2 Corintios 7 - Nuevo Testamento Uwotjüja

¹ Isopäi'ünä̧ chawaruwä chi̧jä̧wa̧tü̧ ja̧'wa̧nü̧ jua̧u̧ i̧yä̧kuȩ ukuokuina̧'a̧ttü̧, Dio ȩma̧tü̧ pä'ümä̧ surojümä̧ jȩtü̧ juiyü'anü̧ ja̧'a̧, surojüttü i̧mi̧ku̧nä̧ tü̧ja̧ pä'ü. Dio-rümä̧ eseu tukuotätukua, ye'ekunü̧ surojü juitächächünä̧; Chutä surojü jui̧'a̧ jü̧ta̧'a̧nü̧.

Corinto ttü̧ja̧mä̧, Pauru eseunä̧ jȩpi̧nä̧tü̧

² Kua̧mi̧ iso'kitukunä̧ esewätükuitü. Ya̧tȩrü̧'i̧nä̧ suronä̧mä̧ jȩpo̧ko̧tü̧ pinä̧tü̧jä̧, ya̧tȩrü̧'i̧nä̧ surojuo'epokotü pinä̧tü̧jä̧; ja̧'wa̧ta̧nü̧ ya̧tȩrü̧'i̧nä̧ yaparewokotü pinä̧tü̧jä̧.

³ Pi̧yȩmä̧, ukuturu suronä̧ pä'ümä̧ pädokü; täkü ä'kanä̧ jidäwinä̧u̧jä̧, ukuturu ta̧mi̧'iso'kinä̧ repeta'a chukuokuinä̧u̧jä̧, wa'are'i̧nä̧ ja̧'wa̧ta̧nü̧ a̧'kua̧rä̧kuä̧wä̧'i̧nä̧ ttoepoka'a jä̧kua̧'a̧ ukuturu eseu repetümä̧.

⁴ Ukuturumä̧ wäjuönä̧tä̧ ukuokusä; ja̧'wa̧ta̧nü̧ rü̧ȩnä̧ eseusä ukuturumä̧; a̧'u̧ ttudomȩnä̧ ppädäkuäwä'i̧nä̧ jo̧mȩnü̧ kkä̧ku̧sä̧; rü̧ȩnä̧ usurä tȩmä̧wa̧'a̧nä̧'i̧nä̧ rü̧ȩnä̧ eseusä.

⁵ Macedonia ütawiyänä̧ tichi'ino̧mȩbü päi'ünä̧, 'kuä'ächi'ümä̧ pȩjä̧mo̧ko̧tü̧jä̧, o'kajuiyünä̧tä̧ usurä ȩmä̧wä̧tü̧jä̧: u̧mi̧ttü̧mä̧, rowäkuäwä'i̧nä̧; jakuänä̧ttü̧mä̧ ye'ekuäjätüjä̧.

⁶ Ja̧'wa̧nü̧ ja̧'a̧nä̧, Dio-mä̧, usurä ȩmä̧wä̧tü̧rü̧ ppädäkuäwä i̧sa̧ ja̧'a̧ttü̧, ppädinä̧u̧jä̧, Tito ichi'omȩnä̧;

⁷ ja̧'wa̧ta̧nü̧ suro, jua̧u̧ ichi'äja'atämä̧ esewokotüjä̧, jua̧u̧'i̧nä̧ ukutuku esewina̧'a̧ rü̧ȩnä̧ esewiyä̧u̧ esewätüjä̧. Jua̧u̧mä̧ jiäwäjä̧u̧jä̧ ukutu, ujuturu to'kua päkuätuku'i̧nä̧, ujutu jäwänä̧ kua̧'kua̧ tta̧kuȩkuä̧tu̧ku̧'i̧nä̧ ja̧'wa̧ta̧nü̧ ttü jäwänä̧ kua̧'kua̧ tta̧kuȩkuä̧tu̧ku̧'i̧nä̧; ja̧'wa̧nü̧ ä̧ju̧ku̧ rü̧ȩnä̧ esewäjisä.

⁸ Jua'akumä̧, wȩyu̧tu̧ wedina̧'a̧ kua̧'kua̧ tta̧kuȩkui̧nä̧tu̧kua̧'a̧nä̧, suronä̧ jȩpi̧nü̧sä̧ pä'ümä̧ amükuädoküsä; ja̧'wa̧nü̧ ja̧'a̧nä̧, ä̧kuo̧mȩnä̧tä̧, suronä̧ pä'inü̧sä̧ pä'ü cha̧'kua̧tta̧ päi'inä̧ku̧sä̧, jua̧u̧nä̧ tta̧'kua̧ tta̧'ȩkuä̧tü̧do pätta'a chä̧ju̧kuo̧mȩnä̧.

⁹ Ja̧'wa̧nü̧ ja̧'a̧nä̧, jitämä̧ eseusä; jua̧u̧ kua̧'kua̧ tta̧kuȩkui̧nä̧tu̧ku̧nä̧tä̧, ku'ärowächi̧ni̧yä̧tu̧kuä̧ku̧; isopäi'ünä̧ kua̧'kua̧ tta̧kuȩkui̧nä̧tu̧ku̧mä̧ Dio-rü pä̧wä̧rü̧jo̧mȩnä̧ ji̧na̧'a̧ pä'üsä ja̧'wa̧nü̧ ja̧'a̧ttü̧ ukuturu ti̧wȩyu̧ti̧na̧'a̧mä̧, surojina̧'a̧ pä'oküsä.

¹⁰ Ja̧'wa̧nü̧ ja̧'a̧ttü̧, Dio-rü pä̧wä̧rü̧jo̧mȩnä̧ ta̧'kua̧ tta̧wȩpü̧mä̧, surojü ra̧wä̧pi̧jü̧ttü̧ ttü̧ji̧pü̧nä̧ jü̧, surojina̧'a̧ pätü juiya pä'ü; ja̧'wa̧nü̧ ja̧'a̧nä̧ pi̧jä̧ttü̧ tta̧'kua̧ tta̧wȩpü̧mä̧ wa'aretä ichü.

¹¹ Kua̧'kua̧ tta̧kuȩkui̧nä̧tu̧ku̧, Dio-rü pä̧wä̧rü̧jo̧mȩnä̧ ji̧na̧'a̧mä̧, ¡topätüjä̧ttü̧, kui̧rȩbȩwi̧nä̧tu̧ku̧mä̧! adiu amükuädü topü, ttürü ppä'ädinä̧tü̧jä̧; jua'akumä̧ kua̧mi̧surächi'inä̧tu̧kua̧'a̧nä̧'i̧nä̧, yekuekui'inä̧tu̧kua̧'a̧nä̧'i̧nä̧; jua̧u̧nü̧ o'ka'amä̧ ttürü to'kuätukua pä'inä̧tü̧jä̧, ttürü ppä'ädümä̧, suronä̧ jȩpä̧ji̧rü̧mä̧ ro̧'ȩpi̧nä̧tü̧jä̧. Ja̧'wa̧nü̧ ji̧na̧'a̧nä̧'i̧nä̧, o'kajuiyünä̧tä̧ i̧jȩkui̧nä̧tü̧jä̧, pi̧yȩ mȩkuä̧tu̧kuo̧kü̧ ji̧nü̧mä̧.

¹² Ja̧'wa̧nü̧ ja̧'a̧ttü̧, jua̧u̧ chi̧wȩnȩ chi̧wȩyu̧ti̧nü̧mä̧, suronä̧ jȩpi̧nü̧rü̧'i̧nä̧, suronä̧ jȩi̧nä̧ku̧ru̧'i̧nä̧ amükuädümä̧ chi̧wȩyu̧to̧kü̧ ji̧nü̧. Ji̧nä̧somä̧, ukutu ujuturu ppä'ädü jȩ'kuä̧tu̧ku̧mä̧, i̧jȩkuä̧cha̧ pä'inü̧sä̧ Dio ä'kattümä̧.

¹³ Ja̧'wa̧nü̧ ja̧'a̧ttü̧, teseunä̧ päi'inä̧u̧jä̧; ja̧'wa̧nü̧ ja̧'a̧nä̧ yabonä̧nü̧ esewätüjä̧, Tito-rü yaboku i̧'chü̧nä̧ ppäkuädinä̧tu̧kuä̧ku̧ esewiyä̧u̧. Jua̧u̧ ja̧'a̧ yaboku teseumä̧.

¹⁴ Täkü, Tito-rümä̧, ukuturu chesewa'amä̧ jidäwinü̧ o'ka'a ji̧na̧'a̧. Pärokua'aku Tito-rü jitäwinü̧'i̧nä̧, ukuturu jitäwinü̧'i̧nä̧ isopäi'ünä̧tä̧ ji̧na̧'a̧.

¹⁵ Ja̧'wa̧ta̧nü̧ Tito-mä̧ ukutu o'katoi'ünä̧rü̧ rü̧ȩnä̧ amükuädü, ukuotü kkä̧nü̧, päüta'anü̧ kuesetinä̧tu̧kuä̧ku̧. Ja̧'wa̧nü̧ ja̧'a̧ttü̧ ukuturu eseu.

¹⁶ ¡Ttü'i̧nä̧ ukuturu, jo̧mȩnü̧ cha̧'kua̧ wȩnä̧rü̧ eseusä!