Apocalipsis 12 - Nuevo Testamento Uwotjüja

Isaju kkütü'kü

¹ Mo̧ro̧jä̧ra̧'a̧ttü̧ i̧jȩkuä̧chi̧na̧'a̧: mo̧ro̧ kkä̧wa̧nä̧ juä'okui'äju o'kaju, isaju büa, kki̧jä̧pi̧yä̧ dȩa̧'a̧ kku̧nä̧ri̧nä̧ju̧ yodó kkä̧wa̧rü̧. Ja̧'wa̧ta̧nü̧ kkunä̧ kku̧nä̧ri̧nä̧ju̧ corona pättü kku'uttäwänä̧ doce-nü̧ si̧ri̧'ko̧tü̧rü̧mä̧.

² Juäjumä̧ muchaju kka'a, o'kaju juoja pä'ü kku̧kuä̧ba̧ barawäkua rü̧ȩnä̧ wopinä̧ju̧.

Dragó̧ pättäku ütü'kü

³ Juȩnȩ o'komȩnä̧ mo̧ro̧jä̧ra̧'a̧ttü̧ kkoro i̧jȩkuä̧chi̧na̧'a̧: Ya̧tȩ dragó̧ pättäku büó, tu̧'a̧, kko̧ro̧mü̧ttü̧nü̧ todäre jo̧mȩnä̧ kku̧nä̧rü̧ upiyämä̧, ä̧ja̧wi̧yä̧ okämä̧ to̧mü̧rȩ jäwä okä kku̧nä̧rü̧ ja̧'wa̧ta̧nü̧ jiyute u piyänä̧mä̧ ji̧yȩtȩ corona pättü u'uttäwä wȩnä̧ri̧nü̧.

⁴ Jua̧u̧ iwiribünä̧ iwi'kuo'ächomȩnä̧ mo̧ro̧jä̧nä̧ttü̧ si̧ri̧'kü̧mä̧ rekuätü juatächi'ü, pi̧jä̧ra̧'a̧ku̧ ma̧'ä̧mi̧nä̧tü̧. Ja̧'wa̧nü̧ ja̧'a̧ dragó̧ pättäkumä̧, isaju kkä'ka jo̧mȩ kkä̧mä̧di̧nü̧, o'kaju juojomȩnä̧, ji̧'chi̧cha̧wa̧rü̧ ukui'a pä'ü.

⁵ Ja̧'wa̧nü̧ ja̧'a̧ juäju isajumä̧, uborü o'kaju juo'inä̧ju̧, kuoräu i̧so̧'kȩnä̧ ruwo wȩä̧kua̧rü̧ pi̧jä̧ o'kajuiyünä̧ ttü̧ja̧rü̧. Ja̧'wa̧nü̧ ja̧'a̧nä̧ juäju kki̧tti̧rü̧mä̧, 'cho'ipü Dio-rü iyäwi'ina̧'a̧, uruwo weomȩ.

⁶ Ja̧'wa̧nü̧ ja̧'a̧nä̧, juäju isajumä̧ rȩbi̧yu̧ dȩ'a̧ra̧'a̧ku̧ tü'ipächinä̧ju̧, Dio aditü u̧ju̧ni̧no̧mȩku̧ kku̧kuȩ iyü tta̧ttä̧ra̧ju̧, wäbodäkuä año ja̧'a̧nä̧ kkoro año ju'to jo̧mȩnä̧.

⁷ Ja̧'wa̧nü̧ päi'omȩnä̧, mo̧ro̧jä̧ra̧'a̧ttü̧ kurä kki̧na̧'a̧: Miguel pä'ü mi̧kua̧ umüwäyotü á̧gȩrȩ-ku̧ rowäwinä̧tü̧ dragó̧ pä'ü mi̧kua̧rü̧; jua̧u̧'i̧nä̧ umüwäyotü á̧gȩrȩ-ku̧ ppä'ädäkuäu rowäwinü̧.

⁸ Ja̧'wa̧nü̧ ja̧'a̧nä̧ weyekuinä̧tü̧, mo̧ro̧jä̧nä̧mä̧ täkü ttü̧ja̧kuo̧mȩ juiyina̧'a̧.

⁹ Ja̧'wa̧nü̧ ja̧'a̧ttü̧, jua̧u̧ dragó̧ pä'ü mi̧kua̧, mo̧ täbokü ä̧ka̧ pinü̧, äwettä, satanás, pättäku pi̧jä̧ o'kajuiyünä̧ yapareumä̧, umüwäyotü á̧gȩrȩ-ku̧ pi̧jä̧ rȩjȩra̧'a̧ kki'opü ikuinä̧u̧.

¹⁰ Ja̧'wa̧nü̧ päi'omȩnä̧, mo̧ro̧jä̧ra̧'a̧ttü̧ pä̧i̧ku̧nä̧ rä̧mi̧pa̧'a̧ ä̧ju̧kui̧nü̧sä̧: Täkü surojüttü kki̧'i̧kuä̧mä̧ rȩbȩä̧kuä̧wa̧'a̧, Tu̧ru̧wa̧ ujuru'i̧nä̧, uruwo weü'i̧nä̧ ja̧'wa̧ta̧nü̧ Crito uruwo weü'i̧nä̧, jü̧nä̧; jua'amä̧, täkü rä'epü iku yawokui'a'attü tawaruwä tü̧jä̧wa̧tü̧rü̧ suronä̧ pä'ä'chi'enü̧rü̧, mo̧ro̧'i̧nä̧, yodo'i̧nä̧ 'kuäopünä̧tä̧ suronä̧ pä'inü̧rü̧, Tä'o Dio ä'ka jo̧mȩttü̧.

¹¹ Ja̧'wa̧ta̧nü̧ tawaruwä ti̧jä̧wa̧tü̧mä̧ abó 'kuätto'inä̧ku̧, oweja mü̧ä̧ya̧ jü̧nä̧ wa̧ ukuoja erinoyanä̧ ja̧'wa̧ta̧nü̧ jittäwinü̧ wȩnȩnä̧; wa'ü ttikua'anä̧'i̧nä̧, ye'ekuokotü pinä̧tü̧, jua'a yaboku, wä̧i̧nä̧ wa'ü ttikuatä pä'inä̧tü̧.

¹² ¡Ja̧'wa̧nü̧ ja̧'a̧ttü̧, eseäkuäwätukui mo̧ro̧jä̧ jäwä'i̧nä̧, ja̧'wa̧ta̧nü̧ mo̧ro̧jä̧nä̧ kka̧kuä̧tü̧'i̧nä̧! jü̧nä̧. Ja̧'wa̧nü̧ ja̧'a̧nä̧, ¡Isottü̧! ¡rȩjȩnä̧'i̧nä̧, rü̧ä̧ ajenä̧'i̧nä̧ kka̧kuä̧tü̧rü̧ juiyo ra̧wä̧pi̧ja̧'a̧, isopäi'ünä̧ äwettämä̧ a̧'u̧ku̧nä̧tä̧ mo̧ro̧ kki̧'ä̧ku̧, wo̧juä̧u̧ ukuturu, suronä̧ jȩa̧ pä'ü a̧mi̧ sura'a mȩyȩwi̧nü̧!

¹³ Ja̧'wa̧nü̧ dragó̧ pättäkumä̧ pi̧jä̧ra̧'a̧ku̧, kki'opü ikuäjäku wo̧jui̧'ü̧mä̧, ru'i'inü isaju kki̧tti̧rü̧ o'kaju juo'inä̧ju̧ru̧.

¹⁴ Ja̧'wa̧nü̧ ja̧'a̧nä̧, juäjuru iyäwi'ina̧'a̧ tobäre kkujuabiyä bäreu pare ujuabiyä, jua̧u̧ dragó̧ pättäku ä'kattü otó kojächa pä'ü, rȩbi̧yu̧ dȩ'a̧ra̧'a̧ku̧, juäjurutä ja̧'a̧tȩ'ü̧ jȩpü̧ kku̧nä̧wo̧mȩku̧, juorü ttukuäje'aju pä'ü, wäbodäkuä año ja̧'a̧nä̧, kkoro ju'to jo̧mȩnä̧.

¹⁵ Jua̧u̧ dragó̧ pättäkumä̧, juäju kko'komȩ jo̧mȩ, änä̧ ajiya räo'ünä̧ jȩpi̧nü̧ aje päi'ünä̧, juoto aje juatädi'aju pä'ü.

¹⁶ Ja̧'wa̧nü̧ ja̧'a̧nä̧, rȩjȩ ppädina̧'a̧ juäjuru, ä bawekuächa'attü, dragó̧ pättäku änä̧ jȩä̧joto ajemä̧, joi'ünä̧ 'ku̧ä̧di̧'i̧na̧'a̧.

¹⁷ Ja̧'wa̧nü̧ weyeku, jua̧u̧ dragó̧ pättäkumä̧, juäjuru a̧mi̧ surächi'äku; rowäu 'chi̧nü̧ kkorotü juäju kki̧tti̧mü̧rü̧, Dio i̧wȩnȩ esetü ukuotätürü ja̧'wa̧ta̧nü̧ Jesú jiäwinü̧nä̧ esetü 'chä̧tü̧rü̧.

¹⁸ Ja̧'wa̧nü̧ jȩpü̧ 'chä̧nü̧, dragó̧ pättäkumä̧, rü̧ä̧ aje jäyoto kkä̧mä̧di̧nü̧.