Apocalipsis 17 - Nuevo Testamento Uwotjüja

Ja̧'a̧tä̧ jȩpä̧'chä̧ju̧ru̧ tä̧bo̧kuä̧kuȩ wȩnȩ

¹ Kko̧ro̧mü̧ttü̧nü̧ ta̧ju̧ wotüttü ya̧tȩ á̧gȩ, kko̧ro̧mü̧ttü̧nü̧ to̧'ta̧rȩ copa o̧'ta̧ 'chu̧ä̧rä̧nü̧ ichi'ü päinä̧ku̧sä̧: «Ichiwä, chi̧jȩpa̧ku̧ u̧mä̧tu̧ku̧ jȩpä̧'chä̧kuä̧wä̧'i̧jä̧ju̧ büarü, ajewiyä wä̧mȩ pä̧ju̧ru̧ usurä kkȩmä̧u̧nä̧ ro̧ȩkuä̧kuȩ.

² Juäjuku jȩpä̧kuä̧wä̧'chü̧ surojuo'ächinä̧tü̧ pi̧jä̧nä̧ttü̧ ruwotümä̧ ja̧'wa̧ta̧nü̧ pi̧jä̧ ttü̧ja̧mä̧, juäju kkawoya, vino isoya au ttidepä iyä'chäkuäu tä̧'ä̧mä̧kuäwi̧nä̧tü̧.»

³ Jua̧u̧nü̧ o'ka'a, Epíritumä̧ rȩbi̧yu̧ dȩ'a̧ra̧'a̧ ȩpi̧nä̧ku̧sä̧, jua'amä̧ visión pättünä̧. Juorü, yajute isaju i̧sa̧ büó tu̧'a̧ u̧wä̧mȩ kku̧wa̧'a̧ topinüsä̧, jua̧u̧mä̧ Dio-rü suronä̧ pä'ü ukuokuäkuäwä wȩyu̧kua̧'a̧ pȩji̧nä̧ku̧ jä̧ttä̧pä̧ya̧tä̧, u piyämä̧ kko̧ro̧mü̧ttü̧nü̧ toyure winü̧ ja̧'wa̧ta̧nü̧ u okämä̧ to̧mü̧rȩ jäwä jo̧mȩnä̧ kku̧nä̧ri̧nü̧.

Isajumä̧, i̧sa̧ büó u̧wä̧mȩ wi̧nä̧ju̧

⁴ Juäju isajumä̧, púrpura pättü i̧sä̧ta̧, tu̧wä̧ta̧ 'ka̧tä̧wi̧nä̧ju̧, oro o'kittü'i̧nä̧, kkoro rü̧ȩnä̧ mikuäu, perlas pättüttü'i̧nä̧ a̧'kua̧tä̧kuä̧winä̧ju̧. Ja̧'wa̧ta̧nü̧ kku̧mü̧nä̧mä̧, oro-ttü a̧di̧kuo̧'ta̧ copa i̧so̧'ta̧ 'chu̧'ä̧ri̧nä̧ju̧, juo̧'ta̧ jakuämä̧ ȩki̧na̧'a̧ ttu̧su̧ro̧tü̧'i̧nä̧ ja̧'wa̧ta̧nü̧ ttidepä weü jȩpä̧'chä̧kuä̧u̧ kkä̧kuä̧wä̧'i̧nä̧, jü̧nä̧;

⁵ juäju kki'änä̧mä̧ ttieruwuö wȩyu̧kua̧'a̧ rü̧tä̧ri̧nä̧ju̧: «Ukuo isomȩ Babironia ütawiyämä̧, pi̧jä̧ttü̧ ttidepä iyä'chäkuäwä'ijätü, o'katoi'ünä̧ surojünä̧ kkä̧'i̧jä̧tü̧ tta̧ju̧ ja̧'a̧» pä'a.

⁶ Ja̧'wa̧nü̧ ja̧'a̧nä̧, juȩnȩ o'komȩnä̧ topinüsä̧, juäju isaju tä̧jä̧mä̧cha̧'a̧, Dio i̧tti̧mü̧'i̧nä̧, Jesú i̧mi̧nä̧ wa'ü ikuätü'i̧nä̧, totte'äkuäwomȩnä̧. Ja̧'wa̧nü̧, juäjuru ja̧'a̧ topü, to̧o̧ to̧pä̧ri̧nü̧sä̧.

⁷ Ja̧'wa̧nü̧ to̧chä̧ri̧yä̧ku̧, á̧gȩ-mä̧ päinä̧ku̧sä̧: «¿Tta̧'a̧nü̧ pä'ü, to̧o̧ to̧'kuä̧ra̧'a̧jä̧ttü̧? juäju kkütü'kü ttieruwuö jidäwäkujä̧, ja̧'wa̧ta̧nü̧ juäjuru ȩpü̧ i̧sa̧ büó betia u piyä kko̧ro̧mü̧ttü̧nü̧ toyure kku̧nä̧rü̧mä̧, u okä to̧mü̧rȩ jäwä okä kku̧nä̧rü̧mä̧ pa̧'a̧nü̧ ja̧'a̧.

⁸ Jua̧u̧ i̧sa̧ büó betia to'kuäjäkumä̧, ya̧tȩ kki̧nü̧ ja̧'a̧ ja̧'wa̧nü̧ ja̧'a̧nä̧ jitämä̧ täkü kko̧kü̧; ja̧'wa̧nü̧ ja̧'a̧nä̧, rȩjȩku̧ 'kuȩya̧ppa̧nü̧ ja̧'a̧ttü̧ räopä̧kua̧, jo̧mȩnü̧ kuä'ü ikuäwarü pä'ü. Pi̧jä̧ ttü̧ja̧, pi̧jä̧ uwäbeinomȩttü̧ kkä̧mä̧dü̧, kkä̧kuä̧wä̧ kuyäru'tänä̧ tti̧mi̧pi̧yä̧ jui'ätümä̧, jua̧u̧ i̧sa̧ büó betia, täbokü kki̧nü̧ ja̧'a̧nä̧, jitämä̧ kko̧kü̧rü̧, ja̧'wa̧ta̧nü̧ ü̧jä̧kua̧rü̧ topü, to̧o̧ to̧ttä̧rä̧kuo̧tü̧, jua̧u̧ru̧ topü.»

⁹ Pi̧yȩ tu̧wo̧jui̧pa̧ pä'ümä̧, wo̧juä̧wä̧ ttu̧ju̧nä̧ra̧ pä'ü ja̧'a̧: «Kko̧ro̧mü̧ttü̧nü̧ toyure u piyä jä̧ji̧mä̧, juäju isaju kkü̧'ä̧ji̧ kko̧ro̧mü̧ttü̧nü̧ todäre jü̧ müä'kiyu ja̧'a̧ ja̧'wa̧ta̧nü̧ wȩnȩkuä̧cha̧'a̧ kko̧ro̧mü̧ttü̧nü̧ todäre wotü ruwotürü.

¹⁰ Juätüttü, ruwotü ji̧mü̧tȩnü̧ wotümä̧, täkü ma̧'ä̧chi̧nä̧tü̧; juätüttü ya̧tȩtä̧ ja̧'a̧ jitä we'ümä̧ ja̧'wa̧ta̧nü̧ kka̧ra̧mä̧ ji̧nä̧ ichokü. Ja̧'wa̧nü̧ ja̧'a̧nä̧ jua̧u̧ ichomȩnä̧mä̧, rekuomä̧ we'okü jä̧kua̧.

¹¹ I̧sa̧ büó betia ä̧kuo̧mȩnä̧ ü̧ji̧na̧'a̧nä̧, jitä kko̧kü̧ päjimä̧, juätü kko̧ro̧mü̧ttü̧nü̧ ta̧ju̧ ruwotü päjätü i̧sa̧ ja̧'a̧. Pä'äjita'anü̧ ruwo we'ü i̧chä̧kua̧, kko̧ro̧mü̧ttü̧nü̧ wäbodäkuä päi'ünä̧ ja̧'wa̧nü̧ ja̧'a̧nä̧, jo̧mȩnü̧, ya'utekutä si'epü ikuäwä̧kua̧.»

¹² To̧mü̧rȩ jäwä u okä to'kuäjimä̧, to̧mü̧rȩ jäwä ruwo wȩttä̧kuȩ ja̧'a̧ ja̧'wa̧nü̧ ja̧'a̧nä̧, jitämä̧ ji̧nä̧ we'okotü ja̧'a̧; ja̧'wa̧nü̧ ja̧'a̧nä̧, tturuwo iyäwi'äkuä̧u̧, suro ya'ute hora-tä, jua̧u̧ i̧sa̧ büó betia-ku yo̧mȩtȩnä̧.

¹³ Pitü to̧mü̧rȩ jo̧mȩnä̧ wotü ruwotümä̧ ji̧nä̧ ji̧yȩtȩnä̧ amükuädätü ja̧'wa̧nü̧ ja̧'a̧ttü̧ i̧sa̧ büó betia-rü uruwo ttiyäkuotü.

¹⁴ Juätümä̧ ttürowäwäkuotü, oweja mü̧ä̧ya̧ jü̧nä̧ wa̧ku̧; ja̧'wa̧nü̧ ja̧'a̧nä̧ jua̧u̧mä̧, umüwäyotüku abo 'kuäo'ä̧kua̧; jua'amä̧ ukuo isotü'i̧nä̧ ttu̧ru̧wa̧ ja̧'a̧ttü̧ ja̧'wa̧ta̧nü̧ ruwotü'i̧nä̧ ttu̧ru̧wa̧ ja̧'a̧ttü̧. Jua̧u̧ku̧ kka̧kuä̧tü̧mä̧ woinä̧u̧tä̧, ȩmi̧nä̧u̧tä̧, ukuotätütä jä̧kua̧'a̧.

¹⁵ Ja̧'wa̧ta̧nü̧ á̧gȩ-mä̧ päinä̧ku̧sä̧: Ajewiyä wä̧mȩ kkidepä iyä'chäkuäwäju kkü̧'a̧'a̧ to'kuäjimä̧, ttü̧ja̧rü̧ tti̧wȩnȩ pünä̧'i̧nä̧, ttidepiyu pünä̧, ruwäkuiyä pünä̧'i̧nä̧ wotü ja̧'a̧.

¹⁶ Ja̧'wa̧ta̧nü̧ to̧mü̧rȩ jäwä u okä to'kuäji'i̧nä̧, i̧sa̧ büorü to'kuäji'i̧nä̧, kkidepä iyä'chäkuäwäjuru kkü'kü jui'ü, kkiäre o'kajuiyünä̧ 'chottipäkuaju. Kkü̧'ka̧tä̧wä̧ta̧ jȩpü̧ iku, kkidepä ttukui'äkuaju ja̧'wa̧nü̧ jȩpü̧ okurära̧'a̧ do'opü ttikuäkuaju.

¹⁷ Jua'amä̧, Dio-mä̧ churutä pä̧wä̧rü̧jo̧mȩnä̧, juätü to̧mü̧rȩ ruwä ruwotü tta̧mi̧ iso'kinä̧ wea'attü̧ ja̧'wa̧nü̧ jȩttü̧nä̧ iyinä̧u̧: Ji̧nä̧ ji̧yȩtȩnä̧ amükuädü i̧sa̧ büorü uruwo ttiya pä'ü. Ja̧'wa̧nü̧ jo̧mȩnä̧, i̧sa̧ büorü ttukuotäkuotü, Dio amükuädinü̧ jo̧mȩnü̧ päi'ünä̧.

¹⁸ Isaju to'kuäjäkuamä̧, ukuo ütawiyärü ja̧'a̧, pi̧jä̧nä̧ttü̧ ruwotü ttu̧wä̧mȩnä̧ weü ütawiyä.