2 Corintios 12 - Nuevo Testamento Uwotjüja

Visiones pättünä̧ Pauru-rü i̧jȩkui̧nü̧ wȩnȩ

¹ Isopäi'ünä̧ cha̧mü̧nä̧ pa̧ja̧tü̧ cheseäkuäwuöttümä̧ mikuäwokü ja̧'a̧nä̧; visiones pättünä̧ i̧jȩkua̧'a̧ tochünä̧ Chu̧ru̧wa̧ u̧wo̧juȩti̧nü̧tä̧ ukuokusä.

² Ya̧tȩ Crito-rü esetürü wo̧jua̧sä̧, täkü catoce años jo̧mȩnä̧ ja̧'a̧ (a̧'kua̧ra̧'a̧nä̧ ji̧na̧'a̧ kkü̧, a̧'kua̧ru̧wa̧nä̧tä̧ ji̧na̧'a̧kü̧; jȩru̧pa̧sä̧ jua'amä̧ Dio-tä wo̧jua̧) mo̧ro̧ji̧yä̧ wäbodäkuä jo̧mȩbü päi'ünä̧ ȩpi̧nä̧ku̧.

³ Ja̧'wa̧ta̧nü̧ jua̧u̧ru̧mä̧ jä̧ttä̧pä̧ya̧ ji̧na̧'a̧kü̧, epíritu-nä̧tä̧ ji̧na̧'a̧kü̧ jȩru̧pa̧sä̧, Dio-tä ja̧'a̧ wo̧jua̧mä̧.

⁴ Paraíso pättomȩ ttȩpi̧nä̧ku̧, jua'attümä̧ ä̧ju̧kui̧nü̧ pi̧jä̧ ttü̧ja̧sa̧rü̧mä̧, ukuokua pä'ümä̧ ya̧tȩrü̧'i̧nä̧ jiäkuäwokü jäwä.

⁵ Ja̧'wa̧nü̧ wi̧nü̧rü̧tä̧, ukuo te'äu eseusä; ja̧'wa̧nü̧ ja̧'a̧nä̧ ttütä cha̧mü̧nä̧mä̧ ukuo te'äkuäwoküsä ja̧'wa̧nü̧ ja̧jü̧ jueimä̧ chijuiyuwa'atä eseusä.

⁶ Ja̧'wa̧nü̧ ja̧'a̧nä̧ cha̧mü̧nä̧ ukuo tedäkuäwuöttü'i̧nä̧, tä̧'ä̧mü̧ 'kua̧rü̧nä̧mä̧ ukuokuokü pajüsä, isopäi'ünä̧tä̧ chukuokua'attü̧. Ja̧'wa̧nü̧ ja̧'a̧nä̧ jȩpo̧kü̧sä̧, ya̧tȩ'i̧nä̧ ttürü tottä'ijümä̧, ttä̧ju̧kuä̧'i̧jü̧mä̧, u̧wä̧mȩnä̧ tta̧mü̧kuädü juiyäkua'anü̧.

⁷ Ja̧'wa̧ta̧nü̧ Dio ttürü i̧jȩpi̧nü̧nä̧ ukuo tedäu juiya pä'ü, chidepänä̧ i̧sa̧ri̧ kku̧nä̧wi̧'i̧nä̧ku̧sä̧, ya̧tȩ äwettä wȩ'ä̧wa̧ ttürü chi'ebabanä̧ kuäopä̧ra̧ pä'ü, jua̧u̧nä̧ ukuo tedäu juiyäkua'anü̧.

⁸ Ja̧'wa̧nü̧ jä̧ku̧, Chu̧ru̧wa̧rü̧mä̧ wäbodäkuä jo̧mȩnä̧, jua̧u̧ usurä chȩmä̧u̧ jȩpü̧ ikuattü pä'ü jä'epinü̧sä̧.

⁹ Ja̧'wa̧nü̧ jädepomȩnä̧ ädätinä̧ku̧sä̧: «Ppädäda'anä̧tä̧'i̧nä̧, jo̧mȩnü̧ ja̧'a̧, isopäi'ünä̧ ttü chujurumä̧, ttijuiyüwuönä̧ adiu juoächa'a.» Ja̧'wa̧nü̧ ja̧'a̧ttü̧, cha̧mi̧ 'kuädünä̧tä̧ rü̧ȩnä̧ eseusä, jua'amä̧, Crito ujuru ttünä̧ kka̧ pä'ü.

¹⁰ Ja̧'wa̧nü̧ jo̧mȩnä̧, Crito-rü eseu repeda'attü̧, ji̧yȩtä̧ chijuiyuwuönä̧tä̧ eseusä, suronä̧ pättä'chü̧nä̧, rekuä rü̧jü̧nä̧, suronä̧ jȩtta̧ttü̧ pä'ü ttusunä̧, cha̧'kua̧ tta̧dȩku̧nä̧; ja̧'wa̧nü̧ ja̧'a̧ttü̧ chijuiyuwomȩnä̧mä̧, chujuru kku̧nä̧rü̧sä̧.

¹¹ Amükuädokotü 'kua̧rü̧nä̧ jȩpü̧sä̧, jua'amä̧ ukutu ja̧'a̧ ja̧'wa̧nü̧ jȩchü̧nä̧ jȩpi̧nä̧tü̧mä̧. Isopäi'ünä̧ ukutu ja̧'a̧, ji̧nä̧so ttü chütü'kü adiu ukuokuajatümä̧; ja̧'wa̧nü̧ ja̧'a̧ttü̧ ttümä̧, juätü «apótore ukuo isotü» tti̧dȩ'a̧nä̧mä̧ woküsä, jua'akumä̧ mikuäwokü cha'anä̧.

¹² O'kajuiyünä̧tä̧ ja̧'a̧nä̧, cha̧mi̧ 'ki'ächi'ü, jȩtto̧kü̧ juei'i̧nä̧, na̧nȩpä̧tü̧ ttü̧'i̧pȩ'ü̧'i̧nä̧, ttünä̧tä̧ ja̧'a̧ topinä̧tü̧jä̧, isopäi'ünä̧ apóto jü̧nä̧ cha'attü, chaditäwämä̧.

¹³ Suronä̧ jȩchi̧nü̧ttü̧mä̧ eseku ikuätukuittü, kkoro igresia wotü jȩtta̧'a̧nä̧ jȩ'kuä̧tu̧kuo̧kü̧ ji̧nü̧mä̧, ji̧yȩtȩtä̧ ja̧'a̧: ukutu pärätä ppäkuädätukuattü pä'ümä̧ jä'epokü pinü̧sä̧.

Pauru pä'äjita'anü̧ do'ächü i̧'chä̧kua̧'a̧ ji'äwinü̧

¹⁴ Täkü jo̧mȩnü̧ wa̧sä̧, wäbodäkuä päi'ünä̧ ukuturu do'ächü chichäkua'amä̧; jitä'i̧nä̧ ukuturu jä̧'ȩpä̧ro̧kü̧ chä̧kua̧sä̧. Ukutu ku̧ju̧nä̧rä̧tu̧ku̧ jädepa pä'ümä̧ usoküsä, ji̧nä̧somä̧ ukuturu ususä; isopäi'ünä̧ ttä̧'o̧tü̧tä̧ ja̧'a̧ tti̧tti̧mü̧ ttiäre pärätä ka̧ka̧tä̧tü̧mä̧, pärokua'aku tti̧tti̧mü̧mä̧, ttä̧'o̧tü̧ ttiäremä̧ ka̧ka̧to̧ko̧tü̧.

¹⁵ Ja̧'wa̧nü̧ ja̧'a̧ttü̧, eseunü̧tä̧ bedekuä̧kua̧sä̧ ttü chiärettümä̧ ja̧'wa̧ta̧nü̧ ttütä'i̧nä̧ be'ipächüsä ukuturu ppä'ädümä̧. Isopäi'ünä̧ ukuturu rü̧ȩnä̧ eseu repeda'anä̧ ¿tta̧'a̧nü̧ pä'ü a̧'u̧ku̧nä̧tä̧ kuesewätukuäkusättü̧?

¹⁶ Ja̧'wa̧nü̧ ja̧'a̧nä̧, ttürü pärätä kuiyätukuattü pä'ü kua̧'kua̧ rokuekuätukua pä'okü pinü̧sä̧. Ja̧'wa̧nü̧ jȩchina̧'a̧'i̧nä̧, kkorotü pä'ätü a̧mü̧nä̧ yaparetü jȩi̧nä̧u̧, jü̧nä̧.

¹⁷ ¿Ja̧'wa̧nü̧ ji̧nü̧ttü̧mä̧, ukutu ku̧jä̧tu̧kua̧'a̧ kkorotürü wedina̧'a̧'i̧nä̧ yaparetü jȩchi̧nä̧u̧jä̧ tä̧jí̧?

¹⁸ Tito-rü we'inü̧sä̧, kka̧ra̧ ta̧wa̧ru̧wa̧ ti̧jä̧wa̧ku̧ jua'a. Jua̧u̧nu̧mä̧ ¿Tito'i̧nä̧ ukuturumä̧, üyaparewina̧'a̧ tä̧jí̧? ¿Ji̧nä̧ ji̧yȩtȩtä̧ amükuädü, ji̧nä̧ yo̧mȩtȩnä̧ amükuädü taditoka'a ji̧na̧'a̧ tä̧jí̧?

¹⁹ Suronä̧ jȩpi̧nü̧'kotü, ujuturu adiku iku jä'epätü päkuätuku'anü̧, ja̧'a̧nä̧ ja̧'wa̧nü̧mä̧ jo̧ka̧'a̧. Ujutumä̧ Dio ä'ka jo̧mȩttü̧ ukuokuätüjä̧, Crito-nä̧tä̧. Ja̧'wa̧nü̧ ja̧'a̧ttü̧, pi̧yȩ o'kajuiyünä̧, chawaruwä chi̧jä̧wa̧tü̧ juȩnȩ ttü̧ja̧ kuä̧rä̧mä̧tu̧kua̧ pä'ü ja̧'a̧.

²⁰ Ja̧'wa̧nü̧ ja̧'a̧ttü̧ yȩ'ȩkua̧sä̧ chi̧rȩbȩwi̧'o̧mȩnä̧, chüjü'koka'aku jȩpü̧ ku̧jä̧tu̧ku̧ 'kua̧ra̧'a̧ pä'ü ja̧'wa̧ta̧nü̧ ttü'i̧nä̧ ukutu kuju'kätukuokomȩnä̧ jȩchü̧ 'kua̧ra̧'a̧ pä'ü; rowäkuäwänä̧tä̧, ttu̧ju̧nä̧ri̧yä̧u̧ kkü'käwokünä̧tä̧, pä̧i̧nä̧tä̧, i̧mi̧ku̧ juoächäkuäwänä̧tä̧, suronä̧ pä'chäkuäwänä̧tä̧, jarode'äkuäwänä̧tä̧ ja̧'wa̧ta̧nü̧ wȩnȩ jü̧nä̧ kkä̧kuä̧wä̧nä̧tä̧, jü̧nä̧;

²¹ Ja̧'wa̧ta̧nü̧ yȩ'ȩkua̧sä̧ pä'äjita'anü̧ ukuturu do'ächü chichomȩnä̧mä̧, chü̧ä̧nä̧wa̧ Dio-mä̧ ukutu jäwä dä'ä ttudunä̧ jȩü̧'a̧nü̧ wa̧sä̧ pä'ü ja̧'wa̧ta̧nü̧ chajuäu 'kua̧ra̧'a̧ pä'ü, mo̧ suronä̧ jȩ'kui̧nä̧tu̧ku̧mä̧ ji̧nä̧ käkuädi'ätukuoka'a jȩpü̧ ku̧ja̧kuä̧tu̧kua̧'a̧ topü, tti̧rȩkua̧mü̧ pokotüku pä̧wä̧rü̧jo̧mȩnä̧ jȩpä̧'chä̧kuä̧u̧ jȩ'kuä̧tu̧kua̧'a̧ topü.