Apocalipsis 2 - Nuevo Testamento Uwotjüja

Éfeso igresia-rü weinü̧ wȩnȩ

¹ Éfeso-ra̧'a̧ igresia tta̧wä̧rä̧kuä̧wä̧ i̧sa̧ á̧gȩ-rü̧ wȩyu̧tu̧ we'i: u̧wo̧jua̧'a̧ku̧nä̧ u̧mü̧nä̧ kko̧ro̧mü̧ttü̧nü̧ ta̧ju̧ wotü si̧ri̧'kü̧rü̧ 'chu̧'ä̧rü̧mä̧ ja̧'wa̧ta̧nü̧ kko̧ro̧mü̧ttü̧nü̧ tokäre tȩya̧u̧ kku̧nä̧wä̧ okä oro jäwä 'kä̧tȩnä̧ kue'ächümä̧ pa̧'a̧nü̧ pä'ü:

² Ttümä̧ ukú kuaditäwämä̧ o'kajuiyünä̧ wo̧jua̧sä̧, usurä kuȩmä̧u̧'i̧nä̧, kua̧mi̧ 'ki'ächi'ü kui̧'chü̧'i̧nä̧, jü̧nä̧; ja̧'wa̧ta̧nü̧ surojünä̧ jȩpä̧tü̧rü̧ kuju'kokü'i̧nä̧ wo̧jua̧sä̧. Ja̧'wa̧ta̧nü̧ Apótore-jä̧ pä'ü yaparewätürü, kka̧kuä̧mü̧ topü ku̧wo̧juö̧'i̧nä̧ wo̧jua̧sä̧.

³ Ja̧'wa̧ta̧nü̧ ttü chi̧mi̧ eseu repe'ümä̧ rü̧ȩnä̧ usurä ȩmä̧u̧, käkuädi'oka'a aditä'ijüjä̧.

⁴ Ja̧'wa̧nü̧ ja̧'a̧nä̧'i̧nä̧, ukumä̧ ji̧yȩtȩ chüjü'kokü kku̧nä̧rü̧jä̧: Jua̧u̧mä̧ ä̧kuo̧mȩnä̧ kuesetinü̧ kuesewinü̧ käkuädi'inü̧ ja̧'a̧.

⁵ Ja̧'wa̧nü̧ ja̧'a̧ttü̧ amükuädi, torü ma̧kuä̧chi̧na̧ja̧ pä'ü ja̧'wa̧nü̧ jȩpü̧ jua̧u̧ttü̧ kä'ädi'ü, pä'äji ji̧nü̧ta'anü̧, ä̧kuo̧mȩnä̧ jȩ'kui̧nü̧ kkä̧mä̧dü̧ jȩpi̧; ja̧'wa̧nü̧ ppa̧kuä̧chü̧ juiyüttümä̧, jitätä ja̧'a̧ ichi'opo'ü, tȩya̧u̧ kku̧nä̧wä̧ kuiäre ku̧ju̧nä̧rü̧ 'cho̧di̧pä̧kua̧jä̧.

⁶ Ja̧'wa̧nü̧ ja̧'a̧nä̧ pi̧yȩ kkü̧nä̧rü̧jä̧, nicoraíta wotü jȩttü̧, ukumä̧ kkü'koküjä̧, ttü chüjü'küjuiyüta'anü̧.

⁷ Ä̧ju̧kuä̧kuä̧wä̧ kku̧nä̧rü̧mä̧, Dio i̧sa̧ Epíritu igresia wotürü jiäu ä̧ju̧kui̧: Pi̧yȩ Isó juo'epürümä̧, kkä̧kuä̧wä̧ dauttü ukua pä'ü chi̧yä̧kua̧, Dio ü̧jo̧mȩ paraíso pättomȩ kkä'ko kkäittü.

Esmirna-ra̧'a̧ igresia-rü weinü̧ wȩnȩ

⁸ Esmirna-ra̧'a̧ igresia wotürü tta̧wä̧rä̧kuä̧wä̧ i̧sa̧ á̧gȩ-rü̧ wȩyu̧tu̧ we'i: Ä̧kuo̧mȩnä̧tä̧ päi'ünä̧ kki̧nü̧mä̧, yodoji rüjí mo̧ro̧'i̧nä̧ ü̧jä̧kua̧mä̧, wa'ü'i̧nä̧ ikuina̧'a̧nä̧ tto'ächinü̧mä̧, pa̧'a̧nü̧ pä'ü:

⁹ Aditü usurä kuȩmä̧u̧mä̧ ja̧'wa̧ta̧nü̧ usurä i̧sa̧ wokü'i̧nä̧ (jua'akumä̧ ru̧wa̧ kua'anä̧) wo̧jua̧sä̧ ja̧'wa̧ta̧nü̧ judío-mä̧ ttoka'anä̧, ujutumä̧ judío-jä̧, ya̧'a̧wä̧'chü̧ pättü'i̧nä̧ ku̧wo̧jua̧'a̧mä̧ wo̧jua̧sä̧, Satanás-rü̧ ukuokuäkuäwode jü̧nä̧tä̧ wotü pä'ü.

¹⁰ Usurä kuȩmä̧wä̧kuȩmä̧ yekuekuätukuä. Äwettämä̧ ukututtü yotüterü kärenä̧ra̧'a̧ 'chuttädünä̧ jȩä̧kua̧, kka̧kuä̧mü̧ toätukuaku pä'ü ja̧'wa̧ta̧nü̧ to̧mü̧rȩ mo̧ro̧ jo̧mȩnä̧ usurä kuȩmä̧wä̧kuo̧tü̧jä̧. Wa'ü kuikuomȩbü päi'ünä̧, kua̧mi̧ 'ki'ächi'ü kkä̧wi̧ ja̧'wa̧nü̧ jo̧mȩnä̧ a̧'kua̧rä̧kuä̧wä̧ premio pättü chi̧yä̧kua̧jä̧.

¹¹ Ä̧ju̧kuä̧kuä̧wä̧ kku̧nä̧rü̧mä̧, igresia wotürü Epíritu päü ä̧ju̧kui̧: Wȩnȩttü̧ abo 'kuä'o'ü iso juo'epürümä̧, yȩnȩta̧'a̧nü̧ wa'ü ikuäwämä̧ wa'ü ikuokü jä̧kua̧.

Pégamo-ra̧'a̧ igresia-rü weinü̧ wȩnȩ

¹² Pégamo-ra̧'a̧ igresia wotürü tta̧wä̧rä̧kuä̧wä̧ i̧sa̧ á̧gȩ-rü̧ wȩyu̧tu̧ we'i: kurodä päteku so̧dä tä̧o̧dä kku̧nä̧rü̧mä̧ pa̧'a̧nü̧ pä'ü:

¹³ Ukú ku̧jo̧mȩmä̧ chu̧wo̧juä̧ku̧jä̧, äwettä uruwo dȩä̧kä̧nä̧ weomȩ ku̧ja̧'a̧mä̧. Ja̧'wa̧nü̧ ja̧'a̧nä̧ Ttü chi̧mi̧ 'kiyünä̧ 'chu̧'ä̧rä̧kuä̧u̧jä̧, ttürü ukuotürü Antipa-rü, kuä'ü ttikuinü̧ mo̧ro̧'i̧nä̧, 'kiyünä̧ kki̧nü̧jä̧, juȩnȩmä̧ satanás-mä̧ ü̧ja̧'a̧nä̧.

¹⁴ Ja̧'wa̧nü̧ ja̧'a̧nä̧, ji̧yȩtȩ kkorojuei a̧'u̧ku̧nä̧ jȩpü̧jä̧, ttü chüjü'kokü jäwä: Balac jȩpü̧ ü̧ji̧nü̧ jȩpä̧tü̧rü̧ kku̧nä̧rü̧jä̧, jua̧u̧mä̧ wo̧juȩti̧nü̧ Barac-rümä̧, Irae ttü̧ja̧rü̧ ma̧ttä̧chü̧nä̧ jȩa̧ pä'ü. Ja̧'wa̧nü̧ jȩpü̧mä̧ ttü̧ä̧nä̧wo̧tü̧ tti̧mi̧nä̧ ukuoku jȩä̧kuä̧wä̧ ttukunä̧'i̧nä̧, nä̧tü̧ku̧ jȩttä̧'chä̧kuä̧u̧nä̧'i̧nä̧ we'inü̧.

¹⁵ Ja̧'wa̧ta̧nü̧ kku̧nä̧rü̧jä̧, yotukunä̧rü̧ nicoraítas jȩttü̧ jäwänä̧ jȩpä̧tü̧rü̧.

¹⁶ Ja̧'wa̧nü̧ ja̧'a̧ttü̧, jua̧u̧ttü̧ kä'ädi'i; ja̧'wa̧nü̧ kä'ädi'ü ppa̧kuä̧chü̧ juiyüttümä̧, jitätä ja̧'a̧ chi̧chä̧kua̧sä̧, juätuku churowäwa pä'ü, chänä̧ kko̧dä kurodänä̧.

¹⁷ Ä̧ju̧kuä̧kuä̧wä̧ kku̧nä̧rü̧mä̧, igresia wotürü Epíritu päü ä̧ju̧kui̧: Surojü abo 'kuä'o'ü iso juo'epürümä̧, maná pättü dajü kku̧nä̧wä̧ttü̧ ukua pä'ü chi̧yä̧kua̧; ja̧'wa̧ta̧nü̧ ido'ki a̧'u̧kuo'ki teo'ki'i̧nä̧ chi̧yä̧kua̧, ji̧yȩtȩ i̧mi̧ jareü wȩyu̧kua̧'a̧ po̧'ki, jua̧u̧ i̧mi̧mä̧ ya̧tȩ'i̧nä̧ jȩru̧pa̧, chutä juo'ki ȩmü̧tä̧tä̧ u̧wo̧juä̧kua̧.

Tiatira-ra̧'a̧ igresia-rü weinü̧ wȩnȩ

¹⁸ Tiatira-ra̧'a̧ igresia wotürü tta̧wä̧rä̧kuä̧wä̧ i̧sa̧ á̧gȩ-rü̧ wȩyu̧tu̧ we'i: ü'äriyä'i̧nä̧ okurä jä̧'i̧nü̧'a̧nü̧ wa̧mä̧, ü̧jä̧pi̧yä'i̧nä̧ bro̧ce pättü säruwächi'ünä̧ jȩpü̧ ikuäwa'a jä̧'i̧nü̧'a̧nü̧ wa̧, Dio i̧tti̧mä̧, pa̧'a̧nü̧ pä'ü:

¹⁹ O'kajuiyünä̧ kuaditäwämä̧, eseu jȩ'ku̧mä̧, kua̧'kua̧ ku̧wȩnä̧rü̧'i̧nä̧, 'kuäkuächi'oka'a kui̧'chü̧'i̧nä̧ ja̧'wa̧ta̧nü̧ ä̧kuo̧mȩnä̧ ji̧no̧mȩttü̧ abonä̧nü̧ jȩ'ku̧'i̧nä̧ wo̧jua̧sä̧.

²⁰ Ja̧'wa̧nü̧ ja̧'a̧nä̧, ukuru chüjü'kokü ji̧yȩtȩ a̧'u̧ku̧nä̧ kku̧nä̧rü̧sä̧: Juäju profeta isajusä pä'äkuäwäju Jezabe-rü, chu̧wo̧juȩtä̧u̧rü yaparetü nä̧tü̧rü̧'i̧nä̧, u̧mä̧tü̧rü̧'i̧nä̧ jȩttä̧'chü̧nä̧ jȩpü̧ kkä̧nü̧'i̧nä̧, ttü̧ä̧nä̧wo̧tü̧rü̧ sacrificio pättü ukuoku jȩä̧kuä̧wä̧'i̧nä̧ ttukunä̧ jȩpä̧'chä̧ju̧ru̧ ja̧'a̧tä̧ to'kuomȩnä̧.

²¹ Jua̧u̧ttü̧ käjädi'a pä'ü tta̧'ä̧ri̧nü̧sä̧ ja̧'wa̧nü̧ ja̧'a̧nä̧ u̧mä̧tü̧rü̧ jȩjä̧'chü̧'i̧nä̧, kkorotü ttü̧ä̧nä̧wa̧rü̧ kkesetü'i̧nä̧ käjädi'a pä'okoju.

²² Ja̧'wa̧nü̧ ja̧'a̧ttü̧, kkü̧rä̧mä̧dü̧nä̧ päi'ünä̧ na̧jä̧chü̧nä̧ jȩpü̧ kkä̧nü̧'i̧nä̧, juäju jü̧ta̧'a̧nü̧ suronä̧ jȩpä̧tü̧rü̧mä̧, rü̧ȩnä̧ usurä ttȩmä̧u̧nä̧ jȩchä̧kua̧sä̧. Jua̧u̧ surojü kättädi'ü juiyüttümä̧.

²³ Ja̧'wa̧ta̧nü̧ kki̧tti̧mü̧rü̧mä̧ wa'ü ttikunä̧ jȩchä̧kua̧sä̧. Ja̧'wa̧nü̧ jo̧mȩnä̧ igresia wotümä̧ o'katoi'ünä̧ ttu̧wo̧juä̧kuo̧tü̧, tta̧mü̧kuädü'i̧nä̧, tta̧mi̧ iso'kinä̧ kka̧ku̧'i̧nä̧ chu̧wo̧juö̧mä̧; ja̧'wa̧nü̧ ja̧'a̧ttü̧ yotukunä̧rü̧ chi̧yä̧'chä̧kua̧sä̧ jȩpü̧ ttü̧ji̧nü̧'a̧kuä̧.

²⁴ Ja̧'wa̧ta̧nü̧ ukutu, Tiatira-nä̧ kka̧kuä̧tü̧rü̧, juäju kku̧wo̧juȩtü̧nä̧ 'cho̧ko̧tü̧rü̧ ja̧'wa̧ta̧nü̧ kkorotü Sataná ü̧dä̧pä̧rȩ pättü ttu̧wo̧jui̧'a̧ pä'okotü pä'ijätürü, ji̧yȩtȩtä̧ we'üsä:

²⁵ Tesetinü̧nä̧mä̧ yabonü̧tä̧, 'kiyünä̧ 'chu̧'ä̧rä̧kuä̧u̧ tti̧'cha̧ pä'ü, ttü chichomebü päi'ünä̧.

²⁶ Ja̧'wa̧nü̧ ja̧'a̧ttü̧ surojü abo 'kuä'o'ü rüjí mo̧ro̧bü päi'ünä̧ ttü chaditäwä 'chu̧'ä̧rä̧kuä̧u̧ru̧mä̧, ttü̧ja̧ tti̧rȩji̧yä̧ o'kajuiyünä̧ wettünä̧ ttukuo chi̧yä̧kuä̧u̧,

²⁷ Ja̧'wa̧nü̧ ja̧'a̧ kuoräu i̧so̧'kȩnä̧ wettäkuotü ja̧'wa̧nü̧ jo̧mȩnä̧, redä'ka i̧so̧'ta̧ dü'ü ttikua'a jä̧'i̧nü̧'a̧nü̧ jä̧kua̧'a̧. Ttü Chä'ottü chȩmi̧nü̧ta'anü̧.

²⁸ Ja̧'wa̧ta̧nü̧ siri'ko, mo̧ro̧ juoa'a i̧sa̧rü̧'i̧nä̧ chi̧yä̧kuä̧u̧.

²⁹ ¡Ä̧ju̧kuä̧kuä̧wä̧ kku̧nä̧rü̧mä̧, igresia wotürü Epíritu päü ä̧ju̧kui̧!