2 Corintios 13 - Nuevo Testamento Uwotjüja

Rüjí jiäwinü̧ wȩnȩ

¹ Ukuturu do'ächü chicha'amä̧, pi̧yȩku̧mä̧ wäbodäkuänä̧ päi'äkua'a. O'kajuiyünä̧tä̧ ya̧tȩ suronä̧ jȩü̧ pätta pä'ümä̧, ta̧ju̧ jo̧mȩnä̧, wä̧mȩtukuä jo̧mȩnä̧ tottäja'a pättomȩnä̧tä̧ jȩä̧kuä̧wä̧kua̧'a̧.

² Todäre päi'ünä̧ chi̧wä̧chi̧nü̧mä̧ ji'äwinü̧sä̧, surojü jȩpä̧tü̧rü̧mä̧ pä̧i̧ku̧nä̧ pä̧dä̧kua̧sä̧ pä'ü ja̧'wa̧ta̧nü̧ jua̧u̧nü̧ o'ka'a surojü jȩpä̧tü̧rü̧'i̧nä̧, jü̧nä̧. Jitä otó chü̧ja̧'a̧nä̧'i̧nä̧ pä'äjita'anü̧ ja̧'wa̧nü̧tä̧ pä'üsä.

³ Ja̧'wa̧nü̧ jo̧mȩnä̧ ku̧wo̧juä̧kuo̧tü̧jä̧, Crito ttünä̧ ukuokua'amä̧. Ja̧'wa̧nü̧ ja̧'a̧ttü̧ Crito-mä̧ ukuturumä̧ 'kuäunä̧mä̧ jȩpo̧kü̧, ujurutä i̧jȩpä̧kua̧ ukuturumä̧.

⁴ Isopäi'ünä̧ juiyu̧pa̧ 'kua̧rü̧nä̧ ü̧jo̧kä̧nü̧ jäinä̧ 'korujuo'ächina̧'a̧nä̧, Dio ujurunä̧ kkü̧ jitämä̧. Ja̧'wa̧nü̧ ji̧nü̧ta'anü̧ ujutu'i̧nä̧ ijuiyüwinü̧nä̧ tü̧ja̧kua̧'a̧nä̧, chunä̧tä̧ tü̧ja̧ku̧ttü̧mä̧, Dio ujurunä̧ tü̧ja̧kuä̧kuo̧tü̧jä̧.

⁵ Isopäi'ünä̧ tta̧'kua̧ wȩnä̧rä̧kuä̧wä̧nä̧ ku̧jä̧tu̧kua̧ja̧ pä'ü, kua̧mü̧nä̧tä̧ topäkuäwätukui; ukututä kka̧kuä̧mä̧kuä̧u̧ topäkuäwätukui. ¿Jesucrito ukutunä̧ ü̧ja̧'a̧mä̧ kuieruwätukua'a tä̧jí̧? ¡ja̧'wa̧nü̧ jo̧ka̧'a̧ jü̧ttü̧mä̧ Crito-mä̧ ukutunä̧mä̧ kko̧kü̧!

⁶ Ja̧'wa̧nü̧ ja̧'a̧ttü̧, ujutumä̧ pä̧wä̧rü̧jä̧u̧jä̧ kka̧kuä̧mü̧ toäkuäwämä̧ 'kuä'opinä̧tü̧ päkuätukuatü pä'ü.

⁷ Dio-rütä ukuokuätüjä̧, surojü jȩ'kuä̧tu̧ku̧ juiya pä'ü; jua'amä̧ kka̧kuä̧mü̧ toäkuäwättümä̧ 'kuä'opinä̧tü̧jä̧ päkuätukuatü pä'ümä̧kü̧, adiwä jueitä jȩ'kuä̧tu̧kua̧ pä'ü, ujutu kka̧kuä̧mü̧ toäkuäwä 'kuä'opokotü jä̧'i̧nü̧'a̧nü̧ jȩta̧ja̧ pä'ü'i̧nä̧.

⁸ Isopäi'ünä̧ jȩä̧kuä̧wä̧ juiya'a jueü wȩnȩ to'ija̧'a̧ku̧ jȩta̧ pä'ümä̧, pärokua'aku jueü wȩnȩnä̧ tukuokua pä'ütä ja̧'a̧.

⁹ Ja̧'wa̧nü̧ ja̧'a̧ttü̧, ujutu tijuiyuwomȩnä̧mä̧ esewätüjä̧, pärokua'aku ukutu kujuruwätukua'anä̧; ja̧'wa̧ta̧nü̧ yabokutä Dio-rü ukuokuätüjä̧ Crito-rü ukuotü juekuekuächätukunä̧.

¹⁰ Ja̧'wa̧nü̧ ja̧'a̧ttü̧ wȩyu̧tu̧tä̧ wȩdä̧u̧jä̧ jua'a chichäkua'a ä'kanä̧; jua'a chichomȩnä̧ Chu̧ru̧wa̧ weinü̧'a̧kuä̧ pä̧i̧ku̧nä̧ pädü juiyäkua'anü̧, jua'amä̧ kuä̧rä̧mä̧tu̧kua̧ pä'ü, surojuodepätukuaku pä'ümä̧kü̧.

Rüjí teäwinü̧

¹¹ Täkü kkoromä̧ juiya'a, chawaruwä chi̧jä̧wa̧tü̧, eseäkuäwuötä, jue'ekuächünü̧tä̧, ro̧'ȩku̧tä̧, ji̧nä̧ ji̧yȩtȩnä̧tä̧, wȩnȩ juiyünä̧tä̧ kka̧kuä̧tu̧kui̧; wȩnȩ jui̧'a̧, eseäkuäwä kkä̧ku̧ Dio-tä ü̧jä̧kua̧ ukutunä̧mä̧.

¹² Yotukunä̧ te'äkuäwätukui, ttawaruwä ti̧jä̧wa̧tü̧ jü̧nä̧ 'chu̧'o̧ku̧ eseu.

¹³ O'katoi'ünä̧ igresia wotümä̧ tettäwä̧u̧jä̧.

¹⁴ Tu̧ru̧wa̧ re ü̧ji̧nü̧mä̧, Dio eseu repeümä̧ ja̧'wa̧ta̧nü̧ Epíritu Sa̧tu̧mä̧ ukutunä̧ ü̧jü̧mä̧ o'katoi'ünä̧ kkä̧tu̧kua̧ku̧ pä'üsä.