Apocalipsis 14 - Nuevo Testamento Uwotjüja

Oweja mü̧ä̧ya̧, Chutä ȩmi̧nä̧u̧ku̧ ji̧nä̧ yo̧mȩtȩnä̧ pätti'inü̧

¹ Jua̧u̧nü̧ o'ka'a topinü̧sä̧ oweja mü̧ä̧ya̧ jü̧nä̧ wa̧rü̧, Sión mü̧ä̧'ka wä̧mȩ ü̧ja̧'a̧. Jua̧u̧ku̧mä̧ ttü̧ja̧kua̧'a̧ topinü̧sä̧, ciento cuarenta y cuatro mil jo̧mȩnä̧ ttü̧ja̧rü̧, tti'änä̧ oweja mü̧ä̧ya̧ wa̧ i̧mi̧'i̧nä̧, Jä'o i̧mi̧'i̧nä̧ wȩyu̧kua̧'a̧ rü̧tä̧rä̧tü̧rü̧.

² Ja̧'wa̧ta̧nü̧ ä̧ju̧kui̧nü̧sä̧, mo̧ro̧jä̧ra̧'a̧ttü̧ ajiya rü̧ȩnä̧ tawipa'a jä̧'i̧nü̧'a̧nü̧'i̧nä̧ ja̧'wa̧ta̧nü̧ ku'upä rü̧ȩnä̧ kuäwa'a jä̧'i̧nü̧'a̧nü̧'i̧nä̧ rä̧mi̧pa̧'a̧; arpa pättü 'poräwä isotü ttu'pora'a 'kua̧rü̧nä̧'i̧nä̧ rä̧mi̧pi̧na̧'a̧.

³ Juätümä̧ jareü ji̧yȩtȩ ra̧'i̧nä̧tü̧, ruwo dȩä̧kä̧ ä'ka jo̧mȩttü̧ ja̧'wa̧ta̧nü̧, pa̧ja̧kuä̧nü̧ wotü a̧'kua̧rä̧tü̧ ttä'kattü'i̧nä̧ ja̧'wa̧ta̧nü̧ A̧ci̧a̧nu̧tu̧ ttä'kattü'i̧nä̧, jü̧nä̧. Jua̧u̧ ra̧ttü̧mä̧ ya̧tȩ'i̧nä̧ ttu̧wo̧jui̧pü̧ juiyünä̧ ji̧na̧'a̧, suro ciento cuarenta y cuatro mil jo̧mȩnä̧ wotü, pi̧jä̧ra̧'a̧ttü̧ surojüttü kka̧kui̧pi̧nä̧tü̧tä̧ wo̧jui̧nä̧tü̧ jua̧u̧mä̧.

⁴ Pitümä̧, kkorotü ttü̧ä̧nä̧wo̧tü̧ yaparewätuku surojuottekuoka'a, suro ya̧tȩ Dio-rütä esetinä̧tü̧ ji̧na̧'a̧. Juätümä̧ o'katoi'ünä̧, oweja mü̧ä̧ya̧ jü̧nä̧ wa̧ i̧'cho̧mȩmä̧ o'ka'anä̧ 'chä̧tü̧ ji̧na̧'a̧. Juätümä̧, pi̧jä̧ ttü̧ja̧ ttü̧'kä̧tȩ jo̧mȩttü̧, surojüttü ȩmi̧nä̧u̧ ji̧na̧'a̧, ä̧kuo̧mȩnä̧ jäwä ofrenda, Dio-rü'i̧nä̧, oweja mü̧ä̧ya̧ jü̧nä̧ wa̧rü̧'i̧nä̧ iyäwä päi'ünä̧.

⁵ Juätü ttänä̧mä̧ ji̧yȩtȩ'i̧nä̧ yaparewokotü ja̧'wa̧ta̧nü̧ surojümä̧ jȩpo̧ko̧tü̧ pä'ijätü ji̧na̧'a̧.

Ubo I̧tti̧'i̧nä̧, sei-nü̧ wotü á̧gȩrȩ'i̧nä̧ ttütü'kü

⁶ Ja̧'wa̧ta̧nü̧ kka̧ra̧ á̧gȩ-rü̧, mo̧ro̧jä̧ ju'tojunä̧ koa'a topinü̧sä̧, jareü wȩnȩ beipokü 'chu̧ä̧rä̧nü̧, pi̧jä̧nä̧ kka̧kuä̧tü̧rü̧, tti̧rȩji̧yä̧ pünä̧, ttawaruwä pünä̧, tti̧wȩnȩ pünä̧ ja̧'wa̧ta̧nü̧ ütawiyä pünä̧ jiäwa pä'ü.

⁷ Jua̧u̧mä̧, pä̧i̧ku̧nä̧ wopinü̧: «Dio-rü ukuotü eseäkuäwätukui, isopäi'ünä̧ pi̧jä̧ ttü̧ja̧rü̧ pojopü ro̧'ȩpü̧ hora-mä̧ rȩbȩä̧kuä̧wa̧'a̧. Ja̧'wa̧ta̧nü̧ kuiwe'kiyutukunä̧ pȩjä̧mü̧ eseäkuäwätukui mo̧ro̧jä̧'i̧nä̧, pi̧jä̧'i̧nä̧, rü̧ä̧ aje'i̧nä̧ ja̧'wa̧ta̧nü̧ ajewiyä kkada'ka'i̧nä̧ aditinü̧rü̧.»

⁸ Ja̧'wa̧nü̧ päomȩnä̧, kka̧ra̧ á̧gȩ pä'inü̧: «Täkü ma̧ä̧chä̧ja̧'a̧, täkü ma̧ä̧chä̧ja̧'a̧, Babironia ütawiyä rü̧ä̧'i̧jo̧mȩmä̧, ruwäkuiyä pa̧ja̧ku̧nä̧ pi̧jä̧ ttü̧ja̧rü̧ kkorotü ttü̧ä̧nä̧wo̧tü̧rü̧ ttesetünä̧ yaparetä'ijümä̧.»

⁹ Juȩnȩ o'komȩnä̧ kka̧ra̧, wäbodäkuä á̧gȩ, pä̧i̧ku̧nä̧ wopinü̧: «Ya̧tȩ, i̧sa̧ büó betia pättäkuru ja̧'wa̧ta̧nü̧ jua̧u̧ a̧'u̧kuä̧ adikuä'karü iwe'kiyunä̧ pä̧mä̧dü̧ eseuttümä̧ ja̧'wa̧ta̧nü̧ u̧mü̧nä̧'i̧nä̧, unä̧'i̧nä̧ ttütünä̧ iyäkuäuttumä̧,

¹⁰ Dio-mä̧ rü̧ȩnä̧ ra̧wä̧ri̧pü̧nü̧ pä̧i̧ku̧nä̧ ro̧ȩpä̧kua̧ ja̧'wa̧nü̧ wa̧rü̧mä̧. A̧'u̧ku̧nä̧tä̧mä̧ ro̧ȩpo̧kä̧kua̧, okuränä̧'i̧nä̧, azufre-nä̧'i̧nä̧, á̧gȩrȩ tä'kattü ja̧'wa̧ta̧nü̧ oweja mü̧ä̧ya̧ jü̧nä̧ wa̧'i̧nä̧ ä'kattü.

¹¹ Okurä isoppa usurä ttȩmä̧u̧nä̧ juoppamä̧ 'kuäopünä̧ mo̧ro̧ ji̧nü̧'a̧kuä̧ 'chawädina̧'a̧, i̧sa̧ büó betia-rü esetinä̧tü̧rü̧mä̧, jua̧u̧ a̧'kua̧juä̧ isä'kanä̧ ttiwe'kiyunä̧ pä̧mä̧dü̧ esewinätü̧rü̧mä̧ ja̧'wa̧ta̧nü̧ jua̧u̧ i̧mi̧ rutäwinä̧tü̧rü̧mä̧ mo̧ro̧'i̧nä̧, yodo'i̧nä̧ 'kuäopünä̧tä̧ usurä ttȩmä̧wä̧kuo̧tü̧.»

¹² ¡Pȩnȩ́ jä̧kua̧'a̧ surojüttü 'kȩ'ȩpü̧ ikuinä̧u̧, Dio-rü ukuotätü ja̧'wa̧ta̧nü̧ Jesú-ru tta̧'kua̧ wȩnä̧rä̧tü̧ tta̧mi̧ 'kittächi'a'a i̧jȩkuä̧chä̧kuo̧mȩmä̧!

¹³ Ja̧'wa̧ta̧nü̧ mo̧ro̧jä̧ra̧'a̧ttü̧ ya̧tȩ i̧wȩnȩ rä̧mi̧pa̧'a̧ ä̧ju̧kui̧nü̧sä̧: «Pi̧yȩ wȩyu̧ti̧: Eseäkuäwä kkä̧kua̧'a̧ porü yaboku, tu̧ru̧wa̧ku̧ todeunä̧ 'korujuo'ächätürü.» «A̧, iweye ja̧'wa̧ta̧nü̧ jä̧kua̧'a̧ pä'ü Epíritumä̧, juätümä̧ ttaditäwättü 'kuä'ächi'ü ttü̧'ä̧mä̧dä̧kuo̧tü̧, ttaditäwämä̧ juätütäku kkä̧kua̧'a̧.»

¹⁴ Ja̧'wa̧ta̧nü̧ ajiya isoppa teoppa topinü̧sä̧, juoppa wä̧mȩ ya̧tȩ ubó I̧tti̧ 'kua̧ra̧ ü̧'a̧'a̧. Unä̧mä̧ wi̧nä̧ku̧ corona pättü, oro-ttü adikuä u'uttäwä ja̧'wa̧ta̧nü̧ u̧mü̧nä̧mä̧ 'chu̧'ä̧ri̧nü̧ hoz pättäkä so̧ä̧kä.

¹⁵ Ja̧'wa̧ta̧nü̧ kka̧ra̧ á̧gȩ, Dio-rü ukuokuäkuäwodettü rä'o'ü pä̧i̧ku̧nä̧ wopinü̧, ajiya isoppa wä̧mȩ pü̧rü̧: «Kuiärekä hoz pättäkänä̧ 'kui'ü, u̧wä̧ju̧ ka̧ka̧ti̧; u̧wä̧ju̧ 'kui'ü ka̧ka̧tä̧kuä̧wä̧ hora-mä̧ täkü rȩbȩä̧kuä̧wa̧'a̧, u̧wä̧ju̧mä̧ jo̧mȩnü̧tä̧ ja̧'a̧ rȩjȩnä̧ttü̧mä̧.»

¹⁶ Ja̧'wa̧nü̧ päku, ajiya isoppa wä̧mȩ pä̧ji̧mä̧ üärekä hoz pättäkä pi̧jä̧nä̧ 'kuiopomȩnä̧, pi̧jä̧nä̧ttü̧ u̧wä̧ju̧mä̧ ka̧ka̧kui̧'i̧na̧'a̧.

¹⁷ Jua̧u̧nü̧ o'ka'a kka̧ra̧ á̧gȩ, mo̧ro̧jä̧nä̧ Dio-rü ukuokuäkuäwodettü rä'o'inü̧, hoz pättäkä soäkä, u̧wä̧ju̧ ka̧ka̧kuäkä 'chu̧'ä̧rä̧nü̧.

¹⁸ Ja̧'wa̧ta̧nü̧ kka̧ra̧ á̧gȩ, altar pättomȩttü̧ rä'o'inü̧, okurä jäwänä̧ ujuru kku̧nä̧rü̧, jua̧u̧mä̧ hoz pättäkä so̧ä̧kä 'chu̧'ä̧rü̧rü̧ pä̧i̧ku̧nä̧ pä'inü̧: «Kuiärekä hoz pättäkä soäkänä̧ 'kui'opi, pi̧jä̧nä̧ttü̧ uwa a̧mȩmä̧ täkü jo̧mȩnü̧ ja̧'a̧, jua̧u̧ kku̧nä̧wä̧ pättiyuttümä̧.»

¹⁹ Ja̧'wa̧nü̧ päku, á̧gȩ-mä̧ üäre hoz pättäkä pi̧jä̧nä̧ 'kuäepäjipomȩnä̧, uwa pättiyuttü uwa a̧mȩ 'kui'inü̧. Ja̧'wa̧nü̧ jȩpü̧ i̧sä̧yu̧ rü̧ä̧yu̧nä̧ ȩni̧nü̧ uwa a̧mȩmä̧, juä̧yu̧ttu̧ 'chu'chu ikua pä'ü. Jua'amä̧ Dio ra̧wä̧ri̧pü̧ jȩä̧kuȩ wȩnȩkuä̧cha̧'a̧.

²⁰ Jua̧u̧ uwamä̧ ütawiyä jäyättü isoya päi'ünä̧ 'chu'chu ttikuomȩnä̧, i̧sä̧yu̧ttü̧mä̧ rü̧ȩnä̧ ttukuojamä̧ rä'opina̧'a̧, ya'ute metro jo̧mȩttü̧'i̧nä̧, kkoro ju'tonü̧ jo̧mȩbü päi'ünä̧ suwädi'ünä̧, ü̧rü̧ä̧mä̧ trescientos kilómetros jo̧mȩnä̧ pa̧ja̧kuä̧chü̧nä̧.