2 Corintios 3 - Nuevo Testamento Uwotjüja

Jareünä̧ Dio-ku Kkä̧kuä̧wä̧ wȩnȩ

¹ ¿Pi̧yȩ pätomȩnä̧mä̧, pä'äjita'anü̧ ujuturu, kueseäkuätukuatü pä'ü päta'a tä̧jí̧? ¿ja̧'wa̧nü̧ jo̧ka̧'a̧ jü̧ttü̧'i̧nä̧, kkorotü jȩttä̧'i̧jü̧'a̧nü̧, adiu jȩtä̧'i̧jü̧ kui̧wȩnȩtu̧ku̧ wȩyu̧tu̧ kuiyätukuatü päta'a tä̧jí̧, kkorotü jȩttä̧'i̧jü̧ a̧nü̧?

² Ukututäjä̧ ujutu ti̧wȩnȩ ti̧wȩyu̧ti̧nä̧u̧ wotümä̧, kua̧mi̧'iso'kitukunä̧ wȩyu̧kuo̧tü̧mä̧, o'katoi'ünä̧ ttü̧ja̧mä̧ ukuturu topü, ukuoku ttu̧wo̧juö̧nä̧;

³ Isopäi'ünä̧tä̧ ukutumä̧ Crito i̧wȩyu̧ti̧ä̧u̧jä̧u̧jä̧ wȩyu̧kuojänä̧mä̧kü̧, isoyanä̧mä̧kü̧ ji̧nä̧somä̧ Dio a̧'kua̧rü̧ i̧sa̧ Epíritu-nä̧tä̧ wȩyu̧kui̧'i̧nä̧u̧jä̧; i̧nä̧binä̧'i̧nä̧ wȩyu̧kuo̧ko̧tü̧ pinä̧tü̧jä̧, ji̧nä̧somä̧ kuidepätuku, kua̧mi̧ iso'kitukunä̧ i̧wȩyu̧ti̧nä̧u̧jä̧.

⁴ Pi̧yȩ tü'kümä̧, Crito-nä̧tä̧ ta̧'kua̧ wȩnä̧rä̧tü̧jä̧, Dio ä'kattümä̧.

⁵ Ujututä ta̧mü̧nä̧ pa̧ja̧tü̧, jȩtü̧'a̧nü̧ jü̧mä̧ jui'ätüjä̧; ujutu jȩtü̧mä̧, jȩtü̧nä̧ Dio iyomȩttü̧tä̧ jȩpä̧tü̧jä̧.

⁶ Ja̧'wa̧ta̧nü̧ Jua̧u̧tä̧tä̧ ji̧na̧'a̧, jareünä̧ eseku wȩnȩ taditiyarü pä'ü jo̧mȩnü̧ tünä̧ wo̧juȩti̧nü̧mä̧ jua'a'i̧nä̧ weäwä wȩnȩnä̧mä̧kü̧, Epíritu-nä̧tä̧; isopäi'ünä̧ weäwä wȩnȩmä̧ totte'ächünä̧tä̧ ji̧nü̧ ja̧'wa̧nü̧ ja̧'a̧nä̧ Epíritu jäwämä̧ tta̧'kua̧rü̧ iyü jäwä ja̧'a̧.

⁷ Weäwä wȩnȩmä̧ ji̧yȩnä̧tä̧ wa'are aditäkuȩ'i̧nä̧, i̧nä̧binä̧ wȩyu̧kua̧'a̧ ichina̧'a̧, rü̧ȩnä̧ Dio ujuru, Irae i̧tti̧mü̧mä̧ Moisé ü'änä̧ tottü juiyünä̧tä̧ ji̧na̧'a̧, Dio ujuru kko̧mȩttü̧, jua'akumä̧ to̧ȩ'ä̧chä̧kuȩ ja̧'a̧nä̧,

⁸ ¡Juȩnȩ abonä̧nü̧ i̧tȩya̧u̧ i̧jȩkuä̧kua̧'a̧, Epíritu aditäwämä̧!

⁹ Isopäi'ünä̧ totte'ächä̧kuȩ wȩnȩ'i̧nä̧ tȩya̧u̧nä̧ ji̧na̧'a̧mä̧, juȩnȩ abonä̧nü̧ tȩya̧wä̧kua̧'a̧ suropätürü aditü iku wȩnȩmä̧.

¹⁰ Isopäi'ünä̧ jitä jäwä tȩya̧u̧mä̧, mo̧ kki̧nü̧ tȩya̧wi̧nü̧ weäwä wȩnȩ ji̧nü̧ttü̧'i̧nä̧ u̧wä̧mȩ ja̧'a̧.

¹¹ Isopäi'ünä̧, ji̧yȩ weäwä 'kuäopä̧chä̧kuȩ'i̧nä̧, tȩya̧wi̧na̧'a̧mä̧ ¡Juȩnȩ abonä̧nü̧ tȩya̧wä̧kua̧'a̧, 'kuäopünä̧tä̧ beipokü jäwämä̧!

¹² Ja̧'wa̧nü̧ tta̧'ä̧rü̧ tü̧ja̧kua̧'a̧ttü̧, o'kajuiyünä̧tä̧ wäjuönä̧ ukuokuätüjä̧;

¹³ ja̧'wa̧ta̧nü̧ Moisé jȩi̧nü̧'anü̧mä̧ jȩpo̧ko̧tü̧jä̧, Irae ttü̧ja̧ i'ä tȩya̧u̧ na̧wi̧pä̧cha̧'a̧ tottü juiyarü pä'ü, i̧sä̧ta̧ttü̧ tto'ekuinü̧'anü̧mä̧.

¹⁴ Ja̧'wa̧nü̧ juätümä̧ pi̧yȩ tü'kümä̧ yorisotä wo̧jui̧'o̧ko̧tü̧ pinä̧tü̧; ja̧'wa̧nü̧ ja̧'a̧ttü̧, jitä pi̧yȩ mo̧ro̧bü päi'ünä̧, Moisé i̧wȩyu̧ti̧nü̧mä̧ wo̧jui̧'o̧ko̧tü̧, juä̧ta̧tä̧ mü̧ȩkuä̧ra̧'a̧ jä̧'i̧nü̧'a̧nü̧ ja̧'a̧ttü̧. Suro, ya̧tȩtä̧ ja̧'a̧ Crito-tä ttu̧wo̧jui̧pü̧nä̧ ba'epümä̧.

¹⁵ Ja̧'wa̧nü̧tä̧tä̧, jitä mo̧ro̧bü päi'ünä̧, Moisé i̧wȩyu̧ti̧nü̧ ttukuokuomȩnä̧mä̧, tta̧mi̧'iso'kimä̧ mü̧ȩkuä̧ra̧'a̧, juä̧ta̧ i̧sä̧ta̧mä̧.

¹⁶ Ja̧'wa̧nü̧ ja̧'a̧nä̧, Tu̧ru̧wa̧ku̧ ppa̧ttä̧cho̧mȩnä̧mä̧, juä̧ta̧ i̧sä̧ta̧ jȩä̧chi̧'ä̧u̧.

¹⁷ Jua'amä̧, Tu̧ru̧wa̧mä̧ Epíritu jü̧nä̧tä̧ wa̧ ja̧'a̧ttü̧; isopäi'ünä̧ Tu̧ru̧wa̧ i̧sa̧ Epíritu ü̧jo̧mȩmä̧, wȩnȩ juiyünä̧ kkä̧kuä̧wä̧ kka̧'a̧.

¹⁸ Ja̧'wa̧nü̧ ja̧'a̧ttü̧, ujutumä̧ täkü o'katoi'ünä̧, ti'änä̧mä̧ i̧sä̧ta̧ tto̧ȩpä̧rä̧ta̧ juita'attü, tti'ä toäkuäwodä 'kua̧rü̧nä̧ kkȩdȩpä̧u̧jä̧ Tu̧ru̧wa̧ i̧tȩya̧u̧mä̧, ja̧'wa̧nü̧ jo̧mȩnä̧ yabonü̧ pärowächätüjä̧, surojü abo 'kuä'opätüjä̧, Tu̧ru̧wa̧ a̧'kua̧juä̧nä̧mä̧, Tu̧ru̧wa̧ i̧sa̧ Epíritu aditäwänä̧mä̧.