Apocalipsis 18 - Nuevo Testamento Uwotjüja

Babironia ütawiyä ma̧ä̧chi̧na̧'a̧

¹ Jua̧u̧ 'kuäopäji o'ka'a, kka̧ra̧ á̧gȩ mo̧ro̧jä̧ra̧'a̧ttü̧ i̧mȩyȩwi̧'a̧'a̧ topinü̧sä̧; jua̧u̧mä̧ rü̧ȩnä̧ ukuo kku̧nä̧ri̧nü̧, i̧tȩya̧u̧ttü̧ pi̧jä̧nä̧mä̧ tȩya̧wi̧na̧'a̧.

² Pä̧i̧ku̧nä̧ wopinü̧: ¡Täkü ma̧ä̧chä̧ja̧'a̧, täkü ma̧ä̧cha̧'a̧ ukuo isomȩ Babironia-mä̧! ¡Suropätü ä̧wȩttü̧, demonio pä̧ttä̧u̧ ttojusode jü̧nä̧tä̧ juoächäja'a, o'katoi'ünä̧ epíritu-tu̧ suropätü ttü̧ja̧kuo̧mȩ jü̧nä̧tä̧, ja̧'wa̧ta̧nü̧ o'katoi'ünä̧ ppi̧yu̧ suropätü, ttu̧so̧ro̧tä̧u̧ ttü̧ja̧kuo̧mȩ jü̧nä̧tä̧!

³ Ja̧'wa̧ta̧nü̧ ruwäkuiyä pa̧ja̧ku̧nä̧, juäjutäku kkü̧ä̧nä̧wo̧tü̧rü̧ eseäkuäwinä̧tü̧; Ja̧'wa̧ta̧nü̧tä̧ pi̧jä̧nä̧ttü̧ ruwotü'i̧nä̧ jȩpi̧nä̧tü̧, «Pi̧jä̧ttü̧ ruwotümä̧ juäjuttütä ruwotü juo'inä̧tü̧, pä̧wä̧rü̧jü̧, ttidepä weü ȩmü̧, iso juottepa pä'ümä̧.»

⁴ Ja̧'wa̧ta̧nü̧ mo̧ro̧jä̧ra̧'a̧ttü̧, kkoro rä̧mi̧pa̧'a̧ ä̧ju̧kui̧nü̧sä̧: «Ukutumä̧ ttü chumüwäyotüjä̧, juorü rä'opächätukui, jua̧u̧ ütawiyätäku, suronä̧ jȩttä̧'i̧jü̧nä̧ ppäkuächi'ätuku juiyäkua'anü̧ ja̧'wa̧ta̧nü̧ usurä ttȩmä̧wo̧mȩnä̧, juätuku surojünä̧ kuiwachätuku juiyäkua'anü̧;

⁵ Juätü suronä̧ jȩttä̧'i̧jü̧mä̧ mo̧ro̧jä̧ra̧'a̧bü päi'ünä̧ rȩbȩä̧kuä̧wä̧'i̧ja̧'a̧, ja̧'wa̧nü̧ ja̧'a̧ttü̧, ¡Dio-mä̧ suronä̧ jȩttä̧'i̧jü̧mä̧ ji̧yȩtȩ'i̧nä̧ unichi'o̧ko̧u̧!

⁶ Juäjurumä̧, kkorotürü kkiyinü̧ ta̧'a̧nü̧ iyätukuiju; suronä̧ jȩji̧nü̧ttü̧'i̧nä̧ todäre jo̧mȩnä̧ kki̧mi̧täunä̧ jȩpä̧tu̧kui̧ju̧; kkorotürü kkaja pä'ü wiwatü kkiyino̧mȩttü̧'i̧nä̧, todäre jo̧mȩ yabonä̧ reünä̧ wiwatü iyätukuiju;

⁷ Kka̧mü̧nä̧ pa̧ja̧tü̧ ukuo te'äkuäu, kkidepä wea'aku eseu kki̧nä̧ju̧, rü̧ȩnä̧ ajuäu, usurä kkȩmä̧u̧nä̧ jȩpä̧tu̧kui̧ju̧. Jua'amä̧ kka̧mi̧ iso'kinä̧ pa̧'a̧nü̧ päja'attü̧: Ttümä̧, pȩnȩmä̧ ruwaju jü̧nä̧ pä̧ju̧sä̧, ttümä̧ rekuamä̧ku̧sä̧, usurä'i̧nä̧ ȩmä̧wo̧ko̧ju̧sä̧ pä'ü kka̧mü̧kuäda'attü̧.

⁸ Ja̧'wa̧nü̧ ja̧'a̧ttü̧, ya'ute mo̧ro̧tä̧ ma̧ä̧mä̧kua̧ju̧ usurä ȩmä̧kuä̧wä̧mä̧: Wa'are'i̧nä̧, ajuäkuäwä'i̧nä̧, ppäi'i̧nä̧, jü̧nä̧ ja̧'wa̧nü̧ jȩpü̧ okuränä̧ kkuwü ikuäwäkuaju; Isopäi'ünä̧ Tu̧ru̧wa̧ Dio juäjuru tä̧bo̧tü̧ ro̧'ȩpü̧mä̧, rü̧ȩnä̧ ujuru kku̧nä̧rü̧ ja̧'a̧ttü̧.»

⁹ Ja̧'wa̧ta̧nü̧ pi̧jä̧nä̧ttü̧ ruwotü juäjutäku surojü, ttidepä esewomȩnä̧ kka̧kui̧nä̧tü̧mä̧, juäju kuo'ü kkikua'a okurä isoppa 'chawäda'a topü, rü̧ȩnä̧ ttajuäkuäwäkuotü,

¹⁰ Juäju usurä kkȩmä̧u̧, ye'eku otonä̧ kkä̧nü̧, pättäkuotü: «¡Isottü̧, isoó, ukumä̧, ütawiyä rü̧ä̧'i̧jo̧mȩ Babironia-mä̧, kujuru rü̧ȩnä̧ kku̧ju̧nä̧rä̧'i̧jo̧mȩmä̧! Tta̧'a̧nü̧ pä'ü, ya'utekutä ukuru tä̧bo̧kuä̧mä̧ rȩbȩwä̧ku̧jä̧ttü̧.»

¹¹ Ja̧'wa̧ta̧nü̧ pi̧jä̧nä̧ttü̧, järe ruwotü'i̧nä̧ a̧'u̧ ttu'u ttajuäkuäwäkuotü jua̧u̧ ütawiyä ja̧'wa̧nü̧ ji̧yä̧u̧, jua'amä̧ juorü ttiäre ttȩmä̧'i̧ja̧'a̧ ttȩmo̧kä̧kua̧'a̧ jä̧u̧:

¹² Oro-ttü'i̧nä̧, pärätättü'i̧nä̧, ido'kiyä rü̧ȩnä̧ mikuäuttü'i̧nä̧, ido'kiyä perlas pättü o'kittü'i̧nä̧, pü̧jä̧ti̧yu̧ adiwä juei lino pättüttü'i̧nä̧, púrpura pättüttü'i̧nä̧, seda pättüttü'i̧nä̧, tuwuöttü'i̧nä̧; o'kajuiyütä dauwiyä a̧mȩu̧ttü̧'i̧nä̧; marfil pättüttü'i̧nä̧, dauwiyä rü̧ȩnä̧ mikuäuttü'i̧nä̧, bronce pättüttü'i̧nä̧, kuoräuttü'i̧nä̧ ja̧'wa̧ta̧nü̧ mármol pättü ido'kiyättü'i̧nä̧;

¹³ ja̧'wa̧ta̧nü̧ canela pättüttü'i̧nä̧, rü̧ȩnä̧ a̧mȩu̧ttü̧'i̧nä̧; incienso pättüttü'i̧nä̧, a̧mȩu̧ttü̧'i̧nä̧ ja̧'wa̧ta̧nü̧ resina pättüttü'i̧nä̧; vino-ttü̧'i̧nä̧, a̧dȩ oyattü'i̧nä̧, pan adikuä a̧ppi̧yä̧ttü̧'i̧nä̧ ja̧'wa̧ta̧nü̧ trigo-ttü'i̧nä̧; äjikuäkuäwotüttü'i̧nä̧, oweja-tü̧ttü̧'i̧nä̧, cabayu-tü̧ttü̧'i̧nä̧, karukiyättü'i̧nä̧; usurä ttȩmä̧u̧nä̧ we'äwotüttü'i̧nä̧, juätümä̧ ttü̧ja̧ ja̧'a̧.

¹⁴ Ja̧'wa̧nü̧ ji̧yä̧u̧, ütawiyä topü pättäkuotü: ¡U̧wä̧ju̧ adiu rü̧ȩnä̧ kuju'kinü̧mä̧, täkü juiya'a; adiwä juei kku̧ju̧nä̧ri̧nü̧'i̧nä̧, rü̧ȩnä̧ pärätä ru̧wa̧ kuinü̧'i̧nä̧ yorisotä po̧kui̧po̧kü̧ kuä̧kua̧jä̧!

¹⁵ Jua̧u̧ Babironia ütawiyättü ȩmü̧ iyä'chü, ruwotü juo'inä̧tü̧mä̧, otonä̧tä̧ kkä̧nü̧ to̧ttä̧rä̧kuo̧tü̧, usurä ȩmä̧wi̧yä̧u̧, rü̧ȩnä̧ a̧'u̧ttü̧ ttajuäkuäwäkuotü, jȩttü̧ juiyünä̧ jä̧u̧.

¹⁶ Pa̧'a̧nü̧ pättäkuotü: «¡Isottü̧, isoó, uku ütawiyä rü̧i̧no̧mȩjä̧! lino pättü adiwäjuei i̧sä̧ta̧ttü̧, púrpura pättü tuwuttü, escarlata pättüttü, oro-ttü ja̧'wa̧ta̧nü̧ ido'kiyä adiwä jueittü, adiu a̧'kua̧ku̧ o'kittü, 'ka̧tä̧wi̧'ü̧ kki̧nü̧jä̧, ukú ütawiyämä̧.

¹⁷ ¡Isopäi'ünä̧, suro, ya'ute hora-nä̧tä̧ kuiäre pärätämä̧ to'e'ächüjä̧!» O'katoi'ünä̧ woi'kiyu kui̧'ȩpä̧ri̧nä̧tü̧'i̧nä̧, aje rü̧o̧to jäyotonä̧ kue'ächinä̧tü̧'i̧nä̧, päjäre'ka to̧pä̧ri̧'ȩnä̧tü̧'i̧nä̧, o'katoi'ünä̧ aje rü̧o̧tonä̧ aditinä̧tü̧mä̧ otonä̧tä̧ kka̧kui̧pi̧nä̧tü̧,

¹⁸ ütawiyä kuoa'a, isoppa to̧pä̧rü̧, wopinä̧tü̧: «¿Tȩnȩ́jä̧ttü̧, kkoro ütawiyä pi̧yȩ ütawiyä rü̧ä̧'i̧jo̧mȩku̧ üyoreku'anü̧ jo̧mȩmä̧?»

¹⁹ Ja̧'wa̧nü̧ pä'ünü̧, ttünä̧ rȩjȩ i̧sa̧ppȩ wȩnä̧u̧, ajuäkuäu kkä̧nü̧ a̧'u̧ ttu'unü̧, wopinä̧tü̧: ¡isottü̧, isoó, ütawiyä rü̧ä̧'i̧jo̧mȩmä̧! Ukú kuiäre pärätänä̧ ruwotü juo'inä̧tü̧, o'katoi'ünä̧ aje rü̧o̧tottü ttuwe'kiyunä̧ aditä'ijätümä̧, ¡yoriso, ya'ute hora-nä̧tä̧, to'e'ächäjätü!

²⁰ Jua̧u̧ ütawiyä topü eseäkuäwätukui, ukutu mo̧ro̧jä̧nä̧ kka̧kuä̧tü̧'i̧nä̧; ja̧'wa̧ta̧nü̧ ukutu surojü jui'ätü'i̧nä̧, apótore wotü'i̧nä̧, profeta wotü'i̧nä̧, isopäi'ünä̧ Dio-mä̧, jua̧u̧ ütawiyä tä̧bo̧tü̧mä̧, ukuturu adiu ppä'ädü jȩa̧'a̧, jua̧u̧mä̧.

²¹ Ja̧'wa̧nü̧ ja̧'a̧, ya̧tȩ á̧gȩ ju̧ru̧wa̧ ido'ki, trigo kkäräwä ido'ki jä̧'i̧nü̧'a̧nü̧ jo'ki kä'epo'ü, rü̧ä̧ ajenä̧ iku pä'inü̧: «Ukurumä̧, pa̧'a̧nü̧ dȩa̧'ku̧ do'opü ikuäwäkuomȩjä̧, Babironia, ütawiyä rü̧o̧mȩmä̧, ja̧'wa̧nü̧ jü̧ o'ka'a, yorisotä pä'äjita'anü̧mä̧ toäkuäwokome jä̧kuo̧mȩjä̧.

²² Täkü, ukuttümä̧, arpa pättü'i̧nä̧, flauta pättü'i̧nä̧, trompeta pättü'i̧nä̧, täkü ä̧ju̧kuä̧kuä̧wo̧ka̧'a̧ jä̧kua̧'a̧, täkü, adikuä aditätü'i̧nä̧ toäkuomȩ, trigo kkäräwä ido'ki ttüjära'a ukuokuä'ijü'i̧nä̧, ukuokuoka'a jä̧kuo̧mȩ.

²³ Täkü, ukuttümä̧ ra̧pa̧ra̧ i̧tȩya̧u̧mä̧ tȩya̧wo̧ka̧'a̧ jä̧kua̧'a̧, ttü'käwa'a pä'käri tteseäkuäwuö'i̧nä̧ rä̧mi̧po̧ka̧'a̧ jä̧kua̧'a̧. Isopäi'ünä̧ ukú ku̧wo̧juȩtä̧u̧ järe iyäwä isotümä̧ pi̧jä̧nä̧ttü̧ ttujuru kku̧nä̧ri̧nä̧tü̧ Ja̧'wa̧nü̧ jȩpü̧ kumä̧ri'änä̧ pi̧jä̧ ttü̧ja̧ o'katoi'ünä̧rü̧ yaparewinü̧jä̧.»

²⁴ Ja̧'wa̧ta̧nü̧ jua̧u̧ ütawiyänä̧ kki̧na̧'a̧, profeta winä̧tü̧, surojü jui'inä̧tü̧ ttukuoja ja̧'wa̧ta̧nü̧ pi̧jä̧nä̧ttü̧ kuä'äu tti̧kui̧nä̧u̧ o'katoi'ünä̧ ttukuoja'i̧nä̧, jü̧nä̧.