2 Pedro 2 - Nuevo Testamento Uwotjüja

Isopäi'ünä̧ jä̧'i̧nü̧'a̧nü̧ tu̧wo̧juȩtü̧ wȩnȩ

¹ Ja̧'wa̧ta̧nü̧ Irae ttü̧ja̧ ttü̧'kä̧tȩnä̧mä̧ isopäi'ünä̧ jä̧'i̧nü̧'a̧nü̧ wotü profeta-tü̧ kka̧kui̧nä̧tü̧; ja̧'wa̧nü̧ ji̧nü̧ta'anü̧ ukutu ku̧'kȩtȩtu̧ku̧nä̧mä̧ isopäi'ünä̧ jä̧'i̧nü̧'a̧nü̧ wo̧juȩkuä̧ isotümä̧ ttü̧ja̧kuä̧kuo̧tü̧. Juätümä̧ suronä̧ tta̧mü̧kuädümä̧ dajiku ttu̧wo̧juȩtä̧kuo̧tü̧, chutä tu̧ru̧wa̧ surojüttü rä'epü ikuinü̧rü̧'i̧nä̧ tä̧ppü̧tä̧rä̧kuo̧tü̧; ja̧'wa̧nü̧ ja̧'a̧ttü̧ juätümä̧ tta̧ttä̧ro̧kü̧ jä̧ji̧ ro̧ȩkuä̧ra̧'a̧ ȩpä̧kuo̧tü̧.

² Isopäi'ünä̧ jä̧'i̧nü̧'a̧nü̧ wo̧juȩkuä̧ isotü jȩttü̧'a̧kuä̧ rekuätü jȩttä̧kuo̧tü̧, ja̧'wa̧ta̧nü̧ juätü jäwänä̧ isopäi'ünä̧ mä̧nä̧mä̧ suronä̧tä̧ ttukuokuäkuotü.

³ Pärätä tta̧'kua̧ ro'ekumä̧, ukuturu kuesetipätukunä̧ ttu̧wo̧juȩtä̧kuo̧tü̧jä̧; ja̧'wa̧nü̧ ja̧'a̧nä̧ usurä ttȩmä̧u̧nä̧ päwi'ino̧mȩ tta̧wä̧rä̧u̧, ja̧'wa̧nü̧ ja̧'a̧ttü̧ mo̧tä̧ päi'ünä̧ usurä ttȩmä̧wä̧kuo̧tü̧ pä'ü kku̧nä̧wo̧tü̧.

⁴ Dio-mä̧ á̧gȩrȩ suronä̧ jȩpi̧tü̧rü̧mä̧ jȩpo̧ko̧tü̧ jü̧nä̧mä̧ topokü pinü̧, ja̧'wa̧nü̧ ja̧jü̧jueimä̧ okurära̧'a̧tä̧ kkisäu ikuinä̧u̧ ja̧'wa̧ta̧nü̧ yo̧mȩtä̧, kä̧rȩnä̧sa̧nä̧ nü̧'kü rütäwomȩ ütinä̧u̧ pojokuä mo̧ro̧bü päi'ünä̧.

⁵ Ja̧'wa̧ta̧nü̧ Dio-mä̧ mo̧ kka̧kui̧nä̧tü̧rü̧'i̧nä̧ surojü jȩpo̧ko̧tü̧ jü̧nä̧mä̧ jȩpo̧kü̧ pinü̧, ja̧'wa̧nü̧ ja̧jü̧jueimä̧ juätü ttü̧ja̧ suropätürümä̧ ajiyatä suädünä̧ wea'anä̧ suro Nué adiunä̧ kkä̧nü̧ ji'äwinü̧tä̧ ja̧u̧ttü̧ kki̧'i̧nü̧mä̧ ja̧'wa̧ta̧nü̧ kkorotü sietenü̧ wotükutä.

⁶ Ja̧'wa̧ta̧nü̧ Dio-mä̧ Sodoma'i̧nä̧, Gomorra ütawiyä rü̧o̧mȩ'i̧nä̧ si'epü iku okuränä̧ ä̧ya̧ri̧tä̧ päi'ünä̧ ro̧'ȩpi̧nü̧, suropätürü 'kuäopä̧kuȩ i̧jȩkuä̧ päi'ünä̧tä̧.

⁷ Ja̧'wa̧nü̧ ja̧'a̧nä̧ ya̧tȩ adiwä i̧sa̧ Lot-rütä rä'epü ikuinü̧ juätü suronä̧ jȩtta̧'a̧ usurä ȩmä̧u̧rü̧tä̧.

⁸ Pide surojü jȩpo̧kü̧ juätü ttü̧'kȩtȩnä̧ kki̧nü̧mä̧, a̧mi̧so'kinä̧mä̧ adiwä i̧sa̧ jo̧mȩttü̧ mo̧ro̧ji̧nü̧'a̧kuä̧ surojü jȩttü̧ topü'i̧nä̧, ä̧ju̧ku̧'i̧nä̧ usurä ȩmä̧wi̧nü̧.

⁹ Tu̧ru̧wa̧mä̧ wo̧jua̧ churutä iyäwinü̧'kotü kka̧kuä̧tü̧rü̧mä̧, ji̧nä̧ iweyettü jȩä̧'chä̧ku̧rü̧ rä'epü ikua pä'ümä̧, ja̧'wa̧ta̧nü̧ wo̧jua̧ suronä̧ jȩpä̧tü̧rü̧ pojokuä mo̧ro̧ päi'omȩnä̧ ro̧ȩpä̧kua̧'a̧ kku̧nä̧rä̧kuä̧wä̧'i̧nä̧.

¹⁰ Tu̧ru̧wa̧mä̧ ro̧ȩpä̧kua̧ ji̧nä̧somä̧ surojünä̧ kkü'kekunä̧ 'chä̧tü̧rü̧, ja̧'wa̧ta̧nü̧ ukuo kkü'kokotürü. Tta̧mi̧ po'ekuätürü'i̧nä̧, tukuo te'äkuäwätürü'i̧nä̧, ja̧'wa̧ta̧nü̧ ukuo ruwotürü suronä̧ pätta'anä̧ ye'ekuokorü'i̧nä̧;

¹¹ Ja̧'wa̧nü̧ ja̧'a̧nä̧ A̧gȩrȩ-mä̧, ttujuru'i̧nä̧, ttukuo'i̧nä̧ rü̧ä̧nä̧ kku̧nä̧rä̧tü̧ ja̧'a̧nä̧, tu̧ru̧wa̧ i̧mi̧nä̧mä̧ suronämä̧ pä'ä'chokotü usurä ttȩmä̧u̧nä̧ jȩpü̧mä̧ juätü ukuo isotürümä̧.

¹² Pitü ttü̧ja̧mä̧ de'iyü isotü jä̧'i̧nü̧'a̧nü̧ wotü: tta̧mü̧kuädü'i̧nä̧ jui'ätü, ja̧'wa̧ta̧nü̧ uwäpächätü 'chu'ädü kuä'ü ttikuatü pä'ütä. Ttu̧wo̧jui̧pü̧ juiyünä̧ jä̧u̧ suronä̧ ukuokuätü; ja̧'wa̧nü̧ ja̧'a̧nä̧ de'iyü isotü 'korujuottächa'a jä̧'i̧nü̧ta̧'a̧nü̧ 'korujuottächäkuotü,

¹³ kkorotürü usurä ttȩmä̧u̧nä̧ jȩtti̧nü̧ta'anü̧. Ya'ute mo̧ro̧mä̧ esewätüjä̧kü̧ pä'ü pä̧wä̧rü̧ja̧'a̧ku̧ jȩpä̧tü̧. Juätümä̧ pä'käri kko̧mȩnä̧ ukutuku tti̧'cho̧mȩnä̧mä̧ dä'ä ttukuätukunä̧tä̧ jȩpä̧'chä̧tü̧, isopäi'ünä̧ 'kua̧rü̧nä̧ ttidepä eseunä̧tä̧ eseäkuäu.

¹⁴ Isajuru ttüjü'kokokua jü̧nä̧mä̧ topokotü; surojü jü̧ttü̧'i̧nä̧ 'kuä'ächi'okotü. Tta̧'kua̧rü̧nä̧ jiyupätürü yaparewä'chätü; ruwotü juoäwätä wo̧juä̧tü̧; juätü ttü̧ja̧mä̧ kueyowächi̧nä̧tü̧.

¹⁵ Kue'ächü re'tewächätü, jua'amä̧ jueü mä̧nä̧ttü̧ 'kȩtti̧pä̧chi̧na̧'a̧ttü̧. Bosor i̧tti̧ profeta Balaam suronä̧ jȩpü̧ premio pättü ȩma̧ pä'ü jȩi̧nü̧'a̧kuä̧ jȩpä̧tü̧,

¹⁶ Ja̧'wa̧nü̧ ja̧'a̧ suronä̧ jȩo̧mȩnä̧ Bü̧ru̧ba̧ isaju ukuokuokoju kku̧ra̧wä̧ri̧nä̧ku̧ ttü̧ja̧ tti̧wȩnȩnä̧ ja̧'wa̧nü̧ ja̧'a̧ttü̧ ja̧'a̧tä̧ jȩü̧ta̧'a̧nü̧ 'kuä'epäjipü kkikuokoku pinü̧.

¹⁷ Juätü wo̧juȩkuä̧ isotümä̧ reju ajiya joäju jä̧'i̧nü̧'a̧nü̧'i̧nä̧, ajiya isoppa kkä̧rü̧'koppa ȩpa̧'a̧ jä̧'i̧nü̧'a̧nü̧'i̧nä̧ wotü; usurä ttȩmä̧wa̧ pä'ütä wotü 'kuäopünä̧tä̧ idikuttü'i̧nä̧ yabonä̧nü̧ yo̧o̧mȩ kkä̧nü̧tä̧.

¹⁸ Kkorojueimä̧ pä̧i̧ku̧nä̧ pätta'anä̧ jui'ätü, ja̧'wa̧ta̧nü̧ ji̧yȩnä̧tä̧ juoächäkuäwänä̧, ttü̧ja̧rü̧ pä̧wä̧rü̧jü̧nä̧, suronä̧ jȩttü̧ttü̧ rättopächa pä'ü kka̧kuä̧tü̧rü̧ ttesetipünä̧ jȩpä̧tü̧.

¹⁹ Pä̧wä̧rü̧ja̧'a̧ku̧ jȩtti̧ya̧tü̧ pä'ätü, jitütämä̧ surojü jȩä̧kuä̧wä̧ umüwäyotü tta'anä̧; isopäi'ünä̧ o'katoi'ünä̧ surojü umüwäyotümä̧ jua̧u̧tä̧ wȩä̧u̧ ja̧'a̧ttü̧.

²⁰ Ja̧'wa̧nü̧ ja̧'a̧ttü̧ tu̧ru̧wa̧ Jesucrito surojüttü tü̧ji̧pü̧nä̧ jȩpü̧rü̧ wo̧juä̧chi̧'ä̧tü̧mä̧, pi̧jä̧ jäwä surojüttü tü'ipächü ttü̧ja̧kui̧na̧'a̧nä̧, ja̧u̧nä̧ jerupächi'ü pä'äjita'anü̧ iyäwätümä̧, jua̧u̧tä̧tä̧ wȩä̧ro̧mȩnä̧, ä'koji suro ttino̧mȩttü̧'i̧nä̧ yabonä̧nü̧ wotü.

²¹ Isopäi'ünä̧ juätü jueü mä̧nä̧ ttu̧wo̧jui̧'o̧ka̧'a̧ ji̧nü̧ttü̧tä̧ adiwaja'a, weäwä wȩnȩ surojü juiyü iyinü̧ttü̧ wo̧jui̧'ü̧'ko̧tü̧ ppa̧ttä̧chü̧ juiyäkua'anü̧.

²² Ja̧'wa̧nü̧ ja̧'a̧nä̧ juätümä̧ isopäi'ünä̧ päwi'ino̧mȩ jä̧'i̧jo̧mȩ jȩpä̧tü̧: Äwirimä̧ edewara̧'a̧ku ppa̧'ä̧chü̧ ja̧'wa̧ta̧nü̧ kuchi'i̧nä̧ aje i'opo'ü̧'ka̧ pä'äjita'anü̧ redäwanä̧ borea pä'ü ppa̧'ä̧chü̧. Jü̧nä̧.