Apocalipsis 16 - Nuevo Testamento Uwotjüja

¹ Ja̧'wa̧ta̧nü̧ ji̧yȩtȩ, Dio ü̧jo̧dettü pä̧i̧ku̧nä̧ rä̧mi̧pa̧'a̧ ä̧ju̧kui̧nü̧sä̧, jua̧u̧mä̧ sietenü̧ wotü á̧gȩrȩ-rü pä'inü̧: «jua̧u̧ kko̧ro̧mü̧ttü̧nü̧ to̧'ta̧rȩ, copa pättü o̧'ta̧nä̧ aku Dio ü̧ra̧wä̧rü̧ rȩjȩra̧'a̧ to'äjätukui.»

Kko̧ro̧mü̧ttü̧nü̧ to̧'ta̧rȩ copa o̧'ta̧ tü'kü

² Ä̧kuo̧mȩnä̧ i̧sa̧ á̧gȩ 'chä̧wi̧'ü̧ üäre copa i̧so̧'ta̧ pi̧jä̧ra̧'a̧ to'inü̧; ja̧'wa̧nü̧ toomȩnä̧ o'katoi'ünä̧ i̧sa̧ büó betia i̧mi̧ rütäwotürümä̧ ja̧'wa̧ta̧nü̧ jua̧u̧tä̧ a̧'kua̧juä̧ tätäwä'ka ttiwe'kiyunä̧ kkä̧mä̧dü̧ esewä'ijätürümä̧, ttüttawiyä surojü, rü̧ȩnä̧ barau räreäkuäwinä̧u̧.

³ Ja̧'wa̧ta̧nü̧ todäre päi'ünä̧ wa̧ á̧gȩ üäre copa i̧so̧'ta̧ rü̧ä̧ ajenä̧ to'inü̧; ja̧'wa̧nü̧ toomȩnä̧ rü̧ä̧ aje ajiyamä̧ ttü̧ja̧ ttukuotä pärowächina̧'a̧, kuä'ü tti̧kuä̧u̧ ttukuoja jä̧'i̧nü̧'a̧nü̧. Ja̧'wa̧nü̧ päi'omȩnä̧ rü̧ä̧ ajenä̧ kka̧kuä̧tü̧ a̧'kua̧rä̧tü̧mä̧ wa'äkuäu ikuinä̧tü̧.

⁴ Ja̧'wa̧ta̧nü̧ wäbodäkuänä̧ päi'ünä̧ wa̧ á̧gȩ üäre copa i̧so̧'ta̧ ajewiyänä̧'i̧nä̧, ajewiyä räopomȩ'i̧nä̧ to'inü̧; ja̧'wa̧nü̧ toomȩnä̧ ajiyamä̧ ttukuojatä pärowächi'ina̧'a̧.

⁵ Jua̧u̧nü̧ o'ka'a ajiyanä̧ ujuru kku̧nä̧rü̧ á̧gȩ pä'a ä̧ju̧kui̧nü̧sä̧: «Chu̧ru̧wa̧, ukumä̧ adiwomȩnä̧ jȩä̧kuä̧wä̧ i̧sa̧jä̧, Dio surojü jui̧'a̧jä̧, jitä'i̧nä̧ kkü̧jä̧, mo̧'i̧nä̧ kki̧nü̧jä̧,

⁶ Isopäi'ünä̧ juätümä̧, ukú kui̧tti̧mü̧ surojü jui'ätürü, ja̧'wa̧ta̧nü̧ profeta winä̧tü̧rü̧'i̧nä̧ kuä'äu ikuinä̧tü̧, ja̧'wa̧nü̧ jȩtti̧nü̧ta'anü̧; ttukuoja ttawuönä̧ jȩ'kuä̧u̧.»

⁷ Ja̧'wa̧ta̧nü̧ altar pättomȩttü̧, rä̧mi̧pa̧'a̧ ä̧ju̧kui̧nü̧sä̧: «A̧ Chu̧ru̧wa̧, isopäi'ünä̧, ukumä̧ adiwomȩnä̧ jȩpü̧jä̧, Dio o'kajuiyünä̧ kujuru kku̧nä̧rü̧ kua'attü̧, isopäi'ünä̧tä̧, jueünä̧tä̧ jȩpü̧jä̧.»

⁸ Ja̧'wa̧ta̧nü̧ pa̧ja̧kuä̧nü̧ päi'ünä̧ wa̧ á̧gȩ üäre copa i̧so̧'ta̧, mo̧ro̧ kkä̧wa̧rü̧ to'inü̧; ja̧'wa̧nü̧ toomȩnä̧, mo̧ro̧ kkä̧wa̧mä̧ ujuru iyäwi'inä̧ku̧ ttü̧ja̧rü̧ kkuwü ikua pä'ü.

⁹ Ja̧'wa̧nü̧ ja̧'a̧ttü̧, ttü̧ja̧mä̧ o'katoi'ünä̧ kuo'äu iku, Dio-rü suronä̧ wopinä̧tü̧, surojüttü kä'ädi'ü Dio-kumä̧ ppa̧ttä̧cha̧ pä'okotü pinä̧tü̧, jua̧u̧ surojü jȩpü̧ ikuäwä ujuru kku̧nä̧rü̧ku̧mä̧.

¹⁰ Ja̧'wa̧ta̧nü̧ ji̧mü̧tȩ jäwä päi'ünä̧ wa̧ á̧gȩ üäre copa i̧so̧'ta̧ to'inü̧, i̧sa̧ büó betia uruwo dȩä̧kä̧nä̧; toomȩnä̧ jua̧u̧ uruwomä̧ yo̧ü̧nä̧tä̧ päi'ina̧'a̧. Ttü̧ja̧mä̧, rü̧ȩnä̧ ba̧ra̧wä̧u̧ tti̧nȩnä̧ yü̧yü̧pä̧kuä̧wi̧nä̧tü̧.

¹¹ Ja̧'wa̧nü̧ ja̧'a̧nä̧'i̧nä̧ ttü̧ja̧mä̧, barau usurä, ttüttawiyä ubara ttutta'anä̧'i̧nä̧, suronä̧ jȩttü̧mä̧ kättädi'oka'a, yaboku Dio mo̧ro̧jä̧ ru̧wa̧rü̧mä̧ suronä̧tä̧ pä'inä̧tü̧.

¹² Ja̧'wa̧ta̧nü̧ kko̧ro̧mü̧ttü̧nü̧ päi'ünä̧ wa̧ á̧gȩ üäre copa i̧so̧'ta̧, Éufrate aje rü̧o̧tonä̧ to'inü̧; ja̧'wa̧nü̧ toomȩnä̧ juoto ajiya joi'ina̧'a̧, kkä̧wa̧ räopa'akuttü ichätü ruwotü 'kuättopa pä'ü.

¹³ Ja̧'wa̧ta̧nü̧ dragó̧ pä'ü'i̧nä̧ pättäku, i̧sa̧ büó betia pä'ü'i̧nä̧ pättäku ja̧'wa̧ta̧nü̧ yapareäkuäwä i̧sa̧ profeta pä'ü'i̧nä̧ pättäku ättü rätta'a topinü̧sä̧, wä̧mȩtukuä epíritu-tu̧ suropätü wa̧jü̧ 'kua̧rü̧nä̧ wotü.

¹⁴ Juätü epíritu-tu̧mä̧, suropätü demonio pä̧ttä̧u̧ tta̧'kua̧rü̧ isotü ji̧na̧'a̧, jȩtto̧kü̧ juei jȩpi̧nä̧tü̧, pi̧jä̧nä̧ttü̧ ruwotü kka̧kuä̧tü̧rü̧ ka̧ka̧tü̧ 'chi̧nä̧tü̧, ji̧yȩ ukuo mo̧ro̧ o'kajuiyünä̧ ju̧ru̧wa̧ Dio-ku kurä ttürowäwa pä'ü.

¹⁵ «Ttümä̧, nä̧u̧kuä̧rä̧kuä̧wä̧ i̧sa̧ 'kua̧rü̧nä̧ chi̧chä̧kua̧sä̧. Eseäkuäwä kkä̧kua̧'a̧ ä'i'oka'a to̧pä̧rü̧rü̧ ja̧'wa̧ta̧nü̧ ü̧'ka̧tä̧wä̧ta̧'i̧nä̧ tta̧'ä̧rä̧kuä̧u̧ru̧, ü̧ä̧rȩta̧ jui̧'a̧ tottäku dä'ä ttuwu juiya pä'ü.»

¹⁶ Ja̧'wa̧nü̧ ja̧'a̧ttü̧, pi̧jä̧nä̧ ruwotürümä̧ ka̧ka̧tü̧ kku̧ni̧nä̧tü̧, hebreo tti̧wȩnȩnä̧mä̧ armagedó̧ pä'ü mi̧kuomȩ.

¹⁷ Ja̧'wa̧ta̧nü̧ kko̧ro̧mü̧ttü̧nü̧ todäre päi'ünä̧ wa̧ á̧gȩ üäre copa i̧so̧'ta̧ juätoppanä̧ to'inü̧; ja̧'wa̧nü̧ toomȩnä̧ mo̧ro̧jä̧ Dio ü̧jo̧de, uruwo dȩä̧kä̧ttü̧ ya̧tȩ i̧wȩnȩ pä̧i̧ku̧nä̧ rä̧mi̧pi̧na̧'a̧: «Täkü jo̧mȩnü̧ päia'a.»

¹⁸ Ja̧'wa̧nü̧ päi'omȩnä̧ ku'upä rou kkä̧nü̧ kuäwa'attü, ttü̧ja̧ tti̧wȩnȩ rä̧mi̧pa̧'a̧ttü̧, rȩjȩ tti̧ȩpo̧mȩnä̧ pparächina̧'a̧, pi̧jä̧nä̧ ttü̧ja̧ ttü̧jo̧kui̧no̧mȩttü̧ päi'ünä̧ yorisotä 'kuäopokü jä̧'i̧jü̧.

¹⁹ Ütawiyä rü̧o̧mȩmä̧ wäbodäkuä jo̧mȩnä̧ 'kä̧'chä̧wi̧pi̧na̧'a̧, ja̧'wa̧ta̧nü̧ pi̧jä̧nä̧ttü̧ ütawiyä kka̧ku̧mä̧ ma̧ä̧chi̧na̧'a̧; ja̧'wa̧nü̧ päi'a'attü, yȩnȩ ütawiyä rü̧o̧mȩ Babironia pättomȩ Dio-mä̧ amükuädi'inü̧, rü̧ȩnä̧ a̧mi̧ suräku, juȩnȩ usurä ttȩmä̧u̧nä̧ ü̧tä̧bo̧ta̧ pä'ü.

²⁰ O'kajuiyünä̧ kkä'ko o̧sa̧'i̧nä̧, müä'kiyu'i̧nä̧ toepoina̧'a̧,

²¹ Ja̧'wa̧ta̧nü̧ mo̧ro̧jä̧ra̧'a̧ttü̧ diyawuö o'ki bäreu ttawäwina̧'a̧, cuarenta kirottü'i̧nä̧ abonä̧nü̧ ä̧mä̧kü̧; ja̧'wa̧nü̧ usurä ttȩmä̧u̧nä̧ ttawäwäu̧, ttü̧ja̧mä̧ Dio-rü suronä̧ pä'inä̧tü̧.