Apocalipsis 21 - Nuevo Testamento Uwotjüja

Jareünä̧ tidepiyu jä̧kuo̧mȩ

¹ Jua̧u̧nü̧ o'ka'a mo̧ro̧jä̧ ja̧rȩä̧jä̧'i̧nä̧, rȩjȩ ja̧rȩä̧jä̧'i̧nä̧ topinü̧sä̧; täkü ä̧kuo̧mȩnä̧ mo̧ro̧jä̧ ji̧nä̧jä̧mä̧, ä̧kuo̧mȩnä̧ rȩjȩ ji̧nä̧jä̧mä̧ juiyina̧'a̧ ja̧'wa̧ta̧nü̧ rü̧ä̧ aje'i̧nä̧ täkü juiyina̧'a̧.

² Ja̧'wa̧ta̧nü̧ ttü Ju̧a̧-mä̧ topinü̧sä̧, surojü juiyü ütawiyä, jareünä̧ Jerusarȩ́, mo̧ro̧jä̧ Dio ü̧jo̧mȩttü̧ mȩyȩwä̧ja̧'a̧. Yajute kkirekuorü kkü'käwa pä'ü kkü̧'ka̧tä̧wi̧'a̧'a̧ jä̧'i̧nü̧'a̧nü̧.

³ Ja̧'wa̧nü̧ päi'omȩnä̧, mo̧ro̧jä̧ ruwo dȩä̧kä̧ttü̧ pä̧i̧ku̧nä̧ i̧wȩnȩ rä̧mi̧pa̧'a̧ ä̧ju̧kui̧nü̧sä̧: «Pȩnȩ́ ja̧'a̧ Dio, ttü̧ja̧ku̧ ü̧jo̧mȩmä̧, Jua̧u̧'i̧nä̧ juätütäku ü̧jä̧kua̧; juätümä̧ umüwäyotü jü̧nä̧ ttü̧ja̧kuä̧kuo̧tü̧, Dio-mä̧ juätütä ttü̧ä̧nä̧wa̧ Dio jü̧nä̧ ü̧jä̧kua̧.

⁴ Dio-mä̧, juätü tti̧'chȩrȩ'i̧nä̧, jȩpü̧ i̧kuä̧kua̧; täkü wa'are'i̧nä̧ juiyäkua'a, 'chȩrȩ'i̧nä̧, barawä̧u̧ wottü'i̧nä̧; täkü ä̧kuo̧mȩnä̧ kka̧kui̧nü̧mä̧ 'kuäopina̧'a̧tä̧ ji̧na̧'a̧.»

⁵ Ja̧'wa̧nü̧ ja̧'a̧ uruwo dȩä̧kä̧nä̧ pü̧mä̧ pä'inü̧: «Ttümä̧ o'kajuiyünä̧ jareü jü̧nä̧tä̧ jȩpü̧sä̧.» Ja̧'wa̧ta̧nü̧ pä'inü̧: «Wȩyu̧ti̧; pi̧yȩmä̧ jueünä̧tä̧, isopäi'ünä̧tä̧ jü̧ ja̧'a̧.»

⁶ Ja̧'wa̧ta̧nü̧ päinä̧ku̧sä̧: «Täkü jo̧mȩnü̧ päia'a. Ttümä̧ ä̧kuo̧mȩnä̧'i̧nä̧, rüjinä̧'i̧nä̧ wa̧sä̧. Awa ä̧di̧ri̧jä̧ku̧ru̧mä̧, mippoünä̧ kkä̧kuä̧wä̧ ajiyattü awa pä'ü chi̧yä̧kua̧.

⁷ Surojü abo 'kuä'o'ümä̧ pi̧yȩ o'kajuiyünä̧ üäre jä̧kua̧'a̧; ttü jä̧kua̧'a̧ ü̧ä̧nä̧wa̧ Dio-mä̧ ja̧'wa̧ta̧nü̧ pärokua'akumä̧ chi̧tti̧ jä̧kua̧'a̧.

⁸ Ja̧'wa̧nü̧ ja̧'a̧nä̧ ye'ekuätü'i̧nä̧, esetokotü'i̧nä̧, kkü'kokotü'i̧nä̧, ttü̧ja̧rü̧ kuä'äwätü'i̧nä̧, nä̧tü̧rü̧ u̧mä̧tü̧rü̧ jȩpä̧'chä̧tü̧'i̧nä̧, märipä jȩpä̧tü̧'i̧nä̧, tta̧'kua̧juä̧ jü̧'a̧kuä̧ tätäwä'ka esetätü'i̧nä̧ ja̧'wa̧ta̧nü̧ yaparewätü'i̧nä̧ o'katoi'ünä̧; okurä Azufre pättü kuoarära̧'a̧ tti̧'chä̧kuo̧tü̧, yȩnȩta̧'a̧nü̧ wa'ü ikuäwomȩ ja̧'a̧, juȩnȩmä̧.»

⁹ Ja̧'wa̧ta̧nü̧ kko̧ro̧mü̧ttü̧nü̧ ta̧ju̧ wotü á̧gȩrȩ-ttü̧ ya̧tȩ, kko̧ro̧mü̧ttü̧nü̧ to̧'ta̧rȩ copa o̧'ta̧, kko̧ro̧mü̧ttü̧nü̧ todäre jo̧mȩnä̧ rüjí mo̧ro̧ usurä ȩmä̧kuä̧wä̧ su̧'pȩnü̧ ȩka̧'a̧, 'chu̧ä̧rä̧nü̧ ichi'ü, päinä̧ku̧sä̧: «ichi'i poku, oweja mü̧ä̧ya̧ jü̧nä̧ wa̧ ü'käwäkuajuru, chi̧jȩpa̧ku̧.»

¹⁰ Ja̧'wa̧nü̧ ja̧'a̧, epíritu jäwänä̧ i̧jȩkuä̧cho̧mȩnä̧, á̧gȩ-mä̧ mü̧ä̧'ka rü̧ä̧'ka ju'toju jä'kara̧'a̧ ȩpi̧nä̧ku̧sä̧, ȩpä̧ji̧'ka̧mä̧ i̧jȩpi̧nä̧ku̧sä̧ surojü juiyü Jerusarȩ́ ütawiyä, mo̧ro̧jä̧ Dio ü̧jo̧mȩttü̧ mȩyȩwa̧'a̧.

¹¹ Jua̧u̧ ütawiyämä̧ Dio i̧tȩya̧u̧ttü̧tä̧ tejädina̧'a̧; i̧tȩya̧u̧mä̧ ido'ki rü̧ȩnä̧ mikuäwo'ki, diamante iso'ki, Crital pätto'ki jä̧'i̧nü̧'a̧nü̧ säruwuönä̧ kkȩdȩpi̧na̧'a̧.

¹² Jua̧u̧ ütawiyä jäyänä̧mä̧, isäbä ju'tojunü̧ ttoekuina̧'a̧, äpatiyämä̧ ttü̧jä̧pü̧ttü̧ taterenü̧ jo̧mȩnä̧ kka̧kui̧na̧'a̧, jua̧u̧ äpate yatetekunä̧mä̧ ya̧tȩ á̧gȩ pünä̧ kka̧kui̧nä̧tü̧; äpatiyänä̧mä̧ Irae ttü̧ja̧, ttü̧jä̧pü̧ttü̧ to̧mü̧rȩ ruwä tti̧mi̧pi̧yä̧ wȩyu̧kua̧'a̧ pȩji̧na̧'a̧.

¹³ Kkä̧wa̧ räopa'akumä̧ äpate wäbatekuä jo̧mȩnä̧ kka̧kui̧na̧'a̧, kkä̧wa̧ u̧wo̧jua̧'a̧ku̧'i̧nä̧ äpate wäbatekuä jo̧mȩnä̧ kka̧kui̧na̧'a̧, kkä̧wa̧ ma̧ä̧cha̧'a̧ku̧'i̧nä̧ äpate wäbatekuä jo̧mȩnä̧ kka̧kui̧na̧'a̧ ja̧'wa̧ta̧nü̧ kkä̧wa̧ ieruwa'akunä̧'i̧nä̧ äpate wäbatekuä jo̧mȩnä̧ kka̧kui̧na̧'a̧.

¹⁴ Ja̧'wa̧ta̧nü̧ ütawiyä tto̧ȩpäräbä 'chu̧ä̧ro̧mȩ kkada'kamä̧ ttü̧jä̧pü̧ttü̧ todäre jäwä jo̧mȩnä̧ i̧nä̧wiyä jȩpü̧ kku̧nä̧wi̧na̧'a̧, jua̧u̧ owänä̧mä̧ oweja mü̧ä̧ya̧ jü̧nä̧ wa̧ umüwäyotü apótore, ttü̧jä̧pü̧ttü̧ todäre jo̧mȩnä̧ wotü tti̧mi̧pi̧yä̧ wȩyu̧kua̧'a̧ pȩji̧na̧'a̧.

¹⁵ Ja̧'wa̧ta̧nü̧ á̧gȩ ttüku ukuokumä̧ nä̧yü̧na̧ oro isä̧na̧ 'chu̧'ä̧ri̧nü̧, ütawiyä'i̧nä̧, äpatiyä'i̧nä̧, tto'epü kku̧nä̧wäbä'i̧nä̧ pa̧ja̧ti̧nü̧ juä̧na̧nä̧.

¹⁶ Ja̧'wa̧ta̧nü̧ ütawiyämä̧ i̧so̧ka̧ 'kua̧rü̧nä̧ ji̧na̧'a̧; üoto'i̧nä̧, ükäwe'i̧nä̧ yorätewina̧'a̧. Á̧gȩ-mä̧ üäre nä̧yü̧na̧nä̧ ütawiyä pa̧ja̧ti̧nü̧: ü̧'a̧to̧mȩnä̧mä̧ dos mil dosciento kilómetros jo̧mȩnä̧ ji̧na̧'a̧; üoto'i̧nä̧, ju'tojuku'i̧nä̧ ja̧'wa̧ta̧nü̧ ükäwe'i̧nä̧, yoräteunä̧tä̧.

¹⁷ Jua̧u̧nü̧ o'ka'a ttoekuäbä pa̧ja̧ti̧nü̧: ü̧'a̧to̧mȩnä̧mä̧ sesenta y cinco metros jo̧mȩnä̧ ji̧na̧'a̧, ttü̧ja̧ ttü̧'a̧tä̧'i̧jü̧ a̧kuä̧, á̧gȩ ü̧'a̧to̧mȩnä̧mä̧.

¹⁸ Ttoekuäbämä̧ diamante-ttü̧ adikuina̧'a̧ ja̧'wa̧ta̧nü̧ ütawiyämä̧ päkuäi oro-tä ji̧na̧'a̧, i̧sä̧yu̧ sä̧ru̧wä̧yu̧ jä̧'i̧nü̧'a̧nü̧, jü̧nä̧.

¹⁹ Ttoekuäbä 'chu̧ä̧rü̧ kkada'kiyu inä̧wiyämä̧ o'kajuiyünä̧ ido'ki rü̧ȩnä̧ mikuäuttü a̧'kua̧tä̧kuä̧wa̧'a̧ ji̧na̧'a̧: Ä̧kuo̧mȩnä̧mä̧, diamante-ttü̧ ji̧na̧'a̧; kkoro'kamä̧, zafiro pättüttü adikuina̧'a̧; wäbodäkuä isä'kamä̧, ágata pättüttü adikuina̧'a̧; pa̧ja̧kuä̧nü̧ isä'kamä̧, emerada pättüttü adikuina̧'a̧;

²⁰ ji̧mü̧tȩ jäwä isä'kamä̧, ónice pättüttü adikuina̧'a̧; kko̧ro̧mü̧ttü̧nü̧ ya'ute isä'kamä̧, rubí pättüttü adikuina̧'a̧; kko̧ro̧mü̧ttü̧nü̧ todäre isä'kamä̧, crisólito pättüttü adikuina̧'a̧; kko̧ro̧mü̧ttü̧nü̧ wäbodäkuä isä'kamä̧, berilo pättüttü adikuina̧'a̧; kko̧ro̧mü̧ttü̧nü̧ pa̧ja̧kuä̧nü̧ isä'kamä̧, topacios pättüttü adikuina̧'a̧; to̧mü̧rȩ jäwä isä'kamä̧, crisoprasa pättüttü adikuina̧'a̧; ttü̧jä̧pü̧ttü̧ ya'ute jäwä isä'kamä̧, jacinto pättüttü adikuina̧'a̧; ja̧'wa̧ta̧nü̧ ttü̧jä̧pü̧ttü̧ todäre jäwä isä'kamä̧, amatista pättüttü adikuina̧'a̧.

²¹ Ttü̧jä̧pü̧ttü̧ taterenü̧ jü̧ äpatiyämä̧, perlas pättüttü ttü̧jä̧pü̧ttü̧ todäre jo̧mȩnä̧ adikuina̧'a̧; äpate yatetekunä̧mä̧, perlas pättüttü yo'kikunä̧ adikuina̧'a̧. Ja̧'wa̧ta̧nü̧ ütawiyättü mä̧nä̧ juȩi̧pä̧mä̧mä̧ päkuäi oro-tä ji̧na̧'a̧, i̧sä̧yu̧ sä̧ru̧wä̧yu̧ jä'i̧nü̧'a̧nü̧ tȩya̧wi̧na̧'a̧.

²² Ütawiyänä̧mä̧, Dio-rü ukuokuäkuäwodemä̧ topokü pinü̧sä̧, Dio-rü ukuokuäkuäwodemä̧ Chutä Tu̧ru̧wa̧, Dio o'kajuiyünä̧ ju̧ru̧wa̧, oweja mü̧ä̧ya̧ jü̧nä̧ wa̧ ja̧'a̧ttü̧.

²³ Ütawiyämä̧ mo̧ro̧ kkä̧wa̧'i̧nä̧, yodó kkä̧wa̧'i̧nä̧, itejäda pä'ümä̧ rekuä rü̧jo̧ka̧'a̧ ji̧na̧'a̧, jua'amä̧ Dio i̧tȩya̧u̧tä̧ ja̧'wa̧ta̧nü̧ oweja mü̧ä̧ya̧ jü̧nä̧ wa̧ i̧tȩya̧u̧tä̧ ja̧'a̧ttü̧.

²⁴ Ja̧'wa̧ta̧nü̧ o'katoi'ünä̧ surojüttü kka̧kui̧pi̧nä̧tü̧mä̧ jua̧u̧ tȩya̧u̧nä̧tä̧ kuettächäkuotü ja̧'wa̧ta̧nü̧ pi̧jä̧nä̧ttü̧ ruwotümä̧ juȩnȩ ttiäre pärätä rü̧ȩnä̧ mikuäu ttiyäkuotü.

²⁵ Jua̧u̧ äpatiyämä̧ mo̧ro̧mä̧ mü̧'ȩpü̧ ikuäwokü jä̧kua̧'a̧ 'kuäopünä̧tä̧, jua'amä̧ yodomä̧ juiya'attü̧.

²⁶ Pi̧jä̧ ruwäkuiyä ttü̧ja̧mä̧ ttiäre pärätä'i̧nä̧, üadiwä'i̧nä̧ juȩnȩtä̧ ttiyäkuotü.

²⁷ Juȩnȩmä̧, yorisotä surojümä̧ doächoka'a jä̧kua̧'a̧, ya̧tȩ surojü jȩpü̧'i̧nä̧, yapareu'i̧nä̧ do'ächokü jä̧kua̧, jua̧u̧ ja̧jü̧ jueimä̧ kkä̧kuä̧wä̧ kuyäru'tä, oweja mü̧ä̧ya̧ jü̧nä̧ wa̧ üäre'tänä̧ i̧mi̧ rü̧tä̧rü̧tä̧ do̧ä̧chä̧kua̧.