2 Corintios 10 - Nuevo Testamento Uwotjüja

Dio Pauru ukuo iyinü̧ wȩnȩ

¹ Ttü Pauru-mä̧, Crito ukuturu eseu re ü̧ji̧nü̧nä̧ jä'epüsä, ukutuku chü̧jo̧mȩnä̧mä̧ adiwä i̧sa̧ pättä'ijäku cha'anä̧, kkara'a chü̧jo̧mȩnä̧mä̧ ujuruku pä'ü pättä'ijäku cha'attü. Jua'a ukuturu topü chichomȩnä̧, ujuturu suronä̧ pä'ä'ijätürü pä̧i̧ku̧nä̧ pädü juiyäkua'anü̧;

² ja̧'wa̧nü̧ ja̧'a̧ttü̧ jädepä̧u̧jä̧, topü chichomȩnä̧ yeäwä juiyünä̧ jȩcha̧mä̧ pä'oküsä juätürümä̧, ttidepä weünä̧ kkä̧tü̧rü̧ pättü'anü̧ ujuturu pä'ätürümä̧.

³ Isopäi'ünä̧ ujutumä̧ pi̧jä̧ ttü̧ja̧ ta'anä̧, pi̧jä̧ ttü̧ja̧ jü̧'a̧nü̧mä̧ tidepä weünä̧ kko̧ko̧tü̧jä̧.

⁴ Isopäi'ünä̧ ujutu türowäu ujurumä̧ tidepä jäwämä̧kü̧; ji̧nä̧somä̧ Dio ujurunä̧tä̧ rowäwätüjä̧ surojü ujuru si'epü ikua pä'ümä̧,

⁵ ttü̧ja̧ ttu̧wo̧juö̧'i̧nä̧, Dio-rü wo̧jui̧'ü̧ jui'ü rowäwäkuäwä'i̧nä̧ o'kajuiyütä si'epü iku, 'chu'ädü rütü yaboku 'chä̧tü̧jä̧ Crito-rü ukuotümä̧,

⁶ ukuotäkuäwokümä̧ o'kajuiyünä̧tä̧ ro̧tȩpa̧ pä'ätüjä̧, ukutu kukuotätuku jo̧mȩnü̧ päkui'ätukuomȩnä̧.

⁷ Ukutumä̧, ttü̧ja̧rü̧mä̧ wä̧mȩnä̧ jȩttü̧tä̧ topätüjä̧. Ya̧tȩ, a̧mü̧nä̧ pa̧ja̧tü̧ toäkuäwomȩnä̧ Crito u̧mü̧wä̧ya̧sä̧ päüttümä̧, jua̧u̧ jü̧ta̧'a̧nü̧ ujutu'i̧nä̧ Crito umüwäyotü wotüjä̧.

⁸ Jua'akumä̧ chukuo jäwänä̧ yabonä̧nü̧ pädäwa'anä̧, dä'ämä̧ ttu'oküsä. Ukutunä̧ chukuo chu̧ju̧nä̧ra̧ pä'ümä̧, Chu̧ru̧wa̧ Jesucrito-tä iyina̧'a̧ttü̧, yabonü̧ kua̧'kua̧ ku̧wȩnä̧rä̧chä̧tu̧ku̧nä̧ ppädädätukuaku pä'ü, surojuodepätukuakumä̧ pä'oküsä.

⁹ Chi̧wȩnȩ chi̧wȩyu̧tu̧nä̧ yekuekue'ätukuamä̧ pä'oküsä.

¹⁰ Isopäi'ünä̧ yotukunä̧mä̧ pä'ätü: «ttü chi̧wȩyu̧tu̧mä̧, juiyo pä̧i̧ku̧nä̧ baraunä̧ rȩmi̧pa̧'a̧; ja̧'wa̧nü̧ ja̧'a̧nä̧ cha̧mü̧nä̧ pa̧ja̧tü̧ chukuokuomȩnä̧mä̧» pä̧i̧ku̧nä̧mä̧ ukuokuokü pä'ijü pä'ätü ja̧'wa̧ta̧nü̧ ukuokuäkuäwä'i̧nä̧ jȩru̧pa̧, pättäkusä.

¹¹ Ja̧'wa̧nü̧ ja̧'a̧nä̧, pi̧yȩ amükuädätürümä̧ pä'üsä, ja̧'wa̧nü̧ wȩyu̧kuä̧nä̧ pädüta'anü̧; ttütä chichomȩnä̧'i̧nä̧ pä̧i̧ku̧nä̧ pä'üsä.

Ukuo teäkuäwä tü'kü ädätinü̧ wȩnȩ

¹² Ttümä̧, tta̧mü̧nä̧ pa̧ja̧tü̧ ttüadiwä ukuokuätuku chüyorekua pä'ümä̧ yorisotä jui̧'a̧sä̧; ja̧'wa̧nü̧ jȩchü̧ttü̧mä̧, yapare mikuäwokü wȩnȩtä̧ ja̧'a̧,

¹³ Ja̧'wa̧ta̧nü̧ jȩcho̧kü̧ jä̧'i̧jü̧, jȩtta̧'a̧ 'kua̧rü̧nä̧mä̧ amükuädoküsä. Ja̧'wa̧nü̧ ja̧'a̧nä̧, ji̧yȩtȩ ukuo tedäu kkü̧ttü̧mä̧, Dio ttürü chadita pä'ü weinü̧tä̧ ja̧'a̧. ¡Jua̧u̧ chaditäwä ju'tomä̧, ukutu ja̧'a̧!

¹⁴ Jȩcho̧kü̧ jä̧'i̧jü̧, abo 'kuäo'ünä̧mä̧ pä'oküsä ja̧'wa̧nü̧ ja̧'a̧nä̧ ujututä ji̧na̧'a̧ ä̧kuo̧mȩnä̧ Corinto ütawiyänä̧ jareü wȩnȩ, Crito i̧wȩnȩ ji'äu rȩbȩwi̧nä̧tü̧mä̧.

¹⁵ Ja̧'wa̧nü̧ ja̧'a̧ttü̧, kkorotü ttaditinü̧nä̧mä̧ esewokotüjä̧, ujutu taditüttü rä'opächümä̧. Ja̧'wa̧nü̧ ja̧jü̧ jueimä̧, ukutuku tadita pä'ätüjä̧ kua̧'kua̧ ku̧wȩnä̧rä̧tu̧ku̧ rü̧ä̧chü̧ta'anü̧, ujutu rü̧tä̧chü̧nä̧ tu̧wo̧juȩti̧nü̧nä̧;

¹⁶ ja̧'wa̧ta̧nü̧ jareü wȩnȩmä̧ ukutu ku̧ja̧kuä̧tu̧kuo̧mȩttü̧mä̧ yabo'i̧nä̧ jitäwäkuotüjä̧ ja̧'wa̧nü̧ ja̧'a̧nä̧ kkorotü ttaditäwomemä̧ dotächoka'atä, juätü ttaditäwänä̧ teseäkuäu juiyäkua'anü̧.

¹⁷ Ja̧'wa̧nü̧ ja̧'a̧ttü̧, ya̧tȩ ukuo te'äu esewa päüttümä̧, Tu̧ru̧wa̧nä̧tä̧ ukuo te'äu esewi;

¹⁸ Isopäi'ünä̧, ya̧tȩ a̧mü̧nä̧ pa̧ja̧tü̧ eseäkuäu ukuo te'äurumä̧ eseäkuäwoka'a ja̧'wa̧nü̧ ja̧'a̧nä̧ chu Tu̧ru̧wa̧ esewäkurumä̧, eseäkuäwä kka̧'a̧.