ Dio ujuru'i̧nä̧, ukuo jäwä'i̧nä̧ iya pä'ü.

²⁸ Jua̧u̧ Crito-rü ja̧'a̧ ujutu jitäumä̧ o'katoi'ünä̧rü̧ tä̧bo̧tü̧, o'kajuiyünä̧ wo̧juȩku̧nä̧, Crito jü̧ta̧'a̧nü̧ jo̧mȩnü̧ wotü juottächa pä'ü.

²⁹ Jua̧u̧ ja̧'a̧tȩ'ü̧ usurä ȩmä̧u̧sä̧, Crito ujurunä̧, chutä chujuru iya'anä̧.