Apocalipsis 15 - Nuevo Testamento Uwotjüja

Sietenü̧ á̧gȩrȩ-tü̧ sietenü̧ usurä ȩmä̧kuä̧wä̧mä̧ tti̧'chä̧chä̧kuȩ wȩnȩ

¹ Ja̧'wa̧ta̧nü̧ topinü̧sä̧, mo̧ro̧jä̧nä̧ kkoro rü̧ȩnä̧ jü̧ adiwä juäi i̧jȩkuä̧cha̧'a̧: kko̧ro̧mü̧ttü̧ ta̧ju̧nü̧ wotü á̧gȩrȩ-tü̧; juätümä̧ kko̧ro̧mü̧ttü̧ todäre jäwä rüjí mo̧ro̧ usurä ȩmä̧kuä̧wä̧kuȩku̧ kka̧kui̧nä̧tü̧; jua̧u̧nä̧tä̧ Dio ü̧ra̧wä̧rü̧mä̧ jo̧mȩnü̧ beipächäkua'a ji̧na̧'a̧.

Sietenü̧ á̧gȩrȩ-rü i̧jȩkuä̧chi̧nä̧ku̧

² Ja̧'wa̧ta̧nü̧ topinü̧sä̧, rü̧ä̧ dubora i̧sä̧yu̧ jäwä jä̧'i̧nü̧'a̧nü̧ säruwora, okuräku wiwakua'a jä̧'i̧nü̧'a̧nü̧ jora; juora jäyoranä̧ kka̧kui̧nä̧tü̧, i̧sa̧ büó betia-rü abó 'kuä'o'inä̧tü̧, jua̧u̧ i̧mi̧ número ttütatü pä'ü we'äkuäwokotü pinä̧tü̧, ja̧'wa̧ta̧nü̧ a̧'kua̧juä̧ jü̧nä̧ tätäwä'karü'i̧nä̧ ttiwe'kiyunä̧ pȩjä̧mü̧ esewokotü pinä̧tü̧, juätürü Dio-mä̧ arpa pättü iyinä̧u̧ ji̧na̧'a̧.

³ Ja̧'wa̧nü̧ ja̧'a̧, jua̧u̧nä̧tä̧ 'porü ra̧'i̧nä̧tü̧, Dio u̧mü̧wä̧ya̧ Moisé Dio-rü ra̧wi̧nü̧'i̧nä̧ ja̧'wa̧ta̧nü̧ oweja mü̧ä̧ya̧ jü̧nä̧ wa̧rü̧ ra̧wi̧nü̧mä̧, pa̧'a̧nü̧ o'ä'chü: «Tu̧ru̧wa̧ Dio o'kajuiyünä̧ kkujuru kku̧nä̧rü̧ kuaditäwämä̧, adiwä juei, rü̧ȩnä̧ jü̧tä̧ ja̧'a̧; ku̧mä̧nä̧mä̧ isopäi'ünä̧tä̧, jueünä̧tä̧ jä̧mä̧ ja̧'a̧, surojü jui'ätü ttu̧ru̧wa̧ Rey-jä̧ ukumä̧.

⁴ ¿Chu̧ru̧wa̧, ditä jä̧ttü̧ ukuru ye'ekuokü jä̧kua̧mä̧? ¿Ditä jä̧ttü̧ ukuru eseu ra̧wo̧kä̧kua̧mä̧? isopäi'ünä̧ ukutäjä̧, surojü jui̧'a̧mä̧; ruwäkuiyä pa̧ja̧ku̧nä̧ ichü, ukuru ttiwe'kiyunä̧ pȩjä̧mü̧ ttȩsȩä̧kuä̧wä̧kua̧jä̧, isopäi'ünä̧ adiwomȩnä̧ jȩ'ku̧mä̧ tottünä̧ i̧jȩkuä̧cha̧'a̧ttü̧.»

⁵ Jua̧u̧ jä̧jí̧ o'ka'a mo̧ro̧jä̧ra̧'a̧ttü̧, tabenákuro pättomȩttü̧, Dio eseku jäwä bawekuächa'a topinü̧sä̧.

⁶ Juode Dio ü̧jo̧dettü, jitü sietenü̧ wotü á̧gȩrȩ rä'ekuinä̧tü̧, sietenü̧ jü̧ usurä ȩmä̧kuä̧wä̧ 'chu̧'ä̧rä̧nü̧. Lino o̧ta̧ teü, kkä̧dȩpü̧nä̧ jü̧ 'ka̧tä̧wi̧nä̧tü̧ ja̧'wa̧ta̧nü̧ tta̧mü̧kanä̧mä̧ isäya oro-ttü adikuäya rü̧nä̧ri̧nä̧tü̧.

⁷ Ja̧'wa̧nü̧ ja̧'a̧ pa̧ja̧kuä̧nü̧ wotü a̧'kua̧rä̧tü̧ttü̧ ya̧tȩ, kko̧ro̧mü̧ttü̧nü̧ ta̧ju̧ wotü á̧gȩrȩ ya̧ku̧nä̧rü̧ iyinü̧, oro o̧'ta̧ yo̧'ta̧ku̧nä̧, Dio ü̧ra̧wä̧rü̧ su̧'pȩnü̧ ȩka̧'a̧, Jua̧u̧ Dio-mä̧ mo̧ro̧ kki̧ä̧mü̧nä̧ kkü̧ ja̧'a̧ttü̧.

⁸ Ja̧'wa̧nü̧ ja̧'a̧, Dio ü̧jodenä̧mä̧ Dio ujuru jäwä, ukuo jäwä isoppa a̧ttä̧di̧'i̧na̧'a̧; juodenä̧mä̧ ya̧tȩ'i̧nä̧ dottächü juiyünä̧ ji̧na̧'a̧, kko̧ro̧mü̧ttü̧nü̧ ta̧ju̧ wotü á̧gȩrȩ 'chu̧ttärü̧ usurä ȩmä̧kuä̧wä̧, jua̧u̧ jo̧mȩnü̧ päi'omȩbü päi'ünä̧.