Apocalipsis 6 - Nuevo Testamento Uwotjüja

Pa̧ja̧kuä̧nü̧ sello ä̧kuo̧mȩnä̧ jäwä tü'kü

¹ Jua̧u̧nü̧ o'ka'a topinü̧sä̧, oweja mü̧ä̧ya̧ jü̧nä̧ wa̧mä̧ kko̧ro̧mü̧ttü̧nü̧ todäre sello jü̧ttü̧, ä̧kuo̧mȩnä̧ sello bawepomȩnä̧, pa̧ja̧kuä̧nü̧ wotü a̧'kua̧rä̧tü̧ttü̧ ya̧tȩ i̧wȩnȩ rä̧mi̧pi̧na̧'a̧, ku'upä kürüächa'a 'kua̧rü̧nä̧: ¡poku ichi'i!, jü̧nä̧.

² Päku, tochomȩnä̧, ya̧tȩ cabayu tȩ'a̧ kki̧nü̧. Jua̧u̧ru̧ wü̧mä̧ 'po'obü 'chu̧'ä̧ri̧nü̧; Jua̧u̧ru̧ iyäwi'ina̧'a̧ corona pättü (u'uttäwä), ja̧'wa̧nü̧ ja̧'a̧ rä'opinü̧ aboiyotürü abo 'kuä'o'äji̧'ka̧, jua'a yabo'i̧nä̧ abo 'kuao'a pä'ü.

³ Ja̧'wa̧ta̧nü̧ oweja mü̧ä̧ya̧ jü̧nä̧ wa̧ yȩnȩta̧'a̧nü̧ sello bawepomȩnä̧, a̧'kua̧rä̧tü̧ttü̧ yȩnȩta̧'a̧nü̧ i̧sa̧ pä'a ä̧ju̧kui̧nü̧sä̧: «¡ichi'ü, topi!»

⁴ Päku, tochomȩnä̧ kka̧ra̧ cabayu tuwoppü wa̧ rä'o'inü̧. Jua̧u̧nä̧ wuö̧rü̧ iyäwi'ina̧'a̧ ujuru, pi̧jä̧nä̧ttü̧ wȩnȩ juiyünä̧ kkä̧kuä̧wä̧ jȩpü̧ iku, ttü̧ja̧ kkorotüku kuä'äkuäu ttikunä̧ jȩa̧ pä'ü; ja̧'wa̧ta̧nü̧ kurodä'i̧nä̧ iyäwi'inä̧ku̧.

⁵ Ja̧'wa̧ta̧nü̧ oweja mü̧ä̧ya̧ jü̧nä̧ wa̧mä̧ wäbodäkuä sello jä̧jí̧ bawepomȩnä̧, a̧'kua̧rä̧tü̧ttü̧ wä̧mȩtukuä päi'ünä̧ wa̧ pä'a ä̧ju̧kui̧nü̧sä̧: «¡ichi'ü, topi!,» Päku chi̧'chi̧'o̧mȩnä̧ cabayu i̧di̧kua̧rü̧ topinü̧sä̧ ja̧'wa̧ta̧nü̧ jua̧u̧nä̧ wuö̧mä̧ rü̧nü̧ topü pa̧ja̧kuäkä 'chu̧'ä̧ri̧nü̧.

⁶ Ja̧'wa̧nü̧ ja̧'a̧ pa̧ja̧kuä̧nü̧ wotü a̧'kua̧rä̧tü̧ ttü̧'kä̧tȩttü̧ rä̧mi̧pa̧'a̧ ä̧ju̧kui̧nü̧sä̧: «suro, trigo-mä̧ ji̧yȩtȩ kiru-tä pa̧ja̧kuä̧chä̧kua̧'a̧, ya'ute mo̧ro̧ mikuämä̧ ja̧'wa̧ta̧nü̧ wäbodäkuä kiru-tä pa̧ja̧kuä̧chä̧kua̧'a̧ cebada-mä̧, ya'ute mo̧ro̧ mikuämä̧; ja̧'wa̧nü̧ ja̧'a̧nä̧ aceite mikuä'i̧nä̧, vino mikuä'i̧nä̧ jua'a yabonü̧mä̧ 'chakuädätukuä.»

⁷ Ja̧'wa̧ta̧nü̧ oweja mü̧ä̧ya̧ jü̧nä̧ wa̧mä̧, pa̧ja̧kuä̧nü̧ sello päi'ünä̧ jü̧ bawepomȩnä̧, a̧'kua̧rä̧tü̧ttü̧ pa̧ja̧kuä̧nü̧ wa̧ pä'a ä̧ju̧kui̧nü̧sä̧: «¡ichi'ü, topi!»:

⁸ Päku, tochomȩnä̧ ya̧tȩ cabayu amarillo wa̧ kki̧nü̧ ja̧'wa̧nü̧ ja̧'a̧ jua̧u̧nä̧ wuö̧mä̧, wa'are pä'ü mikuinü̧. Jua̧u̧ru̧mä̧ wa'are reju ru̧ä̧ri̧na̧'a̧: Jua̧u̧ru̧ ujuru iyäwi'inä̧ku̧ pi̧jä̧ rȩjȩttü̧ o'kajuiyünä̧ tü'küwächi'ünä̧nü̧ kuä'äu ikua pä'ü, kurodiyänä̧'i̧nä̧, ppäinä̧'i̧nä̧, märicheinä̧'i̧nä̧ ja̧'wa̧ta̧nü̧ isotünä̧'i̧nä̧, jü̧nä̧.

Cinco-nü̧, sello päi'omȩnä̧

⁹ Ja̧'wa̧ta̧nü̧ oweja mü̧ä̧ya̧ jü̧nä̧ wa̧ ji̧mü̧tȩ jäwä sello bawepomȩnä̧, Altar pättomȩ dȩa̧'a̧ku̧ kka̧kuä̧tü̧rü̧ topinü̧sä̧, Dio i̧wȩnȩ jittäwiyä̧u̧, weinü̧nä̧ ttü̧ja̧kui̧yä̧u̧ kuä'äu ttikuinä̧u̧ru̧.

¹⁰ Juätümä̧ pä̧i̧ku̧nä̧ wopinä̧tü̧: «Dio ukumä̧ o'kajuiyünä̧ ju̧ru̧wa̧jä̧, surojü'i̧nä̧ jui̧'a̧jä̧, 'kuäopünä̧ jueü wȩnȩtä̧ ukuokujä̧.» ¿Ujuturu kuä'äu ikuinä̧tü̧rü̧mä̧ ti̧yȩnü̧tä̧ pärokua'aku mikuämä̧ jȩ'kuä̧kua'a̧jä̧ttü̧? ¿Ti̧yȩnü̧tä̧ ku̧tä̧bo̧tä̧kuä̧u̧jä̧ttü̧?

¹¹ Ja̧'wa̧nü̧ pättomȩnä̧, yotükupünä̧rü̧ iyäwi'ina̧'a̧ ttü̧'ka̧tä̧wä̧ti̧yu̧ teü ja̧'wa̧ta̧nü̧ jitütä jü̧ta̧'a̧nü̧ wa'ü ikuätü, ttawaruwä ttü̧jä̧wa̧tü̧ wotürü, número pa̧ja̧kuä̧cho̧mȩbü päi'ünä̧ yabonä̧nü̧ tta̧ttä̧ri̧pa̧ pä'ü päwi'ina̧'a̧.

Kko̧ro̧mü̧ttü̧nü̧ ji̧yȩtȩ sello päi'omȩnä̧

¹² Ja̧'wa̧ta̧nü̧ topinü̧sä̧, oweja mü̧ä̧ya̧ jü̧nä̧ wa̧ kko̧ro̧mü̧ttü̧nü̧ jü̧ sello bawepomȩnä̧, rü̧ȩnä̧ ttü̧ȩpa̧'a̧ttü̧ rȩjȩ pparächi'a'a. Ja̧'wa̧ta̧nü̧ mo̧ro̧ kkä̧wa̧mä̧, wa'ü tti̧kui̧yä̧u̧ ajuäu ttü̧'ka̧tä̧wä̧ta̧ jä̧'i̧nü̧'a̧nü̧ idikuächi'ina̧'a̧; ja̧'wa̧ta̧nü̧ yodó kkä̧wa̧mä̧ ttukuoja jä̧'i̧nü̧'a̧nü̧ jä̧ttä̧pä̧ya̧ pärowächinü̧.

¹³ Ja̧'wa̧ta̧nü̧ mo̧ro̧jä̧ si̧ri̧'kü̧mä̧ pi̧jä̧ra̧'a̧ku̧ ma̧'ä̧chi̧nä̧tü̧, higuera pättü dauttü, rü̧ȩnä̧ kkä̧rü̧'ko̧wo̧mȩnä̧ u̧wä̧ju̧ ttawäwächa'a jä̧'i̧nü̧'a̧nü̧.

¹⁴ Ja̧'wa̧ta̧nü̧ mo̧ro̧jä̧mä̧ kuyäru isojä ttü̧to̧ra̧'a̧ jä̧'i̧nü̧'a̧nü̧, toepo'ina̧'a̧ ja̧'wa̧nü̧ päi'omȩnä̧ müä'kiyu'i̧nä̧, aje kkä'ko o̧sa̧'i̧nä̧ pporädü ikuäwi'ina̧'a̧.

¹⁵ Ja̧'wa̧nü̧ päi'omȩnä̧ rȩjȩ we'ätü'i̧nä̧, ukuo isotü'i̧nä̧, su̧ro̧do̧u̧ tturuwotü'i̧nä̧, järe ruwotü'i̧nä̧, ttukuo kku̧nä̧rä̧tü̧'i̧nä̧ ja̧'wa̧ta̧nü̧ ttumüwäyotü'i̧nä̧, ttu̧wo̧juȩtä̧u̧ wokotü'i̧nä̧ o'katoi'ünä̧ müä'kiyu idoriyänä̧ dajawächinä̧tü̧;

¹⁶ Ja̧'wa̧nü̧ jȩpü̧, müä'kiyurü'i̧nä̧, inä̧wiyärü'inä̧ pä'inä̧tü̧: ¡Ujutu tu̧wä̧mȩ, ma̧'ä̧mi̧tü̧, ruwo deäkänä̧ pü̧ toü juiyatü ja̧'wa̧ta̧nü̧ oweja mü̧ä̧ya̧ jü̧nä̧ wa̧ ro̧ȩpü̧ juiyatü!

¹⁷ Jua'amä̧, täkü ji̧yȩtä̧ oweja mü̧ä̧ya̧ jü̧nä̧ wa̧ ro̧ȩpü̧ mo̧ro̧ rȩbȩä̧kuä̧wa̧'a̧ttü̧, ¿ditä jä̧ttü̧ a̧mi̧ 'ki̧ä̧chi̧'ä̧kua̧mä̧?