2 Timoteo 1 - Nuevo Testamento Uwotjüja

Pauru, Timoteo-rü teäwinü̧ wȩnȩ

¹ Ttü Pauru Jesucrito u̧mü̧wä̧ya̧, Dio-rü pä̧wä̧rü̧jo̧mȩnä̧, Jesucrito-nä̧tä̧ kka̧ku̧ kkä̧kuä̧wä̧ i'ko chi̧yä̧kua̧sä̧ pä'inü̧ ji̧nü̧ jidäwa pä'ü wȩ'ä̧wa̧mä̧,

² Chi̧tti̧ chu̧'ä̧kua̧ rȩni̧'a̧ Timoteo-rü te'äusä. Chä'o Dio, Tu̧ru̧wa̧ Jesucrito-tä eseäkuäwä'i̧nä̧ re kkä̧kuä̧wä̧'i̧nä̧, unichä̧rü̧ kkä̧kuä̧wä̧'i̧nä̧ iyäkujä̧.

Dio-rü ukuoku esewinü̧ wȩnȩ

³ Mo̧ro̧'i̧nä̧, yodo'i̧nä̧ Dio-rü chukuokuomȩnä̧ ukuru amükuädü, Dio-rümä̧ eseusä, chä̧do̧tü̧ mi̧nä̧'i̧nä̧ aditäwänä̧ ppättädinä̧ku̧ru̧ ttü'i̧nä̧ aditäwänä̧ suronä̧ chamükuädoka'a ppä̧dä̧dä̧rä̧ku̧ru̧mä̧.

⁴ Kuajuäwi'äna̧'a̧mä̧ 'kuäopünä̧ amükuädä'ijüsä, ja̧u̧ amükuädü chesewächi'a pä'ü do'ächü chicha pä̧wä̧rü̧jä̧ku̧sä̧.

⁵ Ä̧kuo̧mȩnä̧mä̧ kuä̧da̧ Roida'i̧nä̧ kua̧ju̧ Eunice'i̧nä̧ Dio-rü tta̧'kua̧ wȩnä̧ri̧nä̧tü̧; ja̧'wa̧nü̧ ja̧'a̧ttü̧ ukuru chamükuädomȩnä̧mä̧, juätü ji̧nü̧ta'anü̧ uku'i̧nä̧ kua̧'kua̧ ku̧wȩnä̧rü̧mä̧ isopäi'ünä̧tä̧ kku̧nä̧rü̧jä̧ pädünä̧ jä̧ku̧sä̧.

Jareü wȩnȩnä̧mä̧ kudäpekuätukuä

⁶ Ja̧'wa̧nü̧ ja̧'a̧ttü̧ kunä̧ chu̧mü̧ mȩ'ü̧ Dio-rü chukuokuokuomenä̧ ukuru Dio mippoünä̧ iyinü okurä jä̧'i̧nü̧'a̧nü̧ jü̧nä̧ kkä̧wi̧ pä'ü wedäkujä̧.

⁷ Ja̧'wa̧ta̧nü̧ Dio-mä̧ epíritu yȩ'ȩkua̧rü̧mä̧ i̧yo̧ko̧u̧ pinä̧tü̧jä̧, ja̧'wa̧nü̧ ja̧jü̧ jueimä̧ ju̧ru̧wa̧rü̧tä̧, eseäkuäwä kku̧nä̧rü̧rü̧tä̧ ja̧'wa̧ta̧nü̧ a̧mü̧nä̧ pa̧ja̧tü̧ we'äurutä iyinä̧u̧jä̧.

⁸ Ja̧'wa̧ta̧nü̧ ku̧ru̧wa̧ Jesucrito ütü'kü jikuäwomȩnä̧'i̧nä̧; ja̧'wa̧ta̧nü̧ chu̧ru̧wa̧ Jesucrito jäwänä̧ kärenä̧ pü̧ chütü'kü jikuäwomȩnä̧'i̧nä̧ kudäpekuä, ja̧'wa̧nü̧ ja̧jü̧ jueimä̧ jareü wȩnȩ ji'äu kkä̧nü̧ Dio ujuru päü'anü̧ usurä ȩmä̧wi̧.

⁹ Dio-mä̧ surojüttü tü̧ji̧pü̧nä̧ ppädinä̧u̧jä̧, ja̧'wa̧nü̧ ppä'ädü umüwäyotü surojü jui'ätü jü̧nä̧ woinä̧u̧jä̧, ujutu adiu jȩtü̧nä̧mä̧kü̧ ja̧'wa̧nü̧ ja̧jü̧ jueimä̧ Dio ä̧kuo̧mȩnä̧ttü̧ kkä̧mä̧dü̧ rȩrü̧jü̧ topü Jesucrito-nä̧ amükuädü uju̧ni̧nü̧'a̧kuä̧ ji̧na̧'a̧.

¹⁰ Ja̧'wa̧nü̧ ja̧'a̧nä̧ jitämä̧ tu̧ru̧wa̧ surojüttü ttü̧ji̧pü̧nä̧ ppädäkuäwä i̧sa̧ Jesucrito i̧jȩkuä̧cho̧mȩnä̧ repeümä̧ i̧jȩkuä̧chi̧na̧'a̧. Isopäi'ünä̧ jua̧u̧tä̧ ja̧'a̧ wa'arerü si'epü ikuinü̧'i̧nä̧, ja̧'wa̧nü̧ jȩpü̧ jareü wȩnȩnä̧mä̧ kkä̧kuä̧wä̧ i'kotä iyinä̧u̧jä̧.

¹¹ Dio-mä̧ pi̧yȩ jareü wȩnȩ jidäwa pä'ü'i̧nä̧, apóto pättäku jü̧nä̧'i̧nä̧, judío pokotürü wo̧juȩkuä̧ i̧sa̧ jü̧nä̧'i̧nä̧ weinä̧ku̧sä̧.

¹² Ja̧'wa̧nü̧ jo̧mȩttü̧ pi̧yȩttü̧mä̧ usurä ȩmä̧u̧sä̧. Ja̧'wa̧nü̧ ja̧'a̧nä̧ ja̧'wa̧nü̧ 'kuäopünä̧mä̧ dä'ä ttu'oküsä, jua'amä̧ cha̧'kua̧ chu̧wȩnä̧rä̧ku̧ru̧mä̧ chu̧wo̧jua̧'a̧ttü̧; Ja̧'wa̧ta̧nü̧ adiu wo̧jua̧sä̧ rüjí mo̧ro̧bü päi'ünä̧ jareü wȩnȩmä̧ yabokutä jittäunä̧ jȩa̧ pä'ü'i̧nä̧ ujuru kku̧nä̧rü̧ pä'ümä̧.

¹³ Pi̧yȩ wȩnȩ ttü chu̧wo̧juȩto̧mȩnä̧ ttüttü ku̧wo̧jui̧'i̧nü̧'a̧kuä̧ täi, ja̧'wa̧ta̧nü̧ Jesucrito ppädinü̧ tta̧'kua̧ wȩnä̧rä̧kuä̧wä̧nä̧'i̧nä̧, eseäkuäwänä̧'i̧nä̧ kkä̧wi̧.

¹⁴ Epíritu Sa̧tu̧ ujutunä̧ kkü̧ ppä̧dä̧ra̧'a̧nä̧ adiwomȩnä̧ wo̧juȩkuä̧ ukuru weäwi'inü̧mä̧ tta̧'a̧ri̧.

¹⁵ Asia rȩjȩ ttü̧ja̧ o'katoi'ünä̧ ttüttü 'kȩtti̧pä̧chi̧na̧'a̧mä̧ täkü wo̧jua̧jä̧; juätüttümä̧ Figero'i̧nä̧, Hermógenes'i̧nä̧ ja̧'a̧.

¹⁶ Tü̧ä̧nä̧wa̧tä̧ Onesíforo awaruwärümä̧ rȩrü̧jü̧ to̧ä̧kua̧, jua'amä̧ kko̧ro̧nü̧ jü̧ta̧'a̧nü̧ cha̧'kua̧ chȩmu̧nä̧ ppä'ädinü̧ kärenä̧ chü̧'a̧'a̧'i̧nä̧ dä'ättuwoka'a ji̧no̧mȩttü̧.

¹⁷ Ja̧'wa̧nü̧ ja̧jü̧jueimä̧ Roma ütawiyänä̧ ichi'üta̧'a̧nü̧ 'kuächi'oka'a yotäku kkä̧mä̧dü̧ usinä̧ku̧sä̧, ü̧'o̧kui̧'o̧mȩbü päi'ünä̧.

¹⁸ Tü̧ä̧nä̧wa̧tä̧ ji̧yȩnü̧ mo̧ro̧ rȩrü̧jü̧ toäkuäwä ü̧'o̧kui̧'ü̧nä̧ ppä̧dä̧kua̧. Täkü ukumä̧ wo̧jua̧jä̧, Onesíforo ujuturu Éfeso ütawiyättü ppädinü̧mä̧.