Apocalipsis 20 - Nuevo Testamento Uwotjüja

Mil años jo̧mȩnä̧ 'kuäopä̧kuȩ tü'kü

¹ Ya̧tȩ á̧gȩ-rü̧, mo̧ro̧jä̧ra̧'a̧ttü̧ i̧mȩyȩwa̧'a̧ topinü̧sä̧, dȩa̧'a̧ 'kuȩya̧ppa̧nü̧ ja̧'a̧ llawiku'i̧nä̧, kärenä̧sa̧ rü̧ä̧sa̧ u̧mü̧nä̧ 'chu̧ä̧rä̧nü̧.

² Ja̧'wa̧nü̧ ja̧'a̧ jua̧u̧ á̧gȩ-mä̧ dragó̧ pättäkuru, täbokü ä̧ka̧ pinü̧ pättäkuru, chutä äwettä, satanás-rü̧ 'chu'ädü mil años jo̧mȩnä̧ kä̧rȩnä̧sa̧nä̧ nü̧'kü rütinü̧.

³ Jua̧u̧ru̧ dȩa̧'a̧ku̧ 'kuȩya̧ppa̧nü̧ ja̧'a̧ku̧ do'opü ikuinä̧ku̧, äpate 'kiyünä̧ ppe'tädü kku̧nu̧, yabonü̧ ttü̧ja̧rü̧ üyapareu juiya pä'ü, mil años jo̧mȩnä̧. Jua̧u̧ 'kuäo'ü o'ka'a, pä'äjita'anü̧ ejädü i̧kuä̧kua̧, suro, a̧'u̧kua̧'a̧tä̧.

⁴ Ja̧'wa̧ta̧nü̧ topinü̧sä̧, ruwo dȩä̧ki̧yä̧nä̧, adiwomȩnä̧ ruwo wetta pä'ü weäwi̧'i̧nä̧u̧ ttü̧'ȩja̧'a̧. Ja̧'wa̧ta̧nü̧ topinü̧sä̧, jitürü'i̧nä̧, Jesú-ru ttukuotomȩnä̧, Dio i̧wȩnȩ ttukuotomȩnä̧ ttu piyä 'kui'ü tti̧kui̧nä̧u̧rü̧'i̧nä̧. Juätümä̧ i̧sa̧ büó betia a̧'kua̧juä̧ isä'kanä̧'i̧nä̧, weinü̧'a̧kuä̧; tti'änä̧'i̧nä̧, ttu̧mü̧nä̧'i̧nä̧ ttütatü pä'ü we'äwokotü pinä̧tü̧ ji̧na̧'a̧. Juätümä̧ pä'äjita'anü̧ a̧'kua̧ri̧'ä̧ja̧'kotü̧, Crito-ku mil años jo̧mȩnä̧ ruwo we'inä̧tü̧.

⁵ Ja̧'wa̧nü̧ ja̧'a̧nä̧, kkorotü wa'ü ikuinä̧tü̧mä̧, mil años ji̧nü̧ o'ka'atä tto'ächinä̧tü̧. Pi̧yȩ ja̧'a̧, ä̧kuo̧mȩnä̧ ttottächä̧kuȩmä̧.

⁶ ¡Eseäkuäwä kka̧'a̧ ä̧kuo̧mȩnä̧ jäwänä̧ tto'ächinä̧tü̧rü̧, juätümä̧ surojüttü 'kȩ'ȩpü̧ ȩmi̧nü̧nä̧ todepätü ja̧'a̧!; yȩnȩta̧'a̧nü̧ wa'ü ttikumä̧, juätürümä̧ rü̧jä̧mo̧ko̧u̧ ttäkuotü; pärokua'aku Dio'i̧nä̧, Crito'i̧nä̧ umüwäyotü sacerdote jü̧nä̧tä̧ ttäkuotü ja̧'wa̧ta̧nü̧ jua̧u̧tä̧ku̧ mil años jo̧mȩnä̧ ruwo wettäkuotü.

⁷ Mil años jo̧mȩnä̧, jo̧mȩnü̧ päi'omȩnä̧, Satanás-mä̧ pä'äjita'anü̧ kärenä̧ ü̧'o̧mȩttü̧mä̧ rä'epü i̧kuä̧wä̧kua̧,

⁸ ja̧'wa̧nü̧ rä'opächü, pi̧jä̧ ttü̧ja̧rü̧ üyaparewä̧kua̧, pi̧jä̧ beipü u̧dü̧nä̧mä̧ o'kajuiyütä, Gog pättomȩ'i̧nä̧, Magog pättomȩ'i̧nä̧ jü̧nä̧, kurä ürowäwa pä'ü su̧ro̧do̧u̧ru̧ ka̧ka̧tü̧. Juätü ü̧ka̧ka̧tä̧u̧mä̧, rü̧ä̧ aje rȩba̧ 'kua̧rü̧nä̧ ttirekuäkuotü.

⁹ Juätümä̧ pi̧jä̧ o'kajuiyünä̧ kue'ächinä̧tü̧, surojüttü 'kȩpi̧nä̧u̧ ttü̧ja̧kuo̧mȩ'i̧nä̧, chutä repeü ütawiyä'i̧nä̧ tto'epü jȩttä̧kuo̧tü̧. Ja̧'wa̧nü̧ jȩtta̧'a̧nä̧, Dio-mä̧ mo̧ro̧jä̧ra̧'a̧ttü̧ okurä mȩyewi̧'ü̧nä̧ jȩpü̧, kkuwü ikuäkuä̧u̧.

¹⁰ Jua̧u̧ äwettä, juätürü yaparewinü̧rü̧mä̧, okurä rü̧a̧rä azufre pättü jueittü kuoaränä̧ do'opü ikuinä̧ku̧, i̧sa̧ büó betia'i̧nä̧, ya̧pa̧rȩwa̧ profeta'i̧nä̧ ttü̧'ȩja̧ränä̧; Juorümä̧ usurä ttȩmä̧wä̧kuo̧tü̧, mo̧ro̧'i̧nä̧, yodo'i̧nä̧ kki̧ä̧mü̧nä̧tä̧.

Täkü rüjí pojokui'ä̧kuȩ wȩnȩ

¹¹ Ja̧'wa̧ta̧nü̧, ji̧yȩtȩ ruwo wȩä̧wä̧kä̧ rü̧ä̧kä̧ tȩä̧kä̧ topinü̧sä̧ ja̧'wa̧ta̧nü̧ juä̧kä̧nä̧ pü̧rü̧'i̧nä̧. Jua̧u̧ ä'ka jo̧mȩttü̧ pi̧jä̧'i̧nä̧, mo̧ro̧jä̧'i̧nä̧ o'kajuiyütä tipächina̧a'a̧, pä'äjita'anü̧mä̧ uwäu juiyünä̧tä̧.

¹² Ja̧'wa̧nü̧ ja̧'a̧ topinü̧sä̧ wa'ü ikuinä̧tü̧rü̧'i̧nä̧, tä̧mü̧rü̧'i̧nä̧, ppo̧'ä̧tü̧rü̧'i̧nä̧, ruwo dȩä̧kä̧ ä'ka jo̧mȩ ttü̧ja̧kua̧'a̧; kuyäru o'tä bawekuächina̧'a̧, ja̧'wa̧ta̧nü̧ kkoro'tä, kkä̧kuä̧wä̧ kuyäru'tä'i̧nä̧ bawekuächina̧'a̧. Wa'inä̧tü̧mä̧ jȩtti̧nü̧'a̧kuä̧ päwi'inä̧u̧, jua̧u̧ kuyäru o'tänä̧ pä'ü rütäwuö'akuä.

¹³ Ja̧'wa̧ta̧nü̧ rü̧ä̧ aje'i̧nä̧, juotottü to'e'ächinä̧tü̧rü̧ ppa̧wä̧di̧na̧'a̧; ja̧'wa̧ta̧nü̧ wa'are'i̧nä̧, wa'are rejuwiyä'i̧nä̧ jua̧u̧nä̧ wa'inä̧tü̧rü̧ ppa̧wä̧di̧na̧'a̧; ja̧'wa̧nü̧ ja̧'a̧mä̧ yotukunä̧ jȩtti̧nü̧'a̧kuä̧ päwi'inä̧u̧.

¹⁴ Juȩnȩ o'komȩnä̧, wa'are'i̧nä̧, wa'are weü'i̧nä̧ okurä rü̧a̧rära̧'a̧ do'opü ikuinä̧u̧. Pi̧yȩku̧mä̧, yȩnȩta̧'a̧nü̧ wa'ü ikuäwä jä̧kua̧'a̧.

¹⁵ Jua'atä do'opü ikuinä̧u̧, kkä̧kuä̧wä̧ kuyäru'tänä̧ tti̧mi̧ jui'ätürümä̧.