2 Pedro 3 - Nuevo Testamento Uwotjüja

Tu̧ru̧wa̧ pä'äjita'anü̧ i̧chä̧kuȩ wȩnȩ

¹ Pi'tä ja̧'a̧ chi̧jä̧wa̧tü̧, jua̧u̧nü̧ o'ka'a ukuru wȩyu̧tu̧ wedä'tämä̧. Todärekue'ü jueünä̧ kuamükuädätukua pä'ü ro̧'ȩpü̧ ji̧dä̧wä̧u̧jä̧.

² Ji̧yȩnü̧ pä̧nä̧ surojü jui'ätü profeta-tü̧ pättinü̧ ji̧nü̧ amükuädätukui; ja̧'wa̧ta̧nü̧ tu̧ru̧wa̧ surojüttü kki̧'ä̧kuä̧wä̧ i̧sa̧ttü̧ weäwä wȩnȩ apótore pä̧ttä̧u̧ ukuturu ttu̧wo̧juȩti̧nü̧mä̧.

³ Ä̧kuo̧mȩnä̧mä̧ pi̧yȩ wo̧juä̧tü̧kui̧: rüjí mo̧ro̧mä̧ tta̧mü̧nä̧ jäwä surojü kkü'kekunä̧ o̧ipä̧u̧ ttichäkuotü, ja̧'wa̧ta̧nü̧ juätümä̧ ya̧'a̧wä̧'chü̧

⁴ pättäkuotü: «¿Toku ji̧na̧'a̧kuä̧ttü̧ Crito chichäkua̧sä̧ päina̧'a̧mä̧? Tä̧do̧tü̧ mi̧nä̧mä̧ täkü wa'ü ikuinä̧tü̧ ja̧'wa̧ta̧nü̧ o'kajuiyünä̧ pi̧jä̧ uwäbe'inomȩttü̧tä̧ kkä̧mä̧dü̧ yoräteunä̧tä̧ 'cha̧'a̧.»

⁵ Juätü ttü̧ja̧mä̧ mo̧tä̧ päi'ünä̧ mo̧ro̧jä̧mä̧ kki̧na̧'a̧ pä'ümä̧ amükuädokotü, ja̧'wa̧ta̧nü̧ Dio-mä̧ i̧wȩnȩnä̧tä̧ rȩjȩ'i̧nä̧, ajettü kkä̧'ä̧mü̧ räo'ünä̧ jȩpi̧nü̧, ja̧'wa̧nü̧ ja̧'a̧ttü̧ aje kkä'koto kka̧'a̧mä̧.

⁶ Ja̧'wa̧ta̧nü̧ ji̧yȩnü̧ pä̧nä̧mä̧ juoya ajiyanä̧tä̧ suädi'ünä̧ pi̧jä̧mä̧ si'epü ikuinü̧.

⁷ Ja̧'wa̧nü̧ ja̧'a̧nä̧ mo̧ro̧jä̧'i̧nä̧, rȩjȩ'i̧nä̧ jitä kkä̧jä̧mä̧, i̧wȩnȩnä̧ okuränä̧ kkuwü ttikua pä'ütä jȩpü̧ kku̧nä̧wa̧'a̧. Jȩtti̧nü̧'a̧kuä̧ pojokuä mo̧ro̧ päi'omȩnä̧ ja̧'wa̧ta̧nü̧ suropätü totte'ächü mo̧ro̧ juarä okurämä̧ kkuwü ikuäkua'a.

⁸ Chi̧jä̧wa̧tü̧, kkoromä̧, ku̧ni̧chi'ätukuä tu̧ru̧wa̧rü̧mä̧ ya'ute mo̧ro̧mä̧, mil-nü̧ du'o jo̧mȩnä̧ jä̧ku̧ ja̧'wa̧ta̧nü̧ mil-nü̧ du'omä̧ ya'ute mo̧ro̧tä̧.

⁹ Tu̧ru̧wa̧ jȩa̧ päinü̧ jo̧mȩnü̧ päi'a pä'ümä̧ rekuodä'chokü, yotukunä̧ ttamükuäda'anü̧mä̧, ja̧'wa̧nü̧ ja̧jü̧jueimä̧ ukutukumä̧ tta̧mi̧ 'ki'ächi'äkuäwä kku̧nä̧rü̧, ja̧'wa̧nü̧ ja̧'a̧ttü̧ ya̧tȩ'i̧nä̧ wa'ü ikuamä̧ pä'okü, wa'ü ttikuajueimä̧ o'katoi'ünä̧tä̧ Dio-kutä ppa̧ttä̧cha̧tä̧ pä'ü.

¹⁰ Ja̧'wa̧nü̧ ja̧'a̧nä̧ Tu̧ru̧wa̧ u̧mo̧ro̧ päi'omȩnä̧mä̧ nä̧u̧kuä̧rä̧wä̧ i̧sa̧ 'kua̧rü̧nä̧ i̧chä̧kua̧. Ja̧'wa̧nü̧ päi'omȩnä̧ mo̧ro̧jä̧mä̧ rü̧ä̧nä̧ yettünä̧ päi'ünä̧ rä̧mi̧pü̧nä̧ jȩä̧chä̧kua'a, juä̧jä̧nä̧ rü̧jü̧'i̧nä̧ okurä kkuwü ikuomȩnä̧ to̧ȩ'ä̧chä̧kuȩ, ja̧'wa̧ta̧nü̧ rȩjȩ'i̧nä̧, o'kajuiyünä̧ juä̧jä̧nä̧ kka̧ku̧mä̧ kuo'ü i̧kuä̧kuȩ.

¹¹ Pi̧yȩ o'kajuiyünä̧mä̧ pa̧'a̧nü̧tä̧ toe'ächäkua'a, ¡ukutumä̧ adiu jȩpü̧ Dio-rütätä kukuotätukua'anü̧ ja̧'a̧!

¹² Dio u̧mo̧ro̧ icha'anä̧ tta̧'a̧rä̧tu̧kui̧, ja̧'wa̧ta̧nü̧ jurunä̧nü̧ jȩ'kuä̧tu̧ku̧'a̧nü̧ jü̧mä̧ jȩpä̧tu̧kui̧, jua̧u̧nü̧ mo̧ro̧mä̧ mo̧ro̧jä̧mä̧ okuränä̧tä̧ si'epü ikuäwäkua'a ja̧'wa̧ta̧nü̧ juä̧jä̧nä̧ rü̧jü̧'i̧nä̧ okuräma̧ kkä'kottü jawächäkua'a.

¹³ Ja̧'wa̧nü̧ ja̧'a̧nä̧ ujutumä̧ mo̧ro̧jä̧'i̧nä̧, rȩjȩ'i̧nä̧ ja̧rȩä̧jä̧ Dio iya päinä̧jä̧ tta̧'a̧rä̧tü̧, juȩnȩmä̧ o'kajuiyünä̧ adiwäkuomȩ.

¹⁴ Ja̧'wa̧nü̧ ja̧'a̧ttü̧ chi̧jä̧wa̧tü̧, ji̧nä̧ pi̧yȩ tta̧'a̧rü̧ kkä̧nü̧, o'kajuiyünä̧ jȩ'kuä̧tu̧ku̧'a̧nü̧ jü̧mä̧ jȩpä̧tu̧kui̧, wȩnȩ'i̧nä̧ juiyünä̧, surojü'i̧nä̧ jȩpo̧ko̧tü̧ jü̧nä̧ ja̧'wa̧ta̧nü̧ idiku'i̧nä̧ juiyünä̧ Dio-mä̧ ü̧'o̧kui̧'ä̧kua̧'a̧nü̧.

¹⁵ Ja̧'wa̧ta̧nü̧ tü̧ä̧nä̧wa̧mä̧ surojüttü ttü̧ji̧pi̧ya̧rü̧ pä'ü a̧mi̧'ki'ächi'ü tta̧'a̧rü̧. Ta̧wa̧ru̧wa̧ ti̧jä̧wa̧ Pauru'i̧nä̧ pi̧yȩtä̧ tü'kü wȩyu̧tu̧ we'inü̧ ukuturumä̧, wo̧juä̧wä̧ wȩnȩ jua̧u̧ru̧ Dio iyinü̧'a̧kuä̧.

¹⁶ Ji'täkunä̧ i̧wȩyu̧ti̧nü̧ o'tänä̧mä̧ ukuturumä̧ pi̧yȩtä̧tä̧ ukuokuinü̧, ja̧u̧ttü̧mä̧ ttu̧wo̧jui̧pü̧ juiyünä̧ jü̧'i̧nä̧ kka̧'a̧, jerupätürümä̧ ja̧'wa̧ta̧nü̧ tta̧'kua̧ wȩnä̧rä̧kuä̧wä̧ jiyuwa'a jue'okotürümä̧, kkoro wȩyu̧kuä̧ wȩnȩ jueoka'a jü̧ta̧'a̧nü̧, jitütä tta̧mü̧nä̧ jäwänä̧ usurä ttȩmä̧u̧nä̧ päwi'äkuotü.

Rujíku ka̧ka̧ti̧ku̧ päinü̧

¹⁷ Ja̧'wa̧nü̧ ja̧'a̧ttü̧ chi̧jä̧wa̧tü̧, täkü pi̧yȩmä̧ ä'kanä̧ wo̧juä̧tü̧jä̧, ttu̧'ȩpä̧rä̧kuä̧u̧ kka̧kuä̧tu̧kui̧ suronä̧ jȩpä̧tü̧ ttüyapareünä̧ doo'ächätukuäku, 'kiyünä̧ ku̧jä̧'i̧jä̧tu̧kua̧'a̧'i̧nä̧ ma̧kuä̧chä̧tu̧ku̧ juiyäkua'anü̧.

¹⁸ Ja̧'wa̧nü̧ ja̧'a̧nä̧ Tu̧ru̧wa̧ Jesucrito surojüttü kki̧'ä̧kuä̧wa̧rü̧tä̧ adiunä̧nü̧ wo̧juä̧tü̧kui̧ ja̧'wa̧ta̧nü̧ eseäkuäwänä̧ büó juo'ätukui. Jua̧u̧ru̧mä̧ jitä'i̧nä̧, yodoji'i̧nä̧ tesewarüjä̧. Amȩ́.