Apocalipsis 7 - Nuevo Testamento Uwotjüja

144 mil-nü̧ wotürü sello rütäwi'inä̧u̧

¹ Jua̧u̧ topäji̧'ka̧, pa̧ja̧kuä̧nü̧ wotü á̧gȩrȩ-rü, ruwäkuiyä pa̧ja̧kuä̧chü̧nä̧ kkä̧rü̧'koppiyumä̧ pa̧ja̧kuä̧nü̧ jo̧mȩnä̧ 'chu̧'ä̧rü̧ ttü̧ja̧kua̧'a̧ topinü̧sä̧, pi̧jä̧ra̧'a̧ku̧'i̧nä̧, rü̧ä̧ duboranä̧'i̧nä̧, dauwiyänä̧'i̧nä̧ kkä̧rü̧'koppa ppü'ü iku juiyünä̧.

² Ja̧'wa̧ta̧nü̧ kka̧ra̧ á̧gȩ-rü̧, kkä̧wa̧ räopa'akuttü, kkü̧ Dio üäre sello pättü pȩjä̧ku̧ icha'a topinü̧sä̧; Jua̧u̧mä̧ kkorotü pa̧ja̧kuä̧nü̧ wotü á̧gȩrȩ-rü pä̧i̧ku̧nä̧ wopinü̧, pi̧jä̧nä̧'i̧nä̧, rü̧ä̧ duboranä̧'i̧nä̧ surojuottepa pä'ü ttujuru i̧yä̧wi̧'i̧nä̧u̧ru̧:

³ «¡Mä̧kuä̧tó, rȩjȩra̧'a̧mä̧, rü̧ä̧ duborara'amä̧ ja̧'wa̧ta̧nü̧ dauwiyämä̧ surojuokuepätukuä, ji̧nä̧ Tü̧ä̧nä̧wa̧ Dio umüwäyotürü ttü'änä̧ sello pättü tütä'chü juiyäimä̧!»

⁴ Ja̧'wa̧nü̧ ja̧'a̧ sello ttütinä̧u̧mä̧: ciento cuarenta y cuatro mil-nü̧ jo̧mȩnä̧ ji̧na̧'a̧, Irae ttü̧ja̧ttü̧ o'katoi'ünä̧mä̧:

⁵ Judá i̧tti̧mü̧ttü̧mä̧, doce mil-nü̧ jo̧mȩnä̧ sello rütäwi'inä̧u̧; Ruwȩ́ i̧tti̧mü̧ttü̧mä̧, doce mil-nü̧ jo̧mȩnä̧ sello rütäwi'inä̧u̧; Gad i̧tti̧mü̧ttü̧mä̧ doce mil-nü̧ jo̧mȩnä̧ sello rütäwi'inä̧u̧,

⁶ Aser i̧tti̧mü̧ttü̧mä̧, doce mil-nü̧ jo̧mȩnä̧ sello rütäwi'inä̧u̧. Neftarí i̧tti̧mü̧ttü̧mä̧, doce mil-nü̧ jo̧mȩnä̧ sello rütäwi'inä̧u̧. Manasés i̧tti̧mü̧ttü̧mä̧, doce mil-nü̧ jo̧mȩnä̧ sello rütäwi'inä̧u̧,

⁷ Simeón i̧tti̧mü̧ttü̧mä̧, doce mil-nü̧ jo̧mȩnä̧ sello rütäwi'inä̧u̧. Rewí i̧tti̧mü̧ttü̧mä̧, doce mil-nü̧ jo̧mȩnä̧ sello rütäwi'inä̧u̧. Isaca i̧tti̧mü̧ttü̧mä̧, doce mil-nü̧ jo̧mȩnä̧ sello rütäwi'inä̧u̧,

⁸ Zaburó̧ i̧tti̧mü̧ttü̧mä̧, doce mil-nü̧ jo̧mȩnä̧ sello rütäwi'inä̧u̧, José i̧tti̧mü̧ttü̧mä̧ doce mil-nü̧ jo̧mȩnä̧ sello rütäwi'inä̧u̧ ja̧'wa̧ta̧nü̧ Benjamín i̧tti̧mü̧ttü̧tä̧ doce mil-nü̧ jo̧mȩnä̧ sello rütäwi'inä̧u̧.

⁹ Pi̧yȩ jä̧ji̧ o'ka'a topinüsä̧, ttü̧ja̧ rekuätü pa̧ja̧kuä̧ juiyünä̧ wotürü, tti̧rȩji̧yä̧ pünä̧, tti̧wȩnȩ pünä̧, ttawaruwä pünä̧, ruwo dȩä̧kä̧ ä'ka jo̧mȩ, oweja mü̧ä̧ya̧ wa̧ ä'ka jo̧mȩ ttü̧ja̧kua̧'a̧ ttü̧'ka̧tä̧wä̧ti̧yu̧ teü rü̧jä̧u̧ru̧ ja̧'wa̧ta̧nü̧ ttu̧mü̧nä̧mä̧ ojiyä 'chu̧'ä̧ri̧nä̧tü̧.

¹⁰ Ja̧'wa̧nü̧ ja̧'a̧ pä̧i̧ku̧nä̧ wopinä̧tü̧: «¡Ra̧wä̧pi̧jü̧ttü̧ kki̧'i̧kuä̧mä̧ tu̧ru̧wa̧ Dio, ruwo deäkänä̧ pü̧ jäwätä ja̧'a̧, ja̧'wa̧ta̧nü̧ oweja mü̧ä̧ya̧ wa̧ jäwätä ja̧'a̧!»

¹¹ Pättomȩnä̧, o'katoi'ünä̧ ruwo deäkä sobükuächünä̧, kka̧kuä̧tü̧ á̧gȩrȩ'i̧nä̧, a̧ci̧a̧nu̧tu̧'i̧nä̧, pa̧ja̧kuä̧nü̧ wotü a̧'kua̧rä̧tü̧'i̧nä̧, ruwo deäkä ä'ka jo̧mȩku̧ ttiwe'kiyunä̧ pȩjä̧mü̧, Dio-rü eseäkuäwinä̧tü̧,

¹² pa̧'a̧nü̧ pä'ünü̧: «¡Amȩ́! eseu ra̧wä̧wä̧'i̧nä̧, uruwo'i̧nä̧ wo̧juä̧wä̧ wȩnȩ'i̧nä̧, eseäkuäwä'i̧nä̧, ukuo'i̧nä̧, ujuru'i̧nä̧, Chutä, tu̧ru̧wa̧ Dio-rü mo̧ro̧ kki̧ä̧mü̧nä̧ iyü tesewarü pä'ütä ji̧na̧'a̧. ¡Amȩ́!»

¹³ Ja̧'wa̧nü̧ ja̧'a̧, a̧ci̧a̧nu̧tu̧ttü̧ ya̧tȩ ttürü jä'epü ä̧ju̧kui̧nü̧: «Jitüja ttü̧'ka̧tä̧wä̧ti̧yu̧ teü 'ka̧tä̧wä̧tü̧mä̧ ¿titü juo'otüjä̧ttü̧, torü ichinä̧tü̧jä̧ttü̧?»

¹⁴ Päku aditinü̧sä̧: Chu̧ru̧wa̧, ukutäjä̧ wo̧jua̧mä̧. Pädomȩnä̧, päinä̧ku̧sä̧: Jitüjamä̧ rü̧ȩnä̧ usurä ȩmä̧kuä̧wa̧'a̧ttü̧ ichinä̧tü̧, ttü̧'ka̧tä̧wä̧ti̧yu̧ oweja mü̧ä̧ya̧ wa̧ ukuojattü teünä̧ tükäu ikuinä̧tü̧ ja̧'a̧.

¹⁵ Ja̧'wa̧nü̧ ja̧'a̧ttü̧ Dio uruwo dȩä̧kä̧ ä'kajo̧mȩ kka̧kuä̧tü̧, mo̧ro̧'i̧nä̧, yodo'i̧nä̧ 'kuäopünä̧tä̧, Churutä eseäkuäu, juode Dio-rü ukuokuäkuäwodenä̧. Ja̧'wa̧nü̧ ja̧'a̧ttü̧ ruwo dȩä̧kä̧nä̧ pü̧, chutätä tta̧wä̧rä̧kuä̧u̧, juätümä̧.

¹⁶ Täkü, ttukua ppä̧i̧rü̧jü̧'i̧nä̧, ttawa a̧di̧ri̧jü̧'i̧nä̧ juittäkuotü, ja̧'wa̧ta̧nü̧ täkü, du'o kuo'ümä̧, usurä ȩmä̧wo̧ko̧tü̧ ttäkuotü;

¹⁷ Jua'amä̧ oweja mü̧ä̧ya̧ wa̧mä̧, ruwo deäkänä̧ pü̧mä̧, Ttu̧ru̧wa̧ pató ja̧'a̧ttü̧, Jua̧u̧tä̧tä̧ ȩpä̧kuä̧u̧ ajiya kkä̧kuä̧wä̧ kkoya beipokomȩku̧mä̧, ja̧'wa̧ta̧nü̧ Dio-tä tti̧'chȩrȩja 'ka̧wä̧kua̧mä̧.