2 Timoteo 2 - Nuevo Testamento Uwotjüja

Ttujuruku usurä ȩmä̧kuä̧wä̧ wȩnȩ

¹ Ja̧'wa̧ta̧nü̧ chi̧tti̧ ukumä̧, Dio rü̧ä̧nä̧ repeäkujä̧, jua'amä̧ Jesucrito-rü kuesetina̧'a̧ttü̧. Kkorojuei'i̧nä̧ kua̧mi̧ 'kikuächi'äkua'anü̧ kujurutä jä'epirü.

² Ttü̧ja̧ rekuätürü chu̧wo̧juȩta̧'a̧mä̧ ä̧ju̧kuä̧'i̧jü̧jä̧. Jitämä̧ ja̧u̧ kuä̧jukuäijü̧tä̧ tta̧'kua̧ wȩnä̧rä̧tü̧rü̧ ja̧'wa̧ta̧nü̧ kkorotürü ttüwo̧juȩta̧'a̧nü̧ wotürü wo̧juȩti̧.

³ Ukumä̧ Jesucrito u̧mü̧wä̧ya̧ su̧ro̧do̧u̧ i̧sa̧ jä̧'i̧nü̧'a̧nü̧, jua̧u̧ jäwänä̧ usurä kuȩmä̧wa̧ pä'ümä̧ jo̧mȩnü̧ ku̧ju̧'a̧nü̧ ja̧'a̧.

⁴ Su̧ro̧do̧u̧ ttu̧ru̧wa̧ esewätü pä'ätümä̧, yoriso kkoro su̧ro̧do̧u̧ jäwä jo̧kü̧mä̧ tta̧'kua̧ ro'ekuokotü.

⁵ Ja̧'wa̧nü̧ jä̧'i̧nü̧ta̧'a̧nü̧, ya̧tȩ joäkuäwä i̧sa̧ joäkuäwä tü'kü jiäu ukuotoka'a jü̧ttü̧mä̧ premio-mä̧ ȩmo̧kü̧ jä̧kua̧.

⁶ Ja̧'wa̧ta̧nü̧ pätta adikuä i̧sa̧'i̧nä̧ u̧wä̧ju̧ ukua pä'ümä̧, ä̧kuo̧mȩnä̧mä̧ adita pä'ü ja̧'a̧.

⁷ Pi̧yȩ pädümä̧ amükuädi, ja̧'wa̧ta̧nü̧ Tu̧ru̧wa̧ Jesucrito-tä o'kajuiyünä̧ ku̧wo̧jui̧pü̧nä̧ ppädä̧kua̧jä̧.

⁸ Ttü jareü wȩnȩ jidäunä̧mä̧, Jesucrito-mä̧ 'korupäi'äji̧'ka̧ tto'ächinü̧ ja̧'wa̧ta̧nü̧ Dawi isotüttü ichinü̧ päkurutä amükuädi.

⁹ Jua̧u̧, adiwäjuei wȩnȩ jäwä jidäwomȩttü̧ rü̧ȩnä̧ usurä ȩmä̧u̧mä̧, kärenä̧ pü̧sä̧; ttü̧ja̧rü̧ kuäwä i̧sa̧ 'kua̧rü̧nä̧, kä̧rȩnä̧sa̧nä̧ nü̧'käwa'amä̧ ttü̧tä̧rä̧ku̧sä̧; ja̧'wa̧nü̧ ja̧'a̧nä̧ Dio i̧wȩnȩmä̧ nü̧'käwa'amä̧ po̧ka̧'a̧.

¹⁰ Ja̧'wa̧nü̧ jo̧mȩttü̧ o'kajuiyünä̧ usurä chȩmä̧u̧nä̧ Dio pojopü ȩmi̧nä̧u̧rü̧ adiwomȩnä̧ cha̧mi̧ 'ki'ächi'üsä, juätü'i̧nä̧ surojüttü kki̧'i̧kuä̧ra̧'a̧ rȩbȩu̧ Crito-nä̧ kkä̧kuä̧wä̧ i'ko ttȩmä̧kua̧'a̧nü̧.

¹¹ Pi̧yȩmä̧ isopäi'ünä̧tä̧ ja̧'a̧: Chutäku 'korupäti'inü̧ttü̧mä̧, ja̧'wa̧ta̧nü̧ chutäku tü̧ja̧kuä̧kuo̧tü̧jä̧;

¹² Usurä tȩmä̧u̧ ta̧mi̧ 'kitächi'üttümä̧, ujutu'i̧nä̧ chutäku ruwo wetäkuotü̧jä̧; Täppü̧tä̧rü̧ttü̧mä̧, chutä'i̧nä̧ ji̧yȩta̧'a̧kuä̧ ä̧ppü̧tä̧rä̧kuä̧u̧jä̧;

¹³ ujutu adiu tü̧jo̧ka̧'a̧ jü̧ttü̧'i̧nä̧, jua̧u̧mä̧ adiutä kkü̧, Jua'amä̧ chutä a̧mü̧nä̧ pa̧ja̧tü̧mä̧ ä̧ppü̧tä̧rä̧kuä̧wo̧ka̧'a̧ttü̧.

Timoteo ü̧ji̧nü̧ wȩnȩ

¹⁴ Kkorotürü amükuädi, ja̧'wa̧ta̧nü̧ Dio ä'ka jo̧mȩttü̧ pä'ä'chäkuäu ttürowäu juiyükua'anü̧ ji'äwitü. Jua̧u̧ pä'chäkuäwämä̧ ya̧tȩrü̧'i̧nä̧ ppädokü, ja̧'wa̧ta̧nü̧ ä̧ju̧kuä̧tu̧rü̧tä̧ surojuoepü.

¹⁵ Dio ä'ka jo̧mȩ kui̧'chi̧'a̧ o'kajuiyünä̧ jȩpi̧, ya̧tȩ adikuä i̧sa̧ jo̧mȩnü̧ wa̧ dä'äkuokü, isopäi'ünä̧ wȩnȩtä̧ wo̧juȩtü̧ jä̧'i̧nü̧'a̧nü̧ jü̧nä̧.

¹⁶ Dio-rü esetokotü pättä'chäkuäumä̧ kuä̧ju̧kuä̧, jua̧u̧mä̧ ukurumä̧ yoriso ppädokü. Ja̧'wa̧nü̧ pä'ä'chäkuäwätümä̧ yabokutä surojuo'ächätü.

¹⁷ Jua̧u̧ suronä̧ ttu̧wo̧juȩtü̧mä̧ cancer mä̧richei jä'i̧nü̧'a̧nü̧ yaboku yoäwächa'a, pa̧'a̧nü̧ 'kuäopa'a Himeneo-rü'i̧nä̧ Fileto-rü'i̧nä̧,

¹⁸ juätümä̧ pä'ätü täkü tto'ächinä̧tü̧jä̧, ja̧'wa̧nü̧ pätta'anä̧ ja̧u̧mä̧ isopäi'ünä̧mä̧ jo̧ka̧'a̧, ja̧'wa̧nü̧ jȩpü̧ tti̧rȩbȩu̧mä̧ ji̧yȩtȩtä̧ ja̧'a̧, ttü̧ja̧rü̧ re'tetü ttikutä.

¹⁹ Ja̧'wa̧nü̧ ja̧'a̧nä̧ Dio-mä̧ kkada'ka adiu 'kiyünä̧ 'chu̧ä̧ro̧mȩ jȩpü̧ kku̧ni̧nü̧, juȩnȩ wȩyu̧kuä̧mä̧ pä'a: Tü̧ä̧nä̧wa̧mä̧ chutäku todepätürü wo̧jua̧; ja̧'wa̧ta̧nü̧ «o'katoi'ünä̧ tü̧ä̧nä̧wa̧ i̧mi̧nä̧ jä'epätümä̧ surojüttü 'kȩ'i̧pä̧chi̧nä̧tü̧».

²⁰ Yodete isode rü̧o̧dȩnä̧mä̧ o̧'ta̧wi̧yä̧ suro oro-ttü, plata-ttü adikuätämä̧ kko̧ka̧'a̧, ja̧'wa̧nü̧ ja̧jü̧jueimä̧ dausodättü, redä'kattü adikuä'i̧nä̧ kka̧kua̧'a̧; kkoro o̧'ta̧mä̧ pä'käri jȩttü̧ mo̧ro̧ awäwä'i̧nä̧, kkoro o̧'ta̧tä̧ pä'käri jȩtto̧kü̧ mo̧ro̧ ttau'i̧nä̧.

²¹ Ujutunä̧'i̧nä̧, ja̧'wa̧nü̧ jä̧'i̧nü̧ta̧'a̧nü̧ wȩnȩkuä̧cha̧'a̧; suronä̧ jȩtä̧'i̧jü̧ kä'ädi'ü, isopäi'ünä̧ jo̧kü̧ wo̧juȩkuä̧ tunu̧chi̧'ü̧ttü̧mä̧, ja̧u̧ o̧'ta̧wi̧yä̧ ukuo jäwä jä̧'i̧nü̧'a̧nü̧ täkuotüjä̧. Dio-tä ta̧'kua̧rü̧nä̧ aditäkua̧ ta̧'kua̧rü̧ 'chü̧ä̧rä̧kuä̧wä̧ i̧sa̧ ja̧'a̧ttü̧, kkorojuei o'kajuiyünä̧ adiwäjuei jȩta̧ pä'ü jo̧mȩnü̧ tü̧ja̧kuä̧kuo̧tü̧jä̧.

²² Ja̧'wa̧ta̧nü̧ mü̧ä̧yotü ttidepä kkü'kekuttümä̧ tü'ipächi, tü'ipächümä̧ adiu jȩä̧kuä̧wä̧tä̧, tta̧'kua̧ wȩnä̧rä̧kuä̧wä̧tä̧, eseäkuäwätä ja̧'wa̧ta̧nü̧ unichä̧rü̧ kkä̧kuä̧wä̧tä̧ usí, tta̧mi̧so'ki teünä̧ kka̧kuä̧tü̧, ttu̧ru̧wa̧rü̧ ppädatü pä'ü jä'epätuku yo̧mȩtȩnä̧.

²³ Pä'chäkuäwä ukuru yoriso ppädokumä̧ kuä̧ju̧kuä̧, ja̧'wa̧nü̧ pä'ä'chäkuäwätümä̧ rowäwäkuänä̧tä̧ kä'ädätü.

²⁴ Ja̧'wa̧nü̧ ja̧'a̧ttü̧ Tu̧ru̧wa̧ u̧mü̧wä̧ya̧mä̧ pä'ä'chäkuäu rowäwu kue'ächü juiyü'anü̧ ja̧'a̧; ürowäwajueimä̧, o'katoi'ünä̧ku̧tä̧ adiu esekunü̧, wo̧juȩku̧nä̧ wo̧juȩtü̧ kkä̧nü̧ ja̧'wa̧ta̧nü̧ a̧mi̧ 'kiächi'a'anü̧ ja̧'a̧;

²⁵ to'ija̧'a̧ku̧ pä'ätürümä̧ tta̧mi̧so'kinä̧ ukuo tettäwoka'a jua'a yabonü̧ jȩttü̧ juiya pä'ü jittäwa'anü̧ ja̧'a̧, chutä Dio-ku ppa̧ttä̧cho̧mȩnä̧, isopäi'ünä̧ wȩnȩ ttu̧wo̧juä̧chi̧'ü̧nä̧ jȩa̧'a̧nä̧ tta̧'a̧rü̧ kkä̧nü̧.

²⁶ Jua̧u̧ wo̧jui̧'ü̧tä̧ äwettä ttä̧tȩkuä̧ jȩpü̧ u̧ju̧ni̧no̧mȩmä̧ ttü̧ttȩpä̧ri̧'ä̧kuo̧tü̧, ja̧'wa̧nü̧ jo̧mȩnä̧ juorümä̧ tüttipächäkuotü. Jitätämä̧ ji̧nä̧ äwettämä̧ kärenä̧ rü̧tä̧rü̧ kkä̧nü̧ churutä pä̧wä̧rü̧jo̧mȩnä̧ jȩä̧u̧.