Apocalipsis 13 - Nuevo Testamento Uwotjüja

Rü̧ä̧ ajettü I̧sa̧ büó räopinü̧ wȩnȩ

¹ Rü̧ä̧ aje rȩba̧ jäyoto kkä̧mä̧dü̧ tochomȩnä̧, ya̧tȩ i̧sa̧ büorü topinü̧sä̧, kko̧ro̧mü̧ttü̧nü̧ todäre jo̧mȩnä̧ u piyä kku̧nä̧rü̧rü̧ ja̧'wa̧ta̧nü̧ ä̧ja̧wi̧yä̧ okämä̧ to̧mü̧rȩ jäwä okä jo̧mȩnä̧ kku̧nä̧rü̧rü̧.

² Pide i̧sa̧ büó tochinä̧ku̧mä̧ Büó Yäwi 'kua̧ri̧nü̧; ü̧jä̧pi̧yä̧mä̧ aje yäwi ü̧jä̧pü̧ jä̧'i̧nü̧'a̧nü̧ winü̧ ja̧'wa̧ta̧nü̧ ämä̧ Jojochäyu ä 'kua̧ri̧nü̧. Dragó̧ pättäkumä̧ rü̧ȩnä̧ ujuru'i̧nä̧, uruwo'i̧nä̧, ukuo'i̧nä̧ iyinü̧ jua̧u̧ru̧.

³ Jua̧u̧ i̧sa̧ büó ú jiyutenä̧mä̧, ya̧tȩ kuäina̧'a̧ 'kua̧ri̧nü̧, 'koru päi'a pä'ü ja̧'wa̧nü̧ ja̧'a̧nä̧ juȩnȩ toe'ächa pä'ü kuäino̧mȩmä̧ wawächächina̧'a̧ ji̧na̧'a̧; ja̧'wa̧nü̧ jo̧mȩnä̧ pi̧jä̧ ttü̧ja̧ o'katoi'ünä̧ eseäkuäu jua̧u̧ i̧sa̧ büó betia pättäku o'ka'anä̧ 'chi̧nä̧tü̧.

⁴ Ja̧'wa̧nü̧ ja̧'a̧ i̧sa̧ büó betia pättäkuru, uruwo'i̧nä̧, dragó̧ pättäku uruwo iyini̧yä̧u̧ betia pättäkuru eseäkuäwinä̧tü̧: «¿Ditäjä̧ttü̧ pide betia pättäku jü̧'a̧nü̧ wa̧mä̧, dítä jä̧ttü̧ jua̧u̧ku̧ ürowäwuö'anü̧ wa̧mä̧?», pä'ü.

⁵ Ja̧'wa̧nü̧ ja̧'a̧ jua̧u̧ i̧sa̧ büó betia-rümä̧ abekuächinä̧ku̧ ukuo te'äkuäu, Dio-rü suronä̧ pä'cha pä'ü; ja̧'wa̧ta̧nü̧ uruwo iyäwi'inä̧ku̧ kkä̧wa̧tü̧mä̧ cuarenta y do-nü̧ jo̧mȩnä̧ wea pä'ü.

⁶ Ja̧'wa̧nü̧ ja̧'a̧ttü̧ jua̧u̧nü̧ pä̧nä̧mä̧, Dio-rü ukuokuäkuäwodeku'i̧nä̧, mo̧ro̧jä̧nä̧ kka̧ku̧mä̧ o'kajuiyünä̧ pätetü, Churutä Dio-rü'i̧nä̧ suronä̧ pä'ä'chinü̧.

⁷ Ja̧'wa̧ta̧nü̧ Dio i̧tti̧mü̧rü̧ kurä rowäwuö kkȩdü̧ ikua'anä̧'i̧nä̧ ja̧'a̧tä̧ toinä̧ku̧. Ja̧'wa̧ta̧nü̧ ukuo iyäwi'inä̧ku̧ ttü̧ja̧ tti̧wȩnȩ pünä̧, ttidepiyu pünä̧, tti̧rȩjä̧ pünä̧ wea pä'ü'i̧nä̧.

⁸ Ja̧'wa̧nü̧ ja̧'a̧ttü̧, pi̧jä̧ ä̧kuo̧mȩnä̧ adikui'ino̧mȩttü̧ päi'ünä̧, usurä ȩmä̧u̧ to'e'ächinü̧, oweja mü̧ä̧ya̧ wa̧ üäre kuyäru'tä kkä̧kuä̧wä̧ kkä'tänä̧ tti̧mi̧ jui'ätümä̧, jua̧u̧ru̧ ttiwe'kiyunä̧ pȩjä̧mü̧ eseäkuäwinä̧tü̧.

⁹ Ä̧ju̧kuä̧kuä̧wä̧ kku̧nä̧rä̧tü̧mä̧, ä̧ju̧kuä̧tu̧kui̧:

¹⁰ «Kärenä̧ra̧'a̧ ttȩpä̧u̧ru̧mä̧, kärenä̧ra̧'a̧ ttȩpä̧kuä̧u̧; kurodiyänä̧ kuä'äu tti̧kuä̧u̧ru̧mä̧, kuä'äu ttikuäkuä̧u̧ Jua̧u̧ pä̧nä̧ jä̧kua̧'a̧, Dio i̧tti̧mü̧ tta̧mi̧ 'kittächi'ü'i̧nä̧, tta̧'kua̧ ttu̧wȩnä̧rü̧'i̧nä̧ i̧jȩkuä̧chä̧kua̧'a̧mä̧.»

Pi̧jä̧ rȩjȩttü̧ i̧sa̧ büó räopinü̧ wȩnȩ

¹¹ Jua̧u̧nü̧ o'ka'a topinü̧sä̧, kka̧ra̧ i̧sa̧ büó betia rȩjȩttü̧ rä'opürü. Ä̧ja̧ okä tokäre kku̧nä̧rü̧rü̧, oweja mü̧ä̧ya̧ 'kua̧rü̧nä̧ wa̧ ja̧'a̧nä̧ dragó̧ pättäku 'kua̧rü̧nä̧ ukuokuinü̧.

¹² Ä̧kuo̧mȩnä̧ i̧sa̧ büó betia-ttü uruwo ȩmi̧nü̧ pinü̧, jua̧u̧ weütä aditinü̧. Pi̧jä̧ ttü̧ja̧rü̧mä̧, ä̧kuo̧mȩnä̧ i̧sa̧ büó betia-rü ttiwe'kiyunä̧ pȩjä̧mü̧ tteseäkuäwünä̧ jȩpi̧nü̧. Täkü toe'ü'anü̧ ji̧nä̧tta, üttamä̧ wawächinä̧ku̧ pinü̧.

¹³ Ttü̧ja̧ ttä'kattü, jȩtto̧kü̧ ja̧jü̧ juei, bäreu jȩpi̧nü̧, mo̧ro̧jä̧ra̧'a̧ttü̧ okurä pi̧jä̧ra̧'a̧ ma̧ü̧nä̧'i̧nä̧ jȩpi̧nü̧.

¹⁴ Pide i̧sa̧ büó betia-mä̧ ttü̧ja̧ rekuätürü yaparewinü̧, ä̧kuo̧mȩnä̧ i̧sa̧ büó betia ujuru iyinü̧nä̧. Jua̧u̧nü̧ o'ka'a ä̧kuo̧mȩnä̧ i̧sa̧ büó betia pinü̧ a̧'kua̧juä̧ isä'ka aditü kku̧ni̧nü̧, kurodättü toe'inomȩ ji̧no̧mȩmä̧ ü̧ji̧pi̧na̧'a̧ ji̧na̧'a̧.

¹⁵ Dio-mä̧ ja̧'a̧tä̧ topinü̧ ä̧kuo̧mȩnä̧ i̧sa̧ büó betia pinü̧rü̧, juȩnȩ o'komȩnä̧ i̧sa̧mä̧ a̧'kua̧rü̧ iya pä'ü jȩa̧'a̧nä̧, i̧wȩnȩ ukuokuiyarü pä'ü. Jua̧u̧ ä̧kuo̧mȩnä̧ i̧sa̧, a̧'kua̧juä̧ isä'ka pä̧mä̧dü̧ esewokotürümä̧ kuä'äu ttikunä̧ we'inü̧.

¹⁶ We'inü̧ o'katoi'ünä̧rü̧, ppo̧'ä̧tü̧rü̧'i̧nä̧, tä̧mü̧rü̧'i̧nä̧, ruwotürü'i̧nä̧, usurä isotürü'i̧nä̧, ttumüwäyotürü'i̧nä̧, ttu̧wo̧juȩtä̧u̧ pokotürü'i̧nä̧, ttu̧wo̧jua̧'a̧ku̧ i̧sä̧mü̧ ttu̧mü̧nä̧ ja̧'wa̧nü̧ jü̧ juiyüttü'i̧nä̧ tti'änä̧ kkorojuei wȩyu̧ku̧ ttütä'chatü pä'ü.

¹⁷ Jua̧u̧ i̧sa̧ büó betia i̧mi̧'i̧nä̧, iäre número'i̧nä̧ jui̧'a̧ rütäwokürümä̧, mikuä pä'ü iya pä'ü'i̧nä̧, mitü'i̧nä̧ ȩmü̧ juiyünä̧tä̧ jȩpü̧ we'ü kku̧ni̧nü̧.

¹⁸ Pȩnȩmä̧ wo̧juȩku̧nä̧ ttamükuäda pä'ü ja̧'a̧: Wo̧jua̧mä̧, i̧sa̧ büó betia iäre número usú po̧kui̧pi̧, jua̧u̧mä̧ pi̧jä̧ ttü̧ja̧sa̧ iäre número ja̧'a̧. Jua̧u̧ número-mä̧ 666 ja̧'a̧.