2 Corintios 11 - Nuevo Testamento Uwotjüja

Pauru yaparewätürü kkü'kokü pinü̧

¹ ¡Ttu̧'ȩpä̧ro̧ko̧tü̧ ttukuokua'a 'kua̧rü̧nä̧ a̧'u̧ku̧nä̧ chukuokua'anä̧'i̧nä̧, kua̧mi̧ 'ki'ächi'ätukui! ¡Ispäi'ünä̧tä̧!

² Isopäi'ünä̧ ukuturu, rü̧ȩnä̧ repedünä̧ jȩi̧nä̧ku̧sä̧ Dio-mä̧. Jua'amä̧ Crito-rü jueünä̧tä̧ kukuotätukua pä'üsä; yajute kkirekuorü kkȩmä̧kua̧'a̧ ä'kanä̧, churutä a̧mü̧kuä̧rü̧ kukuota'a jä̧'i̧nü̧ta̧'a̧nü̧.

³ Ja̧'wa̧nü̧ ja̧'a̧nä̧, yedekunä̧ jä̧ku̧sä̧, Ewa-rü ä̧ka̧ üyaparewinü̧ta̧'a̧nü̧, ukutu'i̧nä̧ Crito-rü eseunu̧ kukuotätukuttü 'kä̧kui̧pä̧chä̧tu̧ku̧'a̧nü̧ ji̧yä̧ku̧.

⁴ Isopäi'ünä̧ ujutu jitäwä'ijäku Jesú-ttü'i̧nä̧, Epíritu Sa̧tu̧ttü̧'i̧nä̧, jareü wȩnȩ jitäwä'ijüttü'i̧nä̧, kkoromȩnä̧ a̧mu̧kuädätü ttichomȩnä̧mä̧ ukutumä̧ 'kuäünä̧ ȩmä̧tü̧jä̧.

⁵ Ja̧'wa̧nü̧ ja̧'a̧nä̧ ttü'i̧nä̧, juätü apótore ukuo te'äkuäwätü, o'ka'anä̧ ichinä̧tü̧ tti̧dȩa̧'a̧nä̧mä̧ woküsä.

⁶ Jua'akumä̧ adiwomȩnä̧mä̧ ukuokuokü cha'anä̧, chukuokumä̧ jerupoküsä; o'kajuiyünä̧tä̧, o'katoi'ünä̧rü̧ ja̧'a̧tȩ'ü̧ ttu̧wo̧jui̧pü̧nä̧ i̧jȩpä̧'i̧jä̧tü̧jä̧.

⁷ ¿Suronä̧dí̧ jȩpi̧nü̧sä̧, jareü wȩnȩ Dio i̧wȩnȩ mippoünä̧tä̧ jidäwina̧'a̧mä̧; pärokuotü ukutu ukuo isotü päkui'ätukua pä'ü jȩchi̧na̧'a̧mä̧?

⁸ Ukuturu ppä'ädümä̧, kkoro igresia wotü pärätä ppättädünä̧tä̧ aditinü̧sä̧.

⁹ Ja̧'wa̧ta̧nü̧ ukutuku chü̧jo̧mȩnä̧ rekuä rü̧ja̧'a̧nä̧, ya̧tȩrü̧'i̧nä̧ jä'epokü pinü̧sä̧; ja̧'wa̧ta̧nü̧ ttürü rekuä rü̧jü̧mä̧ Macedonia-ra̧'a̧ttü̧ ichinä̧tü̧tä̧ ppättädinä̧ku̧sä̧. Ja̧'wa̧ta̧nü̧ o'kajuiyünä̧tä̧ jädepoka'atä kki̧nü̧sä̧, ukutu ttü jäwänä̧ kua̧'kua̧ rokuekuätukua pä'okü pinü̧sä̧, jitä'i̧nä̧ ja̧'wa̧nü̧tä̧ chü̧jä̧kua̧sä̧.

¹⁰ ¡Crito jäwä jueü wȩnȩ ttünä̧ kka̧'a̧ttü̧!, Acaya rȩjȩ pünä̧ ji'äu cheseumä̧ 'chottipokoku chä̧kua̧sä̧.

¹¹ ¿Jua'amä̧, ta̧'a̧nü̧ pä'ü päda'ajä̧ttü̧? ¿ukuturu repe'ü jui'ü? ja̧'wa̧nü̧mä̧kü̧ Dio-mä̧ o'kajuiyütä wo̧jua̧ ukuturu eseu repedümä̧.

¹² Ja̧'wa̧nü̧ ja̧'a̧ttü̧ jȩchä̧'i̧jü̧ta̧'a̧nü̧tä̧, ukutu kuiäretuku pärätämä̧ jädepoka'atä chaditäkua̧sä̧. Ja̧'wa̧nü̧ jȩcho̧mȩnä̧mä̧ jitü profeta-tü̧ yapare isotümä̧ ukuo tettäu juiyä̧kuä̧u̧, ujutu'i̧nä̧ Jesucrito we'äwotü apótore-jä̧ pä'ü, ujutuku yorekuä'chü, yapareu jittäwä'cha'anä̧.

¹³ Isopäi'ünä̧ juätümä̧ yaparewätü, ujutumä̧ apótore-jä̧, Crito we'äwotüjä̧ pätta'anä̧; apótore 'kua̧rü̧nä̧tä̧ 'ka̧tä̧wi̧'ä̧tü̧.

¹⁴ Ja̧'wa̧nü̧ jȩttü̧mä̧ tieruwuö jueümä̧kü̧, chutä äwettä'i̧nä̧ á̧gȩ tȩya̧pa̧ 'kua̧rü̧nä̧ ü̧'ka̧tä̧wi̧'a̧'a̧ttü̧.

¹⁵ Ja̧'wa̧nü̧ ja̧'a̧ttü̧, jeruwoka'a chutä umüwäyotü, adiwomȩnä̧ jȩpä̧tü̧ 'kua̧rü̧nä̧ ttü̧'ka̧tä̧wi̧'o̧mȩnä̧mä̧; ja̧'wa̧nü̧ ja̧'a̧nä̧ jȩttä̧'i̧jü̧'a̧kuä̧tä̧ päjuriyänä̧mä̧ usurä ttȩmä̧wä̧kuo̧tü̧.

Pauru apóto jü̧nä̧ kkä̧nü̧ usurä ȩmä̧wi̧nü̧

¹⁶ Pä'äjita'anü̧ pä'üsä: ya̧tȩ'i̧nä̧, suripächü 'kua̧rü̧nä̧mä̧ to'kuätukuättü; ja̧'wa̧nü̧ kuamükuädätukuttü'i̧nä̧, wä̧i̧nä̧ suripächü 'kua̧rü̧nä̧ chukuoku esetätukui, ttü'i̧nä̧ a̧'u̧ku̧nä̧ cheseu kkä̧kua̧'a̧nü̧.

¹⁷ Ji̧yȩtȩ pädäu̧jä̧, jua'amä̧ Dio päümä̧kü̧. Ttütä wo̧juä̧kuä̧u̧sä̧, cha̧mü̧nä̧ chüadiwä chukuokuomȩnä̧mä̧, suripätü ttukuokutä ukuokusä pä'ümä̧.

¹⁸ Ja̧'wa̧nü̧ tta̧mü̧nä̧ ttüadiwä ukuokuätü rekuätü ttü̧ja̧kua̧'a̧mä̧ ¿tta̧'a̧nü̧ pä'ü, ttü'i̧nä̧ chüadiwämä̧ chukuokuoka'ajä̧ttü̧?

¹⁹ ¡Ukutumä̧ rü̧ȩnä̧ amükuädäkuäwä kku̧nä̧rä̧tü̧ kuätukua'anä̧, ja̧'a̧tä̧ ukuokuätürü ja̧'a̧tä̧ topätüjä̧!,

²⁰ Ukutumä̧ ja̧'a̧tä̧ topätüjä̧ esclavo jü̧nä̧ wetta'anä̧'i̧nä̧, kkoro juei 'chottipa'anä̧'i̧nä̧, ttüyaparewa'anä̧'i̧nä̧, ttüjü'koka'anä̧'i̧nä̧, kui'ätukunä̧ kuättaja pä'ü'i̧nä̧.

²¹ Pi̧yȩ pädümä̧ dä'ä rü̧ja̧'a̧nä̧ pä'üsä, ¡ujutumä̧ ja̧'wa̧nü̧mä̧ jȩto̧ko̧u̧ pinä̧tü̧jä̧! Ja̧'wa̧nü̧ ja̧'a̧nä̧, kkorotü'i̧nä̧ ja̧'wa̧nü̧ jȩtta̧'a̧ttü̧, ttü'i̧nä̧ ja̧'wa̧nü̧tä̧ jȩpü̧sä̧, tä̧'ä̧mä̧tü̧ ttukuoku 'kua̧ra̧'a̧nä̧.

²² Juätü'i̧nä̧, hebreos ttü̧ja̧ ja̧'a̧mä̧; ttü'i̧nä̧, hebreos ttü̧ja̧sa̧sä̧. Juätü'i̧nä̧ irae ttü̧ja̧ ja̧'a̧mä̧; ttü'i̧nä̧, irae ttü̧ja̧sa̧sä̧. Juätü'i̧nä̧, Abraha̧ i̧tti̧mü̧ isotü ja̧'a̧mä̧; ttü'i̧nä̧, Abraha̧ i̧tti̧mü̧ i̧sa̧sä̧.

²³ Juätü'i̧nä̧, Crito aditäwä aditätü jü̧ttü̧mä̧; (ttu̧'ȩpä̧ro̧kü̧ 'kua̧rü̧nä̧ pä'üsä) ttümä̧, abonä̧nü̧ wa̧sä̧; adikuättümä̧, juätüttü'i̧nä̧ abonä̧nü̧ aditä'ijüsä; juätüttü'i̧nä̧ abonä̧nü̧ kuäkuättinä̧ku̧sä̧; kärenä'i̧nä̧ rü̧ȩnä̧ pinü̧sä̧; tode'ächü'anü̧ jü̧'i̧nä̧ rü̧ȩnä̧ 'kuä'opinü̧sä̧.

²⁴ Judío tturuwotü ji̧mü̧tȩ jäwä jo̧mȩnä̧ ttürü 'chuttädinü̧mä̧, treinta y nueve-nü̧ jo̧mȩnä̧ kuäkuättinä̧ku̧sä̧.

²⁵ Wäbodäkuä jo̧mȩnä̧ i̧so̧'kȩnä̧ kuäkuättinä̧ku̧sä̧; ya'utenä̧mä̧ inä̧dunä̧ ikuäu ttikuinä̧ku̧sä̧; wäbodäkuä jo̧mȩnä̧ ajettümä̧ ma̧'ä̧chi̧nü̧sä̧; ya'ute yodoku, ya'ute mo̧ro̧ku̧ jo̧mȩnä̧ cha̧'a̧wa̧'a̧nä̧ kki̧'i̧nü̧sä̧ rü̧ä̧ duborattümä̧;

²⁶ rü̧ȩnä̧ kue'ächä'ijüsä; ajewiyättü ra̧wä̧pi̧ja̧'a̧'i̧nä̧, nä̧u̧kuä̧rä̧tü̧ttü̧ ra̧wä̧pi̧ja̧'a̧'i̧nä̧, ttütä chi̧rȩjä̧ isotüttü ra̧wä̧pi̧ja̧'a̧'i̧nä̧, judío pokotüttü ra̧wä̧pi̧ja̧'a̧'i̧nä̧, ütäwiyättü ra̧wä̧pi̧ja̧'a̧'i̧nä̧, rȩba̧ dȩ'a̧ra̧'a̧ttü̧ ra̧wä̧pi̧ja̧'a̧'i̧nä̧, rü̧ä̧ ajera̧'a̧ttü̧ ra̧wä̧pi̧ja̧'a̧'i̧nä̧, chawaruwä chi̧jä̧wa̧tü̧ yapareäkuäwä isotüttü ra̧wä̧pi̧ja̧'a̧'i̧nä̧;

²⁷ Aditü usurä ȩmä̧u̧'i̧nä̧, chä'oka'a'i̧nä̧, ppäi ttu'u'i̧nä̧, a̧di̧ ttu'u'i̧nä̧; diyo ttu'u'i̧nä̧, chü̧'ka̧tä̧wä̧ti̧yu̧ jui'ü'i̧nä̧ usurä ȩmä̧wä̧'i̧jü̧sä̧.

²⁸ Ja̧'wa̧ta̧nü̧ kkoro'i̧nä̧ 'kuä'opü kkä̧nü̧, yabokunü̧tä̧ mo̧ro̧ji̧nü̧ a̧'u̧kuä̧ amükuädüsä igresia wotü o'katoi'ünä̧rü̧.

²⁹ Ya̧tȩ na̧wä̧cha̧'a̧ tochomȩnä̧mä̧, ttü'i̧nä̧ na̧dä̧chü̧nä̧ jä̧ku̧sä̧; ya̧tȩrü̧ ma̧ä̧chü̧nä̧ jȩtto̧mȩnä̧mä̧, chüjü'kü juiyünä̧ jä̧ku̧sä̧.

³⁰ Ji̧yȩtȩ ukuo tedäwa pädüttümä̧, chijuiyuwuötä ukuo te'äusä.

³¹ Tu̧ru̧wa̧ Jesucrito jä'o Dio-mä̧, mo̧ro̧ 'kuäopünä̧ eseäkuäwa̧mä̧, wo̧jua̧ ttü chuyaparewoka'amä̧.

³² Damasco ütawiyättü, ru̧wa̧ gobernador-mä̧, ru̧wa̧ rey Areta ütinä̧ku̧ ja̧'a̧, su̧ro̧do̧u̧ru̧ kku̧ni̧nü̧, ttürü 'chuttäda pä'ü.

³³ Ja̧'wa̧nü̧ ja̧'a̧nä̧ yotüte, püttäwäkänä̧ ȩnü̧ tti̧mȩyȩdi̧nä̧ku̧sä̧, ütawiyä ttoekuäbä ventana isatenä̧. Ja̧'wa̧nü̧tä̧ kki̧'i̧nü̧sä̧ jua̧u̧ ru̧wa̧ u̧mü̧ttü̧mä̧.