2 Corintios 2 - Nuevo Testamento Uwotjüja

¹ Ja̧'wa̧nü̧ ji̧yä̧ku̧, kua̧'kua̧ tta̧kuȩkuä̧tu̧kuä̧ pä'ü, amükuädäji̧'ka̧ ukuturumä̧ ya'utekutä do'ächü ichokü pinü̧sä̧.

² Isopäi'ünä̧ ukuturu kua̧'kua̧ tta̧kuȩkuä̧tu̧ku̧nä̧ jȩchü̧ttü̧mä̧, ¿dí jä̧kua̧'a̧jä̧ttü̧, ttürü cheseunä̧ jȩä̧kua̧mä̧?, ttü tochomȩnä̧ ukututä ja̧'a̧.

³ Wo̧jui̧nü̧sä̧ ttü cheseuta'anü̧ ukutu o'katoi'ünä̧ kuesewätukua'amä̧. Ja̧'wa̧nü̧ ja̧'a̧ttü̧, tteseäkuäwajü jueimä̧, kua̧'kua̧ tta̧kuȩkuä̧tu̧kua̧ pä'okü pinü̧sä̧ ja̧'wa̧nü̧ ji̧yä̧ku̧ wȩyu̧tu̧tä̧ wedinä̧u̧jä̧, topü chichoka'atä

⁴ Jua̧u̧ wȩyu̧tu̧ kkä̧nü̧mä̧, cha̧'kua̧ tta̧'ȩkui̧nü̧sä̧, chajuäunä̧tä̧ päi'ünä̧. Ukutu kua̧'kua̧ tta̧kuȩkuä̧tu̧kua̧mä̧ pä'okü pinü̧sä̧; suro, ukuturu rü̧ȩnä̧ eseu repedütä ku̧wo̧juä̧tu̧kua̧ pä'inü̧sä̧.

Suronä̧ jȩpü̧rü̧ mikuä jȩä̧kuä̧wo̧kü̧ wȩnȩ

⁵ Ja̧'wa̧nü̧ ja̧'a̧nä̧, ya̧tȩ ttürü cha̧'kua̧ tta̧dȩku̧nä̧ jȩpi̧nü̧rü̧mä̧, ttürütämä̧ cha̧'kua̧ tta̧dȩku̧nä̧mä̧ jȩpo̧kü̧ pinü̧, ukuturu'i̧nä̧ o'katoi'ünä̧rü̧ (abo 'kuä'o'ümä̧ pädoka'anä̧) kua̧'kua̧ tta̧kuȩkuä̧tu̧ku̧nä̧ jȩpi̧nü̧.

⁶ Ukutu, jua̧u̧ru̧ ro̧kuȩpi̧nä̧tu̧ku̧mä̧, täkü adiwa'a, yabonü̧mä̧ jȩ'kuä̧tu̧kuä̧rü̧.

⁷ Ja̧'wa̧nü̧ ja̧'a̧ttü̧, eseku ikutä ppä'ädätukuirü, jua'a yabo a̧'kua̧ tta̧'ȩku̧ surojuoeku juiyäkua'anü̧.

⁸ Ja̧'wa̧nü̧ ji̧yä̧ku̧, jua̧u̧ru̧ repe'ü kuesewätuku kui̧jȩpä̧tu̧kua̧rü̧ pä'üsä.

⁹ Täkü pi̧yȩ tü'kümä̧, wȩyu̧tu̧ wedinä̧u̧jä̧, isopäi'ünä̧ wedümä̧ o'kajuiyünä̧ jȩ'kuä̧tu̧ku̧'a̧nü̧ ja̧ pä'ü.

¹⁰ Ja̧'wa̧nü̧ ja̧'a̧ttü̧, ukutu'i̧nä̧ eseku kuikuätukuäkurumä̧, ttü'i̧nä̧ chesekuäku. Ttümä̧ chesekuinä̧ku̧, ukutu jäwänä̧, Crito ä'ka jo̧mȩttü̧mä̧.

¹¹ Ja̧'wa̧nü̧ jȩ'kuä̧tu̧ku̧ttü̧mä̧, Satanás-mä̧ kkȩdü̧ ikuoko̧u̧ kuäkuotüjä̧. ¡Täkü wo̧juä̧tü̧jä̧ jua̧u̧ suronä̧ jȩa̧ pä'ü amükuädümä̧!

¹² Ja̧'wa̧nü̧ ja̧'a̧ Tróade ütawiyättümä̧, jareü wȩnȩ Crito i̧wȩnȩ jidäwa pä'ü bawekuächäja'anä̧,

¹³ chesewuö juiyünä̧ ji̧nä̧ku̧sä̧, cha̧wa̧ru̧wa̧ chi̧jä̧wa̧ Tito-rü chu̧'o̧kui̧'o̧ko̧mȩnä̧. Ja̧'wa̧nü̧ jä̧ku̧, juätürü te'äwi'ipütä Macedonia rȩjȩra̧'a̧ku̧ 'chi̧nü̧sä̧.

Pauru Dio-rü esewinü̧ wȩnȩ

¹⁴ Ja̧'wa̧nü̧ ja̧'a̧ttü̧, Dio-rü eseusä, Crito-nä̧tä̧ surojü kkȩdü̧ tikunä̧ 'kuäopünä̧tä̧ ppäda'attü ja̧'wa̧ta̧nü̧ ujutunä̧tä̧ ttü̧jo̧mȩ pünä̧ o'kajuiyünä̧ i̧wȩnȩ jitäwomȩmä̧ a̧mȩu̧ jä̧'i̧nü̧'a̧nü̧ yoäwi'ünä̧ ppäda'attü.

¹⁵ Isopäi'ünä̧ ujutumä̧ Dio-rümä̧, Crito-nä̧mä̧; Chutä Cristo iäre nü̧ a̧mȩu̧ 'kua̧rü̧nä̧ wotüjä̧ surojüttü kki̧'ä̧tü̧rü̧'i̧nä̧ ja̧'wa̧ta̧nü̧ surojü ra̧wä̧pi̧jü̧nä̧ to'e'ächätüttü'i̧nä̧, jü̧nä̧.

¹⁶ To'e'ächätürümä̧, jua̧u̧ adiu a̧mȩu̧mä̧, wa'ü ttikua pä'ütä ja̧'a̧ ja̧'wa̧nü̧ ja̧'a̧nä̧ ra̧wä̧pi̧jü̧ttü̧ kka̧kui̧pä̧tü̧rü̧mä̧ jua̧u̧ adiu a̧mȩu̧mä̧ a̧'kua̧rä̧kuä̧wä̧tä̧ iya'a. ¿Ja̧'wa̧nü̧ ja̧'a̧mä̧, ditä ja̧'a̧jä̧ttü̧ pi̧yȩ ȩmü̧'a̧nü̧ wa̧mä̧?

¹⁷ Ujutumä̧ rekuätü jȩttü̧'a̧nü̧mä̧, Dio i̧wȩnȩnä̧mä̧ mikuä pä'ä'chümä̧ aditokotüjä̧, jueünä̧tä̧, Dio weina̧'a̧ku̧tä̧, Dio ä'kattümä̧ Crito-nä̧ ji'äwätüjä̧.