2 Corintios 9 - Nuevo Testamento Uwotjüja

¹ Ja̧'wa̧ta̧nü̧ tawaruwä tü̧jä̧wa̧tü̧rü̧ iyäwä ofrenda ka̧ka̧kuä̧mä̧, ukuturu jidäwa pä'ümä̧ rekuä rü̧jo̧ka̧'a̧;

² jua'amä̧, ppäkuädätukua päkuätukumä̧ chu̧wo̧jua̧'a̧ttü̧. Ja̧'wa̧nü̧ ji̧yä̧ku̧, Macedonia ttü̧ja̧rü̧mä̧ eseunu̧ pä'äjisä, juätü, Acaya rȩjȩ ttü̧ja̧mä̧ täkü jo̧mȩnü̧tä̧ winä̧tü̧ ni̧po̧ año-ttü̧tä̧ päi'ünä̧, ppättäda pä'ümä̧; ja̧'wa̧nü̧ jȩ'kuä̧tu̧ku̧ ä̧ju̧ku̧ Macedonia ttü̧ja̧mä̧ rekuätü jȩtta̧ pä'ü amükuädi'inä̧tü̧.

³ Ja̧'wa̧nü̧ ja̧'a̧nä̧, Tito-rü'i̧nä̧, kkorotü tawaruwä ti̧jä̧wa̧tü̧ ta̧ju̧ru̧'i̧nä̧ we'üsä, ofrenda jäwä jo̧mȩnü̧ jȩpü̧ ttu̧ju̧na̧ pä'ü; ja̧'wa̧nü̧ jo̧mȩnä̧ ukuturu tesewinü̧mä̧ toe'ächü juiyünä̧, jo̧mȩnü̧tä̧ ku̧jä̧tu̧kuä̧kua̧'a̧nü̧.

⁴ Jo̧mȩnü̧ jȩpü̧ ku̧ju̧nä̧tu̧kuo̧ka̧'a̧nä̧, Macedonia ttü̧ja̧, yotüte ttüku ttichüttümä̧ dä'ä ttutu 'kua̧ra̧'a̧, ta̧'kua̧ tu̧wȩnä̧rä'i̧ja̧'a̧mä̧, ukututä'i̧nä̧ dä'ä ttukuätukuä pä'üsä, pä'ü.

⁵ Ja̧'wa̧nü̧ ja̧'a̧ttü̧, pitü chawaruwä chi̧jä̧wa̧tü̧rü̧ we'üsä, ttü chichäkua'a ä'kanä̧. Juätütä jä̧kua̧'a̧, kuiya päkuinä̧tu̧ku̧ ofrenda ttü̧ka̧ka̧tä̧kuo̧tü̧mä̧. Ja̧'wa̧nü̧ jȩpü̧tä̧ kui̧jȩpä̧kuo̧tü̧jä̧, kkorotü wettoka'anä̧ eseunu̧ kuiyätukua'amä̧.

Eseunu̧ iyäwä wȩnȩ

⁶ Pi̧yȩ amükuädätukui: a̧'u̧ku̧nä̧tä̧ kku̧nu̧mä̧, a̧'u̧ku̧nä̧tä̧ ü̧ka̧ka̧tä̧kua̧ u̧wä̧ju̧mä̧; ja̧'wa̧ta̧nü̧ rü̧ȩnä̧ kku̧nu̧mä̧, rü̧ȩnä̧ ü̧ka̧ka̧tä̧kua̧, u̧wä̧ju̧mä̧.

⁷ Yotukunä̧mä̧, iyätukui kua̧mi̧so'kitukunä̧, kuamükuädäjätuku'akuä: kua̧'kua̧ tta̧kuȩkuä̧tu̧kuo̧ka̧'a̧tä̧, rekuä rü̧jä̧u̧tä̧mä̧kü̧tä̧, isopäi'ünä̧ Dio-mä̧ eseunu̧ iyätürümä̧ eseu.

⁸ Ja̧'wa̧ta̧nü̧ Dio-mä̧ o'kajuiyünä̧ ujuru kku̧nä̧rü̧ ja̧'a̧ttü̧, ukuturu rü̧ä̧chü̧nä̧ iyä̧u̧jä̧; kkorotürü ppäkuädätukua pä'ümä̧;

⁹ wȩyu̧kuä̧ wȩnȩ pä'a: Usurä isotürü 'kȩ'chä̧u̧ iyä'chinü̧, adiwomȩnä̧ 'kuäopünä̧tä̧ kka̧'a̧, Jua̧u̧ jȩü̧mä̧.

¹⁰ Ya̧tȩ, kku̧nä̧wä̧ i̧sa̧rü̧, u̧wä̧ju̧ iyümä̧, ukua pä'ü u̧kuȩ iyü; ja̧'wa̧ta̧nü̧ jȩpü̧ kuäwä yoepä̧kua̧ ukutu adiwomȩnä̧ jȩ'kuä̧tu̧ku̧mä̧.

¹¹ Ja̧'wa̧nü̧ jo̧mȩnä̧ rü̧ȩnä̧ kku̧ju̧nä̧rä̧kuo̧tü̧jä̧, adiu o'kajuiyünä̧ ppäkuäda päkuätukumä̧, jua̧u̧nä̧tä̧ icha'a Dio-rü teseumä̧.

¹² Isopäi'ünä̧ pi̧yȩ ofrenda ka̧ka̧tü̧ ttiya'amä̧, suro Dio-rü esetätürütämä̧ ppädoka'a, Dio-rü ttesewa pä'ü'i̧nä̧ ja̧'a̧;

¹³ Pi̧yȩ kuiyätukua'a topü, Dio-rü tteseäkuäwäkuotü, Crito weinü̧nä̧ kukuotätukua'attü̧ ja̧'wa̧ta̧nü̧ ppäkuätukua'attü jitürütä'i̧nä̧, kkorotü o'katoi'ünä̧rü̧'i̧nä̧, jü̧nä̧;

¹⁴ Ja̧'wa̧ta̧nü̧ juätümä̧, Dio-rü'i̧nä̧ ttukuokuäkuotü rü̧ȩnä̧ eseunu̧, ukutunä̧ Dio-mä̧ re ü̧ja̧'a̧ttü̧.

¹⁵ ¡Dio-rütä esewätüjä̧, adiwä juei jȩtü̧nä̧tä̧ pärowächokü iyina̧'a̧ttü̧!