Apocalipsis 10 - Nuevo Testamento Uwotjüja

Ya̧tȩ á̧gȩ iäre kuyäru'täku kki̧nü̧

¹ Kka̧ra̧ á̧gȩ-rü̧ ujuruku mo̧ro̧jä̧ra̧'a̧ttü̧ i̧mȩyȩwa̧'a̧ topinü̧sä̧, kkä̧rü̧'koppa jakuänä̧; unä̧mä̧ wäyurobü kki̧na̧'a̧. I'ämä̧ kkä̧wa̧ 'kua̧ri̧nü̧ ja̧'wa̧ta̧nü̧ i̧jä̧pi̧yä̧mä̧ okurä 'kua̧ri̧na̧'a̧.

² Jua̧u̧mä̧ u̧mü̧nä̧ ȩpi̧nü̧ ji'täte kuyäru'tä bawekua'a. Ja̧'wa̧nü̧ ja̧'a̧ ü̧jä̧mä̧do̧mȩnä̧, u̧wo̧jua̧'a̧ku̧ i̧jä̧pü̧mä̧ kkä̧mä̧di̧nü̧, rü̧ä̧ ajenä̧ ja̧'wa̧ta̧nü̧ ieruwa'akunä̧ i̧jä̧pü̧mä̧ kkä̧mä̧di̧nü̧ pi̧jä̧ rȩjȩnä̧.

³ Ja̧'wa̧nü̧ ja̧'a̧ pä̧i̧ku̧nä̧ wopi'inü̧, jojochäyu jä̧'i̧nü̧'a̧nü̧. Ja̧'wa̧nü̧ woi'omȩnä̧mä̧ kko̧ro̧mü̧ttü̧nü̧ todäre jo̧mȩnä̧ rä̧mi̧pi̧na̧'a̧ pä̧i̧ku̧nä̧, ku'upä ürowa'a 'kua̧rü̧nä̧.

⁴ Ja̧'wa̧nü̧ kko̧ro̧mü̧ttü̧nü̧ rä̧mi̧po̧mȩnä̧, chi̧wȩyu̧ta̧ pä'inü̧sä̧; ja̧'wa̧nü̧ ja̧'a̧nä̧ mo̧ro̧jä̧ra̧'a̧ttü̧ rä̧mi̧pi̧na̧'a̧: «Kui̧wȩyu̧tä̧ kko̧ro̧mü̧ttü̧nü̧ todäre jo̧mȩnä̧ rä̧mi̧pä̧ji̧mä̧, dajütä kku̧ni̧,» jü̧nä̧.

⁵ Ja̧'wa̧nü̧ päi'omȩnä̧, rü̧ä̧ aje wä̧mȩnä̧'i̧nä̧, pi̧jä̧ rȩjȩnä̧'i̧nä̧ ü̧ja̧'a̧ tochäjäku á̧gȩ päjimä̧, u̧wo̧jua̧'a̧ku̧nä̧ u̧mü̧ kä'epinü̧ mo̧ro̧jä̧ra̧'a̧ku̧.

⁶ Ja̧'wa̧nü̧ ja̧'a̧, juramento pättü jȩpi̧nü̧, mo̧ro̧ kki̧ä̧mü̧nä̧ kkü̧ i̧mi̧nä̧, mo̧ro̧jä̧'i̧nä̧, juä̧jä̧nä̧ kka̧ku̧'i̧nä̧, pi̧jä̧nä̧ kka̧ku̧'i̧nä̧, rü̧ä̧ ajenä̧ kka̧ku̧'i̧nä̧, o'kajuiyünä̧ kka̧ku̧, aditinü̧ i̧mi̧nä̧. Jua̧u̧mä̧ pä'inü̧: Täkü mo̧ro̧mä̧ juiyäkua'a, pä'ü.

⁷ Ja̧'wa̧nü̧ ja̧jü̧ jueimä̧, kko̧ro̧mü̧ttü̧nü̧ á̧gȩ i̧wȩnȩ rä̧mi̧po̧mȩnä̧mä̧, iäre trompeta ppüomȩnä̧mä̧, Dio jäwä uwäwokü ji̧nü̧mä̧ jo̧mȩnü̧ päi'äkua'a, umüwäyotü profeta wotünä̧ jareü wȩnȩ ukuokuinü̧mä̧.

⁸ Ja̧'wa̧nü̧ ja̧'a̧, mo̧ro̧jä̧ra̧'a̧ttü̧ i̧wȩnȩ rä̧mi̧pa̧'a̧ chä̧ju̧kui̧nü̧ ji̧nü̧mä̧, pä'äjita'anü̧ päinä̧ku̧sä̧: Rü̧ä̧ aje'i̧nä̧, pi̧jä̧ rȩjȩ'i̧nä̧ wä̧mȩ kkü̧ á̧gȩ u̧mü̧nä̧ 'chu̧ä̧rä̧'tä kuyäru'tä bawekuä'tä ȩmä̧ji̧.

⁹ Ja̧'wa̧nü̧ ja̧'a̧, á̧gȩ-rü̧ 'chä̧wi̧'ü̧ kuyäru'tä iyattü pä'ü jä'epinü̧sä̧. Jädepäku pä'inü̧: Ja̧já̧ juä'täsä kui'i'i; kukuomȩnä̧ kua̧mi̧mä̧ rȩä̧kua̧jä̧ ja̧'wa̧nü̧ ja̧'a̧nä̧ kuänä̧mä̧ sa̧dä̧kua̧'a̧, mayaja 'kua̧rü̧nä̧.

¹⁰ Päku, kuyäru'tä á̧gȩ-ttü̧ ȩmo̧po̧'ü̧ chukui'omȩnä̧; Chänä̧mä̧ sa̧di̧na̧'a̧, mayaja 'kua̧rü̧nä̧ ja̧'wa̧nü̧ ja̧'a̧nä̧ chukuäji o'ka'amä̧, cha̧mi̧nä̧mä̧ reinä̧ku̧sä̧.

¹¹ Ja̧'wa̧nü̧ ja̧'a̧ jua̧u̧mä̧ päinä̧ku̧sä̧: Pä'äji jä̧ji̧ ta̧'a̧nü̧ rekuä rü̧ja̧'a̧ Dio amükuädü jikuäwa pä'ü, tti̧wȩnȩ pünä̧, tti̧rȩji̧yä̧ pünä̧, ruwotürü'i̧nä̧, jü̧nä̧.