2 Corintios 5 - Nuevo Testamento Uwotjüja

¡Dio ojusodenä̧ tü̧ja̧ pä'ätüjä̧!

¹ Isopäi'ünä̧ tojusode pi̧jä̧ isode, pode tabenákuro pättodemä̧, ya'ute mo̧ro̧ toe'ächäkuode pä'ü wo̧juä̧tü̧jä̧. Ja̧'wa̧nü̧ ja̧'a̧nä̧, mo̧ro̧jä̧nä̧mä̧ kku̧nä̧rä̧tü̧jä̧ tojusode beipokode, Dio adikuode, pi̧jä̧ ttü̧ja̧mä̧ adikuokode.

² Ja̧'wa̧nü̧ ja̧'a̧ttü̧ ajuäkuäwätüjä̧, mo̧ro̧jä̧ jäwä tü̧'ka̧tä̧wi̧'a̧ pä'ü.

³ Ja̧'wa̧nü̧ ja̧'a̧ttü̧, pi̧ta̧ tü̧'ka̧tä̧wä̧ta̧mä̧ jȩä̧cha̧'a̧nä̧'i̧nä̧, jui'ätümä̧ tü̧jo̧kui̧'o̧kä̧kuo̧tü̧jä̧.

⁴ Ja̧'wa̧nü̧ jo̧mȩttü̧, pode tabenákuro isodenä̧ kka̧kuä̧tü̧mä̧ ajuäkuäwätüjä̧, tü̧'ka̧tä̧wä̧ta̧ jui'ätü tü̧ja̧kui̧'a̧jü̧ jueimä̧, pärokuä tü̧'ka̧tä̧wi̧'a̧ pä'ü; wa'arerü kkä̧kuä̧wä̧ kkȩdü̧ ikuomȩbü päi'ünä̧.

⁵ Ja̧'wa̧ta̧nü̧ pi̧yȩ pätetü jȩpi̧nü̧mä̧ Dio-tä ja̧'a̧, Epíritu Sa̧tu̧rü̧ iyinä̧u̧jä̧ jueünä̧ ukuokua'attü.

⁶ Ja̧'wa̧nü̧ ja̧'a̧ttü̧, 'kuäopünä̧tä̧ eseäkuäwünü̧ kka̧kuä̧tü̧jä̧ ja̧'wa̧ta̧nü̧ tidepänä̧ tü̧jä̧i̧mä̧ Tu̧ru̧wa̧ttü̧mä̧ otó wotüjä̧ pä'ü wo̧juä̧tü̧jä̧.

⁷ Jua'amä̧ ti'ärenä̧ topü ti̧'cho̧ka̧'a̧, tta̧'kua̧ wȩnä̧rä̧kuä̧wä̧nä̧tä̧ ti̧'cha̧'a̧ttü̧;

⁸ Ja̧'wa̧nü̧ ja̧'a̧ttü̧, teseäkuäwätukua pi̧yȩ tidepä ikuipü; pärokuänä̧ Tu̧ru̧wa̧ku̧tä̧ tü̧ja̧kua̧ päta'attü̧.

⁹ Ja̧'wa̧nü̧ ja̧'a̧ttü̧, tidepänä̧ tü̧ja̧kua̧ pä'ü'i̧nä̧; tidepä jo̧kü̧nä̧ tü̧ja̧kua̧ pä'ü'i̧nä̧, Tu̧ru̧wa̧ eseunä̧ tü̧ja̧ pä'ätüjä̧.

¹⁰ Isopäi'ünä̧ o'katoi'ünä̧tä̧ ujutumä̧ Crito ä'ka jo̧mȩ (tribunal) pättomȩ ti̧'chi̧'ä̧kuo̧tü̧jä̧; pi̧jä̧ttü̧ ttidepänä̧ ttü̧jä̧i̧ adiunä̧ jȩti̧na̧ja̧ pä'ü'i̧nä̧, surojü jȩti̧na̧ja̧ pä'ü'i̧nä̧, jua̧u̧ mikuä tȩma̧ pä'ü iyomȩ.

¡Dio awaruwä jü̧nä̧ kkä̧kuä̧wä̧!

¹¹ Ja̧'wa̧nü̧ ji̧yä̧u̧, Tu̧ru̧wa̧rü̧ yekuäkuäwä tu̧wo̧jua̧'a̧ttü̧, ttü̧ja̧rü̧ ji'äwätüjä̧ ttesetünä̧; jua'amä̧ Dio ä'kattümä̧ o'kajuiyütä u̧wo̧juä̧u̧tä̧ ta'attü̧, ukutu'i̧nä̧ wäjuönä̧ ku̧wo̧juä̧tu̧kua̧tü̧ pä'ü.

¹² Pä'äjita'anü̧ ujutu ta̧mü̧nä̧ pa̧ja̧tü̧ adiu kuesewätukuatü pä'ümä̧ pätoka'anä̧, jueünä̧ amükuädütä kuesewätukuatü pä'ätüjä̧. Ja̧'wa̧nü̧ kuädätätukuomȩnä̧ päwächa'a tta̧mi̧ iso'kittümä̧ otó tta'anä̧, ukuo te'äkuäwätürü.

¹³ Isopäi'ünä̧ ttu̧'ȩpä̧ro̧ko̧tü̧ 'kua̧rü̧nä̧ jȩtü̧ttü̧mä̧ Dio-rü ukuotü jȩpä̧tü̧jä̧; ja̧'wa̧nü̧ ja̧'a̧nä̧ ttu̧'ȩpä̧rü̧ jȩtü̧ttü̧mä̧ ukuturu ppä'ädü jȩpä̧tü̧jä̧.

¹⁴ Isopäi'ünä̧ Crito eseu repeümä̧, rü̧ȩnä̧ ujuturu 'chu̧ä̧ra̧'a̧, pi̧yȩ tamükuädomȩnä̧: Ujuturu ja̧'a̧tȩ'ü̧mä̧ ya̧tȩtä̧ 'korujuoächina̧'a̧nä̧, jua̧u̧nü̧ o'ka'amä̧ ujutu o'katoi'ünä̧ 'korujuo'ächinä̧tü̧jä̧;

¹⁵ Ja̧'wa̧nü̧ ja̧'a̧ttü̧ Crito-mä̧ o'katoi'ünä̧rü̧ ja̧'a̧tȩ'ü̧ 'korujuo'ächinü̧; a̧'kua̧rä̧tü̧mä̧, jitürütä pä̧wä̧rü̧jo̧mȩnä̧ ttü̧ja̧ku̧ juiya pä'ü, Churutä pä̧wä̧rü̧jo̧mȩnä̧ ttü̧ja̧kua̧ pä'ü.

¹⁶ Ja̧'wa̧nü̧ ja̧'a̧ttü̧, porü yabokumä̧ ttü̧ja̧rü̧mä̧ ya̧tȩrü̧'i̧nä̧ pi̧jä̧ ttü̧ja̧ tta̧mü̧kuäda'akumä̧ amükuädokotüjä̧; ja̧'wa̧ta̧nü̧ Crito-rü'i̧nä̧ pi̧jä̧ ttü̧ja̧ ttu̧wo̧juö̧'a̧nü̧mä̧ wo̧juo̧ko̧tü̧jä̧.

¹⁷ Ja̧'wa̧nü̧ ja̧'a̧ttü̧, ya̧tȩ Crito-nä̧ ü̧jü̧ttü̧mä̧, jareünä̧ uwäbe'äkuäwa̧ ja̧'a̧. Täbo jäwä ji̧nü̧mä̧ 'kuäopina̧'a̧; o'kajuiyünä̧tä̧ jareünä̧ pärotü ikuäwätä ja̧'a̧.

¹⁸ Jua̧u̧mä̧ o'kajuiyünä̧ Dio-ttü ichütä ja̧'a̧; Chutä a̧mü̧nä̧ pa̧ja̧tü̧ esekuinä̧u̧jä̧ Crito-nä̧tä̧ ja̧'wa̧nü̧ jȩpü̧ ujuturu iyinä̧u̧jä̧ eseku ikuäwä wȩnȩ tadita pä'ü;

¹⁹ Dio-mä̧, Crito-nä̧tä̧ a̧mü̧nä̧ pa̧ja̧tü̧ pi̧jä̧ ttü̧ja̧rü̧ esekuinü̧, suronä̧ jȩttä̧'i̧jü̧mä̧ toäkuäwä juiyünä̧, ujuturumä̧ eseku ikuäwä wȩnȩ jitäwiyarü pä'ü we'inü̧.

²⁰ Ja̧'wa̧nü̧ ji̧na̧'a̧ttü̧, ujutumä̧ Crito i̧mi̧nä̧ jitäwiyarü pä'ü weinä̧u̧jä̧, Dio-mä̧ jitäu kuä̧ju̧kui̧yä̧tu̧kua̧rü̧ pä'ü. Ja̧'wa̧nü̧ ja̧'a̧ttü̧ Crito i̧mi̧nä̧ jä̧tȩpä̧u̧jä̧: Dio-ku eseku kuikuätukua pä'ü.

²¹ Surojü jȩpo̧kü̧ pinü̧rü̧mä̧, ujutu jäwänä̧; surojü jȩpä̧tü̧ 'kua̧rü̧nä̧ jȩi̧nä̧ku̧; jua'amä̧ Dio adiwomȩnä̧ jȩü̧mä̧, Crito-nä̧tä̧ adiwä isotü päti'a pä'ü.