Apocalipsis 4 - Nuevo Testamento Uwotjüja

Mo̧ro̧jä̧ra̧'a̧ttü̧ eseu ra̧tti̧nü̧ wȩnȩ

¹ Pi̧yȩ 'kuäopäji o'ka'a topinü̧sä̧, mo̧ro̧jä̧ äpate bawekuä̧nü̧ kka̧'a̧; i̧wȩnȩmä̧ ä̧kuo̧mȩnä̧ chä̧ju̧kuä̧ji̧tä̧, trompeta rä̧mi̧pa̧'a̧ 'kua̧rü̧nä̧, päinä̧ku̧sä̧: «Poku 'cha'ächi'i, pi̧yȩ o'komȩ päi'omȩ 'kuäopä̧kuȩ chi̧jȩpa̧ku̧.»

² Ja̧'wa̧nü̧ päi'omȩnä̧ Epíritu jäwänä̧ chü̧ja̧'a̧ttü̧, mo̧ro̧jä̧nä̧ ji̧yȩtȩ ruwo dȩä̧kä̧ jȩpü̧ kku̧nä̧wa̧'a̧ topinü̧sä̧, ju̧wä̧kä̧ ruwo dȩä̧kä̧nä̧ ya̧tȩ pi̧nü̧.

³ Ju̧ä̧kä̧nä̧ pü̧mä̧ diamante pättü ido'ki jä̧'i̧nü̧'a̧nü̧, rubí iso'ki ido'ki jä̧'i̧nü̧'a̧nü̧'i̧nä̧ winü̧; ja̧'wa̧ta̧nü̧ uruwo deäkä jäyänä̧mä̧ wäyurobü kki̧na̧'a̧, emerada pättü ido'ki tejäda'a jä̧'i̧nü̧'a̧nü̧;

⁴ Ja̧'wa̧ta̧nü̧ topinü̧sä̧ juäkä, ruwo deäkä jäyänämä̧, kkoro ruwo dȩä̧ki̧yä̧ kka̧kua̧'a̧ veintikuatro-nü̧ jo̧mȩnä̧, jua̧u̧ okänä̧mä̧ Veintikuatro-nü̧ wotü A̧ci̧a̧nu̧tu̧, pȩji̧nä̧tü̧, ttü̧'ka̧tä̧wä̧ti̧yu̧ te'ätü, ttünä̧mä̧ oro jäwä corona pättü wȩnä̧rä̧tü̧.

⁵ Juȩnȩ ruwo deäkä kko̧mȩttü̧ räopina̧'a̧, rä̧mi̧pü̧'i̧nä̧, ku'upä ürowü'inä̧, ku'upä kürüächü'i̧nä̧, jü̧nä̧; ja̧'wa̧ta̧nü̧ juȩnȩ, ruwo deäkä ä'ka jo̧mȩmä̧, kko̧ro̧mü̧ttü̧nü̧ todäre jo̧mȩnä̧ ra̧pa̧ra̧ o̧yu̧ kuoina̧'a̧, jua̧u̧mä̧ kko̧ro̧mü̧ttü̧nü̧ todäre jo̧mȩnä̧, Dio isotü epíritu-tu̧ ji̧na̧'a̧.

⁶ Ja̧'wa̧ta̧nü̧ ruwo deäkä ä'ka jo̧mȩmä̧ rü̧ä̧ dubora cristal pättü jä̧'i̧nü̧'a̧nü̧ säruwora ri̧na̧'a̧. Ja̧'wa̧ta̧nü̧ ruwo deäkä kkä'ko päte'ü'i̧nä̧, jäyänä̧'i̧nä̧ kka̧kui̧nä̧tü̧ pa̧ja̧kuä̧nü̧ jo̧mȩnä̧ isotü a̧'kua̧rä̧tü̧, ttü'äriyämä̧ ttä'kanä̧'i̧nä̧, ttaboja̧'a̧ku̧nä̧'i̧nä̧ kku̧nä̧rä̧tü̧.

⁷ Juätüttü ä̧kuo̧mȩnä̧ i̧sa̧ a̧'kua̧rü̧mä̧ jojochäyu jä̧'i̧nü̧'a̧nü̧ winü̧; juȩnȩ o'komȩnä̧ i̧sa̧ a̧'kua̧rü̧mä̧ päkäyä jä̧'i̧nü̧'a̧nü̧ winü̧; wäbodäkuä päi'ünä̧ i̧sa̧ a̧'kua̧rü̧mä̧, ttü̧ja̧sa̧ ü'ä jä̧'i̧nü̧'a̧nü̧ winü̧; ja̧'wa̧ta̧nü̧ pa̧ja̧kuä̧nü̧ i̧sa̧ a̧'kua̧rü̧mä̧ pare koa'a jä̧'i̧nü̧'a̧nü̧ winü̧.

⁸ Juätü pa̧ja̧kuä̧nü̧ wotü a̧'kua̧rä̧tü̧ ya̧ku̧nä̧mä̧, kko̧ro̧mü̧ttü̧nü̧ ya'ute jo̧mȩnä̧ ttujuabiyämä̧ kku̧nä̧ri̧nä̧tü̧, ttü'äriyämä̧ wä̧mȩnä̧'i̧nä̧ jakuänä̧'i̧nä̧ o'kajuiyünä̧tä̧ kka̧kui̧nä̧u̧. Juätümä̧ mo̧ro̧'i̧nä̧, yodo'i̧nä̧ kättädi'oka'a 'kuäopünä̧tä̧ ra̧'i̧nä̧tü̧: Sa̧tu̧ wa̧, Sa̧tu̧ wa̧ Tu̧ru̧wa̧mä̧, Dio o'kajuiyünä̧tä̧ ju̧ru̧wa̧mä̧, «Jua̧u̧tä̧tä̧ ja̧'a̧ 'kuäopünä̧tä̧ kki̧nü̧mä̧, jitä'i̧nä̧ kkü̧mä̧, yodoji'i̧nä̧ i̧chä̧kua̧mä̧.»

⁹ Pitü a̧'kua̧rä̧tü̧mä̧, ruwo deäkänä̧ pü̧rü̧, mo̧ro̧ kki̧ä̧mü̧nä̧ kkü̧rü̧, uruwo'i̧nä̧, ukuo'i̧nä̧ kku̧nä̧rü̧rü̧ esewinä̧tü̧ 'kuäopünä̧,

¹⁰ Veintikuatro-nü̧ wotü a̧ci̧a̧nu̧tu̧mä̧, ruwo deäkänä̧ pü̧rü̧, mo̧ro̧ kki̧ä̧mü̧nä̧ kkü̧rü̧ ttiwe'kiyunä̧ pȩjä̧mä̧kuä̧u̧ esewinä̧tü̧, ttünä̧ kka̧ku̧ püttäwä corona pättü'i̧nä̧, uruwo deäkä ä'ka jo̧mȩ iku pä'inä̧tü̧:

¹¹ «Chu̧ru̧wa̧, ukumä̧ teseäkuäu'i̧nä̧, kuruwo'i̧nä̧, kuȩma̧ pä'ütä wa̧jä̧, o'kajuiyünä̧ kuaditäwätä ja̧'a̧ttü̧, kuwäbe'inü̧tä̧ ja̧'a̧ttü̧; ukú kuju'komȩnä̧tä̧ kka̧ku̧ ja̧'a̧ttü̧.»