1 Timoteo 6 - Nuevo Testamento Uwotjüja

¹ Ttu̧wo̧juȩtä̧u̧ ji̧nä̧ esclavo pä̧ttä̧u̧ jü̧nä̧ wotümä̧, ttu̧ru̧wa̧rü̧mä̧ o'kajuiyünä̧tä̧ ttukuota pä'ü ja̧'a̧, Dio i̧mi̧'i̧nä̧ ttu̧wo̧juȩtü̧'i̧nä̧, suronä̧ ttukuoku juiyäkua'anü̧.

² Ja̧'wa̧ta̧nü̧ yotüte Dio-rü esetätürü tturuwotü päi'ünä̧ kku̧nä̧rä̧tü̧mä̧ ttukuotoka'amä̧ jȩttä̧'chü̧ juiyü'anü̧ ja̧'a̧, tta̧'kua̧ wȩnä̧rä̧kuä̧wä̧nä̧ ttawaruwä ttü̧jä̧wa̧tü̧ jo̧mȩttü̧. Ja̧'wa̧nü̧ jȩtta̧jueimä̧ yabonä̧nü̧ adiunä̧nü̧tä̧ ppättädä̧rü̧'a̧nü̧ ja̧'a̧, jua'amä̧ Crito-rü esetätütä ja̧'wa̧ta̧nü̧ ttawaruwä ttü̧jä̧wa̧tu̧ku̧ eseu repe'ätütä ja̧'a̧ttü̧ adiwäjuei adikuä ȩmä̧tü̧mä̧. Pi̧yȩmä̧ ji'äu wo̧juȩti̧:

Isopäi'ünä̧ rü̧ä̧nä̧ mikuäu wȩnȩ

³ Tu̧ru̧wa̧ Jesucrito u̧wo̧juȩti̧nü̧'a̧kuä̧ ja̧'wa̧ta̧nü̧ isopäi'ünä̧ tesetü ttu̧wo̧juȩti̧nü̧'a̧kuä̧ ya̧tȩ kkoromȩnä̧ u̧wo̧juȩtu̧ttü̧mä̧,

⁴ Jua̧u̧mä̧ wo̧jua̧sä̧ pä'ü ukuo teäwa'anä̧ yoriso jȩru̧pa̧. Jua̧u̧ru̧ pä'chäkuäwämä̧ mä̧richei jä̧'i̧nü̧'a̧nü̧ wa̧ttü̧mä̧; kkü'käwokü, ra̧wä̧rä̧kuä̧wä̧tä̧, tta̧'kua̧ wȩnä̧rä̧kuä̧wo̧kü̧tä̧ icha'a,

⁵ ja̧'wa̧ta̧nü̧ tta̧mü̧kuädü jui'ätuku, isopäi'ünä̧ wȩnȩ'i̧nä̧ jerupätuku, ja̧'wa̧ta̧nü̧ Dio-rü esetäkuäwämä̧ pärätä rü̧ȩnä̧ ȩmä̧wä̧ pä'ü amükuädü 'kuäopünä̧ rowäwätü, juätüttümä̧ 'kȩ'i̧pä̧chi̧.

⁶ Ja̧'wa̧ta̧nü̧ jueünä̧tä̧ ja̧'a̧ Dio-rü esetäkuäwämä̧ rü̧ä̧nä̧ ruwotü juoäwä, ja̧'wa̧nü̧ ja̧'a̧nä̧ ji̧'ki̧cha̧nü̧tä̧ u̧ju̧nära̧'a̧nä̧'i̧nä̧ eseurütä.

⁷ Ja̧'wa̧ta̧nü̧ pi̧jä̧ra̧'a̧mä̧ kkorojuei i'chächümä̧ ichokotü pinä̧tü̧jä̧, ja̧'wa̧ta̧nü̧ kkorojueimä̧ ȩpü̧mä̧ i̧wo̧ko̧tü̧jä̧.

⁸ Ja̧'wa̧nü̧ ja̧'a̧ttü̧ kuäkuäwä tu̧ju̧nä̧ro̧mȩnä̧mä̧ ja̧'wa̧ta̧nü̧ tü̧'ka̧tä̧wä̧kuȩ'i̧nä̧ tu̧ju̧nä̧ro̧mȩnä̧mä̧ täkü ja̧u̧nä̧tä̧'i̧nä̧ teseu'anü̧ ja̧'a̧.

⁹ Ja̧'wa̧nü̧ ja̧'a̧nä̧ ruwotü juotta pä'ätümä̧ äwettä ma̧ttä̧cha̧ pä'ü jȩpü̧ u̧ju̧no̧mȩ ma̧'ä̧chä̧tü̧, ja̧'wa̧ta̧nü̧ tta̧mü̧kuädoka'a pä̧wä̧rü̧jü̧nä̧ surojuoepä̧u̧mä̧, surojuo'ächü to'epächätü.

¹⁰ Ja̧'wa̧ta̧nü̧ pärätä kkü'kekunä̧ toäkuäwämä̧ surojü kkada'ka ja̧'a̧; kkorotü kka̧kuä̧tü̧ pärätä rü̧ȩnä̧ kku̧nä̧rü̧ Dio-rü unichi'inä̧tü̧, juätümä̧ rü̧ȩnä̧ ubara ttu'u usurä ȩmä̧wä̧tü̧.

Timoteo-rü jiäwi'inü̧ wȩnȩ

¹¹ Ja̧'wa̧nü̧ ja̧'a̧nä̧ uku Dio u̧mü̧wä̧ya̧mä̧, o'kajuiyünä̧ pi̧yȩ surojüttü̧mä̧ 'kȩ'i̧pä̧chi̧, 'kȩ'i̧pä̧chü̧mä̧ adiu jȩä̧kuä̧wä̧tä̧, rȩrü̧jü̧ toäkuäwänä̧tä̧, tta̧'kua̧ wȩnä̧rä̧kuä̧wä̧nä̧tä̧, eseu repeäkuäwänä̧tä̧, usurä ttȩmä̧wo̧mȩnä̧ tta̧mi̧ 'kiächi'äkuä̧wä̧nä̧tä̧ ja̧'wa̧ta̧nü̧ kkorotürü'i̧nä̧ kua̧mi̧so'kittü rȩrü̧jü̧ toäkuäwänä̧tä̧ täi.

¹² Tta̧'kua̧ wȩnä̧rä̧kuä̧wä̧nä̧ surojümä̧ adiwäjuei kuränä̧ rowäwi; kkä̧kuä̧wä̧ i'ko'i̧nä̧ dajawächa'anä̧mä̧ ja̧'a̧tä̧ to'kuä, jua̧u̧tä̧ pätetü Dio-mä̧ woinä̧ku̧jä̧, ja̧'wa̧nü̧ ja̧'a̧ttü̧ ttü̧ja̧ rekuätü ttä'ka jo̧mȩttü̧ kua̧'kua̧ ku̧wȩnä̧rü̧mä̧ ji'äwinü̧jä̧.

¹³ Jitämä̧, ttü̧ja̧ o'katoi'ünä̧ pi̧jä̧nä̧ kka̧kuä̧tü̧ tta̧'kua̧rü̧ iyäwä i̧sa̧ Dio'i̧nä̧ ä'ka jo̧mȩttü̧ ja̧'wa̧ta̧nü̧ Jesucrito Poncio pilato-rü, Jä'o Dio-rü a̧'kua̧ u̧wȩnä̧rü̧ ji'äwinü̧'i̧nä̧ ä'ka jo̧mȩttü̧ wedäkujä̧.

¹⁴ O'kajuiyünä̧ wedümä̧ kukuota pä'ü wedäkujä̧, ya̧tȩ'i̧nä̧ suronä̧ ukuoku yapare ji'äu i̧wȩnȩtü̧ juiyaku pä'ümä̧. Pi̧yȩtä̧ jȩpü̧ kkä̧wi̧ Tu̧ru̧wa̧ Jesucrito pä'äjita'anü̧ ichomȩbü päi'ünä̧.

¹⁵ Icha päü mo̧ro̧ ichomȩnä̧mä̧, eseu kkä̧kuä̧wä̧ Dio-mä̧ i̧jȩpä̧kua̧, jua'amä̧ chu̧'ä̧kua̧ ja̧'a̧ttü̧, kkorotüttü'i̧nä̧ abonä̧nü̧ ju̧ru̧wa̧ ja̧'a̧ttü̧ ja̧'wa̧ta̧nü̧ ruwotü'i̧nä̧ ttu̧ru̧wa̧ jo̧mȩttü̧, jua'atäku pi̧jä̧nä̧ kka̧kuä̧tü̧ o'katoi'ünä̧ ttu̧ru̧wa̧ ja̧'a̧ttü̧.

¹⁶ Jua̧u̧mä̧ chu̧'ä̧kua̧ 'kuäopünä̧tä̧ kkü̧, ttü̧ja̧sa̧mä̧ ya̧tȩ pä'ü'i̧nä̧ ütü'küwächi'ü juiyünä̧ rü̧ȩnä̧ tȩya̧u̧ kkȩdȩpo̧mȩ kkü̧. Ttü̧ja̧sa̧mä̧ tookoku ja̧'wa̧ta̧nü̧ toü juiyünä̧ wa̧. Ja̧u̧nä̧mä̧ ukuo'i̧nä̧, ujuru'i̧nä̧ 'kuäopünä̧tä̧ chutä jäwä kka̧'a̧.

¹⁷ Pi̧jä̧nä̧ttü̧ pärätä ruwotürümä̧, kku̧nä̧rä̧tü̧jä̧ pä'ü ukuo tettäu juiyünä̧ ja̧'wa̧ta̧nü̧ tturuwonä̧ tta̧'kua̧ ttu̧wȩnä̧rü̧ juiyünä̧ we'itü, ja̧'wa̧nü̧ ja̧jü̧ jueimä̧ kkorojuei'i̧nä̧ o'kajuiyünä̧ rü̧ä̧nä̧ iyü Dio 'kuäopü kkü̧rü̧tä̧ tesewäkua'anü̧.

¹⁸ Adiwäjuei jȩtta̧'a̧nä̧'i̧nä̧ adiwäjuei aditäkuäwänä̧ ruwotü juo'ü ja̧'wa̧ta̧nü̧ ttiäre ttu̧ju̧nä̧rü̧'i̧nä̧ iyü ppädäkuäwämä̧ jo̧mȩnü̧ ttü̧ja̧kua̧ we'itü.

¹⁹ Ja̧'wa̧nü̧ ttü̧ja̧ku̧ttü̧tä̧ pärätä ruwotü juottäkuotü yodojimä̧ ja̧'wa̧ta̧nü̧ kkä̧kuä̧wä̧ i'ko'i̧nä̧ ttu̧ju̧nä̧rä̧kuo̧tü̧.

Rüjí te'äwi'ü kkä̧nü̧ weinü̧ wȩnȩ

²⁰ Timoteo, ¡kuaditäwämä̧ adiwomȩnä̧ aditi! Jesucrito-rü esetokotü tu̧wo̧juȩtä̧'i̧jü̧ pä'ä'chätürümä̧ ja̧'wa̧ta̧nü̧ isopäi'ünä̧ wȩnȩ ttu̧ju̧nä̧ra̧ pä'ü yapareu ji'äwätürümä̧ kuä̧ju̧kuä̧;

²¹ Ja̧'wa̧ta̧nü̧ juätü pättü esetü kkorotümä̧ Dio-rü tta̧'kua̧ ttu̧wȩnä̧rä̧'i̧jü̧ttü̧mä̧ 'kȩ'i̧pä̧chi̧nä̧tü̧. Ttümä̧ Dio chutä eseäkuäwä iyätukuaku pä'ütä jä'epüsä.