2 Juan 1 - Nuevo Testamento Uwotjüja

Igresia-rü teäwinü̧ wȩnȩ

¹ Igresia-ttü ukuo i̧sa̧mä̧, Dio pojopü ȩmi̧nä̧u̧rü̧ jua'atäku ja̧u̧nä̧tä̧ kka̧kuä̧tü̧rü̧ te'äusä. Isopäi'ünä̧ eseu repedä̧u̧jä̧; ja̧'wa̧ta̧nü̧ ttütämä̧kü̧, ja̧u̧ ja̧jü̧jueimä̧ o'katoi'ünä̧ isopäi'ünä̧ wȩnȩ wo̧jui̧'i̧nä̧tü̧'i̧nä̧.

² Ukuturumä̧ isopäi'ünä̧ jäwä tamiso'kinä̧ tu̧ju̧nä̧rü̧nä̧ ja̧'wa̧ta̧nü̧ 'kuäopünä̧tä̧ kkä̧kuȩnä̧ eseu repedä̧u̧jä̧.

³ Jä'o Dio-nä̧, ja̧'wa̧ta̧nü̧ I̧tti̧ Jesucrito-nä̧, mippoünä̧ iyäwä'i̧nä̧ re kkä̧kuä̧wä̧'i̧nä̧, wȩnȩ juiyünä̧ kkä̧kuä̧wä̧'i̧nä̧ ja̧'wa̧ta̧nü̧ Jä'o I̧tti̧mä̧ ujutuku ü̧jä̧kua̧ isopäi'ünä̧ wȩnȩ päü'anü̧.

Isopäi'ünä̧ eseu repeäkuäwä wȩnȩ

⁴ Rü̧ä̧nä̧ esewächi'äjisä ukututtü yotukunä̧ isopäi'ünä̧ wȩnȩ pä'aku Tä'o Dio weü'anü̧ ttü̧ja̧kua̧'a̧ po̧kui̧pü̧mä̧.

⁵ Ja̧'wa̧ta̧nü̧ jitämä̧, chawaruwä chü̧jä̧wa̧tü̧, kkorotüku repe'äkuäu kka̧kuä̧tu̧kui̧ pä'ü ajuäwäkuäunü̧ jädepä̧u̧jä̧. Pi̧yȩ chi̧wȩyu̧tu̧mä̧ jareü wȩnȩmä̧kü̧ ja̧u̧ ja̧jü̧jueimä̧ ä̧kuo̧mȩnä̧tä̧ päi'ünä̧ tȩmi̧nü̧ ja̧'a̧.

⁶ Ja̧'wa̧ta̧nü̧ eseu repeäkuäwämä̧ Dio weü wȩnȩ päü'anü̧ ttü̧ja̧kua̧ pä'ü kkada'kawa'a, ja̧'wa̧nü̧ ja̧'a̧ttü̧ ä̧kuo̧mȩnä̧tä̧ päi'ünä̧ kuä̧ju̧kui̧nä̧tu̧ku̧ta̧'a̧nü̧ eseu repe'ünü̧ kka̧kuä̧tu̧kui̧.

Jesucrito-nä̧ isopäi'ünä̧ tta̧'kua̧ ttu̧wȩnä̧rü̧ wȩnȩ

⁷ Ja̧'wa̧ta̧nü̧ pi̧jä̧nä̧mä̧ rekuätü ttü̧ja̧rü̧ yaparetü Jesucrito-mä̧ isopäi'ünä̧ Ubo jü̧nä̧mä̧ ichokü pinü̧ pä'ü kue'ächü ji'äwätü. Ja̧'wa̧nü̧ wa̧mä̧ jerutu ikuäwä i̧sa̧tä̧ ja̧'a̧ ja̧'wa̧ta̧nü̧ Crito aboi̧ya̧tä̧ wa̧.

⁸ Ttu̧'ȩpä̧rü̧nü̧ kka̧kuä̧tu̧kui̧, taditäwä u̧wä̧ju̧ tote'ächü juiyäkua'anü̧, totte'ächajueimä̧ iya päinü̧mä̧ jo̧mȩnü̧tä̧ kuȩmä̧tu̧kuä̧kua̧'a̧nü̧.

⁹ Ya̧tȩ Crito u̧wo̧juȩti̧no̧mȩttü̧'i̧nä̧ abonä̧nü̧ amükuädümä̧ Dio-rümä̧ kkü̧nä̧ro̧kü̧; ja̧'wa̧nü̧ ja̧'a̧nä̧ u̧wo̧juȩti̧nü̧nä̧ kkü̧mä̧ Jä'orü'i̧nä̧, I̧tti̧rü̧'i̧nä̧ kku̧nä̧rü̧.

¹⁰ Ya̧tȩ, ukuturu do'ächü ichü pi̧yȩ wo̧juȩkuä̧ wȩnȩ i'chächoka'a ichüttümä̧ kuojusodetukunä̧mä̧ do'ädü'i̧nä̧ te'äu'i̧nä̧ jü̧nä̧mä̧ jȩ'kuä̧tu̧kuä̧rü̧.

¹¹ Ja̧'wa̧nü̧ wa̧rü̧ te'äumä̧ suronä̧ jȩü̧nä̧ ppächi̧'ä̧kua̧.

Rüjinä̧ teäwi'inü̧ wȩnȩ

¹² Ukuturumä̧ rü̧ä̧nä̧ chukuokua pä'üsä, ja̧'wa̧nü̧ ja̧'a̧nä̧ kuyäru isojänä̧mä̧ wȩyu̧tu̧mä̧ we'oküsä. Ttütätä ukuturu do'ächü ichü topü chukuokua pä'ütä tta̧'a̧ru̧sä̧, ja̧'wa̧nü̧ jü̧ttü̧tä̧ tesewäkuäwä'ijümä̧ jo̧mȩnü̧ jä̧kua̧'a̧.

¹³ Ukutu kuawaruwä kui̧jä̧wa̧tü̧ ji̧nä̧ ji̧yȩtȩ wotümä̧ ja̧'wa̧ta̧nü̧ Dio pojopü ȩmi̧nä̧u̧mä̧ tti̧wȩnȩnä̧ te'äu wȩttä̧u̧jä̧.