1 Timoteo 5 - Nuevo Testamento Uwotjüja

Kkorotüku eseku kkä̧kuä̧wä̧ wȩnȩ

¹ Bü̧o̧sa̧rü̧mä̧ ra̧wä̧rü̧nä̧nü̧mä̧ kukuokuä; ja̧'wa̧nü̧ ja̧jü̧jueimä̧ kua̧mü̧nä̧ kuä'o 'kua̧rü̧nä̧ ttu̧ȩkuä̧nä̧ ro̧'ȩpi̧rü̧; ja̧'wa̧ta̧nü̧ u̧mä̧tü̧ müäyotürümä̧ ku̧bü̧o̧tü̧ 'kua̧rü̧nä̧ ukuokuitü.

² Ja̧'wa̧ta̧nü̧ nä̧tü̧ büäkuächätürümä̧, kua̧mü̧nä̧ kua̧ju̧ 'kua̧rü̧nä̧tä̧ ukuokuitü; nä̧tü̧ müäyotürütä kui̧jä̧woju̧tü̧ 'kua̧rü̧nä̧ ttu̧ȩkuä̧nä̧ surojü amükuädäkuäwä juiyünä̧ ukuokuitü.

³ Rȩkua̧mü̧, isopäi'ünä̧ rekuä rü̧jä̧u̧ru̧mä̧ ppä'ädätukui.

⁴ Ja̧'wa̧nü̧ ja̧'a̧nä̧ yajute rekua kki̧tti̧mü̧rü̧'i̧nä̧, ja̧'wa̧nü̧ jo̧ka̧'a̧ttü̧mä̧ kkü̧nä̧mu̧rü̧, kku̧nä̧rä̧ju̧mä̧, juätü jä̧kua̧'a̧, jawäjürü rekuä rü̧jü̧ ppättäda'anü̧ wotümä̧ ä̧kuo̧mȩnä̧ jitürütä tta̧'a̧rü̧, ppäjädinü̧ta̧'a̧nü̧. Pi̧yȩ ja̧'a̧ jȩtti̧ya̧rü̧ pä'ü Dio-rü pä̧wä̧rü̧jü̧mä̧.

⁵ Isopäi'ünä̧ rekua, kkatätä kki̧'ä̧ju̧mä̧, Dio-rü tta̧'a̧rü̧ kkä̧nü̧ mo̧ro̧'i̧nä̧ yodo'i̧nä̧ käjädioka'a jua̧u̧ru̧mä̧ ajuäwinü̧ ukuoku jä'epäju.

⁶ Ja̧'wa̧nü̧ ja̧'a̧nä̧ rekua kkidepä kkü'kekunä̧ kkä̧ju̧mä̧, kka̧'kua̧rü̧mä̧ to'e'ächäju.

⁷ Ja̧'wa̧nü̧ ja̧'a̧ttü̧, ukuru jidäwinü̧mä̧ o'katoi'ünä̧ jȩtta̧ we'itü, juätürü ya̧tȩ'i̧nä̧ ya̧wä̧wä̧'chü̧ juiyäkua'anü̧.

⁸ Ja̧'wa̧ta̧nü̧ chutä a̧mü̧nä̧ jäwä a̧'kua̧ roekuoka'a, yabonä̧ awaruwärü'i̧nä̧ ppä'ädokümä̧ a̧'kua̧ u̧wȩnä̧rü̧ ä̧ppü̧tä̧rü̧, ja̧'wa̧nü̧ wa̧mä̧ esetokotüttü'i̧nä̧ abonä̧nü̧ wa̧.

⁹ Ja̧'wa̧ta̧nü̧ rekua sesenta años yaboku kku̧nä̧rä̧ju̧, kkirekuo ya̧tȩrü̧tä̧ kki̧nä̧ju̧tä̧ ja̧'a̧ rȩkua̧mü̧rü̧ tti̧mi̧pi̧yä̧ wȩyu̧tu̧ rütäwomȩ wȩyu̧tu̧ ttüta'a̧nü̧ wajumä̧.

¹⁰ Kkaditäwä adiwäjuei jȩjü̧ttü̧ ttu̧wo̧juä̧kuo̧ju̧, kki̧tti̧mü̧rü̧ adiu kku'utädinomettü̧; kkojusodenä̧ rȩbȩwä̧tü̧rü̧ adiu dojädino̧mȩttü̧; surojü jui'ätürü ttü̧jä̧pi̧yä̧ kkütükinomȩttü̧ ja̧'wa̧ta̧nü̧ usurä ȩmä̧wä̧tü̧rü̧ ppäjädinomȩttü̧. Rüjinä̧mä̧ kkorottü'i̧nä̧ abonä̧nü̧ kkorojuei o'kajuiyünä̧ adiu jȩji̧nomȩttü̧.

¹¹ Ja̧'wa̧nü̧ ja̧'a̧nä̧ rȩkua̧mü̧ tti̧mi̧pi̧yä̧ wȩyu̧tu̧ rütäwomȩmä̧ ttiäre año pabonä̧tä̧ kku̧nä̧rä̧tü̧rü̧mä̧ wȩyu̧tu̧ kutätukuä, jua'amä̧ ttidepä weü jȩpü̧ pä'äjita'anü̧ tti̧rȩkua̧mü̧rü̧ ttȩma̧ pä'ü Jesucrito-ttü 'kȩ'i̧pä̧chü̧

¹² ä̧kuo̧mȩnä̧ tta̧'kua̧ ttu̧wȩnä̧ri̧nü̧ ji̧nü̧ ttukuotokomȩnä̧ ro̧ȩkuä̧ra̧'a̧ ma̧ttä̧ma̧'a̧ku̧.

¹³ Ja̧'wa̧ta̧nü̧ odewiyä kkorode pünä̧ kue'ächätü, ja̧'wa̧nü̧ kue'ächü ütäwächätü; suro ja̧u̧tä̧mä̧kü̧ suräjuei wȩnȩ'i̧nä̧ ukuokuätü ja̧'wa̧ta̧nü̧ kkorotü jäwänä̧ mȩ'o̧pä̧rü̧ ttukuoku juiyü'anü̧ jü̧ ukuokuätü.

¹⁴ Ja̧'wa̧nü̧ ja̧'a̧ttü̧ mü̧ä̧yotü rȩkua̧mü̧mä̧ ttirekuorü ȩmü̧ i̧tti̧ku̧ ttojusode tta̧'a̧rü̧ ttü̧ja̧kua̧ pä̧wä̧rü̧jä̧ku̧sä̧, ja̧'wa̧nü̧ jü̧ttü̧tä̧ Jesucrito-rü esetokotümä̧ ppättä'choko̧u̧ ttäkuotü.

¹⁵ Ja̧'wa̧ta̧nü̧ yotukunä̧ rȩkua̧mü̧mä̧ täkü 'kȩ'i̧pä̧chi̧nä̧tü̧, ja̧'wa̧nü̧ 'kȩ'i̧pä̧chü̧ Satanás o'ka'anä̧tä̧ 'chi̧nä̧tü̧.

¹⁶ Yajute kkawaruwaju rekua juo'inä̧ju̧ Dio-rü esetäjuru kku̧nä̧rä̧ju̧mä̧, ppäjädü'a̧nü̧ ja̧'a̧; Dio-rü esetätürü a̧mä̧kü̧ juiyäkua'anü̧, isopäi'ünä̧ rȩkua̧mü̧rü̧ ja̧'wa̧nü̧tä̧ ppä'ädätü to'ätürütä ppättädäkua'anü.

¹⁷ Igresia-ttü a̧ci̧a̧nu̧ wotü adiu aditätümä̧, todäre jo̧mȩnä̧ mikuä ttȩma̧ pä'ü ja̧'a̧ ji̧nä̧somä̧ Dio i̧wȩnȩ ji'äu wo̧juȩtä̧tü̧rü̧ ja̧'a̧.

¹⁸ Ja̧'wa̧ta̧nü̧ wȩyu̧kuä̧ wȩnȩmä̧ pä'a: «pä̧kä̧yü̧rü̧mä̧ ji̧nä̧ trigo i̧sa̧ppȩ päi'ünä̧ ijära'anä̧ äbanä̧ isobümä̧ ku̧'ka̧tä̧dä̧tu̧kuä̧». Ja̧'wa̧ta̧nü̧ pä'a: «Adikuä i̧sa̧mä̧, aditäwä mikuä ȩma̧ pä'ü wa̧»

¹⁹ Igresia-ttü ukuo i̧sa̧rü̧ to'ija̧'a̧ku̧ ttukuokuomȩnä̧mä̧, ta̧ju̧tä̧ ja̧'wa̧nü̧ jo̧ka̧'a̧ttü̧'i̧nä̧ wä̧mȩtukuä ja̧u̧ jȩä̧ji̧ tü'kü ji'äwätü toüttümä̧ kuesetätukuätü.

²⁰ Yabokutä surojü jȩpä̧tü̧rü̧mä̧ o'katoi'ünä̧ ttä'ka jo̧mȩttü̧ ra̧wä̧ri̧pü̧nü̧ ji'äwätukuitü, kkorotü'i̧nä̧ yettekuächäkua'anü̧.

²¹ Dio'i̧nä̧, Jesucrito'i̧nä̧ á̧gȩrȩ pojopü ȩmä̧wo̧tü̧'i̧nä̧ ttä'ka jo̧mȩttü̧ pi̧yȩ jȩ'kua̧ pä'ü wedinü̧mä̧ o'kajuiyünä̧ ukuoti ja̧'wa̧ta̧nü̧ o'katoi'ünä̧tu̧ku̧tä̧ adiu jȩpü̧ jü̧nä̧tä̧, ya̧tȩrü̧tä̧mä̧ kuesekuoka'a.

²² Ya̧tȩrü̧ Dio i̧wȩnȩ adita pä'ü we'ü ku̧mü̧ mȩ'ü̧ kukuokuäkua'a ä'kanä̧ adiu amükuädü topi. Isopäi'ünä̧ jua̧u̧ suronä̧ jȩo̧mȩnä̧ kui̧wȩnȩkuä̧chü̧ juiyäkua'anü̧, kua̧mü̧nä̧ pa̧ja̧tü̧tä̧ surojüttümä̧ 'kȩ'i̧pä̧chi̧.

²³ Kuakuä 'kuäopünä̧tä̧ nä̧wä̧cha̧'a̧ttü̧ täkü ajiya päkuoyatämä̧ kuawä, vino isoya ji̧'ki̧cha̧nü̧ ppä'ädütä awi.

²⁴ Yotukunä̧ surojü jȩttü̧mä̧ ro̧ttȩpä̧kua̧'a̧ ä'kanä̧ wäjuönä̧ tottünä̧ i̧jȩkua̧'a̧, ja̧'wa̧nü̧ ja̧'a̧nä̧ kkoronü̧mä̧ täkü rekuo mo̧ro̧ o'ka'atä i̧jȩkuä̧cha̧'a̧.

²⁵ Ja̧'wa̧nü̧ jü̧ ta̧'a̧nü̧ adiwä jueimä̧ jü̧ttü̧'i̧nä̧ i̧jȩkua̧'a̧; ja̧'wa̧ta̧nü̧ adiwäjuei jo̧kü̧mä̧ 'kuäopünä̧tä̧mä̧ dajawä̧ru̧mä̧ kko̧kü̧ jä̧kuȩ.