2 Timoteo 3 - Nuevo Testamento Uwotjüja

Rüjí mo̧ro̧ 'kuäopä̧kuȩ ji'äwinü̧

¹ Ja̧'wa̧ta̧nü̧ ku̧wo̧jua̧ pä'ü ja̧'a̧, rüjí mo̧ro̧ päi'omȩnä̧mä̧ ra̧wä̧pi̧jü̧ mo̧ro̧ rȩbȩwä̧kua̧'a̧.

² Ttü̧ja̧mä̧ kkü'kokotü ttäkuotü, pärätätä tta̧'kua̧ rottekuäkuotü̧, tta̧mü̧nä̧ ukuo ttettäkuäwäkuotü ja̧'wa̧ta̧nü̧ kkorotüttü'i̧nä̧ abonä̧nü̧ wotüjä̧ pä'ü, Dio-rü'i̧nä̧ suronä̧ ukuoku, ttä'orü'i̧nä̧ tta̧ju̧ru̧'i̧nä̧ ukuotokotü ttäkuotü, ja̧'wa̧nü̧ jȩpü̧ ttesewoka'a, ttesetinü̧'i̧nä̧ ukuotokotü ttäkuotü.

³ Eseäkuäwä'i̧nä̧, rȩrü̧jü̧ toäkuäwä'i̧nä̧ juittäkuotü, suräjuei wȩnȩtä̧ ukuoku, surojü ttidepä kkü'kekumä̧ kättädi'oka'a jü̧ta̧'a̧nü̧ o'kajuiyünä̧ adiwäjueimä̧ aboiyotü ttäkuotü.

⁴ Ttawaruwärü iyä'chü ttikuäkuotü ja̧'wa̧ta̧nü̧ tta̧mü̧kuädoka'a jȩpü̧, surojümä̧ jo̧mȩnü̧tä̧ ttäkuotü ja̧'wa̧nü̧ jo̧mȩttü̧ Dio-rü ttüsajueimä̧ jitürütä pä̧wä̧rü̧jü̧tä̧ ttusäkuotü.

⁵ Dio-rü repe'ätüjä̧, ja̧'wa̧ta̧nü̧ ukuotätüjä̧ pätta'anä̧ jȩpü̧ ttü̧ja̧ku̧ttü̧ isopäi'ünä̧ ttesetü jäwä ujurumä̧ ttä̧ppu̧tä̧rä̧kuo̧tü̧. Ttü̧ja̧ ja̧'wa̧nü̧ wotü tta̧wa̧ru̧wa̧ jü̧nä̧mä̧ juokuächä.

⁶ Isopäi'ünä̧ juätümä̧, odewiyänä̧ dodepü ja̧'wa̧ta̧nü̧ surojü rü̧ä̧nä̧ ttu̧ju̧nä̧ra̧'a̧ nä̧tü̧ ttidepä kkü'kekuä̧u̧ tta̧mi̧ 'kuä'ätürü yaparewätü isotü ja̧'a̧,

⁷ 'kuäopünä̧tä̧ ttu̧wo̧jui̧a̧'a̧nä̧ isopäi'ünä̧ wȩnȩmä̧ yoriso ttu̧'ȩpä̧ri̧o̧ko̧tü̧.

⁸ Ja̧'wa̧ta̧nü̧ Janes'i̧nä̧, Jambré'i̧nä̧ Moisé-rü ttukuotoka'a jȩtti̧nü̧ta̧'a̧nü̧, juätü ttü̧ja̧mä̧ isopäi'ünä̧ wȩnȩmä̧ ukuotokotü. Juätü tta̧mü̧kuädümä̧ surojuoekuätä ja̧'a̧ttü̧ Dio-rü tta̧'kua̧ wȩnä̧rä̧kuä̧wä̧mä̧ wo̧jui̧'o̧ko̧tü̧ pinä̧tü̧.

⁹ Ja̧'wa̧nü̧ ja̧'a̧nä̧ yaboku rekuo mo̧ro̧mä̧ kko̧ko̧tü̧ ttäkuotü, ja̧'wa̧ta̧nü̧ pi̧jä̧ ttü̧ja̧ o'katoi'ünä̧ ttu̧wo̧juä̧chi̧'ä̧kuo̧tü̧ jerupätü 'kua̧rü̧nä̧ jȩtta̧'a̧mä̧, ja̧'wa̧nü̧ yotüte ta̧ju̧ Moisé-rü ukuotokotü pinä̧tü̧rü̧ 'kuäopinü̧ta'anü̧ jä̧kua̧'a̧.

Pauru-mä̧ Timoteo-rü ji'äwinü̧

¹⁰ Ja̧'wa̧nü̧ ja̧'a̧nä̧ ukumä̧ chu̧wo̧juȩti̧nü̧nä̧'i̧nä̧ jȩpü̧ chü̧jä̧'i̧jü̧nä̧'i̧nä̧, chamükuädä'ijü̧nä̧'i̧nä̧, Dio-rü cha̧'kua̧ chu̧wȩnä̧rä̧'i̧jü̧nä̧'i̧nä̧, cha̧mi̧ 'kidächi'ünä̧'i̧nä̧, cheseunä̧'i̧nä̧ ja̧'wa̧ta̧nü̧ cha̧mi̧ 'kidächi'a pä'ü chujuruwä'ijü adiu 'chä̧'i̧jü̧jä̧.

¹¹ Ja̧'wa̧ta̧nü̧ Antioquía-ttü'i̧nä̧, Iconiottü̧'i̧nä̧, ja̧'wa̧ta̧nü̧ Ritra ütawiyättü'i̧nä̧ ttürü kuäkuätta'a, usurä chȩmä̧wi̧nü̧mä̧ wo̧jua̧jä̧, ja̧'wa̧nü̧ ja̧'a̧nä̧ chu̧ru̧wa̧ Jesucrito-mä̧ ja̧u̧ttü̧mä̧ o'kajuiyünä̧tä̧ rä'epü ikuinä̧ku̧sä̧.

¹² Isopäi'ünä̧ ja̧'a̧, o'katoi'ünä̧ Jesucrito-rü ukuotü ttü̧ja̧kua̧ pä̧wä̧rü̧jä̧u̧mä̧ kuäkuättä̧u̧ usurä ttȩmä̧wä̧kuo̧tü̧;

¹³ Ja̧'wa̧nü̧ ja̧'a̧nä̧ suronä̧ jȩpä̧tü̧mä̧ ja̧'wa̧ta̧nü̧ yaparewätümä̧ yabokutä surojuottächäkuotü, ja̧'wa̧ta̧nü̧ yotüterü yaparewätürümä̧ kkorotü ttüyaparewäkuotü.

¹⁴ Ukumä̧ ku̧wo̧jui̧'i̧nü̧nä̧tä̧ esetü yaboku kui̧'chü̧'a̧nü̧ ja̧'a̧, ja̧'wa̧ta̧nü̧ isopäi'ünä̧ wȩnȩ pä'ümä̧ wo̧jua̧jä̧. Juȩnȩ o'komȩnä̧mä̧ ukuru wo̧juȩti̧nä̧tü̧rü̧mä̧ täkü wo̧jua̧jä̧.

¹⁵ Amükuädi kua̧'u̧kuä̧'i̧ttü̧ kkä̧mä̧dü̧ wȩyu̧kuä̧ wȩnȩmä̧ wo̧jui̧pi̧nü̧jä̧, ukuru u̧wo̧juȩtü̧'a̧nü̧ jü̧mä̧ ja̧'wa̧ta̧nü̧ Jesucrito-nä̧ kua̧'kua̧ ku̧wȩnä̧ro̧mȩnä̧ surojüttü kki̧'i̧kuä̧ra̧'a̧ ukuru ȩpa̧'a̧nü̧ jü̧mä̧.

¹⁶ Wȩyu̧kuä̧mä̧ o'kajuiyünä̧tä̧ Dio ättü ichü ja̧'a̧, ja̧'wa̧nü̧ ja̧'a̧ttü̧ ttü̧ja̧rü̧ ttu̧wo̧juȩta̧ pä'ü'i̧nä̧, ttütäbo̧ta̧ pä'ü'i̧nä̧, surojü kattädi'ächünä̧ jittäwa pä'ü'i̧nä̧ ja̧'wa̧ta̧nü̧ kkä̧kuä̧wä̧ tü'kü ttu̧wo̧juȩta̧ pä'ü'i̧nä̧ ppäda'a,

¹⁷ ja̧'wa̧nü̧ jo̧mȩnä̧ Dio umüwäyotümä̧ adiwäjuei jȩtta̧ pä'ümä̧ jo̧mȩnü̧ wo̧juȩkuo̧tü̧ ttü̧ja̧kuä̧kuo̧tü̧.