Apocalipsis 19 - Nuevo Testamento Uwotjüja

¹ Jua̧u̧ 'kuäopäji o'ka'a, mo̧ro̧jä̧ra̧'a̧ttü̧ ttü̧ja̧ rekuätü pä̧i̧ku̧nä̧ wotta'a ä̧ju̧kui̧nü̧sä̧: «¡Aleluya! ra̧wä̧pi̧jü̧ttü̧ kki̧'i̧kuä̧'i̧nä̧, uruwo'i̧nä̧ ja̧'wa̧ta̧nü̧ ujuru'i̧nä̧ tü̧ä̧nä̧wa̧ Dio jäwätä ja̧'a̧,

² Isopäi'ünä̧ Jua̧u̧ adiwomȩnä̧ jȩü̧mä̧, jueünä̧tä̧, isopäi'ünä̧tä̧ ja̧'a̧; isopäi'ünä̧ kkidepä iyä'chäkuäu jȩpä̧'i̧jä̧ju̧, isaju büarümä̧ pi̧jä̧ ttü̧ja̧rü̧ surojuo'epinä̧ju̧ru̧mä̧; Dio umüwäyotü wa'ü ttikuinü̧ mikuäwächünä̧, juäjuru ro̧'ȩpä̧ji̧ Dio-mä̧.»

³ Pä'äjita'anü̧ pä'inä̧tü̧: «¡Aleluya! jü̧nä̧. Ja̧'wa̧nü̧ ja̧'a̧, juäju kuojarä isoppamä̧ 'kuäopünä̧ mo̧ro̧ kki̧ä̧mü̧nä̧tä̧ 'chawädäkuoppa.»

⁴ Ja̧'wa̧ta̧nü̧ Veintikuatro-nü̧ wotü a̧ci̧a̧nu̧tu̧'i̧nä̧, pa̧ja̧kuä̧nü̧ wotü a̧'kua̧rä̧tü̧'i̧nä̧ rȩjȩbü päi'ünä̧ ja̧rȩyu̧ pä'i'ü, Dio uruwo deäkänä̧ pü̧rü̧ eseäkuäwinätü̧. Pa̧'a̧nü̧ pä'ünü̧: «¡Amȩ́! ¡Aleluya!» jü̧nä̧.

⁵ Ja̧'wa̧nü̧ ja̧'a̧, ruwo dȩä̧kä̧ttü̧ ji̧yȩtȩ rä̧mi̧pi̧na̧'a̧: «¡O'katoi'ünä̧ umüwäyotü wotümä̧ o'katoi'ünä̧ ukuotätümä̧, tä̧mü̧'i̧nä̧, ppo̧'ä̧tü̧'i̧nä̧ Dio-rü eseäkuäwätukui!»

Eseu ra̧tti̧nü̧ wȩnȩ

⁶ Ja̧'wa̧ta̧nü̧ ttü̧ja̧ rekuätü tti̧wȩnȩ rä̧mi̧pa̧'a̧, däyä tawipa'a, ku'upä kürüächa'a jä̧'i̧nü̧'a̧nü̧ ä̧ju̧kui̧nü̧sä̧. Juätümä̧ pä'inä̧tü̧: «¡Aleluya! Isopäi'ünä̧ Tu̧ru̧wa̧, o'kajuiyünä̧ ju̧ru̧wa̧ Dio ja̧'a̧ täkü kkä̧mä̧dü̧ ruwo we'ümä̧.

⁷ Rü̧ȩnä̧ teseäkuäwätukuarü, jua̧u̧tä̧ jäwätä ja̧'a̧, tesewarü pä'ümä̧; oweja mü̧ä̧ya̧ jü̧nä̧ wa̧ ü'käu mo̧ro̧ rȩbȩä̧kuä̧wa̧'a̧. Irekua ȩmä̧kua̧ju̧mä̧, jo̧mȩnü̧tä̧ kkä̧ju̧:

⁸ Ja̧'wa̧ta̧nü̧ pü̧jä̧ta̧ lino adiwäjuei i̧sä̧ta̧, tȩä̧ta̧, kkȩdȩpä̧ta̧ kkü̧'ka̧tä̧wa̧ pä'ü weäwi'äjäkua, jua̧u̧ lino o̧ta̧mä̧, chutä umüwäyotü, ȩmi̧nä̧u̧ adiu jȩpü̧ ttü̧ja̧ku̧ tü'kü ja̧'a̧.»

⁹ Ja̧'wa̧nü̧ ja̧'a̧ á̧gȩ-mä̧ päinä̧ku̧sä̧: «Wȩyu̧ti̧: Eseäkuäwä kka̧'a̧, jua̧u̧ oweja mü̧ä̧ya̧ jü̧nä̧ wa̧ ü'käu pä'kärinä̧ i̧'cha̧ pä'ü ä̧tȩkuo̧tü̧rü̧mä̧.» Yabonü̧ päinä̧ku̧sä̧: «Pi̧yȩ ja̧'a̧ Dio i̧wȩnȩ, jueü wȩnȩmä̧.»

¹⁰ Á̧gȩ-rü̧ ä'ka jo̧mȩ chiwe'kiyunä̧ pä̧mä̧dü̧, chesewarü pä'ü jȩchä̧ku̧ päinä̧ku̧sä̧: Ja̧'wa̧nü̧mä̧ jȩ'kuä̧, ttü'i̧nä̧ ukuta'a̧nü̧ u̧mü̧wä̧ya̧sä̧, ku̧jä̧wa̧tü̧ Jesú jiäwinü̧nä̧ ukuotü kka̧kuä̧tü̧ jü̧ta̧'a̧nü̧ Dio u̧mü̧wä̧ya̧sä̧, Dio-rütä esewi. Isopäi'ünä̧ Jesú wo̧juȩtü̧ jiäwinü̧tä̧ ja̧'a̧ profeta wotürü yaboku tti̧'chü̧nä̧ jȩü̧mä̧.

Cabayu tȩ'a̧ ütü'kü

¹¹ Ja̧'wa̧ta̧nü̧ mo̧ro̧jä̧ bawekua'a topinü̧sä̧; juȩnȩ cabayu tȩ'a̧rü̧ ü̧ja̧'a̧ topinü̧sä̧, jua̧u̧ u̧wä̧mȩ wü̧mä̧ mikuinü̧, päümä̧ jȩpü̧ ja̧'wa̧ta̧nü̧ jueü wȩnȩtä̧ wa̧, isopäi'ünä̧ jueünä̧tä̧ we'ü, kurä ürowäwa'attü.

¹² Ü'äriyämä̧ okurä jä̧'i̧nü̧'a̧nü̧ kuo'inü̧, Unä̧tä̧ rü̧ȩnä̧ corona pättü u'uttäwä wȩnä̧ri̧nü̧ ja̧'wa̧ta̧nü̧ ji̧yȩtȩ i̧mi̧ chutätä u̧wo̧juö̧ wȩyu̧kua̧'a̧ rü̧tä̧ri̧nü̧.

¹³ Ü̧'ka̧tä̧wä̧ta̧mä̧ ttukuoja 'kukuȩkuä̧ta̧ 'ka̧tä̧wi̧nü̧ ja̧'wa̧ta̧nü̧ i̧mi̧mä̧: «Dio i̧wȩnȩ» pä'ü mikuinü̧.

¹⁴ Mo̧ro̧jä̧nä̧ su̧ro̧do̧u̧, o'ka'anä̧ 'chi̧nä̧tü̧, lino pättü adiwäjuei, rü̧ȩnä̧ teü, idikuokü o̧ta̧ 'ka̧tä̧wä̧tü̧, cabayu-tü̧ te'ätü ttu̧wä̧mȩ wȩjü̧.

¹⁵ Ättümä̧ kurodä so̧o̧dä räopinä̧ku̧, juodänä̧ o'katoi'ünä̧ pi̧jä̧ ttü̧ja̧rü̧ ȩma̧ pä'ü ji̧na̧'a̧. Jua̧u̧mä̧ rü̧ȩnä̧ ujuruku wȩä̧kua̧. Ja̧'wa̧ta̧nü̧ jua̧u̧tä̧ jä̧kua̧'a̧ uwa i̧'kuȩ'kuä̧kua̧mä̧ uwa isoya räopächünä̧, Dio o'kajuiyünä̧ ju̧ru̧wa̧ rü̧ȩnä̧ ü̧ra̧wä̧ro̧ya räopächü wȩnȩkuä̧cha̧'a̧ jua̧u̧mä̧.

¹⁶ Ja̧'wa̧ta̧nü̧ ü̧'ka̧tä̧wä̧ta̧nä̧'i̧nä̧, üjanä̧'i̧nä̧ pa̧'a̧nü̧ i̧mi̧ wȩyu̧kua̧'a̧ rü̧tä̧ri̧nü̧: «Ruwotü'i̧nä̧ ttu̧ru̧wa̧ ja̧'wa̧ta̧nü̧ tturuwotü'i̧nä̧ ttu̧ru̧wa̧,» jü̧nä̧.

I̧sa̧ büó betia-rü abo 'kuäo'inü̧ tü'kü

¹⁷ Ja̧'wa̧ta̧nü̧ ya̧tȩ á̧gȩ mo̧ro̧ kkä̧wa̧nä̧ kkä̧nü̧, o'katoi'ünä̧ ppi̧yu̧ru̧ mo̧ro̧jä̧nä̧ ko̧'ä̧rä̧tü̧rü̧, pä̧i̧ku̧nä̧ woa'a topü kkä̧nü̧ ä̧ju̧kui̧nü̧sä̧: «ichü ka̧ka̧kuä̧tu̧kui̧, Tu̧ru̧wa̧ Dio rü̧ȩnä̧ ukuo jäwä u̧kuȩ ukuomȩ,

¹⁸ ruwotü ttidepä'i̧nä̧, su̧ro̧do̧u̧ tturuwotü ttidepä'i̧nä̧, ttü̧ja̧ juruwätü ttidepä'i̧nä̧, cabayu-tü̧ ttidepä'i̧nä̧, juätünä̧ wä̧tü̧ ttidepä'i̧nä̧, o'katoi'ünä̧ ttidepä'i̧nä̧; ttiweyenä̧ kka̧kuä̧tü̧ ttidepä'i̧nä̧, usurä ttȩmä̧u̧nä̧ wȩttä̧u̧ ttidepä'i̧nä̧, ppo̧'ä̧tü̧ ttidepä'i̧nä̧, tä̧mü̧ ttidepä'i̧nä̧, kukuätukua,» jü̧nä̧ rä̧mi̧pi̧na̧'a̧.

¹⁹ Ja̧'wa̧ta̧nü̧ i̧sa̧ büó betia pättäkurü'i̧nä̧, pi̧jä̧nä̧ttü̧ ruwotü ttu̧wo̧juȩtä̧u̧ su̧ro̧do̧u̧ku̧ ürowäwa pä'ü ü̧ka̧ka̧kuä̧ja̧'a̧ topinü̧sä̧; cabayu-nä̧ wuö̧rü̧, umüwäyotü su̧ro̧do̧u̧ wa̧rü̧ rowäu ttikua pä'ü.

²⁰ I̧sa̧ büó betia-rü 'chu'ädümä̧, jua̧u̧tä̧ku̧ yo̧mȩtȩnä̧ profeta yapareu, jȩtto̧kü̧ juei jȩpü̧, i̧sa̧ büó weü rütä'chü kkä̧nü̧ ja̧'wa̧ta̧nü̧ a̧'kua̧juä̧ isä'kanä̧ ttiwe'kiyunä̧ pȩjä̧mü̧ tteseunä̧ jȩpi̧nü̧rü̧'i̧nä̧ 'chu'ädinä̧tü̧. Pitü ta̧ju̧mä̧ tta̧'kua̧ra̧'a̧nä̧ do'opü ikuinä̧u̧, okurä rü̧a̧ränä̧, azufre pättünä̧ kuoaränä̧.

²¹ Ja̧'wa̧ta̧nü̧ kkorotümä̧ to'e'ächinä̧tü̧, cabayu-nä̧ wuö̧ ättü räopodä kurodänä̧tä̧ ja̧'wa̧ta̧nü̧ o'katoi'ünä̧ ppi̧yu̧mä̧, juätü ttidepä kuä̧nü̧ eseäkuäwinä̧tü̧.