Apocalipsis 22 - Nuevo Testamento Uwotjüja

¹ Jua̧u̧ jä̧ji̧ o'ka'a á̧gȩ-mä̧, aje adiwoto, kkä̧kuä̧wä̧ i'ko aje i̧jȩpi̧nä̧ku̧sä̧. Cristal pättü jä̧'i̧nü̧'a̧nü̧ säruwina̧'a̧, juoyamä̧ Dio'i̧nä̧, oweja mü̧ä̧ya̧'i̧nä̧ tti̧dȩä̧kä̧ttü̧ räopina̧'a̧.

² Ütawiyättü mä̧nä̧ juȩi̧pä̧mä̧ kkä'konä̧ ajemä̧ ri̧na̧'a̧, aje jäyoto ji̧jä̧ku̧'i̧nä̧, pätekuadä̧'i̧nä̧ kkä̧kuä̧wä̧ dauwiyä u̧wä̧ju̧ kkä̧wa̧ jü̧'a̧kuä̧ wȩjü̧ oi buojuoina̧'a̧ ja̧'wa̧nü̧ pä'ümä̧ ttü̧jä̧pü̧ttü̧ todäre jo̧mȩnä̧ ya'ute año-nä̧mä̧ wȩji̧nü̧ oi pä'ü päwä; ja̧'wa̧ta̧nü̧ dauwiyä ojiyämä̧ ttü̧ja̧ ttumä̧richeittü ttü̧'i̧pü̧nä̧ ppädü ji̧na̧'a̧.

³ Ja̧'wa̧ta̧nü̧ juȩnȩmä̧ surojümä̧ juiyäkua'a. Ütawiyänä̧mä̧ Dio'i̧nä̧, oweja mü̧ä̧ya̧'i̧nä̧ tti̧dȩä̧kä̧tä̧ kkä̧kua̧'a̧ ja̧'wa̧ta̧nü̧ umüwäyotütä 'kuäopünä̧ tteseäkuäwä̧kua̧.

⁴ Pä̧tȩkuä̧kuä̧wä̧nü̧ tottäkuäwäkuotü ja̧'wa̧ta̧nü̧ ti'änä̧mä̧ i̧mi̧tä̧ ttü̧tä̧rä̧kuo̧tü̧.

⁵ Juȩnȩmä̧ yodo'i̧nä̧ juiyäkua'a ja̧'wa̧ta̧nü̧ juȩnȩ kka̧kuä̧tü̧mä̧ ra̧pa̧ra̧ i̧tȩya̧u̧'i̧nä̧ mo̧ro̧ kkä̧wa̧ i̧tȩya̧u̧'i̧nä̧ rekuämä̧ rü̧jo̧ko̧u̧ ttäkuotü, jua'amä̧ ttu̧ru̧wa̧ Dio-tä itejäda'attü ja̧'wa̧ta̧nü̧ jua̧u̧tä̧ 'kuäopünä̧tä̧ ruwomä̧ wȩä̧kua̧.

Jesú pä'äjita'anü̧ ichäkua'a tü'küwächa'a

⁶ Ja̧'wa̧ta̧nü̧ á̧gȩ-mä̧ päinä̧ku̧sä̧: «Pi̧yȩ wȩnȩmä̧ isopäi'ünä̧ wȩnȩ ja̧'a̧ ja̧'wa̧ta̧nü̧ jueü wȩnȩ ja̧'a̧. Tu̧ru̧wa̧, Dio profeta wotünä̧ jiäkuäwä i̧sa̧mä̧, u̧mü̧wä̧ya̧ ya̧tȩ á̧gȩ-rü̧ umüwäyotü wotürü jitätä ja̧'a̧ku̧ 'kuäopä̧kuȩ jiäwa pä'ü we'äji.»

⁷ «¡Jitätä ja̧'a̧ku̧ chichäkua̧sä̧! ¡Eseäkuäwä kka̧'a̧ pi'tä kuyäru'tänä̧ wȩyu̧tu̧ rütäwä 'kuäopä̧kuȩ pä'ü jittäwinü̧ esetürümä̧!»

⁸ Ttü, Ju̧a̧-mä̧, pi̧yȩ jäwä topü'i̧nä̧ topinü̧sä̧, ä̧ju̧ku̧'i̧nä̧ ä̧ju̧kui̧nü̧sä̧. Ja̧'wa̧nü̧ topü'i̧nä̧ topäji̧'ka̧, ä̧ju̧ku̧'i̧nä̧ ä̧ju̧kuä̧ji̧'ka̧mä̧, á̧gȩ ttürü i̧jȩpä̧ji̧ ä'ka jo̧mȩ chiwe'kiyunä̧ ma̧'ä̧mi̧nü̧sä̧, chesewarü pä'ü.

⁹ Ja̧'wa̧nü̧ jȩchi̧yä̧ku̧ jua̧u̧mä̧ päinä̧ku̧sä̧: «Ja̧'wa̧nü̧mä̧ jȩ'kuä̧, ttü'i̧nä̧ Dio u̧mü̧wä̧ya̧sä̧, uku jü̧ta̧'a̧nü̧, uku ku̧jä̧wa̧tü̧ profeta wotü jü̧ta̧'a̧nü̧ ja̧'wa̧ta̧nü̧ o'katoi'ünä̧ pi'tä kuyäru'tänä̧ wȩyu̧kua̧'a̧ pȩjü̧ ukuotätü jü̧ta̧'a̧nü̧ wa̧sä̧. Dio-rütä esewi.»

¹⁰ Ja̧'wa̧ta̧nü̧ päinä̧ku̧sä̧: «Pi'tänä̧ wȩyu̧kua̧'a̧ pȩjü̧ 'kuäopä̧kuȩ wȩnȩmä̧ kuä̧ppü̧ti̧'ä̧, täkü 'kuäopä̧kuȩ mo̧ro̧mä̧ tü'küwächa'a.

¹¹ Suronä̧ jȩpü̧mä̧ wä̧i̧nä̧ yabonü̧ suronä̧ jȩpü̧ kkä̧wi̧, surojünä̧ amükuädümä̧ wä̧i̧nä̧ yabonü̧ surojünä̧ amükuädütä kkä̧wi̧ ja̧'wa̧nü̧ ja̧'a̧nä̧ adiu jȩpü̧mä̧ jua'a yabonü̧ adiutä jȩpü̧ kkä̧wi̧ ja̧'wa̧ta̧nü̧ surojü jui̧'a̧mä̧ jua'a yabonü̧ surojü juikuächächünä̧tä̧ jȩpü̧ kkä̧wi̧.»

¹² «A̧, jitätä ja̧'a̧ku̧ ichüsä ja̧'wa̧ta̧nü̧ premio pättü'i̧nä̧ i'kächüsä ya̧ku̧nä̧rü̧ jȩtti̧nü̧ a̧kuä̧ chiyä'chä̧kuemä̧.

¹³ Ttümä̧ ä'kanä̧'i̧nä̧ rüjinä̧'i̧nä̧ ru̧wa̧sä̧, ä̧kuo̧mȩnä̧'i̧nä̧ beipächomȩ'i̧nä̧ ru̧wa̧sä̧.»

¹⁴ Eseäkuäwä kka̧'a̧ kkä̧kuä̧wä̧ dauttü ttukua pä'ü ja̧'wa̧ta̧nü̧ ütawiyä äpatenä̧ dodetta pä'ü ttü̧'ka̧tä̧wä̧ti̧yu̧ tükätürümä̧.

¹⁵ Ja̧'wa̧nü̧ ja̧'a̧nä̧ suropätü'i̧nä̧, märipä jȩpä̧'chä̧tü̧'i̧nä̧, nä̧tü̧rü̧ u̧mä̧tü̧rü̧ jȩpä̧'chä̧ttü̧'i̧nä̧, ttü̧ja̧rü̧ kuä'äwätü'i̧nä̧, tätäwä'kiyu esetätü'i̧nä̧ ja̧'wa̧ta̧nü̧ o'katoi'ünä̧ eseu, yapareäkuäwänä̧ kka̧kuä̧tü̧'i̧nä̧ u̧mi̧nä̧tä̧ ttü̧ja̧kui̧'ä̧kuo̧tü̧.

¹⁶ «Ttü, Jesú-mä̧, chu̧mü̧wä̧ya̧ á̧gȩ-rü̧ we'äjisä pi̧yȩ o'kajuiyünä̧ igresia ttü̧ja̧rü̧ jidäwa pä'ü. Ttütä ja̧'a̧ Dawi-ttü ichäkuäwa̧ kkada'ka jü̧nä̧ wa̧mä̧, pä'ü mo̧ro̧ juomȩnä̧ siri'ko tejäda'a jä'i̧nü̧'a̧nü̧.»

¹⁷ Ja̧'wa̧nü̧ päomȩnä̧ Epíritu sa̧tu̧'i̧nä̧, oweja mü̧ä̧ya̧ irekua'i̧nä̧ pä'inä̧tü̧: «¡Ichi!» Ja̧'wa̧nü̧ pätta'a ä̧ju̧kuä̧tü̧'i̧nä̧, pä'inä̧tü̧: «¡Ichi!» Ja̧'wa̧ta̧nü̧ awa a̧di̧rü̧ja̧ku̧mä̧, ichi; ja̧'wa̧ta̧nü̧ awa pä̧wä̧rü̧jä̧ku̧mä̧, kkä̧kuä̧wä̧ ajiyattü mipponä̧tä̧ awi.

¹⁸ O'katoi'ünä̧ pi'tänä̧ wȩyu̧kua̧'a̧ pȩjü̧ 'kuäopä̧kuȩ pä'ü jittäwinü̧ ä̧ju̧kuä̧tü̧rü̧mä̧, pi̧yȩ ji'äusä: Ya̧tȩ pi'tä kuyäru'tänä̧ ji̧yȩtȩ yabonü̧ i̧wȩyu̧tü̧ttü̧mä̧, Dio-mä̧ pi'tänä̧ wȩyu̧kua̧'a̧ pȩjü̧ usurä ȩmä̧kuä̧wä̧ttü̧ i'chächü i̧yä̧kua̧.

¹⁹ Ja̧'wa̧ta̧nü̧ ya̧tȩ pi'tänä̧ wȩyu̧kua̧'a̧ pȩjü̧ 'kuäopä̧kuȩ päü jittäwinü̧ ȩmü̧ ikuttümä̧, Dio-mä̧ jua̧u̧ üäre kkä̧kuä̧wä̧ dauttu'i̧nä̧, adiwäjuei ütawiyättü'i̧nä̧ ja̧'wa̧ta̧nü̧ pi'tä kuyäru'tänä̧ wȩyu̧kua̧'a̧ pȩjü̧mä̧ 'choipä̧kua̧.

²⁰ Pi̧yȩ jiäumä̧, pä'ü: «A̧, jitätä ja̧'a̧ku̧ ichüsä.» ¡Amȩ́! a̧, chu̧ru̧wa̧ Jesú, ichi.

²¹ Tu̧ru̧wa̧ Jesú repeümä̧ 'kuäopünä̧tä̧ ppädätukuaku pä'üsä.