Apocalipsis 9 - Nuevo Testamento Uwotjüja

Ji̧mü̧tȩ jäwä trompeta päi'ünä̧ ppü'inü̧

¹ Ji̧mü̧tȩ jäwä i̧sa̧ á̧gȩ üäre trompeta ppüomȩnä̧, mo̧ro̧jä̧ra̧'a̧ttü̧ pi̧jä̧ra̧'a̧ku̧ ma̧'ä̧ji̧ siri'korü topinü̧sä̧; jua̧u̧ru̧, dȩa̧'a̧ku̧ 'kuȩya̧ppa̧ jäjú rejú llawi iyäwi'ina̧'a̧.

² Ja̧'wa̧nü̧ ja̧'a̧ juäju 'kuȩya̧ppa̧ jäjú bawepomȩnä̧, rü̧ȩnä̧ kuoä'u iso'uttü käepä'inü̧'a̧nü̧ isoppa käepina̧'a̧; ja̧'wa̧nü̧ käepomȩnä̧ mo̧ro̧ kkä̧wa̧'i̧nä̧, juättoppa'i̧nä̧ yo̧i̧'i̧na̧'a̧.

³ Juoppa isoppattümä̧ ji̧ri̧chu̧tu̧ rä'ü pi̧jä̧ pa̧ja̧kuä̧chü̧nä̧ rü̧jä̧mi̧nä̧tü̧; ja̧'wa̧nü̧ ja̧'a̧ juätürü ttujuru iyäwi'ina̧'a̧ i̧di̧yu̧tu̧ jä̧'i̧nü̧'a̧nü̧ ttü̧ja̧rü̧ raratta pä'ü.

⁴ Juätürü weäwi'ina̧'a̧ pi̧jä̧nä̧ttü̧ isä'kua'i̧nä̧, ja̧'tu̧wü̧'i̧nä̧, dauwiyä'i̧nä̧ surojuottepü juiya pä'ü. Ja̧'wa̧nü̧ ja̧'a̧nä̧ Dio üäre sello tti'änä̧ jui'ätürü surojuottepa pä'ü weäwi̧'i̧nä̧u̧.

⁵ Ja̧'wa̧nü̧ ja̧'a̧nä̧ ttujuru iyäwi'inä̧u̧, kuä'äu ttikuoka'atä, suro usurä ttȩmä̧u̧nä̧tä̧ ji̧mü̧tȩ kkä̧wa̧ jo̧mȩnä̧ jȩtta̧tü̧ pä'ü.

⁶ Jua̧u̧ ji̧mü̧tȩ jäwä kkä̧wa̧ jo̧mȩnä̧, juätü rarattä̧jä̧u̧ ttü̧ja̧mä̧ 'korujuottächa pätta'anä̧, a̧'kua̧ri̧nä̧tü̧. Wa'aremä̧ juätüttümä̧ tüipächina̧'a̧ 'kua̧ri̧na̧'a̧.

⁷ Juätü ji̧ri̧chu̧tu̧mä̧, cabayu-tü̧rü̧ kurä ttürowäwa pä'ü jo̧mȩnü̧ jȩpü̧ kku̧nä̧wo̧tü̧ jä̧'i̧nü̧'a̧nü̧ winä̧tü̧. Ttünä̧mä̧ corona pättü ttu'uttäwä wȩnä̧ri̧nä̧tü̧, oro jäwä; tti'ämä̧ ttü̧ja̧ tti'ä, i'äwinä̧tü̧.

⁸ Ttuwo'che'i̧nä̧, isaju kkuwo'che 'kua̧rü̧nä̧ winä̧tü̧. Ja̧'wa̧ta̧nü̧ ttaku'i̧nä̧ Jojochäyu aku jä̧'i̧nü̧'a̧nü̧ winä̧tü̧.

⁹ Jättäpäyotü kuoräutä 'ka̧tä̧wi̧nä̧tü̧ ja̧'wa̧ta̧nü̧ ttujuabiyämä̧ rä̧mi̧pi̧na̧'a̧ cabayu-tü̧ kurä ttürowäwa pä'ü karukiyä joa'a jä̧'i̧nü̧'a̧nü̧.

¹⁰ Ttiwiribiyunä̧mä̧ i̧sa̧ri̧ kku̧nä̧ri̧nä̧tü̧, idiyu jä̧'i̧nü̧'a̧nü̧, ttü̧ja̧rü̧ rarapü surojuottȩpä̧kuȩmä̧ ji̧mü̧tȩ jäwä kkä̧wa̧ jo̧mȩnä̧.

¹¹ Juätü ttu̧ru̧wa̧mä̧, 'kuȩya̧ppa̧ jäjú á̧gȩ ji̧na̧'a̧, jua̧u̧ i̧mi̧ hebreo tti̧wȩnȩnä̧mä̧ «Abado̧,» mikuinü̧, ja̧'wa̧ta̧nü̧ griego tti̧wȩnȩnä̧mä̧ «Aporio̧» pä'ü mikuinü̧; Todärekue'ünä̧ ja̧'wa̧nü̧ pä'ümä̧ «Surojuo'epü iku» pä'ü, päwä ja̧'a̧.

¹² Ä̧kuo̧mȩnä̧ ¡usurä ȩmä̧kuä̧wä̧mä̧! 'kuäo'äji o'ka'a ja̧'a̧nä̧, ji̧nä̧ todäre jo̧mȩnä̧ juiya'a.

Kko̧ro̧mü̧ttü̧nü̧ ji̧yȩtȩ trompeta päi'ünä̧ ppü'inü̧

¹³ Kko̧ro̧mü̧ttü̧nü̧ i̧sa̧ á̧gȩ iäre trompeta ppüomȩnä̧. Dio ä'ka jo̧mȩ, Altar pättomȩ oro jü̧ttü̧, i̧sa̧ u o̧na̧ pa̧ja̧kuä̧nü̧ jü̧ttü̧ i̧wȩnȩ rä̧mi̧pa̧'a̧ ä̧ju̧kui̧nü̧sä̧.

¹⁴ Ja̧'wa̧nü̧ ja̧'a̧ i̧wȩnȩmä̧, kkoromü̧ttü̧nü̧ ji̧yȩtȩ trompeta kku̧nä̧rü̧rü̧ pä'inü̧: Pa̧ja̧kuä̧nü̧ wotü á̧gȩrȩ-rü, aje rü̧o̧to Éufrate jäyä ti̧'ä̧dü̧ kku̧nä̧wo̧tü̧rü̧ kko̧'ä̧dü̧ ikui.

¹⁵ Ja̧'wa̧nü̧ ja̧'a̧ttü̧, juätü pa̧ja̧kuä̧nü̧ A̧gȩrȩ-mä̧ ejädü ikuinä̧u̧, pi̧jä̧nä̧ kka̧kuä̧tü̧ ttü̧ja̧rü̧ o'katoi'ünä̧ päi'a pä'ümä̧ a̧'u̧ku̧nä̧tä̧ juiyünä̧ päi'ünä̧ kuä'äu ttikua pä'ü. Jua'amä̧, ä̧tȩkuä̧nä̧ jua̧u̧ hora päi'omȩnä̧, mo̧ro̧ päi'omȩnä̧, kkä̧wa̧ päi'omȩnä̧ ja̧'wa̧ta̧nü̧ año päi'omȩnä̧ pätetü u̧ju̧ni̧nä̧u̧ ji̧na̧'a̧.

¹⁶ Ja̧'wa̧ta̧nü̧ ä̧ju̧kui̧nü̧sä̧, cabayu-tü̧nä̧ wä̧nü̧ kurä rowäwätümä̧ dosciento millones jo̧mȩnä̧ ji̧na̧'a̧ su̧ro̧do̧u̧mä̧.

¹⁷ Ja̧'wa̧ta̧nü̧ topinü̧sä̧, cabayu-tü̧nä̧ wȩjä̧tü̧ tta̧mü̧kanä̧mä̧ kuoräu tuwuö rü̧nä̧ri̧nä̧tü̧ okurä 'kua̧rü̧nä̧, zafiro pättü jä̧'i̧nü̧'a̧nü̧ ja̧'tu̧wi̧na̧'a̧ ja̧'wa̧ta̧nü̧ amarillo-nü̧ ji̧na̧'a̧ azufre jä̧'i̧nü̧'a̧nü̧. Cabayu̧-tü̧ ttumä̧ jojochäyu u jä̧'i̧nü̧'a̧nü̧ winä̧tü̧ ja̧'wa̧ta̧nü̧ ttättümä̧ räopina̧'a̧ okurä'i̧nä̧, okurä isoppa'i̧nä̧, azufre pättü'i̧nä̧, jü̧nä̧.

¹⁸ Pi̧jä̧ ttü̧ja̧mä̧, o'katoi'ünä̧ päi'a pä'ümä̧ a̧'u̧ku̧nä̧tä̧ toünä̧ jo̧mȩnä̧ to'e'inä̧tü̧ jua̧u̧ okurättümä̧, jua̧u̧ okurä isoppattümä̧ ja̧'wa̧ta̧nü̧ jua̧u̧ azufre pättüttümä̧.

¹⁹ Cabayu̧-tü̧ tti̧wi̧ri̧'pi̧yu̧nä̧mä̧ ä̧ka̧tü̧ 'kua̧ri̧nä̧tü̧ ja̧'wa̧ta̧nü̧ ttünä̧ kuä'äu ikuinä̧tü̧ ttü̧ja̧rü̧mä̧. Jua'amä̧ cabayu-tü̧ ttujurumä̧ ttänä̧'i̧nä̧ ja̧'wa̧ta̧nü̧ tti̧wi̧ri̧'pi̧yu̧nä̧'i̧nä̧ kku̧nä̧ri̧nä̧tü̧.

²⁰ Kkorotü ttü̧ja̧ pa̧'a̧nü̧ suroja'anä̧'i̧nä̧ to'e'ächokotü pinä̧tü̧mä̧, suronä̧ jȩttü̧ttü̧ kä'ädi'okotü pinä̧tü̧mä̧, ja̧'wa̧ta̧nü̧ ä̧wȩttü̧rü̧ tteseta'a kä'ädi'okotü pinä̧tü̧'i̧nä̧ ja̧'wa̧ta̧nü̧ oro-ttü'i̧nä̧, pärätättü'i̧nä̧, bro̧ce pättüttü'i̧nä̧, inä̧wiyättü'i̧nä̧, dauwiyättü'i̧nä̧, ä̧ju̧ku̧'i̧nä̧ ä̧ju̧kuo̧ko̧tü̧rü̧, topü'i̧nä̧ topokotürü ja̧'wa̧ta̧nü̧ kue'ächü'i̧nä̧ kue'ächokotü wotümä̧.

²¹ Juätümä̧ kuättäu'i̧nä̧, mä̧ri̧mü̧ jäwä jü̧ttü̧'i̧nä̧ kättädi'oka'a jȩpü̧ kka̧kui̧nä̧tü̧; ja̧'wa̧ta̧nü̧ nä̧u̧kuä̧rü̧tä̧ kka̧kui̧nä̧tü̧, nä̧tü̧ku̧, u̧mä̧tu̧ku̧ jȩpä̧'chä̧kuä̧u̧tä̧ kka̧kui̧nä̧tü̧.