2 Timoteo 4 - Nuevo Testamento Uwotjüja

¹ Jesucrito Ru̧wa̧ Rey jü̧nä̧ ichomȩnä̧mä̧ a̧'kua̧rä̧tü̧rü̧'i̧nä̧, 'korujuo'ächinä̧tü̧rü̧'i̧nä̧ ü'ojo'äkua̧. Ja̧'wa̧nü̧ jo̧mȩttü̧ Dio'i̧nä̧, Jesucrito'i̧nä̧ ttä'ka jo̧mȩttü̧ iyü kku̧nu̧ wedäkujä̧.

² Pi̧yȩ Dio i̧wȩnȩmä̧ jikuäwajä̧ ttä̧ju̧kua̧ pättomȩnä̧'i̧nä̧, ja̧'wa̧ta̧nü̧ ttä̧ju̧kua̧ pättokomȩnä̧'i̧nä̧. Tesetipünä̧'i̧nä̧, ro̧'ȩpü̧'i̧nä̧ ja̧'wa̧ta̧nü̧ ttesewipünä̧ o'kajuiyünä̧ kua̧mi̧ 'ki'ächi'ü ku̧wo̧juȩta̧ja̧.

³ Ja̧'wa̧ta̧nü̧ adiwäjuei wȩnȩ ttä̧ju̧kuo̧mȩnä̧ ttü̧ja̧ tta̧mi̧ 'kittächi'okü mo̧ro̧'i̧nä̧ rȩbȩwä̧kua̧'a̧; tta̧mi̧'kittächi'ajueimä̧ jitürütä pä̧wä̧rü̧ja̧'a̧ku̧, wo̧juȩkuä̧ isotü rekuätürü ttusäkuotü jitütä ttä̧ju̧kua̧ pättütä ttu̧wo̧juȩta̧tü̧ pä'ü.

⁴ Ttü̧ja̧mä̧ isopäi'ünä̧ wȩnȩmä̧ ä̧ju̧kuo̧ko̧tü̧ ttäkuotü, ttä̧ju̧kua̧jueimä̧ o'kajuiyünä̧ täbokü wȩnȩtä̧ adiu ttu̧'ȩpä̧rü̧nü̧ ttä̧ju̧kuä̧kuo̧tü̧.

⁵ Ja̧'wa̧nü̧ ja̧'a̧nä̧ ukumä̧ 'kuäopünä̧ adiwomȩnä̧ usurä emäwäkuäwämä̧ kua̧mi̧'ki'ächi'ü, jareü Dio i̧wȩnȩtä̧ ji'äu, kuaditäwämä̧ adiwomȩnä̧ aditi.

⁶ Ttümä̧, täkü Sacrificio jü̧nä̧ ttiya pä'ütä wa̧sä̧; 'koru juodächä̧kuȩ hora-mä̧ täkü tü'küwächa'a.

⁷ Surojükumä̧ adiwäjuei kuränä̧ rowäwinü̧sä̧, ja̧'wa̧nü̧ rowäu jo̧mȩnü̧ rȩbȩwi̧nü̧sä̧, Dio-rü'i̧nä̧ kädädi'oka'a cha̧'kua̧ wȩnä̧ri̧nü̧sä̧.

⁸ Jitämä̧ ji̧yȩnü̧ mo̧ro̧ chu̧ru̧wa̧ Juez premio pättüjuei i̧yä̧kuȩ chȩma̧ pä'ü tta̧wä̧rä̧ku̧sä̧, ttürütämä̧ iyokü jä̧kua̧ ja̧u̧ ja̧jü̧jueimä̧ o'katoi'ünä̧ i̧chä̧kuȩ mo̧ro̧ eseunu̧ tta̧'a̧rä̧tü̧rü̧'i̧nä̧ i̧yä̧kua̧.

Timoteo-rü jiäwinü̧ wȩnȩ

⁹ Kuicha'anü̧ jü̧ttü̧mä̧ jurunä̧nü̧ to'kua ichittü;

¹⁰ ja̧'wa̧ta̧nü̧ Dema, pi̧jä̧ jäwä kkü'kekuienä̧ku̧'i̧nä̧ Tesalónica-ra̧'a̧ 'chä̧nü̧ kkatä u̧ju̧ni̧'i̧nä̧ku̧sä̧. Crecente-tä Galacia rȩjȩra̧'a̧ i̧'cha̧'a̧nä̧ Tito-mä̧ Dalmacia-ra̧'a̧ 'chi̧nü̧.

¹¹ Ya̧tȩtä̧ Ruka-tä ja̧'a̧ ttüku kki̧'i̧nü̧mä̧. Maruku-rümä̧ ukutäku icha o'ipächü ichirü, isopäi'ünä̧ jua̧u̧mä̧ chaditäwä aditü rü̧ä̧nä̧ ppädü'anü̧ wa̧sä̧.

¹² Tíquico-mä̧ Éfeso ütawiyära̧'a̧ we'ü chikuinä̧ku̧.

¹³ Kuichomȩnä̧mä̧, chü̧'ka̧tä̧wä̧ta̧ wä̧mȩ i̧sä̧ta̧, Troas ütawiyänä̧ Capo ojusodenä̧ chu̧ju̧ni̧'i̧nä̧ta̧, kui'chächiyattüjä̧; ja̧'wa̧ta̧nü̧ kuyäru o'tä'i̧nä̧, ji̧nä̧somä̧ pergamino pättüjuei kuyäru'tänä̧ wȩyu̧kuä̧'i̧nä̧ kui'kächajä̧.

¹⁴ Alejandro, kuoräuttü adikuä i̧sa̧mä̧ ttürü rü̧ȩnä̧ surojuo'epinü̧; chü̧ä̧nä̧wa̧tä̧ jua̧u̧ jȩi̧nü̧'a̧kuä̧ i̧mi̧tä̧kua̧mä̧.

¹⁵ Ja̧'wa̧ta̧nü̧ uku'i̧nä̧ ja̧u̧ttü̧mä̧ rü̧ȩnä̧ tta̧'a̧rä̧kuä̧u̧ kkä̧wi̧, jua'amä̧ ujutu tu̧wo̧juȩtü̧mä̧ üjü'kokomȩ jä̧'i̧jo̧mȩttü̧.

¹⁶ Ä̧kuo̧mȩnä̧ ukuo isotü ttä'ka jo̧mȩttü̧ chukuokuomȩnä̧mä̧ ya̧tȩ päü'i̧nä̧ ppättädajueimä̧ o'katoi'ünä̧tä̧ ttikuipinä̧ku̧sä̧, ja̧'wa̧nü̧ jȩtti̧na̧'a̧nä̧ ro̧ȩpü̧ juiyatü pä'ütä Dio-rümä̧ jä'epüsä.

¹⁷ Ja̧'wa̧nü̧ ja̧'a̧nä̧ chu̧ru̧wa̧tä̧ ji̧na̧'a̧ chujuru'i̧nä̧ iyü ppä'ädinü̧mä̧, o'katoi'ünä̧ judío pokotü surojüttü kki̧'i̧kuä̧ wȩnȩ jidäwa ttä̧ju̧kua̧ päümä̧. Ja̧'wa̧nü̧ jȩpü̧tä̧ Chü̧ä̧nä̧wa̧mä̧ mü̧yä̧wi̧tü̧ ttä jakuättü rä'epü ikuinä̧ku̧sä̧.

¹⁸ Ja̧'wa̧ta̧nü̧ Chu̧ru̧wa̧mä̧ surojü aditäwättümä̧ rä'epü ikuinä̧ku̧sä̧ Dio Ru̧wa̧ weomȩ ȩpo̧mȩbü päi'ünä̧. ¡Jua̧u̧mä̧ 'kuäopünä̧tä̧ tesewarü pä̧wä̧rü̧jä̧ku̧!

Rüjí te'äwi'ü ji'äwinü̧

¹⁹ O'katoi'ünä̧ Onesíforo awaruwärü'i̧nä̧ ja̧'wa̧ta̧nü̧ Priscirarü'i̧nä̧, Aquira-rü'i̧nä̧ te'äu chi̧wȩnȩ we'üsä.

²⁰ Erasto-mä̧ Corinto ütawiyänä̧ kki̧'i̧pi̧nü̧, ja̧'wa̧ta̧nü̧ Trófimo-rümä̧ Mileto-nä̧ na̧wä̧cha̧'a̧nä̧ chu̧ju̧ni̧'i̧nä̧ku̧.

²¹ A̧'ȩnä̧ juoäkua'a ä'kanä̧ kuicha amükuädi. Eubulo'i̧nä̧, Lino'i̧nä̧, Claudia'i̧nä̧, ja̧'wa̧ta̧nü̧ kuawaruwä kui̧jä̧wo̧tü̧'i̧nä̧ o'katoi'ünä̧ te'äu tti̧wȩnȩ wettäkujä̧.

²² Tu̧ru̧wa̧ Jesucrito-tä ppädä̧kua̧jä̧. Dio eseumä̧ 'kuäopünä̧ ukutäku kkä̧kua̧'a̧.