3 Juan 1 - Nuevo Testamento Uwotjüja

Teäwinü̧ wȩnȩ

¹ Ttü igresia-ttü A̧ci̧a̧nu̧tu̧ wa̧, isopäi'ünä̧ repedäku ukú Gayo-rü chi̧wȩnȩ we'üsä.

Gayo-rü esewinü̧ wȩnȩ

² Cha̧wa̧ru̧wa̧ chi̧jä̧wa̧, Dio-rü jä'epüsä, Epíritu jäwänä̧ kuä̧rä̧mü̧ta̧'a̧nü̧, kkoro o'kajuiyünä̧'i̧nä̧ adiu kuä̧rä̧ma̧ pä'ü ja̧'wa̧ta̧nü̧ kumä̧richei juiyomȩnä̧ ku̧ja̧ pä'ü.

³ Ja̧'wa̧ta̧nü̧ tawaruwä ti̧jä̧wa̧tü̧ yotukunä̧ ichäjä'kotü jueü wȩnȩnä̧ 'kiyünä̧ ku̧ja̧'a̧ jittäwa'a ä̧ju̧ku̧ rü̧ȩnä̧ esewäjisä.

⁴ Chi̧tti̧mü̧ wotü jueü wȩnȩnä̧ päü'anü̧ ttü̧ja̧kua̧'a̧ ä̧ju̧ku̧mä̧, kkorottü'i̧nä̧ abonä̧nü̧ eseusä.

⁵ Cha̧wa̧ru̧wa̧ chi̧jä̧wa̧, adiwomȩnä̧ jȩpü̧jä̧ kkorotü tawaruwä tü̧jä̧wa̧tü̧rü̧ ppäkuäda'amä̧, ji̧nä̧somä̧ kko̧ro̧jä̧ttü̧ rȩbȩwä̧tü̧rü̧.

⁶ Juätümä̧, eseu repekua'amä̧ ttü̧ja̧ ttä'ka jo̧mȩttü̧ igresia-rü, ukuokuäjätü. Juätürü kkara'a tti̧'cha̧'a̧ rekuä rü̧jü̧mä̧ ppä'äditü, Dio esewomenä̧ jä̧kua̧'a̧nü̧.

⁷ Juätümä̧ Jesucrito i̧wȩnȩ kka̧kuä̧mü̧ ji'äwätü, Dio-rü esetokotü ppättädümä̧ ȩmä̧wä̧ juiyünä̧.

⁸ Ja̧'wa̧nü̧ ja̧'a̧ttü̧ ujutumä̧, juätü ttaditäwämä̧ ppätädü'anü̧ ja̧'a̧, juätümä̧ ujututä ppätädäu̧ jü̧nä̧tä̧.

Diótrefes'i̧nä̧, Demetrio'i̧nä̧ jȩtti̧nü̧ wȩnȩ

⁹ Igresia-rü wȩyu̧tu̧ we'inü̧sä̧ ja̧'wa̧nü̧ ja̧'a̧nä̧ Diótrefe-mä̧ ukuotoka'a, juiyo weäwätä kkü̧'ka̧.

¹⁰ Ja̧'wa̧nü̧ ja̧'a̧ttü̧, chichomȩnä̧mä̧ ji̧dä̧wä̧kua̧, juiyo ujutu tütü'kü suronä̧ ukuokua'attü. Suro, jua̧u̧tä̧mä̧kü̧ kkara'attü rȩbȩä̧kuä̧wä̧tü̧ Jesucrito-rü esetätürü'i̧nä̧ ya̧'o̧kuä̧rü̧ jȩpü̧. Ja̧'wa̧ta̧nü̧ ttawaruwä ttü̧jä̧wa̧tü̧ tti̧chi̧yä̧u̧ do'ädätürü'i̧nä̧ igresia-ttü rä'epä'chü iku jȩpü̧, jua̧u̧mä̧.

¹¹ Cha̧wa̧ru̧wa̧ chi̧jä̧wa̧, surojü jȩttü̧ ji̧yȩta̧'a̧kuä̧mä̧ jȩ'kuä̧. Adiwä juei jȩpü̧mä̧ Dio-rü wo̧jua̧ ja̧'a̧ ja̧'wa̧nü̧ ja̧'a̧nä̧ surojü jȩpü̧mä̧ Dio-rü jȩru̧pa̧ ja̧'a̧.

¹² O'katoi'ünä̧, Demetrio ütü'kü adiu ukuokuätü ja̧'wa̧ta̧nü̧ jua̧u̧ jȩpü̧ ü̧jü̧ttü̧ wo̧juä̧tü̧jä̧ isopäi'ünä̧ ja̧'a̧ pä'ü. Ja̧'wa̧ta̧nü̧ ujutu'i̧nä̧ jua̧u̧ adiu jȩü̧mä̧, adiutä ukuokuätüjä̧, jua̧u̧ tukuokumä̧ jueü wȩnȩtä̧ ja̧'a̧ pä'ü wo̧jua̧jä̧.

Rüjí teäwi'inü̧ wȩnȩ

¹³ Rü̧ȩnä̧ wȩyu̧tu̧ weda päda'anä̧, wȩyu̧tu̧mä̧ rü̧ȩnä̧ chukuokua pädokokujä̧,

¹⁴ jua'amä̧ täkü ukutäku ukuoku chicha pä'ü tta̧dä̧ra̧'a̧ttü̧.

¹⁵ Wȩnȩ juiyünä̧ kkä̧kuä̧wä̧ Dio ppädäku pä'üsä. Chawaruwä te'äu tti̧wȩnȩ wettäkujä̧. Chawaruwärü te'äwiyittü.