Apocalipsis 8 - Nuevo Testamento Uwotjüja

Kko̧ro̧mü̧ttü̧nü̧ todäre sello päi'omȩnä̧

¹ Oweja mü̧ä̧ya̧ wa̧ kko̧ro̧mü̧ttü̧nü̧ todäre sello bawepomȩnä̧, mo̧ro̧jä̧mä̧ media hora jo̧mȩnä̧ 'korudäkuäwina̧'a̧.

² Ja̧'wa̧nü̧ ja̧'a̧ topinü̧sä̧, kko̧ro̧mü̧ttü̧nü̧ ta̧ju̧ á̧gȩrȩ-rü, Dio ä'kajo̧mȩ kka̧kuä̧tü̧rü̧; juätürü iyäwi'ina̧'a̧ yotukunä̧rü̧ ji̧yȩtȩ trompeta pünä̧.

³ Jua̧u̧nu̧ o'ka'a kka̧ra̧ á̧gȩ ichi'inü̧ oro i̧so̧'ta̧ 'chu̧ä̧rä̧nü̧, incienso pättü a̧mȩu̧ rü̧ȩnä̧ ȩnä̧wi̧'i̧na̧'a̧ juo̧'ta̧nä̧, altar pättomȩ ä'ka kku̧nä̧wi̧'i̧na̧'a̧, Dio i̧tti̧mü̧ Dio-rü ttukuokuku yo̧mȩtȩnä̧ ppächi'ünä̧ ujuwa pä'ü.

⁴ Ja̧'wa̧nü̧ ja̧'a̧ incienso pättü a̧mȩu̧ isoppamä̧, á̧gȩ u̧mü̧ttü̧ Dio ü̧jo̧mȩku̧ 'chawädina̧'a̧, Dio i̧tti̧mü̧ Dio-rü ttukuokuku yo̧mȩtȩnä̧.

⁵ Ja̧'wa̧nü̧ ja̧'a̧ á̧gȩ-mä̧ incienso pättü a̧mȩu̧ ȩko̧'ta̧ ȩmo̧po̧'ü̧, altar wä̧mȩttü̧ okurä isäsa ȩni̧nü̧ su̧'pȩ päi'ünä̧, ȩnä̧ji̧'ka̧ rȩjȩra̧'a̧ do'opü ikuomȩnä̧; dina̧na̧ päi'a'attü, wottü'i̧nä̧ rä̧mi̧pa̧'a̧ttü̧, ku'upä'i̧nä̧ ürowa'attü, rȩjȩ'i̧nä̧ ttü̧ȩpi̧na̧'a̧.

⁶ Ja̧'wa̧nü̧ päi'omȩnä̧, kko̧ro̧mü̧ttü̧nü̧ ta̧ju̧ A̧gȩrȩ-mä̧, trompeta 'chu̧'ä̧rä̧tü̧mä̧ kkä̧mä̧dü̧ ppü'inä̧tü̧.

Ä̧kuo̧mȩnä̧, pa̧ja̧kuä̧nü̧ trompeta ji̧nü̧

⁷ Ä̧kuo̧mȩnä̧ á̧gȩ trompeta ppüomȩnä̧, mo̧ro̧jä̧ra̧'a̧ttü̧ ajiya jamara ttawäwina̧'a̧, okurä'i̧nä̧, ttukuojaku wiwaunä̧. Pi̧jä̧ o'kajuiyünä̧ dauwiyä'i̧nä̧, isä'kua'i̧nä̧ jo̧mȩnü̧ kuo'ü ikua pä'ümä̧ a̧'u̧ku̧nä̧tä̧ juiyächi'ünä̧ päi'ünä̧.

⁸ Ja̧'wa̧ta̧nü̧ juȩnȩ o'komȩnä̧ á̧gȩ trompeta ppüomȩnä̧, rü̧ä̧ duborara̧'a̧ku̧ mü̧ä̧'ka 'kua̧rü̧nä̧ okurä rü̧a̧rä kuoa'a juiächina̧'a̧; rü̧ä̧ dubora jättäjora päi'a pä'ümä̧ a̧'u̧ku̧nä̧tä̧ juiyina̧'a̧ ttukuojamä̧.

⁹ Ja̧'wa̧nü̧ päi'omȩnä̧ rü̧ä̧ duboranä̧ kka̧kuä̧tü̧ a̧'kua̧rä̧tü̧'i̧nä̧, woi'kiyuttü'i̧nä̧ o'kajuiyünä̧ toe'ächa pä'ümä̧, a̧'u̧ku̧nä̧tä̧ kki̧'i̧na̧'a̧.

¹⁰ Ja̧'wa̧ta̧nü̧ wä̧mȩtukuä päi'ünä̧ á̧gȩ trompeta ppüomȩnä̧, mo̧ro̧jä̧ra̧'a̧ttü̧ ya̧tȩ siri'ko büó, okurä kuoa'a jä̧'i̧nü̧'a̧nü̧ kuoa'a ma̧'i̧nü̧; ma̧o̧mȩnä̧ ajewiyä räopomȩ'i̧nä̧, ajewiyänä̧'i̧nä̧ ma̧'i̧nü̧, o'kajuiyünä̧ pä'a pä'ümä̧ a̧'u̧ku̧nä̧tä̧ juiyünä̧.

¹¹ Jua̧u̧ siri'komä̧ «Rȩ'a̧» pä'ü mikuinü̧; ja̧'wa̧nü̧ päi'omȩnä̧ ajiyamä̧ a̧'u̧ku̧nä̧tä̧ kki̧'ü̧nä̧ adiwoyamä̧ reina̧'a̧, juoya reoya awätü ttü̧ja̧mä̧, rekuätü wa'äu ikuinä̧tü̧.

¹² Ja̧'wa̧ta̧nü̧ pa̧ja̧kuä̧nü̧ päi'ünä̧ á̧gȩ trompeta ppüomȩnä̧, mo̧ro̧ kkä̧wa̧'i̧nä̧, yodó kkä̧wa̧'i̧nä̧ ja̧'wa̧ta̧nü̧ si̧ri̧'kü̧'i̧nä̧, a̧'u̧ku̧nä̧tä̧ ttü̧ji̧pü̧nä̧ surojuoächina̧'a̧. Ja̧'wa̧nü̧ päi'omȩnä̧ na̧wi̧'o̧mȩnä̧, mo̧ro̧'i̧nä̧, yodo'i̧nä̧ a̧'u̧ku̧nä̧tä̧ kka̧kui̧pi̧na̧'a̧ adiumä̧.

¹³ Jua̧u̧ o'komȩ päi'omȩ tochomȩnä̧, ya̧tȩ mo̧ro̧jä̧nä̧ á̧gȩ ko̧'ä̧rü̧ pä̧i̧ku̧nä̧ woa'a ä̧ju̧kui̧nü̧sä̧: «¡Isottü̧, isottü̧, ukutu pi̧jä̧ ttü̧ja̧we, kkorotü wä̧mȩtukuä á̧gȩrȩ ji̧nä̧ trompeta ppütta pä'ü juiya'a!» pä'inü̧.