Apocalipsis 1 - Nuevo Testamento Uwotjüja

Jesú u̧mü̧wä̧ya̧rü̧ i̧jȩpi̧nü̧ wȩnȩ

¹ Dio-mä̧ Jesucrito-rü iyinü̧, umüwäyotürü jitätä ja̧'a̧ 'kuäopä̧kuȩ wȩnȩ i̧jȩpa̧ pä'ü. Ja̧'wa̧nü̧ jo̧mȩttü̧ Jesucrito-mä̧ Ju̧a̧-rü̧ ji'äwinü̧, ya̧tȩ u̧mü̧wä̧ya̧ á̧gȩ-nä̧,

² Ja̧'wa̧nü̧ ji̧na̧'a̧ttü̧ jua̧u̧ Ju̧a̧-mä̧ toinü̧mä̧ jueünä̧tä̧ ji'äwinü̧, Dio Jesucrito-nä̧ jiäwinü̧ wȩnȩmä̧.

³ Pi̧yȩ 'kuäopä̧kuȩ wȩnȩ topü ukuokurumä̧ ja̧'wa̧ta̧nü̧ ä̧ju̧ku̧ ukuotätürümä̧, rü̧ȩnä̧ eseäkuäwä kka̧'a̧, täkü jua̧u̧ 'kuäopä̧kuȩ mo̧ro̧mä̧ tü'kü ja̧'a̧ttü̧.

Teäwinü̧ wȩnȩ

⁴ Ttü Ju̧a̧, Asia rȩjȩnä̧ kka̧kuä̧tü̧, kko̧ro̧mü̧ttü̧nü̧ todäre igresia wotürü te'äusä: Wȩnȩ juiyü, adiwä juei ukuturu kka̧ pä'üsä. Jitä'i̧nä̧ kkü̧, mo̧'i̧nä̧ kki̧nü̧, pä'ejita'anü̧'i̧nä̧ i̧chä̧kua̧ ja̧'wa̧ta̧nü̧ kko̧ro̧mü̧ttü̧nü̧ ta̧ju̧ wotü uruwo dȩä̧kä̧ ä'ka jo̧mȩ kka̧kuä̧tü̧ epíritu-tu̧ru̧'i̧nä̧ kku̧nä̧rü̧ ȩmi̧nä̧u̧ kuätukua'attü,

⁵ Ja̧'wa̧ta̧nü̧ Jesucrito, jueü wȩnȩ jiäkuäwä i̧sa̧, wa'inä̧tü̧ttü̧ ä̧kuo̧mȩnä̧ tto'ächinü̧ ja̧'wa̧ta̧nü̧ pi̧jä̧ ruwotü'i̧nä̧ ttu̧wä̧mȩnä̧ wa̧ ȩmi̧nä̧u̧jä̧. Jua̧u̧tä̧ ja̧'a̧ ujuturu repe'ü, suronä̧ jȩtü̧'i̧nä̧ ukuojanä̧ tükü ikuinü̧mä̧.

⁶ Ja̧'wa̧nü̧ jȩpü̧ kku̧nu̧ rȩjȩ ruwotü jü̧nä̧, sacerdote-tü̧ jü̧nä̧ Jä'o Dio iyinä̧u̧jä̧; ja̧'wa̧nü̧ ja̧'a̧ttü̧ ¡Jua̧u̧ru̧ esewätüjä̧ mo̧ro̧ kki̧ä̧mü̧nä̧, uruwo we'ürü! Amȩ́.

⁷ ¡Crito-mä̧ ajiya isoppanä̧ i̧chä̧kua̧! O'katoi'ünä̧ tottä̧kua̧, Churutä dakuodänä̧ ta'inä̧tü̧'i̧nä̧ tottä̧kua̧; Ja̧'wa̧ta̧nü̧ o'katoi'ünä̧ pi̧jä̧ ttü̧ja̧mä̧ jua̧u̧ru̧ topü ttajuäkuäwäkuotü. Ja̧'wa̧nü̧ ji̧yä̧u̧. Amȩ́.

⁸ «Ttütäsä ä̧kuo̧mȩnä̧'i̧nä̧, rüjinä̧'i̧nä̧ wa̧mä̧,» pä'ü Tu̧ru̧wa̧ Dio-mä̧, täbokü'i̧nä̧ kki̧nü̧mä̧, jitä'i̧nä̧ kkü̧mä̧, ja̧'wa̧ta̧nü̧ yodoji'i̧nä̧ i̧chä̧kua̧mä̧, o'kajuiyünä̧tä̧ ujuru kku̧nä̧rü̧mä̧.

Visión pättünä̧ Jesucrito i̧jȩkui̧nü̧

⁹ Ttü, Ju̧a̧, Crito-nä̧ ku̧jä̧wa̧tu̧ku̧ wa̧, ukutu jü̧ta̧'a̧nü̧ Dio weü jäwänä̧ usurä ȩmä̧kuä̧wä̧ i̧sa̧, Jesucrito a̧mi̧ 'ki'ächi'ü jäwänä̧ wa̧sä̧. Pamo pä̧ttä̧sa̧ kkä'ko i̧sä̧sa̧nä̧; Dio i̧wȩnȩ jäwänä̧ ja̧'wa̧ta̧nü̧ Jesucrito jäwänä̧ ttȩpi̧nä̧ku̧ kkä̧nü̧,

¹⁰ Tu̧ru̧wa̧ u̧mo̧ro̧ ja̧'a̧, Epíritu Sa̧tu̧ jäwänä̧ chü̧ja̧'a̧ chaboja̧'a̧ku̧nä̧ttü̧ pä̧i̧ku̧nä̧ rä̧mi̧pi̧na̧'a̧ ä̧ju̧kui̧nü̧sä̧ trompeta jä̧'i̧nü̧'a̧nü̧,

¹¹ i̧wȩnȩ rä̧mi̧pü̧nä̧ pä'ümä̧, pä'inü̧: «Ukú to'kumä̧ wȩyu̧tu̧ we'í, kko̧ro̧mü̧ttü̧ todärenü̧ jü̧ igresia wotürü, Asia rȩjȩnä̧ kka̧kuä̧tü̧rü̧: Éfeso-ra̧'a̧'i̧nä̧, Esmirna-ra̧'a̧'i̧nä̧, Pégamo-ra̧'a̧'i̧nä̧, Tiatira-ra̧'a̧'i̧nä̧, Sadira̧'a̧'i̧nä̧, Firadefia-ra̧'a̧'i̧nä̧ ja̧'wa̧ta̧nü̧ Laodicea-ra̧'a̧'i̧nä̧,» jü̧nä̧.

¹² Ja̧'wa̧nü̧ rä̧mi̧pi̧yä̧ku̧, dí ukuokuättü pä'ü chüjärächi'omenä, topinü̧sä̧: Tochomȩnä̧, kko̧ro̧mü̧ttü̧nü̧ tokäre jo̧mȩnä̧ tȩya̧u̧ rȩdȩkuä̧ okä candelabro pättü, oro-ttü adikuä okä kka̧kui̧na̧'a̧,

¹³ jua̧u̧ candelabro pättü okä 'kä̧tȩ jo̧mȩ kki̧nü̧, ya̧tȩ ubo i̧tti̧ Jesú 'kua̧ra̧, ü̧'ka̧tä̧wä̧ta̧mä̧ ü̧jä̧pü̧ra̧'a̧bü päi'ünä̧ beipä̧ta̧ 'ka̧tä̧u̧ ja̧'wa̧ta̧nü̧ a̧mü̧kanä̧ oro isäya rü̧nä̧ri̧nü̧.

¹⁴ Uwo'chemä̧ oweja uwo'chettü adikuä̧ta̧ teä'ijüta'anü te'inü̧, diyawa'a ma̧ä̧ppȩ teä'ijü'a̧nü̧, i'äriyämä̧ okurä kuoa'a jä̧'i̧jü̧'a̧nü̧ kuo'inü̧.

¹⁵ Ü̧jä̧pi̧yä̧mä̧ Bro̧ce pättü jäwättü, kkuwü ikuäwa'a säruwä'inü̧'a̧nü̧ kkä̧dȩpi̧na̧'a̧; ja̧'wa̧ta̧nü̧ i̧wȩnȩmä̧ ajiya rü̧ȩnä̧ tawipa'a rä̧mi̧pä̧'i̧nü̧'a̧nü̧ rä̧mi̧pi̧na̧'a̧.

¹⁶ U̧mü̧ u̧wo̧jua̧'a̧ku̧ i̧sä̧mü̧nä̧mä̧ si̧ri̧'kü̧ kko̧ro̧mü̧ttü̧nü̧ ta̧ju̧ wotürü 'chu̧'ä̧ri̧nü̧ ja̧'wa̧ta̧nü̧ ättümä̧ kurodä päteku so̧dä tä̧o̧dä räopina̧'a̧. Ja̧'wa̧ta̧nü̧ ü'ämä̧ kkä̧wa̧ rü̧ȩnä̧ kkȩdȩpo̧mȩnä̧ kkä̧dȩpa̧'a̧ jä̧'i̧nü̧'a̧nü̧ kkä̧dȩpi̧na̧'a̧.

¹⁷ Ja̧'wa̧nü̧ topümä̧, 'korupä'i'ätü 'kua̧rü̧nä̧ ü̧jä̧pi̧yä̧ kkada'ka ma̧'ä̧mi̧nü̧sä̧. Ja̧'wa̧nü̧ pädi'iyäku, u̧wo̧jua̧'a̧ku̧nä̧ i̧sä̧mü̧ u̧mü̧nä̧ mȩ'ü̧, päinä̧ku̧sä̧: —Yekuekuä; ttümä̧ ä̧kuo̧mȩnä̧tä̧ päi'ünä̧ kki̧nü̧sä̧ ja̧'wa̧ta̧nü̧ rüjí mo̧ro̧bü päi'ünä̧ chü̧jä̧kua̧sä̧,

¹⁸ ja̧'wa̧ta̧nü̧ jitämä̧ a̧'kua̧rü̧sä̧, ya'utenä̧mä̧ 'korujuo'ächinü̧sä̧; ja̧'wa̧nü̧ ji̧na̧'a̧nä̧ jitämä̧, mo̧ro̧ kki̧ä̧mü̧nä̧ kkü̧sä̧. Ja̧'wa̧ta̧nü̧ wa'are ujuru u̧wä̧mȩnä̧ wa̧sä̧, chujurumä̧.

¹⁹ Ja̧'wa̧nü̧ ja̧'a̧ttü̧, to'kuäjimä̧ wȩyu̧ti̧: Jitä 'kuäopü'i̧nä̧ ja̧'wa̧ta̧nü̧ yodoji 'kuäopä̧kuȩ'i̧nä̧, jü̧nä̧.

²⁰ Ku̧wo̧jui̧pü̧ juiyünä̧ jä̧ji̧, chu̧wo̧jua̧'a̧ku̧nä̧ 'chu̧dä̧rä̧jä̧u̧ kko̧ro̧mü̧ttü̧nü̧ ta̧ju̧ si̧ri̧'ko̧tü̧ päjätümä̧; kko̧ro̧mü̧ttü̧nü̧ tokäre tȩya̧u̧ kku̧nä̧wä̧ okä oro okä jä̧ji̧'i̧nä̧ jü̧nä̧mä̧, pi̧yȩ ja̧'a̧: Kko̧ro̧mü̧ttü̧nü̧ ta̧ju̧ si̧ri̧'kü̧ päjätümä̧, kko̧ro̧mü̧ttü̧nü̧ todäre igresia-ttü á̧gȩrȩ-rü päteta'a; ja̧'wa̧ta̧nü̧ kko̧ro̧mü̧ttü̧nü̧ tokäre tȩya̧u̧ kku̧nä̧wä̧ okä jä̧ji̧mä̧, kko̧ro̧mü̧ttü̧nü̧ todäre igresia-rü päteta'a.