2 Pedro 1 - Nuevo Testamento Uwotjüja

Teäwinomȩ

¹ Ttü Simón Peduru, Jesucrito wȩ'ä̧wa̧ ja̧'wa̧ta̧nü̧ u̧mü̧wä̧ya̧ wa̧, te'äusä ujutu jü̧ta̧'a̧nü̧ adiwäjuei tta̧'kua̧ wȩnä̧rä̧kuä̧wä̧nä̧ rȩbȩwi̧nä̧tü̧rü̧, isopäi'ünä̧ tü̧ä̧nä̧wa̧ Dio'i̧nä̧, Jesucrito ra̧wä̧pi̧jü̧ttü̧ kki̧'i̧kuä̧ i̧sa̧'i̧nä̧ adiwä i̧sa̧ jo̧mȩttü̧.

² Mipponä̧ ppädäkuäwänä̧ ja̧'wa̧ta̧nü̧ wȩnȩ juiyünä̧ kkä̧kuä̧wä̧nä̧ rü̧ä̧chü̧nä̧ kka̧kuä̧tu̧kui̧, Dio u̧wo̧juö̧nä̧'i̧nä̧ ja̧'wa̧ta̧nü̧ tu̧ru̧wa̧ Jesú-nä̧'i̧nä̧.

Dio-rü pä̧wä̧rü̧jo̧mȩnä̧ kkä̧kuä̧wä̧ wȩnȩ

³ Dio-mä̧, ujurunä̧ o'kajuiyünä̧ ta̧'kua̧rü̧nä̧ rekuä rü̧jü̧'i̧nä̧, rȩrü̧jü̧ toäkuäwä'i̧nä̧ iyinä̧u̧jä̧, chutä ü̧rü̧ä̧nä̧ adiwäjuei aditäwänä̧ ujuturu wopinü̧rü̧ tu̧wo̧jua̧ pä'ümä̧.

⁴ Pi̧yȩ jäwänä̧tä̧ iya päinü̧mä̧ iyinä̧u̧jä̧, ja̧u̧mä̧ ri̧u̧ jäwä ja̧'wa̧ta̧nü̧ rü̧ä̧nä̧ mikuäu ja̧'a̧, ja̧u̧nä̧tä̧ Dio jäwä ku̧ju̧nä̧rä̧kuo̧tü̧jä̧ ja̧'wa̧nü̧ ja̧'a̧ttü̧ pi̧jä̧ jäwä surojuoepü ttidepä kkü'keku pi̧jä̧ra̧'a̧ i'kächinü̧ttü̧mä̧ dü'ekuächätukui.

⁵ Ja̧'wa̧ta̧nü̧ pa̧'a̧nü̧ jo̧mȩttü̧ adiu kkä̧nü̧ o'kajuiyünä̧ tta̧'kua̧ wȩnä̧rä̧kuä̧wä̧ rü̧ä̧chä̧kua̧'a̧nü̧ juruwächi'ätukui; ja̧'wa̧ta̧nü̧ adiu kkä̧kuä̧wä̧mä̧, wo̧jui̧'ä̧kuä̧wä̧ra̧'a̧;

⁶ Ja̧'wa̧ta̧nü̧ wo̧jui̧'ä̧kuä̧wä̧tä̧, tta̧mü̧nä̧ weäkuäwoküra̧'a̧, ja̧'wa̧ta̧nü̧ tta̧mü̧nä̧ weäkuäwokümä̧ tta̧mi̧ 'kiächi'äkuäwära̧'a̧; tta̧mi̧'kiächi'äkuäwätä, rȩrü̧jü̧ toäkuäwära̧'a̧;

⁷ ja̧'wa̧ta̧nü̧ rȩrü̧jü̧ toäkuäwätä ttawaruwäku eseäkuäwära̧'a̧; ja̧'wa̧ta̧nü̧ ttawaruwäku eseäkuäwätä eseunu̧ repeäkuäwära̧'a̧.

⁸ Isopäi'ünä̧ pi̧yȩ ukutunä̧ kko̧mȩnä̧mä̧ büó juo'ätüjä̧, kua̧'kua̧ru̧tu̧ku̧nä̧'i̧nä̧ mikuäwokü jü̧nä̧mä̧ jo̧ka̧'a̧ jä̧kua̧'a̧, tu̧ru̧wa̧ Jesucrito-rü'i̧nä̧ tteruwäku jü̧nä̧mä̧ jo̧kü̧ jä̧kua̧.

⁹ Ja̧'wa̧nü̧ ja̧'a̧nä̧ jui̧'a̧mä̧ ä̧to̧ka̧ jä̧'i̧nü̧'a̧nü̧ wa̧ jo̧mȩttü̧ otomä̧ topokü; täbokü suronä̧ jȩi̧nü̧ jȩä̧chi̧'ina̧'a̧mä̧ unichi'inü̧.

¹⁰ Ja̧'wa̧nü̧ ja̧'a̧ttü̧, chi̧jä̧wa̧tü̧, täkü Dio-mä̧ wopü pojopü ȩmi̧nä̧u̧jä̧ aditü 'kiyünä̧ kka̧kuä̧tu̧kui̧, ja̧'wa̧nü̧ jȩ'kuä̧tu̧ku̧ttü̧mä̧ yoriso ma̧'ä̧cho̧ko̧tü̧ kuäkuotüjä̧.

¹¹ Ja̧'wa̧nü̧tä̧ tu̧ru̧wa̧ Jesucrito surojüttü tü̧ji̧pü̧nä̧ jȩpi̧nü̧ ruwo beipokü weomȩ doächäkuäwomȩ bawekuächäkua'a.

Isopäi'ünä̧ jueü wȩnȩ

¹² Ja̧'wa̧nü̧ ja̧'a̧ttü̧ pi̧yȩ o'kajuiyünä̧ 'kuäopünä̧tä̧ u̧ni̧chi'okü chä̧kua̧sä̧, ku̧wo̧juä̧tu̧kua̧'a̧nä̧'i̧nä̧ isopäi'ünä̧ wȩnȩ chu̧wo̧juȩti̧nü̧nä̧ 'kiyünä̧ kka̧kuä̧tu̧kui̧.

¹³ Ji̧nä̧ cha̧'kua̧rä̧i̧mä̧ pi̧yȩnä̧ ro̧'ȩpü̧nü̧ jidäwa pä'ümä̧ chaditäwä ja̧'a̧.

¹⁴ Tu̧ru̧wa̧ Jesucrito-mä̧ jiäwinä̧ku̧sä̧ a̧'u̧kua̧'a̧tä̧ jü̧ o'ka'a cha̧'kua̧rü̧ beipächäkuomȩmä̧;

¹⁵ Ja̧'wa̧nü̧ ja̧'a̧nä̧ o'kajuiyünä̧ jȩchü̧'a̧nü̧ jü̧mä̧ jȩchä̧kua̧sä̧ 'korujuodächü o'ka'a pi̧yȩ wȩnȩ tta̧mü̧kuädäkua'anü̧.

¹⁶ Tu̧ru̧wa̧ Jesucrito ujuru'i̧nä̧, ppa̧wä̧chä̧kuȩ'i̧nä̧ tu̧wo̧juȩti̧nü̧mä̧ täbo wȩnȩ ttü̧ja̧ rättepinü̧mä̧ jo̧ka̧'a̧ ji̧na̧'a̧, ja̧'wa̧nü̧ ja̧jü̧jueimä̧ tu̧ru̧wa̧ ü̧rü̧ä̧mä̧ ta̧mü̧nä̧ ti'ärenä̧ topinä̧tü̧jä̧.

¹⁷ Jä'o Dio-mä̧ eseäkuäwä'i̧nä̧ ü̧rü̧ä̧'i̧nä̧ iya'a topinä̧tü̧jä̧, Dio ü̧rü̧ä̧ ukuokumä̧ rä̧mi̧pi̧na̧'a̧: Pide chi̧tti̧rü̧ rü̧ä̧nä̧ eseusä, ttütä pojopü chȩmi̧nä̧ku̧ru̧ jü̧nä̧.

¹⁸ Ujutumä̧ ta̧mü̧nä̧ pa̧ja̧tü̧ ä̧ju̧kui̧nä̧tü̧jä̧ mo̧ro̧jä̧ra̧'a̧ttü̧ rä̧mi̧pa̧'a̧mä̧, jua̧u̧nü̧ rä̧mi̧pi̧nü̧mä̧ chu̧ru̧wa̧ku̧ mü̧ä̧'ka surojü juiyä'kanä̧ kka̧kui̧nä̧tü̧jä̧.

¹⁹ Pi̧yȩ profeta wotü jittäwinü̧mä̧ isopäi'ünä̧ ja̧'a̧, adiu topü jȩ'kuä̧tu̧ku̧mä̧ ra̧pa̧ra̧ yo̧mȩku̧ tejäda'a jä̧'i̧nü̧'a̧nü̧, mo̧ro̧ juomȩbü päi'ünä̧ ja̧'wa̧ta̧nü̧ mo̧ro̧ päia'a siri'komä̧ tta̧mi̧so'kinä̧ itejäda pä'ü rä'opü.

²⁰ Kkorottü'i̧nä̧ yabonä̧nü̧ ku̧wo̧juä̧tu̧kua̧ pä'ü ja̧'a̧: profeta wotü tti̧wȩyu̧ti̧nü̧mä̧ jitürütä pä̧wä̧rü̧jo̧mȩnä̧ rä'epü iku jittäwa pä'ümä̧ jo̧ka̧'a̧.

²¹ Isopäi'ünä̧ profeta wotümä̧ yoriso ttü̧ja̧rü̧ pä̧wä̧rü̧ja̧'a̧ku̧mä̧ ukuokuokotü pinä̧tü̧, ja̧'wa̧nü̧ ja̧jü̧jueimä̧ Epíritu Sa̧tu̧ jiäwa'anä̧tä̧ Dio jäwämä̧ ukuokuinä̧tü̧.