2 Corintios 4 - Nuevo Testamento Uwotjüja

Jesucrito jäwä ji'äwätü

¹ Ja̧'wa̧nü̧ ja̧'a̧ttü̧, pi̧yȩ taditäwämä̧ Dio rȩrü̧jü̧ topü iyinä̧u̧ ta'attü̧ 'kuä'ächi'okotüjä̧.

² Ja̧'wa̧nü̧ jä̧u̧, da̧ja̧wä̧rä̧kuä̧wä̧mä̧, dä'ä ttuwä'chäkuäwämä̧ jui'ätüjä̧; yaparewä'chü'i̧nä̧ jȩto̧ka̧'a̧, Dio i̧wȩnȩ'i̧nä̧ pärotokotüjä̧. Pärokua'aku, Dio-mä̧ wo̧jua̧ jueünä̧ tukuokua'amä̧. Ja̧'wa̧nü̧ jo̧mȩnä̧ o'katoi'ünä̧ ujuturu tta̧'kua̧ ttu̧wȩnä̧rü̧nä̧ ja̧'a̧.

³ Ja̧'wa̧nü̧ ja̧'a̧nä̧, jareü wȩnȩ jitäu wo̧jui̧'o̧ko̧tü̧mä̧, surojüttü kka̧kui̧po̧ko̧tü̧tä̧ ja̧'a̧,

⁴ Ja̧'wa̧nü̧ ja̧'a̧ttü̧, esetokotürümä̧, pi̧jä̧nä̧ttü̧ ttü̧ä̧nä̧wa̧mä̧ ttu̧wo̧juö̧ juiyünä̧ ä̧to̧dü̧ ikuinä̧u̧, jareü wȩnȩ i̧tȩya̧u̧ Crito üadiwä kkä̧dȩpü̧ juiyatü pä'ü, jua̧u̧mä̧ Dio a̧'kua̧juä̧ ja̧'a̧ttü̧.

⁵ Ujututä ta̧mü̧nä̧ pa̧ja̧tü̧mä̧ ji'äwokotüjä̧, ji̧nä̧somä̧ Jesucrito-mä̧, Tu̧ru̧wa̧ ja̧'a̧ pä'ü ji'äu kkä̧nü̧, ukutumä̧ ku̧wo̧juȩtä̧u̧jä̧ pä'ätüjä̧, Crito-rü eseu repeta'attü̧.

⁶ Isopäi'ünä̧ Chutä Dio-tä, yo̧mȩttü̧ tȩya̧u̧ kkä̧dȩpa̧ pä'ü jȩpi̧nü̧tä̧ ja̧'a̧, tta̧mi̧'iso'kinä̧ tȩya̧u̧ kkä̧dȩpa̧ pä'ü'i̧nä̧ jȩpi̧nü̧mä̧, jua'amä̧ Jesucrito-nä̧tä̧, Chutä Dio ü̧rü̧ä̧ tu̧wo̧jui̧ya̧rü̧ pä'ü.

Usurä ttȩmä̧wa̧'a̧nä̧ tta̧'kua̧ wȩnä̧rä̧kuä̧wä̧ wȩnȩ

⁷ Ujutumä̧, pi̧yȩ rü̧ȩnä̧ mikuäumä̧ kku̧nä̧rä̧tü̧jä̧ reda'kattü adikuä o̧'ta̧nä̧; jua'amä̧ adiwä juei ujurumä̧, ujututtümä̧ ichokü, Dio-ttütä ichü pä'ü tu̧wo̧jua̧ pä'ü.

⁸ Ja̧'wa̧nü̧ ja̧'a̧ttü̧, o'kajuiyünä̧tä̧ usurä tȩmä̧wa̧'a̧nä̧, kkȩdü̧mä̧ ikuoko̧u̧jä̧; jurunä̧ jȩta̧'a̧nä̧, ta̧'kua̧ ro'eku usurä ȩmä̧wo̧ko̧tü̧jä̧.

⁹ Suronä̧ jȩtta̧tü̧ pä'ü ttusa'anä̧, Dio-mä̧ tta̧wä̧rä̧u̧jä̧. Tijuiyuwächi'ünä̧ jȩtta̧'a̧nä̧, si'epümä̧ tti̧kuo̧ko̧u̧jä̧.

¹⁰ Ti̧'cho̧mȩ pünä̧mä̧, 'kuäopünä̧tä̧ Jesú 'korujuo'ächü usurä ȩmä̧wi̧nü̧ta'anü̧, usurä ȩmä̧wä̧tü̧jä̧ ja̧'wa̧nü̧ ja̧'a̧ttü̧, Jesú-ru tukuotomȩnä̧, wa'are tü'küdä̧u̧jä̧. Jua'amä̧ ujutunä̧'i̧nä̧ Jesú a̧'kua̧rü̧ i̧jȩkuä̧cha̧ pä'ü.

¹¹ Ja̧'wa̧nü̧ ja̧'a̧ttü̧, ujutumä̧ ta̧'kua̧ra̧'a̧nä̧, Jesú jäwänä̧ wa'areku iyäwotüjä̧; jua'amä̧, Jesú a̧'kua̧rü̧ jäwä wa'ü ikuätü tidepänä̧ i̧jȩkuä̧cha̧ pä'ü.

¹² Ja̧'wa̧nü̧ ja̧'a̧ttü̧, ujutunä̧mä̧ wa'are adita'anä̧, ukutunä̧mä̧ a̧'kua̧rä̧kuä̧wä̧nä̧ adita'a.

¹³ Ja̧'wa̧nü̧ ja̧'a̧ttü̧ wȩyu̧kuä̧ wȩnȩmä̧ pä'a: «Ttümä̧ Dio-rü esetinü̧ cha'attü ukuokusä,» ujutu'i̧nä̧ Dio-rü esetinä̧tü̧ ta'attü̧, ji'äwätüjä̧,

¹⁴ ja̧'wa̧ta̧nü̧ Tu̧ru̧wa̧ Jesú-ru tto'ädinü̧mä̧, ujuturu'i̧nä̧ Jesú-ku ttoädäkuä̧u̧jä̧ pä'ü wo̧juö̧ kkä̧nü̧, ukututäku yo̧mȩtȩnä̧ i̧jȩpä̧kuä̧u̧jä̧ pä'ü'i̧nä̧ wo̧juä̧tü̧jä̧.

¹⁵ Pi̧yȩmä̧ o'kajuiyünä̧ 'kuä'opätüjä̧ ukutu adiwä juei kuȩmä̧tu̧kua̧ pä'ü. Isopäi'ünä̧ rekuätü Dio rȩrü̧jü̧ topü eseu ttȩmü̧ttü̧mä̧, rekuätü jä̧kua̧'a̧ Dio ü̧rü̧ä̧ eseäkuäwätümä̧.

¹⁶ Ja̧'wa̧nü̧ ja̧'a̧ttü̧, juiyupächi'okotüjä̧. Wä̧mȩnä̧ tidepämä̧ 'kuo̧pa̧ja̧'a̧nä̧ surojuoächa'anä̧, jakuänä̧ ta̧'kua̧rü̧mä̧ mo̧ro̧ji̧nü̧'a̧kuä̧ jareünä̧tä̧ juoächa'a.

¹⁷ Isopäi'ünä̧ pi̧yȩ pi̧jä̧nä̧ttü̧ jurunä̧tä̧ usurä tȩmä̧u̧mä̧, jua̧u̧ttü̧tä̧ Dio-mä̧ i̧yä̧kuä̧u̧jä̧ beipokü adiwä jueimä̧;

¹⁸ ujutumä̧ ti'ärenä̧ totütä tottajü jueimä̧, ti'ärenä̧ tottokü jueitä tota pä'ü ja̧'a̧; isopäi'ünä̧ ti'ärenä̧ totümä̧ 'kuäopächü jäwä ja̧'a̧ ja̧'wa̧nü̧ ja̧'a̧nä̧ ti'ärenä̧ totokü jäwämä̧, beipokü jäwä ja̧'a̧.