Apocalipsis 11 - Nuevo Testamento Uwotjüja

¹ Ja̧'wa̧nü̧ ja̧'a̧, chü̧'a̧tä̧kuä̧nä̧ ttürü iyäwi'a'attü̧, päwi'inä̧ku̧sä̧: Ä̧rä̧mi̧'ü̧ Dio ojusode, Dio-rü ukuokuäkuäwode pa̧ja̧ti̧ ja̧'wa̧ta̧nü̧ Altar pättomȩ'i̧nä̧ pa̧ja̧ti̧ ja̧'wa̧ta̧nü̧ juȩnȩ Dio-rü eseu ukuokuätürü'i̧nä̧ pa̧ja̧ti̧.

² Ja̧'wa̧nü̧ ja̧'a̧nä̧, u̧mi̧nä̧mä̧ ku̧'a̧to̧ka̧'a̧ kku̧ni̧pi̧, juȩnȩmä̧ judío pokotürü iyäwi'ino̧mȩ; juätütä wettäkuomȩ ütawiyä surojü juiyomȩmä̧, cuarenta y do-nü̧ kkä̧wa̧tü̧ jo̧mȩnä̧.

³ Ja̧'wa̧nü̧ ja̧'a̧ttü̧ wȩdä̧kua̧sä̧, ttü chütü'kü ji'äwätü ta̧ju̧ru̧, wäbodäkuä año ja̧'a̧nä̧, kkoro año ju'to jo̧mȩnä̧, ajuäkuäu 'ka̧tä̧kuä̧wä̧ 'ka̧tä̧wä̧tü̧rü̧.

⁴ Pitü, ttü chütü'kü jittäwäkuotü ta̧ju̧mä̧, olivo dauwiyä toire ja̧'a̧ ja̧'wa̧ta̧nü̧ tȩya̧u̧, todäre jo̧mȩnä̧ jü̧, pi̧jä̧ u̧ru̧wa̧ Dio ä'ka jo̧mȩ kka̧ku̧.

⁵ Ja̧'wa̧nü̧ ja̧'a̧ttü̧, juätürü ya̧tȩ suronä̧ jȩa̧ päüttümä̧, juätümä̧ ttänä̧ okurä kuoäkuäu̧, kuo'ü ttikunä̧ ttaboiyotürümä̧, 'koru pätti'ünä̧'i̧nä̧, jü̧nä̧tä̧.

⁶ Pitümä̧ ttujuru kku̧nä̧rä̧tü̧, mo̧ro̧jä̧ttü̧ ajiya ichü juiyünä̧ jȩtta̧ pä'ü'i̧nä̧, jü̧nä̧, jittäu mo̧ro̧mä̧; ja̧'wa̧ta̧nü̧ ajewiyänä̧'i̧nä̧ ttujuru kku̧nä̧rä̧tü̧, ttukuojatä päi'ünä̧ jȩtta̧ pä'ümä̧. Ja̧'wa̧ta̧nü̧ pi̧jä̧nä̧ttü̧ surojünä̧ jȩtta̧ pä'ü'i̧nä̧, ttujuru kku̧nä̧rä̧tü̧, jȩttü̧nä̧tä̧ pä̧wä̧rü̧jo̧mȩnä̧mä̧.

⁷ Ja̧'wa̧nü̧ ja̧'a̧ ji'äu kättädü o'ka'amä̧, 'kuȩya̧ppa̧nü̧ jä̧ju rejuttü rä'opü i̧sa̧ Betia pättäkumä̧ juätuku ürowäwä̧kua̧, juätüttü'i̧nä̧ abo 'kuä'o'ü, kuä'ü i̧kuä̧kuä̧u̧.

⁸ Juätü kuä'äu i̧kuä̧jä̧u̧ o'kotümä̧, ütawiyä bäreu mä̧ni̧yä̧nä̧ ttü'ȩjä̧kuo̧tü̧, epíritu jäwänä̧mä̧ Sodoma, Egito pä'ü mi̧kuomȩ, ujutu Tu̧ru̧wa̧rü̧ ü̧jo̧kä̧nü̧ jäinä̧ kuä'ü ttikuino̧mȩ.

⁹ Wäbodäkuä mo̧ro̧ 'kuäo'ünä̧ kkoro mo̧ro̧ ju'to mo̧ro̧ jo̧mȩnä̧, ttü̧ja̧ kkara'a ruwä'i̧nä̧, kkorotü isotü'i̧nä̧, kkoro ukuokuätü'i̧nä̧, kkoro rȩjȩ'i̧nä̧, juätürü ttu'tura'anä̧mä̧ ja̧'a̧tä̧mä̧ tottokäkuotü.

¹⁰ Juätü totte'ächäja'a topümä̧ pi̧jä̧ ttü̧ja̧mä̧ tteseäkuäwäkuotü, regalos pättü iyä'chäkuäu, juätümä̧ suronä̧tä̧ jȩtti̧nä̧u̧.

¹¹ Ja̧'wa̧nü̧ ja̧'a̧nä̧, Dio-mä̧ wäbodäkuä mo̧ro̧ o'ka'a, ji̧yȩtȩ mo̧ro̧ kkä'ko päi'omȩnä̧ tta̧'kua̧ri̧'ü̧nä̧ jȩi̧nä̧u̧, ja̧'wa̧nü̧ jo̧mȩnä̧ ä̧rä̧mi̧'ü̧ kka̧kui̧nä̧tü̧; ja̧'wa̧nü̧ ji̧yä̧u̧, o'katoi'ünä̧ juätürü topätümä̧ rü̧ȩnä̧ ye'inä̧tü̧.

¹² Ja̧'wa̧nü̧ ja̧'a̧, juätürü mo̧ro̧jä̧ra̧'a̧ttü̧ pä̧i̧ku̧nä̧ pa̧'a̧nü̧ rä̧mi̧pi̧na̧'a̧: «Poku 'cha'ächi'ätukui» päomȩnä̧, mo̧ro̧jä̧ra̧'a̧ ajiya isoppanä̧ 'cha'ächinä̧tü̧, ttaboiyotümä̧ o'katoi'ünä̧ to̧ttä̧ra̧'a̧nä̧.

¹³ Jua̧u̧ hora-nä̧, rȩjȩ tti̧ȩpo̧mȩnä̧ pparächi'ina̧'a̧ ja̧'wa̧nü̧ päi'omȩnä̧ ütawiyä suropäi'ina̧'a̧, ttü̧ja̧mä̧ siete mil-nü̧ jo̧mȩnä̧ to'e'inä̧tü̧. Ja̧'wa̧nü̧ ja̧'a̧nä̧ to'e'okotümä̧ rü̧ȩnä̧ ye'ü, Dio mo̧ro̧jä̧ ru̧wa̧rü̧ eseäkuäwinä̧tü̧.

¹⁴ Jua̧u̧ ji̧na̧'a̧ todäre päi'ünä̧ usurä ttȩmä̧u̧mä̧, jua'a yabonä̧ wäbodäkuä päi'ünä̧ jitätä ja̧'a̧ i̧chä̧kuȩmä̧ juiya'a.

Kko̧ro̧mü̧ttü̧nü̧ todäre trompeta päi'omȩnä̧ ppü'inü̧

¹⁵ Kko̧ro̧mü̧ttü̧nü̧ todäre á̧gȩ iäre trompeta ppüomȩnä̧, mo̧ro̧jä̧ra̧'a̧ttü̧ pä̧i̧ku̧nä̧ rä̧mi̧pi̧na̧'a̧: «Täkü rȩbȩä̧kuä̧wa̧'a̧, pi̧jä̧nä̧ Tu̧ru̧wa̧ Dio'i̧nä̧, weinä̧ku̧'i̧nä̧ ruwotü jü̧nä̧ wettü mo̧ro̧ ja̧'wa̧nü̧ ja̧'a̧ttü̧ mo̧ro̧ kki̧ä̧mü̧nä̧ wettäkuotü.»

¹⁶ Veintikuatro-nü̧ wotü, Dio ä'ka jo̧mȩ, ru̧wa̧ jü̧nä̧ weomȩ pȩjä̧tü̧mä̧, rȩjȩra̧'a̧ päi'ünä̧ ttiwe'kiyunä̧ pȩjä̧mä̧kuä̧u̧ Dio-rü eseäkuäwinä̧tü̧.

¹⁷ Pa̧'a̧nü̧ pä'ünü̧: Chu̧ru̧wa̧ Dio, o'kajuiyünä̧ ju̧ru̧wa̧jä̧, ukumä̧ kkü̧jä̧, mo̧ro̧ kki̧ä̧mü̧nä̧tä̧ kki̧nü̧jä̧. Ukuru esewätüjä̧, kujuru i̧jȩpü̧, ruwo wekua'attü̧, pi̧jä̧ rȩjȩnä̧.

¹⁸ Ukuru esetokotümä̧, rü̧ȩnä̧ tta̧mi̧ sura'a, ja̧'wa̧nü̧ ja̧'a̧nä̧ ji̧yȩ mo̧ro̧ rȩbȩä̧kuä̧wa̧'a̧, pä̧i̧ku̧nä̧, usurä ttȩmä̧u̧nä̧ ro̧kuȩpä̧kuȩ mo̧ro̧, «Jua̧u̧nü̧ mo̧ro̧mä̧, wa'ü ikuinä̧tü̧ o'katoi'ünä̧rü̧ jȩtti̧nü̧ adiu ja̧ pä'ü'i̧nä̧, surojü ja̧ pä'ü'i̧nä̧ pä'ü ku̧ju̧nä̧kua̧jä̧. Profeta winä̧tü̧rü̧, ku̧mü̧wä̧yotürü, ukuotätürü, ruwotürü'i̧nä̧, usurä isotürü'i̧nä̧ adiwä juei kuiyä'chä̧kua̧jä̧. Ja̧'wa̧nü̧ jȩpü̧ pi̧jä̧ rȩjȩ surojuo'epätürü, si'epü kui̧kuä̧kua̧jä̧.»

Ttu̧wo̧jui̧pü̧nä̧ i̧jȩkui̧nü̧

¹⁹ Ja̧'wa̧nü̧ ja̧'a̧ Dio-rü ukuokuäkuäwode, mo̧ro̧jä̧ra̧'a̧ttü̧ bawekuächomȩnä̧, Aca pä̧tto̧ka̧ esekuino̧ka̧mä̧, tottünä̧ i̧jȩkuä̧chi̧na̧'a̧. Ja̧'wa̧nü̧ päi'omȩnä̧ ku'upä rowinü̧, tti̧wȩnȩ rä̧mi̧pi̧na̧'a̧, rü̧ȩnä̧ kürüina̧'a̧, rȩjȩ ttü̧ȩpa̧'a̧ttü̧ pparächina̧'a̧ ja̧'wa̧ta̧nü̧ rü̧ȩnä̧ ajiya jamara ma̧i̧na̧'a̧.