2 Corintios 8 - Nuevo Testamento Uwotjüja

Ofrenda iyäwä wȩnȩ

¹ Ja̧'wa̧ta̧nü̧ chawaruwä chi̧jä̧wa̧tü̧, Macedonia rȩjȩnä̧ igresia wotürü Dio rȩrü̧jü̧ toinü̧ wȩnȩ, ku̧wo̧juä̧tu̧kua̧ pä'ü ji'äwätüjä̧;

² Pi̧yȩ igresia wotümä̧ rü̧ȩnä̧ usurä ȩmä̧u̧ 'kuättopa'anä̧, eseäkuäwinä̧tü̧; rü̧ȩnä̧ usurä isotü tta'anä̧, ruwotü 'kua̧rü̧nä̧ ttiäre ofrenda iyinä̧tü̧.

³ Ttü wo̧juö̧ ji'äusä, juätümä̧ eseunu̧ ttujuru kko̧mȩbümä̧ iyinä̧tü̧ ja̧'wa̧ta̧nü̧ betti̧pä̧ra̧'a̧ yabo'i̧nä̧ iyinä̧tü̧; jua'a'i̧nä̧ wȩttä̧u̧mä̧kü̧, jitütä amükuädü iyinä̧tü̧.

⁴ Jua'a'i̧nä̧, ujutuku ukuoku jättepinä̧u̧jä̧, Dio ȩmi̧nä̧u̧ru̧ ppättäda pä'ümä̧.

⁵ Ujutu ta̧mü̧kuädinomȩttü̧'i̧nä̧ abonä̧nü̧ iyinä̧tü̧, ä̧kuo̧mȩnä̧mä̧ Ttu̧ru̧wa̧rü̧ iyäunü̧ jȩpi̧nä̧tü̧, juȩnȩ o'komȩnä̧mä̧ ujuturu ppä'ädinä̧tü̧. Ja̧'wa̧nü̧ jȩtto̧mȩnä̧mä̧ Dio-rü pä̧wä̧rü̧jo̧mȩnä̧tä̧ jȩpi̧nä̧tü̧.

⁶ Tito ji̧na̧'a̧, pi̧yȩ ofrenda ppädäkuäwä ä̧kuo̧mȩnä̧ kkä̧mä̧dü̧ ka̧ka̧ti̧nü̧mä̧. Ja̧'wa̧nü̧ ja̧'a̧ttü̧, jua̧u̧ru̧ jä'epinä̧tü̧jä̧ yaboku adita pä'ü jua̧u̧ eseäkuäwämä̧.

⁷ Ja̧'wa̧nü̧ ja̧'a̧ttü̧ tta̧'kua̧ wȩnä̧rä̧kuä̧wä̧ ku̧ju̧nä̧rä̧'i̧jä̧tu̧ku̧ta'anü̧, wo̧juä̧wä̧ wȩnȩ, ku̧wo̧jui̧'i̧nä̧tu̧ku̧, ppä'ädäkuäu jȩ'kuä̧'i̧jä̧tu̧ku̧ta'anü̧, pi̧yȩ ppädäkuäwä'i̧nä̧ jȩpä̧tu̧kui̧.

⁸ We'ü ttukuoku'anü̧mä̧ ukuokuoküsä. Suro, kkoro igresia isotü ofrenda ppä'ädü jȩttü̧ ku̧wo̧juä̧tu̧kua̧tä̧ pä'üsä. Ukutu'i̧nä̧ isopäi'ünä̧ eseäkuäwä kui̧jȩpä̧tu̧kuä̧kua̧'a̧nü̧.

⁹ Täkü, ukutumä̧ wo̧juä̧tü̧jä̧ Tu̧ru̧wa̧ Jesucrito, ru̧wa̧ ja̧'a̧nä̧ ukuturu repe'ü usurä i̧sa̧ juoinü̧mä̧; Jua̧u̧ usurä i̧sa̧ juoinü̧nä̧mä̧, ukutu ruwotü juokuätukua pä'ü ji̧na̧'a̧.

¹⁰ Ja̧'wa̧ta̧nü̧ pi̧yȩ tü'kü, ukuturu ro̧'ȩpü̧ pä'üsä; ni̧po̧ año-nä̧mä̧ ukutu ji̧na̧'a̧ ä̧kuo̧mȩnä̧ kkä̧mä̧dü̧ pi̧yȩ jȩpi̧nä̧tü̧mä̧ ja̧'wa̧nü̧ jȩpü̧mä̧ rü̧ȩnä̧ esewinä̧tü̧jä̧.

¹¹ Ja̧'wa̧nü̧ ja̧'a̧ttü̧ jitämä̧, ä̧kuo̧mȩnä̧ kkä̧mä̧dü̧ eseunu̧ jȩ'kui̧nä̧tu̧ku̧ta̧'a̧nü̧, jȩpä̧tu̧kui̧ käkuädätukuomȩbü päi'ünä̧, yotükupünä̧ jȩ'kuä̧tu̧ku̧ jü̧'a̧nü̧ jü̧mä̧.

¹² Isopäi'ünä̧ ya̧tȩ eseunu̧ iya pä'ürümä̧, iäre ofrenda-mä̧, Dio-mä̧ ȩmi̧yä̧kua̧, juitü tiyarü pä'ümä̧ jä'epokü ja̧'a̧ttü̧.

¹³ Jua'akumä̧, kkorotürü ppäkuädätukuomȩnä̧, pärokua'aku ukututämä̧, juikuätukuamä̧ pätoka'anä̧, ji̧nä̧somä̧ yoräteunä̧ ku̧ju̧nä̧rä̧tu̧kua̧ pä'ätüjä̧.

¹⁴ Jitämä̧ ukutujä̧, juätürü rekuärü̧jü̧ kku̧nä̧rä̧tü̧mä̧; kkoronü̧mä̧ ukuruturu rekuä rü̧jü̧ ttu̧ju̧nä̧rä̧kuo̧tü̧ juätümä̧ ja̧'wa̧nü̧ jȩ'kuä̧tu̧kuo̧mȩnä̧ yoräteunä̧ ku̧ju̧nä̧rä̧kuo̧tü̧jä̧,

¹⁵ wȩyu̧kuä̧ wȩnȩ pä'a: «rü̧ȩnä̧ ü̧ka̧ka̧tä̧ja̧'a̧nä̧, rü̧ȩnä̧mä̧ kki̧'o̧ko̧ku̧ pi̧nü̧ ja̧'wa̧ta̧nü̧ a̧'u̧ku̧nä̧tä̧ ka̧ka̧tä̧ji̧rü̧'i̧nä̧, juiyoka'a ji̧na̧'a̧.»

Ppättäda pä'ü ka̧ka̧kuä̧ wȩnȩ

¹⁶ Dio-rümä̧ eseusä, Tito a̧mi̧so'kinä̧, ukuturu ppäda pä'ü weina̧'a̧ttü̧, ttü chamükuädüta'anü̧.

¹⁷ Ttü jidäwäkumä̧ esetinü̧; chutä'i̧nä̧ ukuturu toa pä'ü esewomȩtä̧mä̧.

¹⁸ Ja̧'wa̧ta̧nü̧, jua̧u̧ Tito-kumä̧ we'inä̧tü̧jä̧, ya̧tȩ ta̧wa̧ru̧wa̧ ti̧jä̧wa̧rü̧, jua̧u̧mä̧ kkoro igresia-ttü'i̧nä̧ ttu̧wo̧juä̧ku̧, adiu jȩa̧'a̧ ä̧ju̧ku̧.

¹⁹ Ja̧'wa̧nü̧ ja̧'a̧ttü̧, igresia isotümä̧ ujutuku wettäjäku, pi̧yȩ rekuä rü̧jä̧u̧ru̧ ppä'ädü ti̧'cho̧mȩ icha pä'ü; jua'amä̧ Dio-rü eseu jȩta̧'a̧ rekuä rü̧jä̧u̧ru̧ ppä'ädü;

²⁰ Ja̧'wa̧nü̧tä̧ aditätüjä̧ kkorotü suronä̧ pättä'chü juiya pä'ü, pi̧yȩ ofrenda tȩpo̧mȩnä̧.

²¹ Adiutä jȩta̧ pä'ü amükuädätüjä̧, suro Tu̧ru̧wa̧ ä'ka jo̧mȩttü̧tä̧mä̧kü̧, ttü̧ja̧ ttä'ka jo̧mȩttü̧'i̧nä̧.

²² Juätükumä̧, kka̧ra̧ ta̧wa̧ru̧wa̧ ti̧jä̧wa̧rü̧'i̧nä̧ wȩtä̧u̧jä̧, adiu jȩpü̧ ü̧jü̧mä̧ totä'ijäku ja̧'a̧ttü̧, jitämä̧ juȩnȩ abonä̧nü̧ jȩpü̧ ukuturu a̧'kua̧ u̧wȩnä̧ra̧'a̧ttü̧.

²³ Tito ütü'kümä̧ pä'üsä, jua̧u̧mä̧ ttütä cha̧wa̧ru̧wa̧ ja̧'a̧; ttütäku aditä'ijü; ja̧'wa̧ta̧nü̧ kkorotü tawaruwä jua̧u̧tä̧ku̧ ichätümä̧ igresia wȩttä̧u̧ ja̧'a̧, Crito-rü eseu aditätü.

²⁴ Ja̧'wa̧nü̧ ja̧'a̧ttü̧, i̧jȩpä̧tu̧kui̧ juätürü kuesewätuku igresia isotü ttä'kattü jua̧u̧ jȩ'kuä̧tu̧kua̧'a̧ kuesewätukuäkua'anü̧.