2 Corintios 6 - Nuevo Testamento Uwotjüja

¹ Ja̧'wa̧nü̧ Dio aditäwä ppä̧dä̧rä̧kuä̧wä̧ isotü ta'attü̧, ukuturu jä'epätüjä̧, Dio rettü iyinü̧mä̧, mikuäwokü jäwä 'kua̧rü̧nä̧mä̧ kuȩmä̧tu̧ku̧ juiya pä'ü.

² Pa̧'a̧nü̧ pä'a wȩyu̧kuä̧ wȩnȩnä̧: Ukuturu ppädäda pä'ü jü̧ mo̧ro̧ chä̧ju̧kui̧nä̧u̧jä̧. Ja̧'wa̧ta̧nü̧ surojüttü ku̧ji̧pa̧ pä'ü rekuä rü̧jü̧ mo̧ro̧ ppädädinä̧u̧jä̧. Ja̧'wa̧nü̧ ja̧'a̧ttü̧, jitä mo̧ro̧tä̧ ja̧'a̧ kuesetü'anü̧ jü̧ mo̧ro̧mä̧; ja̧'wa̧ta̧nü̧ ra̧wä̧pi̧jü̧ttü̧ ku̧ji̧pü̧'a̧nü̧ jü̧ mo̧ro̧mä̧.

Dio weinü̧ aditü, Pauru usurä ȩmä̧wi̧nü̧

³ Ya̧tȩ'i̧nä̧ suronä̧ ukuokua pä'okotüjä̧ ujutu taditäwämä̧ ja̧'wa̧nü̧ ji̧yä̧u̧ adiutä aditätüjä̧ suronä̧ ti̧jȩpü̧ juiya pä'ü.

⁴ Pärokua'aku o'kajuiyünä̧tä̧ i̧jȩpä̧tü̧jä̧, Dio aditäwä aditätü pättünä̧, rü̧ȩnä̧ ta̧mi̧'ki'ächi'ätüjä̧, usurä tȩmä̧wo̧mȩnä̧, rekuä rü̧jo̧mȩnä̧, ta̧'kua̧ tta̧tȩkuo̧mȩnä̧;

⁵ kuäkuättomȩnä̧'i̧nä̧, kärenä̧ tü̧'o̧mȩnä̧'i̧nä̧, tä'oka'a usurä tȩmä̧wo̧mȩnä̧'i̧nä̧, ppäi ttütomȩnä̧'i̧nä̧;

⁶ ja̧'wa̧ta̧nü̧ surojü juiyünä̧ tü̧jo̧mȩnä̧'i̧nä̧, tu̧wo̧juo̧mȩnä̧'i̧nä̧, ta̧mi̧'kitächi'omȩnä̧'i̧nä̧, re tü̧jo̧mȩnä̧'i̧nä̧, Epíritu Sa̧tu̧nä̧ tü̧jo̧mȩnä̧'i̧nä̧, jueünä̧ eseu repetomȩnä̧'i̧nä̧;

⁷ jueü wȩnȩnä̧ tü̧jo̧mȩnä̧'i̧nä̧, Dio ujurunä̧ tü̧jo̧mȩnä̧'i̧nä̧ ja̧'wa̧ta̧nü̧ ttu̧wo̧jua̧'a̧ku̧nä̧, ttieruwa'akunä̧, adiwomȩnä̧ tü̧ji̧pa̧ja̧ pä'ü'i̧nä̧ jueünä̧tä̧ jȩpä̧tü̧jä̧;

⁸ tteseuttü'i̧nä̧, tteseu juiyaja pä'ü'i̧nä̧; adiu tukuotaja pä'ü'i̧nä̧, adiu tukuotü juiyaja pä'ü'i̧nä̧; yapareu ji'äwätü 'kua̧ra̧'a̧nä̧, jueünä̧ ukuokuätü jü̧nä̧tä̧ wotüjä̧;

⁹ tti̧ȩru̧wä̧u̧ 'kua̧ra̧'a̧nä̧, ttu̧wo̧juä̧u̧ jü̧nä̧tä̧; juiyupächätü 'kua̧ra̧'a̧nä̧, ta̧'kua̧rü̧ kku̧nä̧rä̧tü̧tä̧; usurä ttȩmä̧u̧nä̧ jȩttä̧u̧ 'kua̧ra̧'a̧nä̧, wa'ümä̧ ikuokotüjä̧.

¹⁰ Tta̧'kua̧ tta̧'ȩkuä̧tü̧ 'kua̧ra̧'a̧nä̧, 'kuäopünä̧tä̧ esewätüjä̧; usurä isotü 'kua̧ra̧'a̧nä̧, rekuätü ruwotü juottünä̧ ppä'ädätüjä̧; yoriso jui'ätü 'kua̧ra̧'a̧nä̧, o'kajuiyünä̧ kku̧nä̧rä̧tü̧jä̧.

¹¹ Chawaruwä chi̧jä̧wa̧tü̧, ukutu Corinto ütawiyä ttü̧ja̧rü̧mä̧, wäjuönä̧tä̧ ukuokuinä̧tü̧jä̧; ta̧mi̧'iso'ki'i̧nä̧ o'kajuiyünä̧ wäjuönä̧tä̧ ukuokuinä̧tü̧jä̧.

¹² Ujutumä̧ ukuturumä̧ rü̧ȩnä̧ esewätüjä̧; ja̧'wa̧nü̧ ja̧'a̧nä̧ ukutumä̧, pärokua'akumä̧ amükuädokotüjä̧.

¹³ Repettomȩnä̧mä̧, eseu repeäkuäwä. Ttä'o i̧tti̧mü̧rü̧ jäepa'a jä̧'i̧nü̧'a̧nü̧ jädepä̧u̧jä̧: ¡ukutu'i̧nä̧ repe'äkuäu kka̧kuä̧tu̧kui̧, ttü jü̧ta̧'a̧nü̧!

Surojüttü 'Kȩ'i̧pä̧chä̧tu̧kui̧

¹⁴ Jesucrito-rü esetokotü jȩttü̧nä̧mä̧ ppäkuächä̧rä̧tu̧kuä̧, ji̧yȩtȩnä̧'i̧nä̧. Adiwä jueimä̧, surojükumä̧ i̧mi̧ku̧ jäwä ja̧'a̧. Ja̧'wa̧ta̧nü̧ yo̧ü̧'i̧nä̧, tȩya̧u̧ku̧mä̧ ji̧nä̧ ji̧yȩtȩmä̧ jo̧ka̧'a̧.

¹⁵ Ja̧'wa̧ta̧nü̧ Crito-mä̧, äwettä-kumä̧ ji̧nä̧ ji̧yȩtȩmä̧ wokotü, ja̧'wa̧nü̧ jü̧ta̧'a̧nü̧ Jesucrito-rü esetümä̧, esetokükumä̧ ji̧nä̧ ji̧yȩtȩmä̧ wokotü.

¹⁶ Ja̧'wa̧ta̧nü̧ ukutumä̧ Dio ü̧jo̧de (templo) pättodejä̧; ja̧'wa̧nü̧ ja̧'a̧ttü̧ ttü̧ä̧nä̧wo̧tü̧rü̧ esetätukumä̧ wokotüjä̧. Dio-mä̧ pä'inü̧: «juätü chȩmi̧nä̧u̧ku̧ ttü̧'kä̧tȩnä̧ kkä̧nü̧, kuȩdä̧chä̧kua̧sä̧, ja̧'wa̧ta̧nü̧ juätümä̧ Ttü̧ä̧nä̧wa̧ Dio chä̧kua̧sä̧, jitütämä̧ chumüwäyotü ttäkuotü»

¹⁷ Ja̧'wa̧nü̧ ja̧'a̧ttü̧, Tu̧ru̧wa̧mä̧ pä'ü: «Juätüttümä̧ rä'opächü, 'kȩ'i̧pä̧chä̧tu̧kui̧, Surojümä̧ mȩkuä̧tu̧kuä̧, ja̧'wa̧nü̧ jȩ'kuä̧tu̧kuo̧mȩnä̧, Ttümä̧ chȩmä̧kuä̧u̧jä̧,»

¹⁸ Ja̧'wa̧nü̧ jȩ'kuä̧tu̧kuo̧mȩnä̧, Ttümä̧ Kuä'otuku Dio chä̧kua̧sä̧, ja̧'wa̧ta̧nü̧ ukutumä̧, u̧mä̧tü̧'i̧nä̧, nä̧tü̧'i̧nä̧ chi̧tti̧mü̧ kuäkuotüjä̧. Tu̧ru̧wa̧ o'kajuiyünä̧ ju̧ru̧wa̧mä̧ ja̧'wa̧nü̧tä̧ pä'ü.